2022 December 13 Archive - People's Balita

July 3, 2024
Search in People's Balita
Ang Diyaryong Pinagkakatiwalaan

Archive for December 13th, 2022

Mahigit sa 1.4-B DSWD disaster relief funds, naka-standby para kay ‘Rosal’

Posted on: December 13th, 2022 by @peoplesbalita No Comments

TINIYAK ng Department of Social Welfare and Development (DSWD) sa publiko na mayroong P1.4 bilyong halaga ng standby funds ang Central Office, Field Offices, at National Resource Operations Center bukod pa sa stockpiles bilang paghahanda sa pananalasa ni tropical depression Rosal.

Maliban pa dyan, may mahigit na 547,000 family food packs ang nakahanda para ipamahagi sa local government units na mangangailangan.

“Tinitingala tayo ng mga tao and we are expected to do our job. And our job is to respond to every calamity or disaster,” ayon kay DSWD Secretary Erwin Tulfo sa idinaos na coordination meeting kasama ang FOs regional directors.

Sa nasabing miting, sinabi ni Tulfo na nakahanda ang DSWD na magbigay ng technical at resource assistance sa LGUs na maaapektuhan.

Ayon sa 5 p.m. bulletin ng Philippine Atmospheric, Geophysical and Astronomical Services Administration (PAGASA), araw ng Linggo, Disyembre 11, napanatili ni Rosal ang lakas nito habang kumikilos patungong northeastward ng Philippine Sea.

Habang patuloy na kumikilos papalayo si Rosal mula sa Philippine landmass, asahan na ang maulap na kalangitan, kalat-kalat na pag-ulan at kulog sa ilang bahagi ng Luzon partikular na sa Quirino, Aurora, Quezon, Marinduque, Oriental Mindoro, Occidental Mindoro, at Camarines Norte.

“Aside from rain showers caused by the trough of Rosal, the tropical depression is less likely to bring heavy rains in the country throughout the forecast period,” ayon sa PAGASA. (Daris Jose)

Tax-exempt shopping purchase ng returning OFW’s at mga balikbayan, gawing $6,000

Posted on: December 13th, 2022 by @peoplesbalita No Comments

NAIS ng isang mambabatas na maitaas sa $6,000 ang tax exemption ng mga overseas Filipino workers at mga balikbayan kapag mamimili o magsa-shopping sa mga duty free shop na pinapangasiwaan ng Department of Tourism.

Sinabi ni House Minority Leader Marcelino Libanan sa House bill 647 na panahon na para i-upgade ang benepisyo ng mga OFW at mga balikbayan dahil mahigit tatlumpung taon na ang batas sa Balikbayan Program.

Kapag naisabatas, mahihikayat ang maraming OFW’s at balikbayan na sa mga duty-free shops sa Pilipinas mamili ng pasalubong sa halip na sa abroad.

Sinabi ng mambabatas na makatutulong ito para sa dagdag na dolyar sa ating ekonomiya.

Sa kasalukuyan, umaabot lang sa $3,500 ang tax exempt purchases sa mga duty free shop ng DOT.

Paliwanag ni Libanan, sa naturang halaga, $1,500 ang kabuuang tax exemption sa discretionary consumer goods at $2,000 sa livelihood tools gaya ng computers, sewing machines at iba pa.

May tatlong duty free shops ang DOT sa NAIA Terminals 1,2 and 3. (Ara Romero)

Malaking bagay na si Yam ang director ng movie: FRANKI, palaban din sa hubaran at nakipagsabayan kina KIKO at JAY

Posted on: December 13th, 2022 by @peoplesbalita No Comments

MARAMI ang nakapansin sa isa sa mga Instagram post ni Heart Evangelista na tila ang payat na raw talaga nito ngayon.

Although, sa buong showbiz career naman yata ni Heart, never namin siyang nakitang tumaba, huh.

Pero medyo kapansin-pansin nga ang mas malaking ibinawas ng timbang ni Heart. Na even her face, sobrang liit na at ang braso niya.

Pero pwede rin naman na ito ang ina-achieve ni Heart dahil nga sa career niya ngayon sa fashion.

Pero bukod daw sa tila mas pagiging slim ni Heart ngayon, hindi nakalagpas sa paningin ng ilang netizens ang tila lungkot daw sa aura at mga mata ni Heart.

Ilan sa mga comment kay Heart, “Too thin now, Heart. Take care of yourself and have yourself checked-up. I hope you value yourself first.”

“Some sadness in your eyes, Hearty.”

***

PALABAN din pala talaga ang VIVA artist na si Franki Russell.

Palaban din ito sa hubaran at mga bed scene.

Ganito ang mapapanood sa mga eksena niya sa bagong movie, ang “Laruan” kunsaan, she shared intimate and daring moments with Kiko Estrada and Jay Manalo.

Twisted at baliw-baliwan lang ang character na ginagampanan ni Franki. Sa totoo lang, mahirap maitawid ang role niya at hindi lahat ng artistang babae, kakayanin ito.

Kaya isa kami sa nasurpresa kay Franki. Second movie pa lang niya ang “Laruan” sa VIVA max pero ibang-ibang Franki na ang pinakita niya. Ngayon din namin naintindihan kung bakit niya nasabi na how she wished, it’s “Laruan” as her launching movie instead of “Pabuya”.

Malaking bagay si Yam Laranas na siyang director ng movie.

Sabi ni Franki, “I’m a fan of Direk Yam. Napanood ko mga movies niya. Kaya noong malaman ko na siya ang director, yes naman, I feel so honored to be directed by Direk Yam.”

Feeling din ni Franki, nailabas talaga ng movie ang best side raw niya as an actress.

Sabi pa niya about their director, “I asked a lot about his approach when it comes to his directing and everything has exceeded my expectations, and yeah, it was really funworking on set with him and everybody.”

(ROSE GARCIA)

Interes ng Pilipinas, prioridad, kahit kakatawan din si Pangulong Marcos para sa Asya

Posted on: December 13th, 2022 by @peoplesbalita No Comments

TINIYAK ni Pangulong Ferdinand Marcos Jr. na bitbit niya ang interes ng Pilipinas, kahit magsisilbi siyang kinatawan ng Asian countries sa pagdalo sa Brussels, Belgium.

Idaraos kasi doon ang Association of Southeast Asian Nation-European Union (ASEAN-EU) Commemorative Summit mula December 12-14, 2022.

Ganap na alas-8:00 ng gabi nang tumulak ang pangulo, kasama ang deligasyon ng Pilipinas para sa nasabing event.

Sa kanyang pre-departure speech sa Villamor Airbase, sinabi ng pangulo na pagkakataon ito para maisulong ang economic interest ng Pilipinas.

Isusulong din umano niya ang post-pandemic economic recovery, trade, maritime cooperation at climate action.

Si Pangulong Marcos ay inaasahang magbibigay ng closing remarks sa nasabing business summit.

Bukod pa sa pagdalo sa ASEAN-EU business summit, mayroon din siyang courtesy call kay King Philippe ng Belgium.

Magkakaroon naman ng bilateral talks si Pangulong Marcos sa iba pang heads of state kagaya ng Estonia, Czech Republic, Spain, Denmark, Germany, Poland, Finland, the Netherlands at European Union.

Haharap din siya sa Filipino community, kung saan mahigit sa 5,000 Pinoy workers ang nakabase doon. (Daris Jose)

Rondina, Gonzaga kampeon sa World Tour

Posted on: December 13th, 2022 by @peoplesbalita No Comments

NASUNGKIT nina Sisi Rondina at Jovelyn Gonzaga ang gintong medalya sa Volleyball World Beach Pro Tour Futures na ginanap sa Subic Bay Sand Court sa Subic.

Naisakatuparan ito nina Rondina at Gonzaga matapos pataubin sina Gen Eslapor at Dij Rodriguez sa bendisyon ng 22-24, 21-12, 15-12 come-from-behind win sa all-Filipino championship match.

Naiselyo ang all-Filipino finale matapos pataubin ng Pinay spikers ang kani-kanyang karibal sa semis.

Iginupo nina Rondina at Gonzaga sina Yahli Ashush at Anita Dave ng Israel sa pamamagitan ng dikdikang 20-22, 21-8, 17-15 panalo sa unang semifinal match.

“It was worth it!” wika ni Rondina.

Dumaan din sa butas ng karayom sina Eslapor at Rodriguez na kinailangang itakas ang 16-21, 28-26, 15-13 panalo kina Japanese tandem Miyu Sakamoto at Mayu Sawame.

“Three Japanese teams, those are what we beat here. Turned out we’ve become their (Japanese)conquerors,” ani Eslapor.

Pinuri naman ni Philippine National Volleyball Federation (PNVF) president Ramon “Tats” Suzara ang tagumpay ng mga Pinay spikers.

Ito ang pinakamataas na karangalan na nakuha ng Pilipinas sa isang volleyball tournament sa nakalipas na mga taon. (CARD)

Mahigit 78-K wanted individuals, arestado ng Philippine National Police ngayong taong 2022

Posted on: December 13th, 2022 by @peoplesbalita No Comments

IBINIDA ngayon ng Philippine National Police (PNP) ang nasa mahigit 78,000 wanted individuals na kanilang naaresto ngayong taong 2022.

Sa gitna pa rin ito ng patuloy na pagsisikap ng buong hanay ng kapulisan na mapigilan at masugpo ang krimen sa Pilipinas.

Batay sa inilabas na pinakabagong consolidated assessment report ng PNP Directorate for Operations, makikita na umabot na sa 78,293 wanted individuals ang nahuli na ng pulisya mula buwan ng Enero hanggang buwan ng Disyembre ng taong kasalukuyan.

Nakasaad din sa nasabing ulat na nasa 2,940 mga miyembro na rin ng mga organized crime groups ang na-round-up na ng mga otoridad, nasa 381 na ang na-neutralized, habang nasa 162 na ang mga sumukong criminal group members, at nakakumpiska rin ito nasa 369 na mga armas sa loob ng nasabing 12 buwan ng taong 2022.

Samantala, iniulat din ng pambansang pulisya na sa ilalim ng kampanya nito kontra loose firearms ay umabot na sa 32,441 na mga armas ang kanilang nakumpiska, habang nasa 9,724 na mga indibidwal naman ang kanilang naaresto, at aabot naman sa o4,930 ang mga kasong naihain na nito sa korte.

Bukod dito ay ibinida rin nila ang nasa 2,440 na mga miyembro ng mga communist terrorist groups sa bansa, at ang kabuuang 1,133 na mga armas na kanila rin nakumpiska matapos ang mga operasyong ikinasa ng kapulisan ukol dito.

Samantala, kaugnay nito ay nagpaabot naman pagbati si PNP chief PGen. Rodolfo Azurin Jr. sa lahat ng mga tauhan ng Philippine National Police para sa naging matagumpay na operasyon nito bilang bahagi ng pagpapaigting nito sa presensya ng pulisya para mabawasan ang mga krimen, katiwalian, ilegal n droga, insugency, terorismo, at iba pa.

Aniya, nagpapakita lamang ito na mayroong matibay na samahan ang buong hanay ng pambansang pulisya, at ang iba pang sangay ng pamahalaan para sa pagpapatupad ng kapayapaan at kaayusan sa buong Pilipinas.