SINABI ng Bureau of Fisheries and Aquatic Resources (BFAR) na ang pag-angkat ng 30,000 metric tons (MT) ng isda ay makatutulong para mapanatiling matatag ang suplay sa lokal na pamilihan sa panahon ng taunang ‘closed fishing season’ na itinakda tuwing Nov. 1 hanggang Jan. 31.

Sinabi ni BFAR spokesperson Nazario Briguera na ang supplementary importation ay makakapunan sa supply gap at matitiyak na matatag ang presyo sa lokal na pamilihan sa gitna ng inaasahang limitadong huli sa nasabing panahon.

“Para magkaroon ng pagkakataon ang ating mga mamimili na makapamili ng ayon sa kanilang budget, makapamili ng isda na hindi mabigat sa kanilang bulsa, kailangan may sapat na supply. So, may mga alternatibong supply para sa ating mga mamimili,” ang sinabi ni Briguera.

“Ang sinisiguro natin, mapanatili ang affordable na presyo ng ating mga isda sa mga palengke sa panahon ng closed fishing season.”aniya pa rin.

Tinuran nito na ang imported fish mula Vietnam at Tsina ay darating kada batch, simula sa katapusan ng Oktubre o unang linggo ng Nobyembre, tamang tama sa panahon para sa ‘closed fishing season.’

Nakatakda namang ipag-utos ng BFAR ang ‘closed fishing season’ sa North Eastern Palawan, pangunahing pinagkukuhanan ng galunggong o mackerel scad ng Pilipinas mula Nov. 1, 2024 hanggang Jan. 31, 2025.

Susundan naman ito ng ‘closed fishing’ sa Visayan Sea at Zamboanga Peninsula mula Nov. 15, 2024 hanggang Feb. 15, 2025 para sa small pelagic fish gaya ng sardinas.

Pinapayagan sa taunang ‘closed fishing season’ ang punuin ang fish stocks at pabilisin ang pagpaparami at paglago ng marine resources. (Daris Jose)

ISINIWALAT ng Social Weather Stations (SWS), isang non-commissioned survey para sa third quarter ng 2024 ang pagtaas ng involuntary hunger sa hanay ng pamilyang Filipino kumpara sa second quarter.

Base sa resultang ipinalabas ng SWS, araw ng Martes, Oct. 17, may 22.9% ng pamilyang Filipino ang napaulat na nakararanas ng involuntary hunger—tumutukoy bilang ‘pagiging gutom’ o ‘gutumin’ at walang makain kahit na isang beses sa nakalipas na tatlong buwan.

Makikita na 5.3-point ang itinaas mula sa 17.6% na naitalang noong June 2024. Ito rin ang pinakamataas na rate mula ng 30.7% na naiulat sa panahon ng Covid-19 lockdowns noong September 2020.

Nakapagtala naman ang Mindanao ng pinakamataas na hunger rate na may 30.7%, sinundan ng Visayas na may 26%, Metro Manila na may 21.7% at Balance Luzon (Luzon sa labas ng Metro Manila) na may 18.1%.

“This is a notable shift from the second quarter of 2024 when Metro Manila had the highest hunger incidence,” ayon sa ulat.

Sa kabilang dako, iniuugnay naman ng SWS ang kabuuang 5.3-point na pagtaas mula June hanggang September sa mabilis na pagtaas sa Mindanao (mula 15.7% ay naging 30.7%) at Visayas (mula 13.7% na naging 26%), sinamahan ng bahagyang pagtaas sa Metro Manila (mula 20% na naging 21.7%) at bahagyang pagbaba sa Balance Luzon (mula 19.6% ay naging 18.1%).

Tinukoy naman ng SWS na ang 22.9% hunger rate nito lamang September ay kinabibilangan ng 16.8% ng pamilyang nakararanas ng “moderate hunger” at 6.1% ang nahaharap sa “severe hunger.”

Ang Moderate hunger ay tumutukoy sa mga nakararamdam ng pagkagutom “only once or a few times” sa nakalipas na tatlong buwan habang ang severe hunger naman ay tumutukoy sa nakaranas ng pagkagutom na “often or always.”

Mula June hanggang September, tumaas ang moderate hunger ng 16.8% mula sa 12.8% habang ang severe hunger ay tumaas ng 6.1% mula 4.9%.

Sa Metro Manila, nananatili namang steady ang moderate hunger sa 13.3% habang ang severe hunger ay tumaas ng 8.3% mula 6.7%.

Sa Balance Luzon, ang moderate hunger ay bumaba sa 13% mula sa 14.5% habang ang severe hunger ay nanatili naman sa 5.1%.

Sa Visayas, sumirit ang moderate hunger sa 20% mula sa 10.7% habang ang severe hunger ay tumaas sa 6% mula sa 3%.

Sa Mindanao, tumaas ang moderate hunger sa 24% mula sa 10.7 %n habang ang severe hunger ay tumaas sa 6.7% mula sa 5%.

Samantala, ang SWS survey ay isinagawa mula Sept. 14 hanggang 23 sa pamamagitan ng face-to-face interviews sa 1,500 adults na may edad na 18 at pataas sa buong bansa. (Daris Jose)