AMINADONG fan ng sikat na social media influencer na si Zeinab Harake ang Kapuso Primetime Queen na si Marian Rivera.

Kinikilig talaga ito kay Marian.

Aniya, “Meron akong crush sa Beautéderm family. Totoo po, kung ano man ang arte ko ngayon, feeling ko, dito ko masasabi, ‘Ate Yan! Si Ate Yan talaga, Marian Rivera po, nine years old pa lang ako, siya na ang pine-peg ko, sa ngiti ko, sa galaw ko.

“And super excited din po akong makasama ang iba kong mga kapatid sa Beautéderm family ko.”

Nang mag-follow raw si Marian sa Instagram account niya, ibinuking ng Beautéderm C.E.O. na si Ms. Rhea Tan si Zeinab sa naging reaksiyon nito na sinabing pwede na raw siyang mamatay.

Kaya sey ni Ms. Rhei, “Patay agad?!”

Sabi naman ni Zeinab, “Kasi ‘yung reaksiyon ko. Kaya sabi ko, binuo ni Ate Yan ang araw ko. Pinasaya ni Ate Yan ang morning ko. Morning kasi ‘yon no’ng nag-follow siya.”

Bukod dito, kahit nga hindi pa makapag-commit ng sagot si Zeinab kung papasukin na rin ba niya ang mundo ng pag-arte, pero nang tanungin ito kung si Marian ang makakasama, mabilis na sumagot ito nang, “Kahit extra lang ako.

“Basta movie po ni Marian, sasama po talaga ‘ko. Kahit taga-punas ni Ate Yan, opo, sasama ko. Pwede! Sobrang dream ‘yon kung mangyayari.”

Hindi pa raw siya nagkakaroon ng chance na makita si Marian sa personal, pero nagkaka-chat na raw sila.

Malaki naman nga ang posibilidad na magkita sila ngayong isa si Zeinab sa mga bagong endorser ng Beautéderm. Siya ang face ng Koreisu toothpaste na mismong si Zeinab ay na-prove na ang effectiveness at gawang Japan din.

***

NAKAAALIW naman ang rebelasyon ng Kapuso Primetime King na si Dingdong Dantes tungkol sa asawa na si Kapuso Primetime Queen Marian Rivera.

Nagkaroon ng pagkakataon na makapag-guest at makapaglaro ang inyong lingkod kasama ang aming entertainment editors na sina Lito Mañago, Anna Pingol at Rohn Romulo sa Family Feud.

Talaga naman na isa yata ito sa mga game show sa telebisyon na napakasaya pero nakaka-tense sa mga contestants. Sinabi namin kay Dingdong na nakakakaba.

At saka niya naikuwento na natatawa, “Pero alam niyo, si Marian, dalawang linggo na after niyang maglaro, iniisip pa rin niya.”

Ang tinutukoy siguro ni Dingdong, two weeks na, tila hindi pa nakaka-move-on si Marian sa maaaring hindi nakasama sa top answer na sagot nito.

Anyway, magtatapos na rin ang second season ng Family Feud na extended na nga, pero ang good news, dahil nga isa ito sa consistent top-rater talaga, another extension for the show. At tuloy-tuloy na raw ito for another season, which is, third season na ng Family Feud kunsaan, mahusay na nagagampanan talaga ni Dingdong bilang host.

***

HALATANG nag-e-enjoy si Barbie Imperial kapag ang content ng Youtube vlog niya ay ang sumagot ng mga controversies sa kanya.

Aminin na rin na si Barbie ang isa sa mga artista ngayon na masarap interbyuhin dahil talagang wala itong inuurungang tanong at isyu.

So, sa vlog nga niya, sinagot niya ang isyu sa kanya na kabit naman siya ng isang pulitiko.

At napa-“my god ito” saka sinabing, “Sana wala akong mga bayarin dito sa bahay. Feeling ko naman, as an artista, hindi mo talaga maiiwasan na masabihan ka na kabit ka nig anito, ganyan… ‘yung mga sugar daddy.

“Actually, noong nag-Tanduay ako, mula nang mag-calendar girl ako, ang dami talagang nagsasabi sa akin na, ‘gusto ka raw maka-date ni ganito-ganyan,’ ‘gusto ka raw ilabas, dalhin sa ibang bansa, shopping.’ Pero for me, no talaga.”

Katwiran ni Barbie, hindi naman daw kasi siya materialistic na babae at magbibili ng kung ano-anong mga branded na gamit.

Sabi pa niya, “Parang mas masarap sa feeling na pinag-iipunan mo kung ano ang meron ka ngayon. Mas masarap na pinaghihirapan mo dahil mas lalo mong gugustuhin. Feeling ko kasi, if madali kong makukuha ang mga bagay, tatamarin na ‘ko sa life, gano’n.”

Malaking factor rin daw na probinsyana ang nanay at pamilya niya, so nakakahiya raw kung gagawin niya.

Sey pa niya, “conservative” raw siyang talaga at kahit nga raw sa mga kissing scenes niya, hindi rin pinapanood ng parents niya.

Itinanggi rin niya ang tungkol kay Sandro Marcos. Nothing romantic daw talaga sa kanilang dalawa, as in, magkaibigan lang daw sila.

(ROSE GARCIA)