SA celebrity screening ng pilot episode ng ‘FPJ’s Batang Quiapo’ namin unang narinig ang bagong version ni Gary Valenciano ng ‘Kapalaran’ na pinasikat noong ’70s ni Rico J. Puno, na may kurot sa puso habang pinakikita ang mabigat na eksena ni Miles Ocampo na kung saan nanganganak siya sa loob ng isang palengke.

Kaya naman sa ginanap grand mediacon ng serye ng pinagbibidahan ng Hari ng Primetime na si Coco Martin, ikinuwento niya ang mga detalye kung kung bakit napili niya ang kantang ‘Kapalaran’ bilang isa sa themesong, na talaga namang bagay na bagay at marami talagang makaka-relate.

Ayon kay Coco, “Para siyang milagro para sa akin. Kasi, noong araw na bago kami mag-storycon, iniisip ko kung ano ang magiging disenyo ng stage, kung anong magiging hitsura ng over-all.

“Sabi ko sana kahit storycon pa lang, gusto ko na maramdaman na ng mga actor, ano ‘yung project, ano ‘yung konsepto. Naisip ko, sabi ko, gusto ko, parang pagpunta nila, parang nadoon ka na mismo sa Quiapo. Tapos okey na lahat, nakita ko ‘yung design, in-approve na.”

Dagdag pa Coco,“Sabi ko, gusto ko, habang naglalakad ‘yung mga artista, may tumutugtog na kanta. Na parang themesong na.

“Tapos sabi kong ganoon, ang alam kong themesong ng ‘Batang Quiapo,’ ‘Doon Lang, eh. Tapos noong tiningnan ko, inaral ko, ganoon, ayun bagay.

“Pero noong kakalipat ko ng kakalipat ng pinakikinggan ko, mayroon akong narinig na kanta, na isa sa mga kinanta ni Gary Valenciano, ‘yung ‘Kapalaran.’ Sabi ko parang bagay din siya.

“Kasi parang kuwento siya ng bawat tao. Hindi ‘yung karakter lang ni Tanggol (Coco). Parang lahat nakare-relate. Lalo na pagdating sa Quiapo, ‘di ba, parang nandoon tayo para magdasal, magsimba, para magkaroon tayo ng maayos na buhay di ba?

“Parang inano ko siya, sabi ko, sakto mayroong Gary V.

“Tapos noong umaga, bago ako mag-storycon, nagkita kami ni Sir Gary dahil may taping sila ng ‘ASAP,’ niyakap ko siya, nagpasalamat ako dahil nga sa ‘Ang Probinsyano.’”

“Sabi ko Sir Gary, kinanta mo pala ‘yung ‘Kapalaran?’ Nagamit mo na ba ‘yun sa pelikula o teleserye?

“Sabi niya, ‘hindi pa. Pero matagal ko nang nakanta ‘yan’

“Sabi ko,’Sir Gary pwedeng makiusap? Pwede ko ba siyang magamit mamaya sa storycon namin, doon sa ‘Batang Quiapo’?

“Kasi naiisip ko, parang siya ‘yung bagay doon sa seryeng gagawin namin, ‘yung ‘Batang Quiapo.’

“Sabi niya, ‘Sige! Go! Go!”natatawang kuwento ng matulunging aktor.

“And after that, ang ginawa ko, pinatugtog ko.

“Sabi ko, ‘yan ang patutugin natin, habang naglalakad ‘yung mga tao.

“Nagulat sina Tita Cory (Vidanes), sir Deo (Endrinal).

“Sabi nila, in fairness sa ‘yo, nakapagpa-record ka agad.

“Sabi ko, ‘hindi! Hiniram ko lang ‘yan sa YouTube,” natatawang kuwento pa ni Direk Coco.

“Kaya noong nagkita uli kami, sabi ko Sir Gary, yun na ba ang gagamitin natin o kakantahin niya uli para sa teleserye. Sagot naman niya, ‘hindi, gagawa tayo ng bago.”

Para sa amin, mas nahigitan pa ni Mr. Pure Energy ang version niya, dahil mas lalo itong naging madamdamin na for sure marami na naman ang mai-LSS sa kanta, habang pinapanood ang FPJ’s Batang Quiapo na mapapanood simula ngayong February 13, 8:00 p.m. sa Kapamilya Channel, A2Z,TV5, iWantTFC, and Kapamilya Online Live on ABS-CBN Entertainment’s YouTube channel and Facebook page.

Si Love Poe nga pala ang gaganap na leading lady ni Coco, na sa trailer pa lang ay may chemistry ang kanilang kulitan. Makakasama nila sina Charo Santos, Cherry Pie Picache, John Estrada,Pen Medina, McCoy de Leon, Alan Paule, Lou Veloso, Lito Lapid, Irma Adlawan, Mercedes Cabral at marami pang iba.

Mula ito sa mahusay at maaksyon direksyon nina Malu Sevilla at Coco Martin.

(ROHN ROMULO)

NAGING emosyonal si Jennylyn Mercado habang bini-video ang muling pagkikita ng kanyang mag-amang sina Dennis Trillo at Baby Dylan.

Nauna na kasing pumuntang Las Vegas si Jennylyn at Baby Dylan para magbakasyon. Sumunod naman si Dennis sa Amerika matapos ang taping nito para sa ‘Maria Clara at Ibarra’.

Sa isang Instagram video ay makikita ang bonding moment ng mag-ama na parehong masayang-masaya sa muli nilang pagkikita.

Ngayong tapos na si Dennis sa MCI taping, balitang si Jennylyn naman ang sasabak sa taping ‘Love. Die. Repeat’ na nahinto ang taping last year dahil nabuntis si Jennylyn.

Leading man dito ni Jen si Xian Lim na una munang mapapanood sa ‘Hearts On Ice’ sa GMA.

***

NAKASENTRO ang JanB ENTERTAINMENT, isang hybrid company (into digital, mainstream & on the ground media) sa pagpapalaganap ng halos lahat ng uri o genre ng musika tulad ng Soul, R&B, Pop, Rock, OPM at global music.

Isasakatuparan nila ito sa pamamagitan ng kanilang mahuhusay na artists na tulad ng Pinoy artist based in New York na si Eytch Angeles na kamakailan lang ay kasama ng Filipino alternative rock band na Sponge Cola sa U.S. Jeepney Tour 2023 bilang isa sa mga front acts.

Si Eytch ang umawit at sumulat ng latest single niyang Sa Kalawakan.

Ipinakilala rin ng JanB Entertainment ang mga artists nila na sina Ashley, Tif, Almyn, Boyong at Chelle.

Masuwerte ang mga baguhang artist dahil mabilis na ngayong ipakalat ang anumang nais nilang ibahagi sa publiko, tulad ng kanilang musika, dahil sa napakaraming platforms sa social media ngayon.

***

HINDI totoong tinalikuran na ni Katrina Halili ang showbiz dahil sa Palawan na ito namamalagi.

Tuloy pa rin ang showbiz career niya, sa katunayan ang pagigigng visible niya sa sari-saring proyekto ng GMA

tulad na lamang ng teleserye na ‘Unica Hija’ at ang latest ay ang guesting ni Katrina sa ‘Magpakailanman’ ni Ms. Mel Tiangco.

Kapag walang taping, umuuwi si Katrina sa Palawan dahil narooon ang kanyang anak na si Katie.

“Parang gusto ko munang mag-focus sa anak ko and ibang life din naman kasama yung family ko sa Palawan.

“Alam mo yun, kapag hindi rin naman ako nagsu-shoot,” pahayag ng aktres.

(ROMMEL L. GONZALES)

NAG-TRENDING sa Twitter ang #MCIHulingHalik na eksena sa GMA Network historical fantasy portal na “Maria Clara at Ibarra,” na muling pagkikita nina Maria Clara (Julie Anne San Jose) at Crisostomo Ibarra (Dennis Trillo), na pumasok na ang story sa second book na isinulat ni Jose Rizal, ang “El Filibusterismo.”  

Napigilan ang tangkang pagmolestiya ni Padre Salvi (Juancho Trivino) kay Maria Clara dahil dumating sina Klay (Barbie Forteza) at Fidel (David Licauco), kasama si Ibarra at noon lamang sila muling nagkita after 13 years.  Pero saglit lamang ang pagkikita nila dahil binaril ni Padre Salvi si Ibarra, pero humadlang si Maria Clara kaya siya ang nabaril.  Iyon na ang huling pagkikita ng magkasintahan.

Puring-puri ng mga netizens and viewers ang acting ni Julie Anne kahit ang huling halik niya kay Ibarra na magandang na-execute ni direk Zig Dulay.  Nalalapit na ang pagtatapos ng #MCI at maraming nagtatanong kung happy ending ba ang fantasy series, na napapanood gabi-gabi pagkatapos ng “24 Oras”.

Meanwhile, Valentines’s Day na bukas, February 14, at ang mga JulieVer fans nina Julie Anne at Rayver Cruz ay natuwa nang mabalitang jewelry ang gift nila sa isa’t isa.  Kaya ang akala nila, may magaganap na raw proposal sa mag-sweetheart.

Pero sabi ni Rayver, “no matter what the occasion, giving someone with jewelry as a gift will never go out of style.”

At mali nga ang balitang magpu-propose na si Rayver dahil ring daw ang ibinigay niya kay Julie.  Promotion pala nila iyon ng bagong endorsement mula sa @sepvergara fine jeweler.

***

HINDI pala naging madali para sa mahusay na director na si Darryl Yap, ang paggawa ng official trailer ng “Martyr or Murderer (MOM),” ang pangalawa niyang movie na ginawa kasunod ng “Maid in Malacanang (MIM).

Ipinalabas na ang official trailer at naging kontrobersiyal ito agad.  Napanood namin ito at tiyak na pinag-usapan na ito ng mga naunang nakapanood.

Ayon pa kay direk Darryl, five days nila ginawa ang trailer na tumakbo lamang ng 150 seconds.  Kinailangan nga raw kumonsulta ng producer niya, ang Viva Films, sa lawyer nila para panoorin ang ginawa nila.  First time raw iyon na kinailangan nila ang tulong ng mga lawyers para masigurong tama ang mga ginawa nila.

Hindi pala magkakasabay ang showing ng “MOM”  sa “Ako, Si Ninoy” na produced ang directed naman ni Vince Tanada, na ipalalabas daw sa anniversary ng EDSA Revolution.

Ang MOM naman ay sa March 1 pa ang showing at may mga bagong artistang papasok bukod sa cast noon ng “MIM.”

***

“BE part of our growing family,” ang ipinaabot ng All Access to Artists (AAA) sa mga gustong mag-artista, performers and influencers.

Ang AAA ay isa sa leading talent agencies sa Pilipinas. Kabilang sa kanilang roster of talents ay sina Marian Rivera, Maine Mendoza, Baste, Kitty & Kakai Almeda, Kayla Rivera, Hershey Neri, Nichole Morgan at Ver5us.

Open na ang audition nila para sa 16 to 25 years old, talented, with pleasing personality.  Kaya kung kaya mong ipakita ang talent mo sa dancing, acting, singing or hosting, ngayon na ang perfect timing, dahil open na ang audition ng AAA sa Saturday, February 25, mula 1pm hanggang 4pm, na gaganapin sa APT Studios, 80 Marcos Highway, Brgy. San Isidro, Cainta Riza

Para magkaroon ng audition slot, please contact Mr. Jerick Pangilinan sa 0917-706-7034.

(NORA V. CALDERON)