SINAMPAHAN na ng Commission on Elections (Comelec) ng kasong material misrepresentation sa Regional Trial Court ng Tarlac si dating Bamban Mayor Alice Guo o Hua Ping Lin Guo.

Ayon kay Comelec Chairman George Garcia, nilabag ni Guo ang Section 74 ng Omnibus Election Code na may kauganyan sa Section 262 ng parehong code .

Ito ay ang paghahain nito ng kanyang Certificate of Candidacy (COC) noong Okt.1,2021 kaugnay sa May 9, 2022 National and Local Elections sa munisipalidad ng Bamban,Tarlac.

Ayon sa Comelec, kusa at labag sa batas na gumawa ng material misrepresentation sa paghahain ng kanyang kandidatura sa pagiging Mayor ng Bamban,Tarlac si Guo at ang pagdedeklara na siya ay karapat-dapat para sa posisyon na hinahangad na mahalal sa kabila na siya ay Chinese citizen at residente ng Fujian, China.

Si Guo ay sentro ngayon ng mga pagdinig sa Senado matapos ito maaresto sa Indonesia dahil sa pagkakasangkot sa sinalakay na POGO hub sa Tarlac. GENE ADSUARA

AABOT sa 4.5 milyong mga pasahero ang da­dagsa sa mga bus terminals, airports at seaport ngayong Undas.

Ayon kay Transportation Secretary Jaime Bautista, nasa 3 milyong pasahero ang dadagsa sa airports at seaports habang nasa 1.5 milyon sa mga bus terminals.

Mas mataas ito ng 20 hanggang 30 porsyento sa karaniwang bilang ng mga pasahero kada araw.

Kasabay nito, pinapayuhan ni Bautista ang mga bus operators na iwasan na munang ibiyahe ang mga bus patungo sa Bicol region dahil nasa 30 kilometro na ang haba ng pila ng mga sasakyan sa Matnog, Sorsogon.

“Ang LTO just issued a memorandum, informing mga buses, bus ­operators po sana na huwag munang magbiyahe doon sa Bicol, lalung-lalo na iyong pupunta doon sa Matnog, dahil napakahaba pa nung queue. In fact, kanina, I heard a radio report na almost 30 kilometers daw iyong pila nung mga sasakyan doon.Kaya we are encouraging iyong mga bus operators na siguro i-monitor iyong situation doon before allowing their buses to ply to those destinations,” ani Bautista. ( Daris Jose)

ITO ang dalawang nakikitang batayan ng House Committee on Good Go­vernment and Public Accountability na maaring magamit sa paghahain ng impeachment complaint laban kay Vice President Sara Duterte kaugnay ng hindi nito maipaliwanag na paggastos ng confidential funds sa Office of the Vice President (OVP) at Department of Education (DepEd).

Sinabi ni Manila 3rd District Rep. Joel Chua, Chairman ng Blue Ribbon panel na, ang mga natuklasan gaya ng paggastos ng P125 milyong confidential funds ng OVP na naubos sa loob lamang ng 11 araw noong Disyembre 2022 ay sapat na upang magdulot ng mga pagdududa kung tama ang ginawang paggastos sa pondo ng bayan.

Noong Agosto, naglabas ang COA ng Notice of Disallowance sa kuwestyunableng paggamit ng P73.28 ­milyon na bahagi ng P125 milyong confidential fund ng OVP noong 2022.

Ang tanggapan ni Duterte ay nakatanggap din ng P500 milyon confidential fund noong 2023 at sa halagang ito ay P375 ­milyon ang nagastos. Hindi na ginamit ng OVP ang nalalabing P125 milyon.

Ang P15 milyon sa confidential funds ng DepEd na ginamit umano sa pagbabayad ng reward sa mga impormante at P16 milyon na ginastos ng OVP sa renta ng mga safehouse sa loob ng 11 araw noong 2022.

Gayundin ang paggasta ng P15-M sa Youth Leadership Summit kung saan lumilitaw na sumakay lamang ito sa programa ng Philippine Army at walang inilabas na pondo kahit singko. ( Daris Jose)

PERSONAL na nagtungo sa Talisay, Batangas si dating Pangulong Rody Duterte.

Dito ay nakiramay siya sa mga pamilya ng mga biktima ng bagyong Kristine na namatay mula sa landslide noong Oktubre 24, 2024 sa Barangay Sampaloc, Talisay, Batangas.

Kasama niya ang pangkat mula sa Office of the Vice President’s Special Projects Division at Public Assistance Division para magbigay ng Burial Assistance para sa mga apektadong pamilya.

Sumali rin siya sa Relief Operations ng OVP Disaster Operation Center sa iba’t ibang evacuation centers sa Talisay at Laurel, Batangas.

Si dating Pangulong Duterte kasama ang mga opisyal ng OVP sa pangunguna nina Director for Operations Norman Baloro at G. Eyemard Eje, hepe ng OVP-DOC, ay nag-abot ng burial assistance sa mga pamilya ng mga biktima ng landslide.

Nakiisa rin si FPRRD sa relief operations ng OVP-DOC sa iba’t ibang evacuation centers sa Talisay at Laurel, Batangas.

Mahigit 1,400 pamilya ang nabigyan ng relief bags sa mga nasabing lokalidad sa Batangas. (Daris Jose)

NATANGGAP ng Pamahalaang Lungsod ng Valenzuela ang ika-8th Galing Pook Award para sa programa nitong Safe Spaces and Safeguarding Children: at Strengthening LGU-Led Community-Based Child Protection, sa ginanap na awarding ceremony sa Samsung Hall, Taguig City, noong Oktubre 24.

Isa sa top 10 awardees mula sa pool of 18 finalists, ang Valenzuela City ay kinilala para sa namumukod-tanging local governance program nito, na nagpapakita ng mga positibong resulta, mahusay na paghahatid ng mga programa, innovation, scalability, at aktibong community engagement sa pagprotekta sa mga bata.

Ang Child Protection Center (CPC) na pinumunuan ng Valenzueka ay itinatag noong Hulyo 2017, isang LGU-led, community-based center na isang multidisciplinary team (MDT) na binubuo ng mga doktor, nars, women and child protection specialists, mga social worker, psychometrician, at mga imbestigador ng pulisya na nagbibigay ng suporta sa 6,000 mga bata, kabilang ang mga nasa risk at mga conflict with the law.

Sa pamamagitan ng CPC’s integrated model, kailangan lang ng mga bata na isalaysay ang kanilang mga karanasan para mabawasan ang trauma. Gumagana nang 24/7 sa ilalim ng isang bubong, pinahuhusay ng MDT ang pag-access sa hustisya at pagpapagaling sa mga batang ito na tinitiyak ang kanilang kaligtasan.

Kaugnay nito, pinarangalan ni Mayor WES Gatchalian ang tagumpay ng programa sa matibay na pakikipagtulungan nito sa mga National Government Agencies, Non-Government Organizations, paaralan, at komunidad kung saan binigyang-diin niya na ang pagprotekta sa mga bata ay nakakasiguro ng mas ligtas na kinabukasan para sa Valenzuela City.

Ang nakamit na Galing Pook Award ng Valenzuela ay isang special citation sa Participatory Governance para sa pagpapakita ng malakas na pakikilahok sa komunidad. Ang mga stakeholder ng lungsod ay patuloy na nagtutulungan upang lumikha ng isang ligtas na kanlungan para sa lahat ng mga bata sa Valenzuela. (Richard Mesa)

RAMDAM na ang pagtaas ng presyo ng mga kandila at bulaklak , ilang araw bago ang paggunita ng Undas.

Sa kandila, ang bentahan ngayon ng tatlong piraso ng maliit na kandila sa paligid ng Manila North Cemetery (MNC) ay P40 .

Nasa P50 naman ang medium size kada dalawang piraso habang ang large ay P50 ang kada isang piraso.

Kada dalawang piraso naman ng extra large na kandila ay pumapatak ng P150 kung saan nasa P60 kandila na nasa maliit na baso.

Sa bentahan naman ng bulaklak, ang presyo ng radus ay nasa P250 ang bundle, P200 ang carnation, P150 ang malaysian mums at P180 ang stargazer.

Halagang P800 Hanggang P2,500 mabinili ang bulaklak na may stand depende sa disenyo at sukat .

Inaasahan na tataas pa ang mga presyo ng mga bulaklak habang papalapit ang Undas Hanggang sa mismong araw sa Nob.1 at 2. GENE ADSUARA