Nasa 53 lugar sa bansa ang nasa ilalim ng COVID-19 Alert Le­vel 4 ng Department of Health (DOH) dahil sa patuloy na pagtaas ng mga bagong kaso na nahahawa ng virus at pagtaas din ng healthcare utilization rate.

Ayon sa DOH, ang Alert Level 4 ay nanga­ngahulugan na ang isang lugar ay klasipikado sa moderate-to-critical-risk at ang healthcare utilization rate nito ay mas mataas sa 70%.

Ito’y makaraang ma­kapagtala ang Pilipinas ng daily average na 10,459 kaso mula Agosto 6 hanggang 12 na higit na mas mataas sa 7,987 daily average ng sinundang linggo.

Sa Metro Manila, nasa Alert Level 4 ang Las Piñas, Malabon, Makati, Marikina, Muntinlupa, Navotas, San Juan, Pateros, Quezon City, Taguig, at Valenzuela.

“The National Capital Region maintains positive two-week growth rate and a high-risk average daily attack rate (ADAR) and is currently at high-risk case classification,” ayon kay Health Undersecretary Maria Rosario Vergeire.

Nasa Alert Level 4 din ang Apayao, Baguio City, Benguet, Dagupan City, Ilocos Norte, Cagayan, Quirino, Angeles City, Nueva Ecija, Pampanga, Tarlac, Olongapo City, Zambales, Batangas, Cavite, Laguna, Quezon, Lucena City, Rizal, Naga City at Masbate.

Kasama rin ang Aklan, Antique, Guimaras, Iloilo, Iloilo City, Bohol, Cebu, Cebu City, Lapu-Lapu City, Siquijor, Ormoc City, Tacloban City, Bukidnon, Cagayan De Oro City, Camiguin, Lanao Del Norte, Misamis Oriental, Cotabato (North Cotabato), General Santos City, South Cotabato at Agusan del Sur.

LUNGSOD NG MALOLOS– Bukod sa COVID-19 at Dengue, mariing ipinaalala ni Gob. Daniel R. Fernando sa publiko na iwasan ang paglangoy, paliligo at paglusong sa baha o gumamit ng proteksyon kung hindi maiiwasang ma-expose sa tubig na posibleng kontaminado ng Leptospirosis.

“Lahat ng sakit na meron tayong magagawa talaga para maiwasan, iwasan na po natin, kagaya ng Leptospirosis. Kasi dito may laban tayo, alam natin ang gagawin, alam natin ang source.  ‘Yun pong sa umpisa simpleng pag-iwas, gamutan kapag hindi natin sinunod, minsan buhay ang kabayaran. Mahal po itong singil, ayaw po nating makitang nasasayang ang buhay ng mga Bulakenyo,” ani Fernando.

Ayon sa Epidemiology and Disease Surveillance Unit ng Provincial Health Office-Public Heath, may  kabuuang 11 na pinaghihinalaang kaso ng Leptospirosis sa lalawigan ngunit walang naitalang namatay mula Enero hanggang Hulyo 2021.

Anila, patuloy silang nagsasagawa ng pinaigting na health education at nagkakaloob ng prophylactic treatment (Doxycycline) sa mga maaaring kapitan ng sakit na ito tulad ng mga nakatira sa binabahang mga lugar, rumeresponde sa emergency at mga pulis.

“Currently, we have distributed 59,400 capsules of Doxycycline in 13 LGUs. Though mababa ang kaso, hindi tayo nagpapabaya para hindi na dumagdag pa sa problemang pangkalusugan ng mga Bulakenyo, at para maiwasan na rin ‘yung pangangailangan na magpunta pa sa mga ospital,” pahayag ni Dr. Jocelyn Gomez, provincial health officer.

Bukod dito, pinapayuhan din ng Kagawaran ng Kalusugan ang publiko na limasin ang mga tubig na posibleng nakontamina at alisin ang mga daga sa pamamagitan ng paglason sa mga ito o paglalagay ng trap at pagpapanatili ng kalinisan sa bahay.

Ang Leptospirosis ay isang sakit na nakakaapekto sa mga tao at hayop sanhi ng Leptospira. Sa tao, maaari itong magpakita ng sintomas gaya ng lagnat, pananakit ng kalamnan, pananakit ng ulo, pamumula ng mata at kung hindi magamot ay maaring magdulot ng sakit sa bato, meningitis, sakit sa atay at kamatayan. (Bishop Jesus “Jemba” M. Basco)