NASAWI ang isang rider matapos dumulas at sumemplang ang minamanehong motorsiklo saka sumalpok sa isang papalikong kotse sa Caloocan City, kamakalawa ng gabi.

Dead on arrival sa Caloocan City Medical Center sanhi ng tinamong pinsala sa ulo at katawan ang biktima na kinilalang si Juanito Angala, 44-anyos, may-asawa at residente ng Blumentrit Extension, Sampaloc Manila.

Nahaharap naman sa kasong Reckless Imprudence Resulting in Homicide with Damage to Property ang driver ng Toyota Vios na kinilalang si Francisco Manuel, 53, taxi driver at residente ng San Basilio Santa Rita Pampanga.

Sa imbestigasyon ng pulisya, ang insidente ay naganap dakong alas-8:40 ng Linggo ng gabi sa kahabaan ng Rizal Avenue Extention corner 3^rd Avenue, Brgy. 45 ng nasabing lungsod.

Binabagtas ng biktima ang naturang lugar patungong Manila lulan ng kanyang minamanehong motorsiklo at pagsapit sa kanto ng 3^rd Avenue ay aksidente siyang dumulas dahil sa madulas na kalsada.

Sumemplang umano ang biktima bago sumalpok sa kanang bahagi ng papalikong kotse na naging dahilan upang magtamo ito ng matinding pinsala sa iba’t-ibang bahagi ng katawan kaya’t agad siyang isinugod sa naturang pagamutan subalit, hindi na rin umabot ng buhay. (Richard Mesa)

NATANGGAP na sa wakas nang nasa 668 Navoteño families ang kanilang second tranche ng Social Amelioration Program.

Ang Department of Social Welfare and Development (DSWD)–National Capital Region, sa koordinasyon sa Pamahalaang Lungsod ng Navotas ay ipinamahagi na ang P8,000 emergency cash assistance.

“The wait is over. After more than a year, 668 families have now claimed their Bayanihan 1 second tranche. This is just the beginning though. We will continue to work with the DSWD until all qualified Navoteño beneficiaries have received their cash aid,” ani Mayor Toby Tiangco.

Noong nakaraang December, sumulat si Tiangco kay DSWD-NCR Director Vicente Gregorio Tomas at tinanong kung bakit ang ilang beneficiaries ay hindi naibukod sa payroll ng pangalawang tranche ng SAP.

Nagpadala ang alkalde ng kabuuang 51 sulat na naglalaman ng 4,382 mga pangalan ng mga beneficiary na nagsabing hindi nila natanggap ang kanilang emergency cash subsidy.

Si Tiangco, kasama ang ilang depertment heads ng lungsod ay nakipag-diyalogo sa mga opisyal ng DSWD upang maayos ang usapin.

Sa isang pagpupulong kay DSWD Sec. Rolando Joselito Bautista at iba pang pangunahing personalidad ng DSWD noong Agosto 9, nalaman ng lungsod na 668 sa mga benepisyaryo ay walang kumpletong datos ngunit karapat-dapat na makatanggap ng cash aid. (Richard Mesa)