SA kulungan ang bagsak ng dalawang drug suspects matapos maaresto sa isinagawang buy bust operation ng pulisya sa Navotas City, kamakalawa ng gabi.

Sa kanyang report kay Northern Police District (NPD) OIC Director P/Col. Josefino Ligan, kinilala ni Navotas police chief P/Col. Mario Cortes ang naarestong mga suspek na sina alyas “Jomboy”, 31, ng Tondo, Manila at alyas “Bibe”, 37, ng lungsod.

Ayon kay Col. Cortes, ikinasa ng mga operatiba ng Station Drug Enforcement Unit (SDEU) sa pangunguna ni P/Capt. Luis Rufo Jr ang buy bust operation kontra sa mga suspek matapos ang natanggap nilang impormaston hinggil sa umano’y ilegal drug activities ng mga ito.

Inaresto ang mga suspek ng mga operatiba ng SDEU matapos umanong bintahan ng shabu ang isang pulis na nagpanggap na buyer dakong alas-11:51 ng gabi sa Tanigue St., Brgy. NBBS Dagatdagatan.

Ani Capt. Rufo, nakumpiska nila sa mga suspek ang humigi’t kumulang 10.42 grams ng hinihinalang shabu na may standard drug price value na P70,856.00 at buy bust money.

Mahaharap ang mga suspek sa kasong paglabag sa RA 9165 o ang Comprehensive Dangerous Drug Act of 2002. (Richard Mesa)

NANAWAGAN si Rep. Jude Acidre ng Tingog Partylist kay dating Presidente Rodrigo Duterte na harapin ang Quad-Committee kasunod na rin sa naging testimonya nito sa senado ukol sa kanyang anti-drug campaign.

“Duterte’s admissions about his ‘death squad’ and his chilling willingness to command extrajudicial killings reveal a leader who has absolutely no regard for human life. It’s appalling that he continues to hide behind the facade of a tough-on-crime persona while leaving a trail of bloodshed in his wake,” ani Acidre.

Sa ginanap na pagdinig kamakailan ng senado, inamin ni Duterte na inatasan niya ang isang grupo ng mga maton para tapusin ang mga pinaghihinalaang panganib. Sinabihan din nito ang mga pulis na udyukan ang mga suspek para magkaroon ng komporntasyon upang mabigyang hustisya ang pagpatay.

Tinataya na mahigit sa 6,252 katao ang nasawi sa ilalim ng drug war, sa kabila na sinasai ng ilang human rights organizations na ang aktuwal na bilang ay mas malaki pa dito.

Iginiit ni Acidre ang pangangailangan ng isang transparent inquiry, kung saan ang pagbibigay hustosya sa mga biktima ang pangunahing prayoridad.

“We must hold Duterte and his enablers accountable for the senseless violence they unleashed on this nation. The Filipino people deserve justice, not hollow excuses and justifications from a leader who has caused nothing but chaos and suffering,” pagtatapos nito. (Vina de Guzman)

PINANGUNAHAN ni National Housing Authority (NHA) General Manager Joeben Tai ang groundbreaking para sa ipapatayong Progreso Village sa Barangay Marulas, Lungsod ng Valenzuela, nitong Oktubre 29, 2024.

Ang bagong proyektong pabahay na ito ay isang medium-rise building na bubuuin ng siyam na gusali na may 11 palapag bawat isa, ito ang magiging bagong komunidad ng 1,530 kwalipikadong benepisyaryo kapag natapos. Magkakaroon din ng commercial space ang mga ground floor ng bawat gusali.

Kasama sa mga pasilidad ng housing site ang mga parking space, mga ilaw sa kalye, sewage treatment plant, guard house, konkretong bakod, at central park.

Sa kanyang mensahe, ibinahagi ni GM Tai na ang proyektong ito ay isang makabuluhang hakbang tungo sa pagbibigay ng abot-kayang pabahay sa pamamagitan ng Pambansang Pabahay Para sa Pilipino (4PH) Program ng pamahalaan, isa sa mga pangunahing programa ng administrasyon ni Pangulong Ferdinand R. Marcos Jr.

“Gaya ng pangalan nito, makakaasa kayo na ang Progreso Village ay maituturing na progresibo, sinisiguro po namin na ang bawat proyektong pabahay ng NHA ay matibay, ligtas, komportable at may kasamang iba’t ibang pasilidad,” saad ni GM Tai, kung saan binigyang-diin din niya ang pangako ng NHA sa pagpapabuti ng pamumuhay ng mga benepisyaryo nito.

Kasama ni GM Tai sa seremonya sina Department of Human Settlements and Urban Development (DHSUD) Undersecretary Garry de Guzman, na kumatawan kay Secretary Jose Rizalino Acuzar; Valenzuela City Mayor Weslie Gatchalian; Vice Mayor Lorena Natividad Borja at NHA North Sector Office. (PAUL JOHN REYES)

PINURI ni Senator Christopher “Bong” Go, chairperson ng Senate committee on health, ang pagpapalabas ng Korte Suprema ng temporary restraining order (TRO) na humahadlang sa paglilipat ng sobrang pondo ng PhilHealth sa National Treasury.

“This is one big win for the Filipino people! Sulit ang ating pangungulit!” ani Go sa pagsasabing ang mga pondo ng pampublikong kalusugan ay dapat na gamitin lamang sa kalusugan at kagalingan ng mga Pilipino.

“We thank the Supreme Court for heeding the calls to temporarily stop the illegal and immoral transfer of health funds from PhilHealth to finance projects unrelated to the health and wellness of our people,” dagdag niya.

Ang utos ng Korte Suprema ay kasunod ng tatlong petisyon na nagsasaad na ang transfer ay magpapahina sa sektor ng kalusugan. Nilinaw ni Supreme Court spokesperson Atty. Camille Ting na habang pinipigilan ng TRO ang nasabing paglilipat, ang mga pondong na-transfer na sa Treasury ay hindi awtomatikong maibabalik. Nitong Oktubre, ang Department of Finance (DOF) ay naglipat na ng P60 bilyon, at isa pang tranche ang inaasahan sa Nobyembre.

Ang desisyon ng Korte Suprema, sabi ni Go, ay ayon sa kanyang patuloy na panawagan na pangalagaan ang mga pondong inilaan para sa pangangalagang pangkalusugan.