NASA Singapore si Mylah Roque, misis ni dating Presidential Spokesperson Harry Roque para magpa-checkup sa karamdaman nito sa nasabing bansa.

Ito ang kinumpirma nitong Miyerkules ni Quad Comm Chairman at Surigao del Sur 2nd District Rep. Robert Ace Barbers base sa report at rekord ng Bureau of Immigration (BI).

“I cannot judge kung bakit siya umalis; meron kasi siyang letter sa amin sinasabi niya na nagpa-checkup yata siya sa Singapore,” ani Barbers kung saan ay hindi na bumalik ang misis ni Roque.

“I hope nothing serious is happening to her kasi sa ganun katagal. We don’t know; we just hope and pray na walang serious medical issue,” giit nito.

Si Mylah ay ipinatatawag ng Quad Comm dahilan ito ang pumirma sa Biancham Trading ng mister nitong si Harry. Ang nasabing kumpanya ay iniuugnay sa ni-raid na Lucky South 99 sa Porac, Pampanga dahil sa isyu ng human trafficking.

Samantala si Harry ay iniuugnay rin sa Lucky South 99 matapos matagpuan ang ilang mga dokumento mula sa bangko at iba pang mga papeles na may lagda nito.

Si Roque rin ang nagsama kay Katherine Cassandra Li Ong, incorporator sa Whirlwind Corp. na nagpaupa ng lupain sa nasabing Pogo sa Porac at tumulong para sa pagsasaayos ng mga bayarin sa Whirlwind sa PAGCOR.

Ang mag-asawang Roque ay kapwa pinatawan ng contempt at ipinaaresto ng Quad Comm. (Daris Jose)

ITO ang paniniwala ni Gabriela Women’s Party Representative Arlene Brosas sa pahayag ni Senador Ronald “Bato” dela Rosa na magsasagawa ng motu proprio investigation sa war on drugs ni dating Pangulong Duterte.

Naniniwala pa ang mambabatas na ang planong imbestigasyon ay upang mailayo ang atensiyon sa pagkuha ng tunay na accountability.

“Sino ang iimbestigahan niya, sarili niya? This planned investigation by Sen. Bato, who himself was accused of playing a central role in Duterte’s war on drugs, is nothing but a biased attempt to sanitize their involvement,” ani Brosas.

Ayon kay Brosas, hindi dapat gamitin ang pondo ng bayan sa imbestigasyon para lamang umano na maka-absuwelto sa halip na lumabas ang katotohanan.

Ang pahayag ay ginawa ng senador matapos magpahayag si Senador Bong Go nang kahandaan na maghain ng resolusyon para sa imbestigasyon, sa kabila na may ginagawa na ang House quad committee ng pagdinig ukol dito.

“The Filipino people deserve accountability and justice for the thousands of lives lost and families shattered by this bloody and anti-poor war on drugs. This Senate probe, spearheaded by those deeply implicated, cannot be expected to deliver that,” Rep. Brosas emphasized.

“Wala na sanang paghuhugas kamay na maganap. Matagal nang nananawagan ng hustisya ang mga pamilya ng mga biktima ng extrajudicial killings kaya panahon na para harapin ito ng mga akusado,” dagdag ni Brosas.

Naniniwala naman si Laguna Rep. Dan Fernandez, co-chairman ng Quad Committee na nagiimbestiga sa extrajudicial killings (EJKs) noong panahon ng dating Duterte administration, na ang planong paglulunsad ng senate inquiry ay isang malinaw na “conflict of interest.”

Tinuligsa rin ni Fernandez, chairman ng House Committee on Public Order and Safety, ang naturang hakbang na ito dala na rin sa naging papel ni dela Rosa bilang dating Philippine National Police (PNP) chief sa kontrobersiyal na anti-drug campaign.

“Delicadeza na lang sana ang pairalin ni Sen. Bato. For me it is highly inappropriate for him, the chief enforcer of the drug war, to lead a probe into the very operations he designed and implemented,” ani Fernandez. (Vina de Guzman)

PINAKAKANSELA ang Certificate of Candidacy (COC) ng nakakulong na si Pastor Apollo Quiboloy dahil sa material misrepresentation.

Sa 7 pahinang petisyon na inihain sa Commission on Elections (Comelec) ni Labor leader Sonny Matula at ng Workers’ and Peasants’ Party (WPP), ang nominasyon ni Quiboloy bilang kandidato ng WPP ay “walang katotohanan at legal na batayan at, ang kanyang CONA, ay ginawa ng mga hindi awtorisadong tao.

Iginiit din ng WPP na ang kontrobersyal na lider ng relihiyon ay hindi miyembro ng partido o guest candidate.

Ang petisyon laban sa kandidatura ni Quiboloy ay matapos na pinirmahan umano ni Matula ang Certificate of Nomination and Acceptance (CONA) nito bagay na itinanggi naman ng Labor leader.

Dagdag pa, sinabi ng WPP na si Quiboloy ay “pinagsasamantalahan lamang ang proseso ng elektoral bilang isang smokescreen para ilihis ang atensyon mula sa mabibigat na kasong kriminal na kanyang kinakaharap.

Samantala, naghain din ng petisyon ang kampo ni Quiboloy na pinadedeklara si Matula bilang nuisance candidate. GENE ADSUARA

TINATAYANG mahigit 1,000 pulis ang ipapakalat ng pamunuan ng Manila Police District (MPD) sa Manila North Cemetery (MNC) at South Cemetry sa Undas 2024.

Ayon kay MPD Director P/Brig.General Arnold Thomas Ibay, ito ay upang masiguro na walang magiging problema sa buong lungsod lalo na ang mga magtutungo sa sementeryo.

Ang mga nasabing pulis ay hindi lamang tututok sa mga pampubliko at pribadong sementeryo kungdi sa mga chekcpoints.

Ipapakalat din sila sa mga istasyon ng pampublikong transportasyon, mga pasyalan, malls at iba pang matataong lugar.

Dagdag pa ni Ibay, nakabantay ang mga pulis mula sa araw ng paglilinis Hanggang sa pagtatapos ng Undas sa nabanggit na mga sementeryo.

Inaasahan kasi ng opisyal na milyun-milyun indibidwal ang magtutungo sa mga sementeryo sa Maynila lalo na sa MNC na ang iba ay mula pa sa kalapit na lungsod at probinsiya. GENE ADSUARA

KULONG ang tatlong hinihinalang tulak ng ilegal na droga matapos makuhanan ng mahigit P160K halaga ng shabu sa isinagawang buy bust operation ng pulisya sa Malabon City, kamakalawa ng gabi.

Kinilala ni Malabon police chief P/Col. Jay Baybayan ang naarestong mga suspek na sina alyas Obet, 45, alyas Bosho, 36, at alyas Bok, 50, pawang residente ng lungsod.

Sa kanyang report kay Northern Police District (NPD) Director P/BGen. Rizalito Gapas, dakong alas-11:00 ng gabi nang maaresto ang mga suspek ng mga operatiba ng Station Drug Enforcement Unit (SDEU) sa Camus Street, Brgy. Ibaba.

Nakumpiska sa mga suspek ang humigi’t kumulang 23.7 grams ng hinihinalang shabu na may standard drug price value na P161, 160.00 at buy bust money.

Ayon kay Co. Baybayan, bago ang pagkakadakip sa mga suspek ay unang nakatanggap ng impormsyon ang SDEU hinggil sa kanila umanong ilegal drug activities kaya isinailalim sila sa validation.

Matapos magpositibo ang report, ikinasa ng SDEU ang buy bust operation na nagresulta sa pagkakaaresto sa mga suspek na pawang mahaharap sa kasong paglabag sa RA 9165 o ang Comprehensive Dangerous Drug Act of 2002.

Pinuri naman ni Gen. Gapas si Col. Baybayan at ang kanyang mga tauhan sa kanilang pagsisikap na tugisin ang mga taong nagpapakalat sa ilegal na droga na nagresulta sa pagkakaaresto sa mga suspek. (Richard Mesa)

ISANG Grade 8 na estudyante ang arestado matapos mabisto ng security guard ang dalang baril sa loob ng kanyang bag habang pumasok sa kanilang paaralan sa Malabon City.

Papasok na sa gate ng kanilang paaralan sa Arellano University Jose Rizal Campus sa may Gov. Pascual St. Brgy. Baritan ang 15-anyos na estudyante alas-11 ng tanghali nang suriin ng security guard na si Alenn Olorosa ang laman ng kanyang dalang bag at nakita sa loob nito ang isang kalibre .38 revolver na may kargang isang bala at isang basyo sa chamber.

Inireport ng security guard sa Malabon Police Sub-Station 7 ang pangyayari, kaya agad silang nagresponde upang kumpiskahin ang baril at isama sa presinto ang estudyante para sa wastong dokumentasyon bago siya ipasa sa pangangalaga ng Bahay Sandigan.

Ayon kay Malabon City Police Chief P/Col. Jay Baybayan, nagsimulang maghigpit ang pamunuan ng bawa’t paaralan sa lungsod matapos mapaulat ang insidente ng umano’y pagpapaputok ng baril ng isang Grade 7 na estudyante sa loob ng kanilang paaralan sa Dumaguete City, Negros Oriental, noong Biyernes na mariin namang itinanggi ng principal ng paaralan sa kabila ng mga nakuhang ebidensiya at testimonya ng pulisya.

Sinabi ni Col. Baybayan na iniutos niya sa kanyang mga tauhan na dalhin ang nakumpiskang baril at bala sa Northern Police District (NPD) Forensic Unit upang isailalim sa ballistic examination. (Richard Mesa)