IPAGBABAWAL muna ang pagbebenta at pag-inom ng alak sa Kapistahan ng Quiapo , ayon kay Manila Mayor Isko Moreno Domagoso

Ito ay matapos lagdaan ng alkalde ang City Ordinance 5555 na nagbabawal sa pagbebenta ng alak sa panahon ng Kapistahan ng Itim na Nazareno o nasasakop ng Kapistahan.

Magsisimula ang liquor ban sa Enero 8 ng alas-sais ng umaga hanggang Enero 10 ng alas-sais din ng umaga.

Apela ng alkalde sa publiko sa nasabing Kapistahan na wala munang inuman hanggat maari at makiisa sa gobyerno  upang maiwasan ang  pagkalat ng COVID-19 lalo na ngayong tumataas ang mga kaso dahil sa Omicron variant.

Nanawagan din ang alkalde sa mga deboto na maaring sa bahay na lamang magdasal at huwag nang magtungo pa sa Simbahan dahil  aniya para rin  sa kanilang kapakanan at kalusugan.

Inaasahan aniyang dadagsa ang mga deboto kaya naman nakikiusap ito na makiisa ang bawat isa dahil  may mga itatalaga rin aniyang mga kapulisan sa paligid ng Quiapo upang magbantay at mapanatiling nasusunod ang health protocol .

Napagkasunduan na rin ng pamahalaang lungsod at pamunuan ng simbahan na walang physical mass ngunit mayroon namang online mass.

Sa pangalawang pagkakataon, suspendido pa rin ang Traslacion dahil pa rin sa banta ng COVID-19.  (GENE ADSURA)

PINAALALAHANAN ng Metropolitan Manila Development Authority (MMDA) ang publiko na palaging dalhin ang kanilang ID at vaccination card.

Sa Laging Handa public briefing, sinabi ni MMDA chair Benhur Abalos na magkakaroon kasi ng mga random checking sa lahat ng mga gusali habang nasa ilalim ng alert level 3 ang NCR at ilang lugar sa bansa.

“Titingnan po ito sa lahat ng mga gusali na papasok ‘no, random po ito at of course makikipag-ugnayan tayo sa mga kapulisyahan to make sure that we are really serious on this,” ayon kay Abalos.

Tiniyak ni Abalos na makikipagtulungan ang national government sa pamamagitan ng Philippine National Police (PNP) sa mga kawani ng LGU at kasama na ang mga private sector gaya ng sa mga malls upang masiguro na maipatutupad ito.

Ani Abalos, bahagi ito ng gagawing paghihigpit sa galaw ng mga unvaccinated and partially vaccinated na inaprubahan sa pamamagitan ng resolusyon ng Metro Manila Council.

“Well, let me state this very clearly ‘no. Wala pong lawmaking power ang MMDA o ang Metro Manila Council – this is a resolution ‘no. Ibig sabihin it’s a manifestation na lahat po ng mga alkalde through their local government units and all respective councils ay gagawa ng kaniya-kaniyang ordinance na uniformed ‘no; so ito po ay gagawin ng bawat city o municipal council ng bawat local government units in Metro Manila. Pero mabilis na lang po ito dahil may template na po kami,” aniya pa rin.