BUMABA pa sa 1.2 na lamang ang COVID-19 reproduction number sa Metro Manila hanggang noong Enero 19, mula sa dating 2.95 noong nakalipas na linggo.

Sa kabila nito, nilinaw naman ni OCTA Research fellow Dr. Guido David na nananatili pa rin ang rehiyon sa “very high risk” classification kaya’t pinayuhan ang mga mamamayan na patuloy na maging maingat at obserbahan ang umiiral na health at safety protocols.

Ang reproduction number ay tumutukoy sa bilang ng mga tao na maaaring maihawa ng sakit ng isang pasyente ng COVID-19. Ang reproduction number na mas mababa sa 1 ay indikasyon nang pagbagal ng hawaan ng virus.

Samantala, iniulat din naman ni David na ang one-week growth rate sa rehiyon ay bumaba pa sa -42%, na inilarawan niya bilang “a clear downward trajectory” sa mga bagong COVID-19 cases.

Bumaba rin ang average daily attack rate (ADAR) sa NCR sa 72, ngunit nasa “very high level” ito.

Sa isa pang tweet, sinabi ni David na ang mga lalawigan sa labas ng NCR ay nasa very high risk, dahil sa mataas na ADAR.

Sinabi rin ni David na ang COVID-19 cases sa Cavite at Batangas ay posibleng umaabot na sa peak.

Nakapagtala rin ng negative growth rates ang Rizal at Bulacan ngunit nasa very high risk pa rin.

LUNGSOD NG MALOLOS – Sa pagdiriwang ng isa sa mga pinaka kilalang kaganapan sa Lalawigan ng Bulacan, pinangunahan ni Gob. Daniel R. Fernando ang isang payak na programa sa paggunita ng ika-123 Anibersaryo ng Araw ng Unang Republikang Pilipino na ginanap sa makasaysayang Simbahan ng Barasoain dito kaninang umaga.

May temang “Unang Republikang Pilipino: Sandigan ng Nagbabagong Panahon”, binigyang diin ni Fernando ang diwa ng pagdiriwang ng Araw ng Republika at ang ginampanan ng Lalawigan ng Bulacan sa pagkamit ng pambansang kasarinlan.

“Ang Araw ng Republika ay pagdakila sa lalawigan ng Bulacan at sa kanyang hindi malilimutang gampanin sa kasaysayan ng pambansang katubusan. Ang diwa nito ay maging karapat-dapat sa lahat ng mabubuting bagay na ipinaglaban ng ating mga ninuno—ang kahalagahan ng pagtatanggol sa ating demokrasya, pagdamay at pagmamahal sa kapwa, respeto sa kalikasan, at higit sa lahat, ang pagkakaroon ng banal na takot sa Diyos, sapagkat ito ang siyang bukal ng tunay na karunungan,” anang gobernador.

Dumalo rin sa programa sina Bise Gob. Wilhelmino M. Sy-Alvarado, National Historical Commission of the Philippines Representative Rosario V. Sapitan, Lungsod ng Malolos Mayor Gilbert T. Gatchalian, Vice Mayor Noel G. Pineda, PCol. Rommel J. Ochave of PNP Bulacan at Rev. Fr. Domingo Salonga upang saksihan ang pag-aalay ng bulaklak sa harap ng monumento ni Hen. Emilio Aguinaldo.

Ang Republika ng Pilipinas, na nailalarawan bilang unang wastong republikang konstitusyonal sa Asya, ay itinatag noong Enero 23, 1899 ni dating Pangulong Emilio Aguinaldo sa Bulacan noong Rebolusyong Pilipino at Digmaang Espanyol-Amerikano. (Bishop Jesus “Jemba” M. Basco)