HINIKAYAT ni House Quad Comm Leader at Surigao del Norte Rep. Robert Ace Barbers ang Department of Justice (DOJ) na mag samoa ng muder charges laban kina retired police Colonels Royina Garma at Edilberto Leonardo kaugnay sa pananambang nuong 2020 laban kay retired police Gen. Wesley Barayuga.

Ayon kay Barbers mayruon silang close coordination sa DOJ at mayruon silang mga representatives na nagmomonitor sa kanilang pagdinig lalo at kanilang ibinubunyag ang isang krimen.

Tinukoy ni Barbers ang naging rebelasyon ni Police Lt. Col. Santie Mendoza ng Philippine National Police Drug Enforcement Group at Nelson Mariano, na isang drug informant ni Mendoza na sina Garma at Leonardo ang nasa likod sa pagpatay sa dating Lotto official.

Giit ni Barbers sa mga nasabing rebelasyon dapat gumalaw na ang DOJ at sampahan na ng kaso sina Garma at Leonardo.

Sa pagdinig ng Quad Comm nuong nakaraang Biyernes iminungkahi ni Surigao del Sur Rep. Johnny Pimentel na isama sa committee report ang rekumendasyon na sampahan ng kaso sina Garma at Leonardo.

Una rito, naglabas ng pahayag ang PMA Matikas Class of 1983 at pinuri ang Quad Comm sa paglabas sa likod ng asasinasyon ni Barayuga.

Si Barayuga ay miyembro ng PMA Class 1983. (Vina de Guzman)

Nanawagan ang House Quad Comm kay dating Presidential Spokesperson Harry Roque na sumuko na lamang matapos pinawalang bisa ng Supreme Court (SC) ang kaniyang apela kaugnay sa inilabas na detention order ng komite.

Ginawa nina Sta Rosa City Rep. Dan Fernandez at Surigao del Norte Rep. Robert Ace Barbers ang panawagan kasunod ng pagtanggi ng SC sa hiling ni Roque.

Si Roque ay nauugnay sa iligal na operasyon ng Philippine offshore gaming operators (POGOs) na itinuring na person of interest.

Naghain siya ng petisyon para sa writ of amparo, isang protective writ na inilapat niya para makatakas sa detention habang iniimbestigahan ng Quad Comm ang kanyang pagkakasangkot sa mga iligal na gawain ng mga POGO.

Ayon kay Fernandez hindi na ito ang panahon para magpalusot, dapat narin niyang harapin at sagutin ang mga alegasyon.

Hinimok ni Barbers si Roque na makinig sa rule of law at makipagtulungan sa patuloy na imbestigasyon, na nagbunyag ng nakababahalang koneksyon ng mga POGO sa iba pang ipinagbabawal na gawain, kabilang ang mga sindikato ng iligal na droga at extrajudicial killings.

Sa desisyon ng SC, na ibinaba noong Oktubre 1, nilinaw na ang writ of amparo ay para sa mga kaso ng extrajudicial killings o enforced disappearances, mga sitwasyong hindi nalalapat sa kaso ni Roque.

Hinikayat ni Barbers si Roque na respetuhin ang ang legal na proseso. (Daris Jose)

“HIGIT na palalakasin ang mga premyadong programa tulad ng social services, health, education at shelter kapag pinalad na maging alkalde muli ng Quezon City sa darating na May 12 election sa susunod na taon.”

Ito ang sinabi ni Mayor Joy Belmonte kasabay ng kanyang paghahain ng certificate of candidacy (COC) pasado ala-1 ng hapon kahapon sa Amoranto Sports Complex, Quezon City para sa muling pagtakbo nito bilang alkalde ng lungsod.

Sa tanong ng media kung anong masasabi nito na “unbeatable” siya at walang lalaban sa kanya, sinabi ni Belmonte na unang araw pa lang naman ng filing at hindi pa alam kung talagang walang makakalaban sa mayoral race.

Si Mayor Joy ay sinamahan ng kanyang ama na si dating Speaker at dating QC Mayor Sonny Belmonte, Kit Belmonte at iba pang kapamilya sa kanyang paghahain ng COC.

Kasabay ni Mayor Belmonte na nag-file ng COC sina QC Vice Mayor Gian Sotto para sa kanyang re-election bid.

Sinabi ni Vice Mayor Sotto, ang mga programang pangpamilya ang prayoridad na ipatutupad kapag nasungkit ulit nito ang puwesto sa halalan.

Kabilang pa sa mga nag-file ng kandidatura sa pagkakonsehal ang mga kaalyado ni Mayor Belmonte na sina City Councilors Charm Ferrer, TJ Calalay, Bernard Herrera, Gabriel Atayde, at Majority floor leader Doray Delarmente mula sa District 1.

Mula sa District 2, sina City Councilor Fernando Michael “Mikey” Belmonte at Candy Medina at sa District 3 ay si City Councilor Gelyn Ge Lumbad, Wency Lagumbay at baguhang nais pumasok sa pagkakonsehal sa District 3 na si Chackie Antonio.

Nagsampa rin bilang re-electionist sa District 4 sina Councilors Nanet Daza, Irene Belmonte at Egay Yap, habang sa District 5 sina Councilors Alfred Vargas at Aiko Melendez, at tatakbo ring konsehal ang artistang si Enzo Pineda. (Vina De Guzman)