NAGLULUKSA ngayon ang OPM industry dahil sa pagpanaw ng isa sa tinaguriang haligi ng OPM music na si Danny Javier ng trio na APO Hiking Society.

Ayon sa anak ni Javier na si Justin Javier Long, pumanaw ang 75-year old veteran musical artist dahil sa “complications due to his prolonged illnesses.”

“In life, as in his death, our Pop never stopped fighting for what he loved, what he believed in and what he was passionate about. He left this world with his passion and strength of will intact and we know he would not have it any other way. Our family would like to thank everyone for the outpouring of love, prayers and condolences at this difficult time,” ayon pa kay Justine.

Sa National Kidney Transplang Insitute na-confine si Javier at sa naturang ospital na raw siya binawian ng buhay, ayon sa kapatid nitong si George Javier.

Si Danny, kasama sina Jim Paredes at Boboy Garrovillo ay tumulong sa pagsikat ng OPM or Original Pilipino Music noong ’70s, ’80s and ’90s. Hanggang ngayon ay pinapatugtog pa ang ilan sa mga original singles nila tulad ng “Batang-Bata Ka Pa”, “Panalangin”, “Awit Ng Barkada”, “Yakap Sa Dilim”, “Ewan”, “Kaibigan”, “Pumapatak Ang Ulan”, “Mahirap Magmahal Ng Syota Ng Iba”, “Nakapagtataka”, “Blue Jeans”, “Anna”, “When I Met You” at ang mga pinasikat nilang Christma songs nila na “Tuluy Na Tuloy Pa Rin Ang Pasko”, “12 Days of Pinoy Krismas”, “Paskong Walang Pera” at APO version ng “Pasko Na Sinta Ko”.

Nagkaroon ang APO ng sarili nilang musical variety show every Sunday sa ABS-CBN 2 noong ’90s na Sa Linggo nAPO Sila na ginawang noontime show na ‘Sang Linggo nAPO Sila. Nagkaroon din sila ng weekly musical show na APO Live.

Sa interview kay Jim, nalungkot ito sa pagmamaalam ni Danny na kelan lang ay nabisita niya sa ICU: “I was able to visit him and we were able to talk for 45 minutes. He was getting better until this happened.”

Gayundin si Boboy na nag-post sa kanyang Facebook na: “Just feeling the loss of an old faithful friend who knew what love is although sometimes it just doesn’t show.”

Kelan lang ay natanong namin si Boboy sa Zoom mediacon ng ‘Unica Hija’ kung may possibility ba na magkaroon ng reunion concert ang APO?

Ang sagot niya ay mukhang hindi na raw posible dahil sa kalagayan ni Javier. Sila na lang ni Paredes ang dumadalo sa mga imbistasyon para sa APO. Si Paredes ay paminsan-minsan nasa Pilipinas dahil naka-base na ito sa Australia.

Taong 2010 nang mag-retire na ang APO bilang trio and six years later ay na-interview ni Jessica Soho si Javier. Kinuwento nito na binigyan lang daw siya ng mga doktor ng 10% chance na mabuhay dahil sa kanyang sakit na congestive heart failure, COPD or Chronic Obstructive Pulmonary Disease, at iba pang sakit.

“I nearly died on June 11, 2011. At that time i preferred to keep it quiet because i’m just another life. One thing led to another. Na-food poisoning ako, akala nila asthma. I was told I had kidney failure. I had liver collapse. I had emphysema. I had pneumonia, hepatitis-A, congestive heart failure, and—i might have skipped something else—sepsis,” pahayag noon ni Javier.

Nagkaroon daw siya ng tinatawag na “white light” experience. Nagkaroon daw siya ng pangitaing nagdala daw sa kanya sa langit, purgatoryo, at impyerno.

“‘Yung sandali lang, hawak-hawak ko yung kamay ng anak ko. Ang feeling ko, kung saan-saan ako nagpupunta. pumunta akong langit, purgatoryo at saka impyerno. Pagdating ko sa impyerno, ang daming tao, nakapila. Lahat, mga kaibigan ko. So at home na at home ako,” biro pa niya.

Dahil sa rami raw ng tao at haba ng pila, napatanong si Danny kung maaring bumalik: “Sabi ko sa bantay, pwede ba kong bumalik? Kasi walang gustong magpasingit e. Nu’ng umalis ako, namulat ako, hawak ko pa rin yung kamay ng anak ko.”

Nabanggit din ni Javier na ‘di raw siya natatakot sa kamatayan.

“This is my time to go, it’s my time to go. I have never been afraid of death. kung hindi ka mamamatay, hindi ka nabuhay. di ba? ‘Yun talaga ang destination mo, e.”

Ang APO Hiking Society ay unang nakilala bilang Apolinario Mabini Hiking Society, ng Ateneo de Manila High School in 1969. 15 ang original members nito (John Paul Micayabas, Lito de Joya, Sonny Santiago, Gus Cosio, Renato Garcia, Chito Kintanar, Kenny Barton, Bruce Brown, Butch Dans, Kinjo Sawada, Ric Segreto Macaraeg, Goff Macaraeg, Doden Besa, Jim Paredes, Boboy Garrovillo) at pang-16th si Danny Javier. Binuo raw nila ang grupo para sumali sa isang singing competition.

Mula sa dose, naging apat hanggan sa naiwan na lang sina Danny, Jim at Boboy. In 1978, nanalo ang APO bilang 2nd Place winner in the Metro Manila Popular Song Festival para sa song na Ewan ni Louie Ocampo.

Naging regular guest performers ang APO sa mga ’70s shows na Noontime Matinee, Ariel Con Tina, Okay Lang, Seeing Stars With Joe Quirino, Pemthouse 7, Germside hanggang sa maging host sila ng sarili nilang musical show na Discorama noong 1980.

Sa apat na dekada na naging aktibo sila, nakagawa sila ng 27 albums at nagkaroon pa ng isang musical film based on their songs na ‘I Doo Bidoo-Bidoo’ noong 2012.

(RUEL J. MENDOZA)

LAST Sunday, October 30, nangyari na ang sinasabing imposibleng ‘one-on-one’ interview na nangyari na sa ‘Korina Interviews’ na pinalabas sa NET25 at sa kanilang YouTube channel last Sunday, na kung saan harap-harapang tinanong ni Korina Sanchez-Roxas si Karen Davila kung bakit nga ba sila pinag-aaway.

Sa bandang huli nga ng exclusive interview ni Korina, sinagot ito ni Karen ng, “eh kasi naman, ikaw yun reyna”.

Say naman ni Ate Koring, “Teka muna, wag mo munang sagutin, sandali lang, kakain pa tayo ng salad…” at saka sila nag-high five at nagtawanan.

Bago umere ang show, pinakikita na nagpi-prepare si Karen ng pomelo salad with cashew nuts and carrots, kahit hindi pinakikita ang mukha. May binake din siyang flourless chocolate cake.

At sa pagbalik ng ‘Korina Interviews’, ay sinumulan na nilang kainin ang healthy salad na inaming favorite din ni Ate Koring at may pang-aasar pa ito kay Karen ng, ‘so, kakain na tayo, kung makakain ka?”

Para sa maraming taga-industriya, ang one-on-one sa pagitan nina Korina at Karen ay imposible at ‘di nga makapaniwala, na sinagot naman ni Korina, “bakit, ano ba problema n’yo? Saan n’yo ba nakukuha yan at bakit ba ang tingin nyo magkagalit kami ni Karen Davila?”

Sagot naman ni Karen, “ang feeling ko, siguro nga, workwise, parang it’s a competitive environment where we used to work. So, parang they always pit people against each other.

“Let’s say, after Korina, nandyan si Karen, at napakahirap nu’n for any woman, kasi nga, you feel minsan, either may hinahabol ka or hinahabol ka. You understand.’

Napag-usapan na ang dalawa bilang “magkalaban” sa kanilang dating network na ABS-CBN mula noong 90’s. Kaya never pa silang nagkatrabaho sa isang proyekto.

Inamin ni Karen na nakaramdam siya ng panghihinayang, “I would have to say this, from the bottom of my heart, ako sa pananaw ko, isa sa mga nasayang na panahon ko sa ABS-CBN is ‘yung hindi kita nakilala noon. I’ll be honest, dahil siguro pareho talagang busy.

“But I feel, it was lost oppurtunity, for me, for both of us. I wish, I have gotton to know then. Even as a mentor ha, and the whole experience of getting to know you. We never got to do that.”

Nag-agree naman si Korina, dahil sobrang busy nga nila sa work, iba-iba ang schedules nila. Kahit si Bernadette Sembrano at Loren Legarda, ay hindi rin niya maysadong nakakatsikahan, dahil ang palagi niyang nakakasama ay si Ted Failon, dahil sila ang magka-partner.

Naloka nga si Korina nang humirit ng tanong si Karen, kung niligawan pa siya ni Ted, na that time daw ay may asawa na, kaya parang wala namang ligawang nangyari.

Paglilinaw pa ni Korina, naunahan pa raw ng intriga na since pinalitan siya ni Karen sa ‘TV Patrol’ ay baka nagalit siya, dahil desisyon daw yun management. In-invite pa raw niya si Karen nang tumakbo ang asawa na si Mar Roxas.
Sa middle part ng interview, hindi nga napigilang maluha ni Karen sa pagkukuwento sa kanilang pinagdaanan na mag-asawa pagkakaroon ng ‘special child’ na muntik na palang mamatay sa kanilang harapan noong 2019.

At hindi na-experience ni Karen na tawagin ‘mommy’ ni David noong bata pa ito, hanggang sa dumating ang second boy nila na si Lucas, na labis niyang ikinatakot, dahil baka may autism din ay maulit ang pinagdaanan nila kay David.
Buti na lang at normal ito ng pinanganak, dahil meron silang mapag-iiwanan nila ni DJ kay David at magmamahal hanggang dulo.

Marami pang rebelasyon si Karen sa buhay niya, kagulat-gulat lalo na yun pinagdaanan niyang depresyon at inaming natakot siya noon kay Korina.

Napapanood tuwing Linggo, ika-5 ng hapon ang Korina Interviews sa napapanood sa NET25, at puwedeng balik-balik ang mga episodes sa kanilang YouTube.

Dagdag rebelasyon pa ni Ate Koring, “I didn’t know that Karen and I have so many things in our lives in-common. And it really surprised me.”

Say pa ng batikang brodkaster, “And if you watch it on my YouTube Channel “Rated Korina”, don’t skip the ads ha!”
Puring-puri naman ng netizens sina Korina at Karen, sa kanilang masaya at mapusong kuwentuhan, sa tanging sa NET25 lang naganap.

Wish tuloy ng mga netizens, na magkaroon ng part two, dahil sobrang bitin talaga ang episode na ito.
At dahil na naging matagumpay ang pagtatagpong ito, aabangan naman ang paggi-guest ni Korina sa YT vlog ni Korina.

May nagwi-wish din na sana raw sa mga future episodes ay isa si Jessica Soho ang mai-feature ni Ate Koring, na for sure, pag-uusapan din nang husto ang kanilang pagtatapat.

Mapapanood nga ang mga nakaraang episode ng Korina Interviews sa kanyang YouTube Channel na “Rated Korina” tuwing Miyerkules, kaya i-a-upload na rin today ang masaya at mapusong interview niya kay Karen Davila.

(ROHN ROMULO)