TINANONG namin si Nova Villa na isa sa bident ng ’Senior Moments’ kung ano ang sekreto ng longevity niya sa showbiz, na hanggang ngayon ay aktibo siya sa pelikula at telebisyon?

“Up to now, iyon din ang tinatanong ko sa sarili ko e,” sabi ng beteranang aktres.

“Well, it’s… the only answer I could say is it’s a blessing, you know?

“And talaga ang Diyos mabait because He knows ang pangangailangan mo. Like I have my husband, I’m taking care of him, may edad na rin naman kami.”

May sakit ang asawa niya.

“Na-stroke, and then, of course, sa mga prayers na magpatuloy, kung gusto pa ni Lord, na ako maging artista pa, to help me dahil may mga pangangailangan din. So I can feel, I can feel the grace, the blessing.

“May 7 years na siyang bedridden,” pahayag ni Nova.

Hindi na raw ito nakapagsasalita.

“No, ano lang, reaction lang, pag nakikita niya ako, umiiyak, parang baby, ganun.”

Kahanga-hanga si Nova na sa loob ng pitong taon, sa edad niya, ay nakakaya pa niyang alagaan ng kanyang asawa?

“Kaya nga magtataka ka, saan galing,” pakli ng aktres.

Ano naman ang masasabi niya sa nagbibida pa siya sa pelikula, tulad nga dito sa ‘Senior Moments’ kasama sina Noel Trinidad at Tessie Tomas.

“Kahit ako nga nagtataka e, and the only words I can say is, ‘Thank you, Lord’.

“Alam ko naman, napi-feel naman natin yun e, alam naman natin yun, kaya siguro, probably I have done something good.”

Mayroon ba siyang sekreto, tulad sa kanyang diet o exercise?

Lahad niya, “Hindi. Hindi ako ganyan. Actually, matakaw ako, gusto ko kumain, but at this age, may nararamdaman ako, na less na ang food intake.

“Hindi katulad nun, sige-sige, kain lahat, ngayon hindi na.”

Nakatutuwa ang sagot niya sa tanong namin kung ano ang paborito niyang kainin?

“Pritong baboy, cochinillo, de leche,” ang tawa ng tawa niyang sinabi.

Bagaman kumakain pa rin daw siya ng mga paborito niya ay may pagbabago na.

“Medyo bawas na.

“Pagdating sa exercise, kiti-kiti ako. Naglilinis ako ng kuwarto, naglilinis ako ng banyo, ano pa? Kaya lang medyo ano ka na rin dahil… ang mga buto, maluluwag na, delikado na, ganun.”

Marami na siyang nakakatrabahong mga kabataang artista ngayon; ano ang nakikita niyang pagkakaiba ng mga artista ngayon sa kanila noong araw?

“Hindi ko alam ha, kasi eto teenager ‘to, hindi ko puwede i-level yung ano ko, kahit papaano may pagkakaiba pa rin yung mga artista noon at saka ngayon.

“But you know, normal lang yun kasi umiikot ang mundo, nagbabago lahat.”

Ang teknolohiya ang isa sa malaking pagbabago.

“Yes, wala tayo niyan noon.

“Wala, so ngayon talaga…kaya kahit ako nasa-shock pag napapanood ko itong mga bagets ngayon, talagang ako’y mangha ba?

“Kasi wala sa amin nung mga ganyan noong araw.”

Wala silang social media platform tulad ng TikTok.

“Wala, wala yan. Mas tamed noong araw, basta’t sila, magaganda sila noong araw, mga Gloria Romero, Amalia Fuentes, mga ganyan.”

Sa ‘Senior Moments’ na mula sa A & S Production at sa direksyon ni Neil ‘Buboy’ Tan, ano ang maasahan ng mga manonood?

“Meron din ano, a little of comedy, hindi naman nawawala yun, pero more on the buhay ng isang senior and this really happens. Magandang mapanood ng mga senior, e.”

(ROMMEL L. GONZALES)

“SA wakas!! Masaya kaming team TOPAKK na mapapanood niyo na lahat ito!!!

Kaya sa Dec 25, makipag-TOPAKKan na!!!! Damay damay na ‘to!”, ito ang caption ni Sylvia Sanchez tungkol sa ng announcement ang “Topakk” na entry sa 50th Metro Manila Film Festival na pinagbibidahan ni Arjo Atayde.

Caption sa social media post ng Nathan Studios Inc., “The internationally acclaimed Pinoy action film—first shown in Cannes and premiered in Locarno—is coming home this December. Ang lakas ng #Topakk, mararamdaman niyo ngayong Pasko!

“Stay tuned for the poster drop on November 19 and full trailer release on November 20. Damay-damay na ‘to.”

Samantala, matagal na ngang hinintay ng cast na mapanood ang hard-action movie dahil hindi pa nila napanood matapos mag-ikon sa ibang bansa at doon nag-world premiere.

Kaya sa ginanap ang cast screening last November 16, ay nasipagdatingan ng buong cast na excited mapanood ang kabuuan ng pelikula.

Noong nagsimula na ang movie ay bigla raw tumahimik ang lahat at walang tumatayo, dahil maraming puwedeng ma-miss.

At pagkatapos mapanood ang ‘Topakk’ ay nagkamayan silang lahat at ‘yung iba nagyakapan. Kitang-kita sa mga mukha nila na kuntento sila sa napanood, lalo na sina Julia Montes, Sid Lucero at Arjo, na puring-puri sa kani-kanilang pagganap.

Inamin din ng cast na excited na sila mag-promote ng movie, pagpunta sa mga mall shows at pagsakay na pasabog at ginastusang float.

Mapapanood na nationwide ang hard-action movie na pang-international ang pagkakagawa, simula sa December 25.

***

LUBOS ang pasasalamat ng Movie and Television Review and Classification Board (MTRCB), na pinamumunuan ni Chairperson at CEO Lala Sotto-Antonio, sa Senado ng Pilipinas sa ilalim ng liderato ni Senate President Francis “Chiz” Escudero, matapos pumasa sa plenaryo ang P164-milyong badyet ng Ahensya sa 2025.

Pinasalamatan din ng Board si Jinggoy Estrada, ang Senate Pro Tempore, bilang sponsor ng badyet.

Wala pang dalawang minuto ang itinagal ng deliberasyon nang aprubahan noong Nobyembre 14 sa plenaryo ang badyet dahil wala ni isang senador ang tumutol.

“Malaking tulong ang pondong ito sa mga plano namin na maisulong ang isang ‘Responsableng Panonood tungo sa Bagong Pilipinas’ ayon sa lakbay-tanaw ni Pangulong Marcos,” sabi ni Chair Sotto-Antonio “Dahil din sa suporta ng ating kongreso, patuloy kaming magsisikap na mapataas ang kamalayan ng publiko sa tamang paggamit ng media.”

Idiniin din ni Sotto-Antonio ang tatlong haligi ng “Responsableng Panonood (RP)”: Responsableng Panonood, Responsableng Paggabay; at Responsableng Paglikha.

Inilunsad ng administrasyong Marcos ang “Tara, Nood Tayo!” noong Nob. 12, isang informercial na layong itaas ang kamalayan sa industriya ng paglikha at ng pamilyang Pilipino sa tamang pagpili ng mga palabas na panonoorin.

Mula sa bagong badyet ay ilalaan din ang pagbili ng mga makabagong kagamitan at pagpondo sa mga proyektong pagsasanay para sa mga empleyado ng Ahensiya.

(ROHN ROMULO)

BIGO na mauwi ni Miss Philippines Chelsea Manalo ang korona sa ginanap na 73rd Miss Universe sa Arena CDMX in Mexico City.

Si Miss Denmark Victoria Kjær Theilvig ang nagwagi at kinabog niya ang 125 delegates. Ito ang unang pagkakataon na manalo ang Denmark sa naturang pageant.

Ang mga runners-up niya ay sina Miss Nigeria Chidimma Adetshina (1st); Miss Mexico María Fernanda Beltrán (2nd); Miss Thailand Opal Suchata Chuangsri (3rd) at Miss Venezuela Ileana Márquez 4th).

Umabot lang si Chelsea sa Top 30 semi-finalists.

Samantala, sa ginanap na presscon after ng competition, in-announce ang winners ng four Continental Queens.

Gumawa nga ng history si Chelsea dahil siya ang kauna-unahang Miss Universe Asia.

Ang first runner-up na si Miss U Nigeria ang napiling MU Africa and Oceana.

Si Miss U Finland Matilda Wirtavuori naman MU Europe and Middle East at si Miss U Peru Tatiana Calmell naman nagwaging MU Americas.

Makakasama ang four Continental Queens sa pag-iikot ni Miss Universe Victoria sa iba’t-ibang panig ng mundo.

***

BIKTIMA na rin ang Pinay Broadway star na si Lea Salonga ng fake fan page sa Facebook.

Nagbigay babala sa publiko ang Tony Award-winning actress na hindi niya authorized ang isang fan page sa FB, kaya nakikiusap ito sa netizens na i-report at i-block ang naturang account.

“This is not me. I have only two accounts on Facebook: this personal one and the official one. Any account besides these two that purport to be me is not me. Report and block. I also saw a sample message sent to a friend. God, it’s rife with grammatical errors,” mensahe ni Lea.

Pinaalala pa ni Lea na dalawa lang ang kanyang official Facebook accounts. Isa ay verified personal account at yung pangalawa ay ang official Facebook page na may 2.1 million followers.

***

TINANGHAL na ‘2024 Sexiest Man Alive’ ng People ang actor-director na si John Krasinski.

Ayon sa aktor: “That’s not how I wake up, thinking, ‘Is this the day that I’ll be asked to be Sexiest Man Alive?’ And yet it was the day you guys did it. You guys have really raised the bar for me.”

Married si John sa aktres na si Emily Blunt at may dalawa silang anak. Dinirek niya si Emily sa suspense-thrillers na A Quiet Place (2018) at A Quiet Place Part 2 (2020).

Unang nakilala bilang comedian si Krasinski sa hit sitcom na The Office (2005-2013). Lumabas siya sa mga pelikulang Leatherheads, Away We Go, It’s Complicated, Something Borrowed, Promised Land, Big Miracle at 13 Hours: The Secret of Benghazi.

Nagbida rin si Krasinski sa spy thriller series na Jack Ryan sa Amazon Prime.

(RUEL J. MENDOZA)