ISINAGAWA ng mga operatiba ng SDEU sa harap nina Mayor John Rey Tiangco, Navotas police chief P/Col. Mario Cortes, mga witness mula sa media at opisyal ng barangay ang pag-imbentaryo ng mga nakuhang droga sa suspek na si alyas “William”, 40, Chinese national at kanyang live-in partner na si alyas “Rose”, 28, matapos maaresto sa buy bust operation sa Road 10, Brgy. NBBN,, Navotas City. Nakuha sa kanila nasa 2,226.6 grams ng hinihinalang shabu na nagkakahalaga ng P15,140,880.00. (Richard Mesa)
- December 19, 2024
-
Search in People's Balita
Ang Diyaryong Pinagkakatiwalaan
Archive for December 17th, 2024
Mag-live-in na tulak, tiklo sa Navotas drug bust
Pagbati, bumuhos para kay Magsayo, matapos ang 2nd-round KO vs Ecuador fighter
Bumuhos ang pagbati kay Mark “Magnifico” Magsayo sa pagsasara niya ng taong 2024 sa isang impresibong laban.
Ito’y matapos mapasakamay niya via second-round TKO ang panalo laban kay Bryan Mercado ng Ecuador sa Long Beach, California.
Pinabagsak ni Magsayo si Mercado ng apat na beses gamit ang mga left hook sa katawan.
Sa kasalukuyan ay pangatlo sa WBC super featherweight division, target ni Magsayo ang isang world title eliminator laban kay Eduardo Hernandez ng Mexico.
Ang kaniyang promoter na si Sean Gibbons ay puspusang gumagawa ng paraan upang maselyuhan ang laban.
Mula sa mga fans at kapwa Pinoy boxers ay umani ng paghanga ang tinaguriang “Magnifico” ngunit hamon nito sa sarili, marami pa siyang gagawing pagsisikap para sa mas malalaking laban sa 2025.
Pagbuo ng mega government task force na siyang maghahabol sa rice price manipulators, hinikayat ni Speaker Romualdez
HINIKAYAT ni Speaker Ferdinand Martin Romualdez ang pagbuo ng mega government task force na siyang maghahabol sa rice price manipulators at ganid na mangangalakal.
“A call to immediate action is needed to force a decrease in rice prices for the benefit of the Filipino consumer,” ani Speaker.
Ang suwestiyon ay ginawa ni Romualdez matapos madiskubre ni House Quinta Comm chairman at Ways and Means Committee chairman Rep. Joey Salceda ng Albay ang nakakaalarmang ebidensiya ng sabwatan at price manipulation sa rice industry, sa kabila ng ulat na mayroong oversupply at pagbawas sa import tariffs.
Ayon kay Romualdez, ang panukalang task force ay bubuuin ng Department of Agriculture (DA), Department of Justice (DOJ), kabilang na ang National Bureau of Investigation (NBI), Bureau of Customs (BOC), Bureau of Internal Revenue (BIR) at Department of Trade and Industry (DTI).
May kapangyarihan ang task force na magsagawa ng imbentaryo, pagbusisi sa compliance sa tax laws at rules, inspect warehouses at agad magpasara ng mapagsamantalang business establishment.
ipinanukala pa nito ang pagpapasumite ng task force ng buwanang report sa kamara bilang bahagi ng oversight functions nito.
hindi aniya niya maintindihan kung bakit nananatili sa nasa P50 per kilo ang presyo ng bigas sa kabila na may sapat na supply at kabawasan sa importation cost.
“The findings of the Quinta Comm expose a serious betrayal of public trust. The Filipino people are paying unnecessarily high prices for rice, which should now be at P35 to P40 per kilo due to oversupply and tariff reductions. This blatant manipulation is unacceptable,” anang Speaker.
Sa huling pagdinig ng Quinta Comm o Murang Pagkain Super Committee, nabunyag ng mga mambabatas ang pattern ng price-fixing at hoarding sa mga rice importers at traders.
Sa datos na iprinisinta ng Philippine Statistics Authority (PSA), lumitaw na may oversupply ng bigas, kung saan ang demand-supply ratio ay bumaba mula 82.5 sa 69.4 ngayon taon.
Sa kabila na may sapat na suplay, ini ulat ng PSA na ang presyo ng regular-milled rice ay bumaba ng kaunti mula P50.16 – 50.40 noong October sa P49.44 nitong unang bahagi ng nakalipas na buwan.
Ang quinta committee ay binubuo ng House Committees on Ways and Means, on Trade and Industry, on Agriculture and Food, on Social Services, and the Special Committee on Food Security, with Ways and Means.
naatasan din ang panel na tugunan ang kahinaan sa mga government programs at masiguro ang pananagutan ng mga umaabuso. (Vina de Guzman)
Pinalakas na implementasyon ng Anti-Agricultural Sabotage Act ipinag-utos ni PBBM sa BOC at DA
PINATITIYAK ni Pangulong Ferdinand Marcos Jr., sa Bureau of Customs (BOC) at Department of Agriculture (DA) ang mahigpit na implementasyon ng Anti-Agricultural Sabotage Act.
Ginawa ng Pangulong Marcos ang pahayag sa inspeksyon ng PhP178.5 milyong halaga ng smuggled na mackerel sa Maynila.
Binigyang-diin ng Presidente na ang pagpapalakas sa implementasyon ng naturang batas ay para sa proteksyon ng mga mamimili, at mga magsasaka at mangingisda.
Ayon sa Punong Ehekutibo na ang pinalakas na aksiyon ng gobyerno laban sa mga smgglers ay nakaka-gambala sa supply chain at nakaka-apekto sa presyo ng mga produktong pang agrikultura sa mga lokal na merkado.
“Kaya’t ito ‘yung buong tinatawag na chain na kailangan nating buwagin. At ito’y, as I said, is the first case under the new law of the Anti-Agricultural Sabotage Act. So, I’ve spoken to our Bureau of Customs, and I’ve spoken to the Department of Agriculture and we have to keep going. Kailangang patibayin pa natin ito,” pahayag ni Pang. Ferdinand Marcos.
Samantala, kasama ang DSWD, nakiisa rin si PBBM sa pamamahagi ng tig-dalawang kilo ng nasamsam na isda sa 21,000 na sambahayan sa Baseco.
Nasa 150,000 na pamilya ang makatatanggap ng mackarel, kasama ang mga pinakanangangailangansa NCR, Bulacan, at Cavite.
Mabibigyan din ang mga city jail, public hospital, at iba pang care facility sa mga nasabing lugar. (Daris Jose)
NHA, NAMAHAGI NG CELA SA 382 BENEPISYARYO SA CSJDM, BULACAN
NAMAHAGI ang National Housing Authority (NHA) ng Certificates of Eligibility for Lot Allocation (CELA) sa 382 kwalipikadong benepisyaryo para sa siyam na housing sites sa Lungsod ng San Jose del Monte, Bulacan.
Sa patnubay ni NHA General Manager Joeben Tai, pinangunahan ni Assistant General Manager Alvin S. Feliciano at Region III Manager Minerva Y. Calantuan ang pamamahagi ng CELA sa mga benepisyaryo sa lungsod.
“Layon ng pamahalaan na magbigay ng pabahay para sa ikauunlad ng bawat Pilipino sa kanilang bagong buhay tungo sa isang bagong Pilipinas,” ani AGM Feliciano, na binigyang-diin ang dedikasyon ng pamahalaan, sa pangunguna ng NHA, na baguhin ang pamumuhay ng mga mamamayan sa pamamagitan ng mga programa sa pabahay.
Nakibahagi rin sa naturang kaganapan sina San Jose del Monte Mayor Alfred Robes at San Jose del Monte Lone District Representative Florida Robes, kung saan ipinahayag ng huli ang kanyang pasasalamat sa NHA dahil sa mga pagsisikap nitong makatulong sa mga benepisyaryo.
“Ang pabahay ay isang pamanang punong-puno ng pag-asa. Masaya po ako na ang National Housing Authority ay talagang nakatuon sa pagbabagong anyo ng tunay na bukas pagdating po sa pabahay,” anang Rep. Robes, sabay banggit sa kahalagahan ng mga programang pabahay ng NHA para sa mga residente ng San Jose del Monte.
Ang kaganapan ay isang hakbangin ng NHA para ipakita ang dedikasyon nitong tugunan ang lumalaking pangangailangan sa pabahay ng lungsod. (PAUL JOHN REYES)
UAAP crown nabawi ng UP
NAIBALIK ng University of the Philippines ang korona sa kanilang bakuran matapos patalsikin sa trono ang De La Salle University, 66-62 sa do-or-die Game 3 ng UAAP Season 87 men’s basketball tournament na nilaro sa Araneta Coliseum kagabi.
Nagsanib puwersa sina graduating student JD Cagulangan, Francis Lopez at Quentin Millora-Brown upang akbayan ang Fighting Maroons sa dikdikang laban sa dulo at makuha ang kampeonato sa kanilang best-of-three showdown.
Lamang ng isang puntos ang UP 61-60 sa 1:31 mark sa fourth canto, yumanig ang Big Dome nang isalpak ni Lopez ang pandiinan na tres para hawakan ang 64-60 bentahe.
Natapyasan pa ng La Salle ang lamang ng UP, 62-64 may 46 segundo pa ang nalalabi, pero sinelyuhan ni Millora-Brown ang panalo ng Diliman squad nang ipasok nito ang dalawang libreng tira.
PROYEKTO NG DOLE, OKEY SA COMELEC KAHIT MAY ELECTION BAN
APRUBADO ng Commission on Elections (Comelec) ang hirit ng Department of Labor and Employment (DOLE) na gawin ang kanilang proyekto sa gitna ng Election Ban dahil sa 2025 mid-term at BARMM elections.
Salig sa Omnibus Election Code, ang paglalabas, pagpapakalat, at paggastos ng public funds para sa social services at mga proyektong may kinalaman sa pabahay ay hindi pinapayagan .
Sinabi ng Comelec sa naunang rekomendasyon ng law department nito na hindi makakaimpluwensiya sa botohan ang tukoy na 9 na proyekto.
Wala rin umanong magaganap na pamamahagi ng AICS o Assistance to Individual in Crisis Situation mula May 02 Hanggang May 12 maliban sa mga normal na ibinibigay sa mga kuwalipikadong individual.
Kasama sa mga inaprubahan ni COMELEC Chair George Erwin Garcia ang Special Program for Employment of Students, Government Internship Program, JobStart Philippines Program, Child Labor Prevention and Elimination Program at ang DOLE Integrated Livelihood and Emergency Employment Program kahit pa may election ban .(Gene Adsuara)
1,322 tumanggap ng P500 milyong OVP confidential funds walang birth records
TULAD ni “Mary Grace Piattos”, wala umanong birth records sa database ng Philippine Statistics Authority (PSA) ang 1,322 tumanggap ng P500 milyong confidential fund ng Office of the Vice President (OVP).
Ayon kay National Statistician at Civil Registrar General Undersecretary Claire Dennis Mapa, ito ang naging resulta ng ginawang paghahanap ng PSA bilang tugon sa kahilingan ni House Committee on Good Government chairperson Rep. Joel Chua na beripikahin ang 1,992 pangalan na nakalista sa confidential funds ng OVP.
Sa 1,992 pangalan, 1,456 ang walang marriage records at 536 may posibleng match, 1,593 walang death records, 399 ang posibleng tumugma at 670 ang “most likely matched”.
Ang mga pangalan ay batay sa mga acknowledgment receipts (AR) na isinumite ng OVP sa Commission on Audit (COA) upang bigyang katwiran ang paggastos nito ng confidential funds mula Disyembre 2022 hanggang 2023.
Dahil dito, ayon kay Chua ay higit na tumindi ang duda na gawa-gawa lamang ng OVP ang nasabing mga pangalan tulad ng kontrobersyal na “Mary Grace Piattos”.
“These findings raise a critical question: if the recipients don’t exist, where did the money go? This is not just a clerical error; this points to a deliberate effort to misuse public funds,” dagdag pa nito.
Una nang hinanap ng PSA ang 677 pangalan na tumanggap ng P112.5 milyong confidential fund ng DepEd. Sa naturang bilang 405 ang walang birth record, 445 walang marriage certificates, at 508 walang death certificate.
Nakuha ang atensiyon ng mga mambabatas kay “Mary Grace Piattos” dahil katunog nito ang pangalan ng isang restaurant at brand ng potato chips. Wala itong rekord sa PSA.
Ang pangalan namang “Kokoy Villamin” ay lumabas sa AR ng OVP at DepEd pero magkaiba ang pirma nito. Gaya ni Piattos, walang rekord sa PSA si Villamin. (Daris Jose)
Proteksiyon ng mga pasahero ngayong holiday rush isinulong
PINATITIYAK ni Senador Win Gatchalian na mabibigyan ng proteksiyon ang mga pasahero ng mga taxi at tourist car transport services lalo ngayong panahon ng holiday rush.
Ito ang layon ng Senate Bill 819 o An Act Establishing the Rights of Passengers of Taxis, Tourist Car Transit Services, and Other Similar Vehicles for Hire, na isinampa niya ngayong 19th Congress.
Ayon kay Gatchalian, ang mga pampublikong transportasyon ay karaniwang kapaki-pakinabang at in demand tuwing rush hour, panahon ng kapaskuhan, tag-ulan, at dis-oras ng gabi kung kailan problema ang kaligtasan ng mga pasahero at kakulangan ng ibang paraan ng transportasyon.
“Nakita natin ang hindi mabilang na mga video at narinig ang mga nakakagalit na kwento ng mga pasaherong naging biktima ng mga abusadong driver ng mga taxi at iba pang sasakyang paupahan,” dagdag pa niya.
Sinabi ng mambabatas na tumataas ang ganitong mga insidente tuwing holiday season dahil sa pagdami ng pasahero na gumagamit ng taxi at iba pang pampublikong transportasyon. Bunsod nito, nagiging mahirap para sa mga commuter ang makahanap ng masasakyan habang dumarami ang mga driver na naniningil ng labis na bayad.
Binigyang-diin ng senador na ang ganitong mga insidente ay madalas na pinapalampas o hindi naaaksyunan dahil sa kakulangan ng mga batas na pumoprotekta sa mga commuter.
Chinese national, ka-live-in timbog sa higit P15 milyon shabu sa Navotas drug bust
UMABOT sa mahigit P15 milyong halaga ng shabu ang nasamsam sa isang Chinese national at live-in partner nito matapos malambat ng pulisya sa ikinasang buy bust operation sa Navotas City, Lunes ng umaga.
Sa kanyang report kay Northern Police District (NPD) Acting Director P/Col. Josefino Ligan, kinilala ni Navotas police chief P/Col. Mario Cortes ang naarestong mga suspek na sina alyas “William”, 40, Chinese national at kanyang live-in partner na si alyas “Rose”, 28, kapwa residente ng Brgy.
Manganvaka, Subic Zambales.
Ayon kay Col. Cortes, bago ang pagkakaaresto sa mga suspek ay nakatanggap na ng impormasyon ang Station Drug Enforcement Unit (SDEU) mula sa Regular Confidential Informant (RCI) hinggil sa umano’y pagbebenta ng illegal na droga ng mag-live-in partner kaya isinailim nila ang mga ito sa validation.
Nang positibo ang ulat, ikinasa ni SDEU chief P/Capt. Luis Rufo Jr at P/Capt. Gregorio Cueto ang buy bust operation, katuwang ang CID-IG sa pangunguna ni P/Capt. Felcerfi Simon kontra sa mga suspek na pumayag umanong sa Navotas gaganapin ang kanilang transaksyon.
Nang tanggapin umano ni alyas William ang marked money mula sa pulis na nagsilbi bilang poseur-buyer kapalit ng isang zip-lock plastic bag ng shabu ay agad siyang dinamba ng mga operatiba, kasama ang kanyang live-in partner dakong alas-6:16 ng umaga sa Road 10, Brgy. NBBN.
Ani Capt. Rufo, nakumpiska sa mga suspek ang 2,226.6 grams ng hinihinalang shabu na may corresponding standard drug price na P15,140,880.00, buy bust money na tatlong dusted genuine P1,000 bill at 117 pirasong P1,000 boodle money, cellphone, digital weighing scale at gamit nilang sasakyan na isang itima na Honda Jazz.
Pinuri naman ni Navotas City Mayor John Rey Tiangco si Col. Cortes at ang SDEU team sa pangunguna ni Capt. Rufo sa kanilang matagumpay na operation kontra illegal na droga na nagresulta sa pagkakaaresto sa mga suspek na kapwa mahaarap sa kasong RA 9165 o ang Comprehensive Dangerous Drugs Act of 2002. (Richard Mesa)