HINDI maganda yung pag-aaway sa social media ng mga Kapamilya at Kapuso.

Hindi nagustuhan ni Suzette Doctolero ang comment ni Direk Andoy Ranay na basura ang shows ng Kapuso network kahit pa may franchise ito.

Siyempre rumesbak si Suzette ng comment at sinabi naman na dapat magbayad ng tamang tax ang Kapamilya network.

Isa raw ito sa dahilan kung bakit hindi nabigyan ng prangkisa ang Channel 2 although we recall na sa hearing last year ay sinabi ng iba’t-ibang ahensiya ng gobyerno na walang problema ang ABS-CBN.

Kahit na walang prangkisa ay ipinagpatuloy pa rin ng ABS-CBN ang pagsisilbi sa publiko via the various platforms available tulad ng streaming.

Ang GMA naman ay sinasabi na number one network na sila at nakagawa ng isang hit series via The First Yaya na nagbabu sa ere recently.

Pwede naman ipagmalaki ng ABS-CBN at ng GMA 7 ang kanilang respective achievements without having to disparage each other.

Mag-focus na lang at ipahayag ang achievements ng bawat isa. Huwag na lang magsiraan.

Ang public naman ang nasusunod kung ano ang gusto nilang panoorin.

In the same manner, sana respetuhin din ng ABS-CBN kung mag-decide man ang iba nilang artista na lumipat sa GMA. Huwag na sana nilang siraan or i-condemn ang desisyon na tanggapin ang alok na lumipat ng network.

For sure, ‘yung mga lumipat na artista from ABS-CBN to GMA Network ay hindi nalilimutan ang kanilang utang na loob sa Kapamilya Network.

Hindi naman masama kung tanggapin nila ang offer to work with GMA. Work is work. It puts money on the table, na nagagamit pangtustos sa pangangailangan.

We are in a pandemic and every opportunity to earn money is welcome, sa Kapamilya Channel man yan or sa Kapuso Network.

***

ANG Full Circle Lab Philippines na binuo ng  Film Development Council of the Philippines (FDCP) kasama ang Tatino Films ay magkakaroon ng isa pang virtual edition mula Setyembre 20 hanggang Oktubre 1 bilang capacity-building program na pinangungunahan ng international industry experts na patuloy na sinusuportahan ang Filipino at Southeast Asian filmmakers na mapahusay ang kanilang mga proyekto nang maging globally competitive ang mga ito.

Sa ikatlong edisyon nito, gaganapin ang online Full Circle Lab Philippines sa pagdiriwang ng Philippine Film Industry Month na idineklara sa Presidential Proclamation No. 1085.

Binubuo ang lab ng Fiction lab, Series Lab, First Cut Lab, at ang pinakabagong Creative Producers Lab upang matulungan ang producers sa project development, legal at financing issues, at company development para madagdagan ang production value ng kanilang pelikula.

Eligible at hinihikayat ang filmmakers mula sa Pilipinas at mga bansa sa Southeast Asia na Brunei, Cambodia, Timor-Leste, Indonesia, Laos, Malaysia, Myanmar, Singapore, Thailand, at Vietnam na magsumite ng kanilang mga proyekto nang masali ito sa konsiderasyon para sa apat na labs ng programa.

Hanggang Hulyo 30, 2021 ang pagsusumite ng mga aplikasyon at iaanunsyo ng FDCP ang mga napiling proyekto sa unang linggo ng Setyembre.

Ang FDCP, sa pamumuno ni Chairperson at CEO Liza Diño, ay naglalayong gawing creative hub ang Pilipinas sa Southeast Asian region sa pakikipagtulungan kasama si Full Circle Lab director Matthieu Darras, dating Artistic Director ng internationally renowned na Torino Film Lab.

(RICKY CALDERON)