2020 December 29 Archive - People's Balita

July 3, 2024
Search in People's Balita
Ang Diyaryong Pinagkakatiwalaan

Archive for December 29th, 2020

Morale ng PNP, mataas pa rin kahit may isyu kay Nuezca

Posted on: December 29th, 2020 by @peoplesbalita No Comments

PLANO ng Philippine National Police (PNP) na palagiang magsagawa ng neuro examination sa kanilang hanay.

Sa Laging Handa public press briefing ay sinabi ni PNP Spox PGen Ildebrandi Usana na posible na nila itong isagawa ngayon kada anim na buwan o kada isang taon.

Aniya, layon nito na masuring mabuti ang behaviour ng isang pulis.

Ani Usana, sadyang napaka stressful kasi ng trabaho ng isang pulis na kung minsan ay napapabayaan na nito ang sarili nyang pamilya kung kaya’t mahalagang masuri ang kanilang mentalidad upang matukoy kung sila ay nasa katinuan pa.

Reaksyon ito ng kalihim matapos ang nangyaring karumal dumal na pagpatay ni Police Sr Master Sgt Jonel Nuezca sa mag inang Gregorio sa Tarlac noong Linggo kung saan ginamit ng suspek ang kanyang service fire arm sa pagpatay sa mga biktima.

Sa kasalukuyan, isinasagawa ang neuro exam sa hanay ng Pambansang Pulisya sa recruitment, schooling at kanilang promotion lamang.

Samantala, hindi naman bumaba ang morale ng Pambansang Pulisya sa kabuuan.

Sinabi ni Usana na mandato pa rin ng Pambansang Pulisya na protektahan ang estado.

Kasunod nito, marami din aniyang accomplishments ang PNP tulad ng pagkakakumpiska kamakailan ng higit P200M halaga ng shabu na dapat din namang tignan o kilalanin ng publiko.

Nauna nang kinondena ng pamunuan ng PNP ang pamamaril ni Nuezca sa mag inang Gregorio kung saan tiniyak nilang maigagawad ang hustisya sa mga biktima. (Daris Jose)

PDu30, inaprubahan ang pagpapalawig ng 2 pang linggo ng travel ban laban sa UK

Posted on: December 29th, 2020 by @peoplesbalita No Comments

INAPRUBAHAN noong Disyembre 26 ni Pangulong Rodrigo Roa Duterte ang rekumendasyon ni Presidential Spokesperson Harry Roque, Jr. na palawigin ng dalawa pang linggo ang travel ban laban sa United Kingdom (UK) pagkatapos ng Disyembre 31, 2020.

Inaprubahan din ng Pangulo ang rekumendasyon ng Department of Health (DOH) para sa “strict mandatory 14-day quarantine” para sa mga byahero na manggagaling mula sa mga bansa o lugar na napaulat na may COVID-19 new variant, kabilang na ang Hong Kong, Singapore, at Australia.

“regardless of RT-PCR test results; travel restrictions in countries that have recorded cases of the COVID-19 new variant when transmission of the new variant in these countries have been confirmed at the community level; and all positive RT-PCR specimens of UK travellers must be forwarded to the Philippine Genome Center, Research Institute for Tropical Medicine, and the University of the Philippines National Institutes of Health, for genome sequencing,” ayon kay Sec. Roque.

Bukod dito, inaprubahan din ng Chief Executive ang rekumendasyon ni Dr. Jaime C. Montoya, Executive Director ng Department of Science and Technology-Philippine Council for Health Research and Development, na palakasin ang genomics surveillance, bilang bahagi ng biosurveillance, isama na rin ang target sequencing sa tinatawag na high-risk groups, gaya ng clusters na may mataas na kaso at clusters na may mataas na “severity at deaths”.

Samantala, inaprubahan din ng Punong Ehekutibo ang rekumendasyon ni Justice Secretary Menardo Guevarra na paikliin ang panahon ng pagpapalabas ng Implementing Rules and Regulations ng Executive Order No. 122, na nagpapalakas sa border control sa pamamagitan ng pag-adopt at implementasyon ng Advanced Passenger Information System. (Daris Jose)

2 U-turn slots sa EDSA muling binuksan

Posted on: December 29th, 2020 by @peoplesbalita No Comments

Muling binuksan ng Metropolitan Manila Development Authority (MMDA) ang dalawang (2) U-turn slots sa EDSA sa Quezon City matapos na udyokan ng mga lawmakers at ng pamahalaang lungsod ng Quezon City.

Ang nasabing U-turn slots ay ang nasa tapat ng Quezon City Academy at ang malapit sa Darrio Bridge sa Balintawak upang magamit ng mga motorista at dahil sa sunod-sunod na complaints na tinalakay sa nakaraang congressional inquiry ng House committee sa Metro Manila development.

“We opened this up since its holiday season so the volume is really high. But we assure everyone that even if we open this up, we are not giving a favor to the few private vehicles passing through the area,” wika ni MMDA general manager Jojo Garcia.

Ang nasabing U-turn slot sa Quezon Academy ay bukas lamang para sa mga light vehicles samantalang ang nasa Darrio Bridge ay para lamang sa mga emergencies at government vehicles.

Nagalak naman si Mayor Joy Belmonte sa naging desisyon ng MMDA sa muling pagbubukas ng nasabing U-turn slots, na noon pa man ay hiniling na ni Belmonte dahil sa maraming complaints na kanyang natatangap mula sa mga motorista.

Ayon kay Belmonte ang pamahalaang lungsod ng Quezon City sa ilalim ng task force traffic management ay silang mangangasiwa sa stop-and-go scheme sa mga nasabing U-turn slots.

Sila rin ang titingin sa daloy ng traffic sa mga iba pang lugar upang malaman kung maaari pa na humiling sa MMDA na muling buksan ang ibang U-turn slots.

“We made the request in response to the numerous complaints we received from motorists. This is a win-win solution for motorists who have been experiencing heavy traffic along EDSA due to congestion caused by the U-turn closures, and along nearby roads due to the spillover of vehicles. Patients and visitors going to Quezon City General Hospital will benefit the most, and we thank the MMDA for their favorable response,” ayon naman kay Belmonte.

Dagdag pa niya na kahit na binibigyan nila ng suporta ang mga transportation initiatives ng pamahalaan lalo na ang EDSA Bus Carousel project subalit hindi naman nila puwedeng pabayaan ang kapakanan ng mga mamayan na dumadaan sa EDSA.

“The MMDA and the city government will continue to explore short and long-term solutions to the perennial bottlenecks along EDSA. We are willing to help for as long as it will bring comfort to our constituents and ensure that their mobility is not hampered,” saad pa ni Belmonte.

Ayon sa report, ang MMDA ay pumayag na rin dahil sila ay nakatangap ng mga batikos mula sa mga lawmakers dahil sa pagsasara ng U-turn slots sa EDSA sa nakaraang hearing sa Kongreso. (LASACMAR)

Face to face classes sa Enero 2021, kanselado

Posted on: December 29th, 2020 by @peoplesbalita No Comments

IPINAG-UTOS ni Pangulong Rodrigo Roa Duterte ang kanselasyon ng face-to-face classes, na nauna nang inaprubahan ng Department of Education (DepEd) na magdaos ng pilot study sa Enero 2021.

Ang kautusan ng Pangulo ay inihayag nito nang pangunahan ng Chief Executive ang Inter-Agency Task Force (IATF) meeting kasama ang mga infectious diseases experts kagabi, Disyembre 26, 2020, sa Heroes Hall, Malacanan Palace.

Sa panig naman ni DepEd Secretary Leonor Briones ay sinabi nito na ipatutupad niya ang kautusan ng Pangulo na bawiin ang limited face-to-face classes.

Hinggil naman sa usapin ng Pfizer, kinumpirma ni Food and Drug Administration (FDA) Director-General Rolando Domingo na naghain na sila ng Emergency Use Authorization (EUA) noong Disyembre 23, 2020.

“It will take FDA 21 days to evaluate and approve the EUA but vaccination would start as soon as stocks become available,” ayon kay Presidential Spokesperson Harry Roque.

Samantala, kasama ng Pangulo sa nasabing pulong ang mga miyembro ng kanyang gabinete na sina Executive Secretary Salvador Medialdea; Secretary Francisco T. Duque; Secretary Delfin N. Lorenzana; Secretary Carlito G. Galvez; Secretary Eduardo M. Ano; Secretary Menardo I. Guevarra; Secretary Arthur P. Tugade; Secretary Karlo Alexei B. Nograles; at Secretary Herminio Harry L. Roque Jr.

Present din sa miting si Senador Christopher Lawrence T. Go.

Habang ang mga inimbitahan namang medical experts ay kinabibilangan nina Dr. Marissa M. Alejandria, miyembro ngTechnical Advisory for COVID-19 (TAG); Dr. Marc Edsel C. Ayes, Laboratory Manager ng UP-Philippine Genome Center (PGC); Dr. Celia C. Carlos, Director ng Department of Health (DOH)-Research Institute for Tropical Medicine; Dr. Althea de Guzman, Medical Specialist ng DOH Epidemiology Bureau; Dr. Rolando Enrique D. Domingo, Director General ng DOH-Food and Drug Administration; Dr. Nina Gloriani, Pinuno ng Vaccine Development Expert Panel at Professor ng UP College of Public Health; Dr. Teodoro J. Herbosa, Special Adviser ng NTF-COVID-19; Dr. Jodor A. Lim, Lead Expert sa Clinical Trials for Vaccines at miyembro ng UP-Philippine General Hospital Division of Infectious Diseases; Dr. Jaime C. Montoya, Executive Director ng DOST-Philippine Council for Health Research and Development; Dr. Anna Lisa T. Ong-Lim, miyembro ng TAG; Dr. Cynthia Palmes-Saloma, Executive Director ng UP-PGC; Dr. Mario M. Panaligan, Immediate Past President ng PSMID at Vice President ng Philippine College of Physicians; Dr. Katherine Ann V. Reyes, Associate Dean for Research ng UP College of Public Health; Dr. Camilo C. Roa, Jr., Pulmonary Medicine ng Manila Doctors Hospital; Dr. Edsel Maurice T. Salvana, miyembro ng TAG; Dr. Ofelia P. Saniel, Professor Emeritus ng UP College of public Health Department of Epidemiology and Biostatistics; Dr. Rontgene M. Solante, Chairman ng Adult Infectious Disease Tropical Medicine ng San Lazaro Hospital; at Dr. Socorro B. Zarate-Escalante, Coordinator ng World Health Organization.

Nauna rito, muling inulit ni Senador at chairman ng Senate Committee on Health Christopher “Bong” Go ang kanyang “firm reservation” kaugnay sa pagdaraos ng pilot face-to-face classes sa bansa sa Enero 2021 habang wala pang aprubadong ligtas at epektibong bakuna sa gitna ng bagong strain ng COVID-19.

Patuloy naman ang kanyang paghikayat sa mga concerned authorities na irekunsidera ang nasabing plano bunsod na rin ng potensiyal na banta ng COVID-19 at bagong strains sa kalusugan at kaligtasan ng mga estudyante , teaching staff at nakapaligid na komunidad nang walang aprubadong bakuna para protektahan ang mga ito.

“Same stand po ako diyan. Matagal ko nang sinasabi na habang wala pang vaccine ay ‘wag muna natin ipasubo ang mga bata. Dapat balikan at pag-aralan ng gobyerno ang polisiyang ito na bumalik sa face-to-face classes,” ayon kay Go.

“Sa Mayo, matatapos naman na ang klase (school year). Ba’t ‘di na lang natin antayin? Alam naman natin na marami pang nangyayari. Nakakabahala kung bubuksan pa natin ang klase (na face-to-face),” dagdag na pahayag ni Go sabay sabing “Unahin natin ang buhay at kaligtasan ng bawat Pilipino. A life lost is a life lost forever.”

Matatandaang, itinutulak ng Department of Education ang limited physical classes a low-risk areas upang tugunan ang educational challenges na kinahaharap ng mga kabataan mula sa disadvantaged families at sa rural areas.

Tinalakay ni Go ang isyu kay Pangulong Duterte na irekunsidera ang nasabing hakbang at i-delay ang pilot implementation hangga’t walang ligtas at epektibong bakuna na available at ang level of immunity ng bansa ay “high enough to achieve herd immunity.”

“With what is happening right now sa ibang bansa, siguro maaaring pag-usapan at pag-aralan at bisitahing muli ang desisyon ng DepEd. Pwede ko pong kausapin si Pangulo at maaaring pag-aralang muli ang pilot implementation ng face-to-face classes,” ang pahayag ni Go.

“Pag may nag-positive diyan kahit isa, panibagong contact tracing na naman tayo. Back to square one na naman, panibagong trabaho. Ba’t ‘di pa natin hintayin ang next school year? Sakaling ma-attain na natin ang herd immunity baka sakaling makapag pilot test na tayo,” aniya pa rin. (Daris Jose)

RIDER PATAY, ANGKAS SUGATAN

Posted on: December 29th, 2020 by @peoplesbalita No Comments

TODAS ang isang 23-anyos rider habang malubha namang nasugatan ang kanyang angkas matapos bumangga sa isang pampasaherong jeep ang kanilang sinasakyang motorsiklo sa Caloocan city, kahapon ng madaling araw.

Dead-on-arrival sa Tondo General Hospital sanhi ng tinamong pinsala sa ulo at katawan si Arvin Sarmiento, helper ng 35 B Anneth St. Marulas, Valenzuela city.

Inoobserbahan naman sa naturang pagamutan sanhi rin ng mga pinsala sa ulo at katawan ang kanyang back rider na si Dexter De Asis, 29, delivery helper ng Sangandaan, Caloocan city.

Nahaharap naman sa kasong Reckless Imprudence resulting in Homicide at Serious Physical Injury ang driver ng Isuzu Jitney (PUJ) na may plakang (NWJ-921) na si Geniroso Vergara, 29 ng Dizon St., Brgy. 2, Caloocan city.

Sa nakarating na ulat kay Caloocan police chief Col. Samuel Mina Jr., alas-12:20 ng madaling araw nang maganap ang insidente sa kahabaan ng A. Mabini St. corner P. Gomez II, Brgy. 5, habang minamaniobra ni Vergara ang naturang jitney nang sumalpok ang sinasakyang motorsiklo ng mga biktima na patungong Sangandaan sa kanang bahagi nito.

Sa lakas ng pagkakasalpok, tumilapon ang mga biktima at bumagsak sa simentadong kalsada na naging dahilan upang mabilis silang isinugod sa naturang pagamutan habang kusang loob naman na sumuko sa pulisya si Vergara. (Richard Mesa)