SHOOT sa selda ang isang holdaper na sumapak at sumaksak sa biniktima niyang tinder ng ‘ukay-ukay’ nang masapol sa kuha ng CCTV camera ang kanyang pagtakas sa Valenzuela City.

Sa ulat ni P/Col Salvador Destura Jr, hepe ng Valenzuela City Police Station kay Northern Police District (NPD) Director P/BGen. Rizalito Gapas, nagpanggap na kostumer ang suspek na si alyas “Aksel”, 30, construction worker nang pumasok sa tindahan ng ukay-ukay sa Tongco St. Brgy. Maysan, Biyernes ng hapon.

Nang makatiyempo, tinutukan ng suspek ng patalim ang tinderang si Renalyn, 19, at ipinasok sa banyo saka doon na sinapak at sinaksak ng dalawang beses sa tiyan.

Matapos nito, nagpalit ng damit ang suspek saka tumakas tangay ang P3,500.00 na pinagbentahan habang isinugod naman ang biktima sa Valenzuela Medical Center kung saan siya ginagamot.

Kaagad bumuo ng team si Col. Destura mula sa mga operatiba ng Sub-Station-9, Station Intelligence Section (SIS), Station Investigation Unit (SIU), at Detective Management Unit (DMU) sa pangunguna nila PCpt Richie Garcia, PLt Armando Delima, PLt Ronald Bautista, at PCpt Robin Santos para sa pagtugis sa suspek.

Sa ginawang backtracking ng pulisya sa kuha ng mga CCTV sa lugar, nakita ang pagpasok ng suspek sa tindahan pati na ang paglabas na iba na ang suot na damit hanggang sa pagsakay ng tricyle patungo sa construction site na kanyang pinagta-trabahuhan sa R. jacinto St. Brgy. Canumay na nagresulta sa kanyang pagkakadakip.

Positibong kinilala ng tindera ang suspek nang dalhin ng mga pulis sa pagamutan kung saan nakaratay pa ang biktima sanhi ng tinamong saksak sa tiyan.

Ayon kina P/Cpl Larry Legazpi at P/SSg Julius Congson, kasong robbery with physical injuries ang inihain nila sa piskalya ng Valenzuela City laban sa suspek. (Richard Mesa)

HINAHANDA na ngayon ng  Department of Human Settlements and Urban Development (DHSUD) ang  financial assistance para sa mga pamilya na nawalan ng kanilang tahanan dahil sa 6.8 magnitude earthquake na tumama sa Mindanao dalawang linggo na ang nakalilipas.

Sa katunayan, sinabi ni DHSUD Secretary Jose Rizalino Acuzar na ipinag-utos na niya sa mga opisyal ng departamento sa Davao Region at Soccsksargen (South Cotabato, Cotabato, Sultan Kudarat, Sarangani at General  Santos) na bilisan ang  probisyon ng financial assistance.

Sa ilalim ng Rental Subsidy and Financial Assistance Program ng DHSUD,  ang mga pamilya na may “totally damaged” na bahay ay makatatanggap ng P10,000 na  cash aid.

Base sa   DHSUD data, mayroong  673  bahay ang “totally damaged” sa dalawang rehiyon.

Ipinag-utos din ni Acuzr sa local DHSUD officials  na mahigpit na makipag-ugnayan sa mga apektadong local government units (LGUs) at  pangasiwaan ang mabilis na pagpapalabas ng  financial aid para sa mga pamilya na “totally destroyed” ang mga bahay.

Sa kabilang dako, sinabi naman ni DHSUD Undersecretary for Disaster Response Randy Escolango na tuloy-tuloy naman ang kanilang ginagawang pagmo-monitor sa situwasyon sa dalawang rehiyon at pinapanatiling updated ang management  sa lawak ng pinsala upang matiyak na kagyat na naibibigay ang kinakailangang suporta.

Higit pa sa financial aid, sinabi ni Acuzar na ang mga pamilyang nakatira sa  danger zones ay kabilang sa mga  “priority beneficiaries” ng  Pambansang Pabahay para sa Pilipino (4PH) Program ng gobyerno.

“The recent calamities further push us to work harder to provide safe, decent and affordable housing units across the country through the 4PH program,” ayon kay Acuzar.

“We are motivated now, more than ever, to help relocate families living in danger zones to mitigate the effects of disasters. We see to it that we put them on top priority as every Filipino family deserves to live in resilient and sustainable communities,” dagdag na pahayag nito.  (Daris Jose)

IGINAGALANG umano ni House Deputy Speaker at Pampanga  Rep. Aurelio Gonzales Jr. ang pahayag ni Sen. Ronald dela Rosa subalit dapat din umano nitong igalang ang ginagawang pagganap ng kamara sa mandatong ito.

“As the senator very well knows, the House of Representatives is mandated to act on resolutions filed by its members regardless of political affiliations in the same manner that the Senate takes action on measures presented by senators,” giit ng kongresista.

Ayon kay dela Rosa, ginagamit ng kamara ang imbestigasyon ng ICC upang patahimikin ang mga Duterte.

Isa sa mga trabaho ng Kamara ay dinggin ang mga inihahaing resolusyon ng mga kongresista.

Tatlong resolusyon ang nakahain ngayon sa kamara na nananawagan sa gobyerno na payagan ang International Criminal Court (ICC) na makapagsagawa ng imbestigasyon kaugnay ng madugong war on drugs campaign ng administrasyong Duterte.  (Ara Romero)

BILANG bahagi ng pagwawakas ng selebrasyon ng ika-400 founding anniversary, pinasinayaan ng Pamahalaang Lungsod ng Valenzuela ang Casa de Polo sa pangunguna ni Mayor WES Gatchalian, kasama ang panauhing pandangal na si first lady Louise Araneta-Marcos.

Kasunod nito, ang paglulunsad ng coffee table book ng lungsod na nagha-highlight sa kasaysayan at pag-unlad ng Valenzuela sa nakalipas na 400 taon at ng “Cultural Night”, isang culminating program na nagpapakita ng pagsiklab ng makasaysayang pagkakakilanlan ng lungsod.

Naganap ang tatlong mahahalagang pangyayaring ito sa Casa de Polo, Brgy., Poblacion,

Ang inagurasyon ay isang kasaysayan at koneksyon ng Valenzuela sa mga unang Marcos, at para sa isang maikling background, mula sa pagiging isang kakaibang munisipalidad, ang Polo ay naging isang malayang bayan noong ika-12 ng Nobyembre 1623.

Ang Polo noon ay nakilala bilang Valenzuela City; nakipag-ugnayan sa Metropolitan Manila noong 1975 na pinamunuan noon ni Governess at First Lady Imelda Romualdez Marcos, at sa huli ay naging isang highly urbanized na lungsod noong 1998.

Sa kanyang welcoming remarks, binigyang-diin ni Mayor Wes ang kahalagahan ng pagdiriwang ng ika-400 anibersaryo ng pagkakatatag ng lungsod at nagpahayag ng kanyang pasasalamat sa mga taong nagtrabaho sa likod ng matagumpay na serye ng pagdiriwang.

“Sa ating pagba-balik-tanaw, malugod ko po kayong tina-tanggap sa ating selebrasyon ng Valenzuela 400! Sa pamamagitan ng temang ‘kasaysayan at kaunlaran,’ samahan niyo po ako sa paglingon sa aming makulay na nakaraan, nang ang Valenzuela ay isa pa lamang bayan ng agrikultura; pagbubunyi sa aming kasalukuyan,  bilang isang hinahangaang, multi-awarded industrial city; at pagtanaw sa aming kinabukasan, bilang isang maunlad na liveable city,” aniya.

Samantala, ang coffee table book ay pinamagatang, “Valenzuela: History and Progress” na nagtatampok ng walkthrough ng pamana ng lungsod; pagsubaybay sa mga kahanga-hangang kaganapan mula sa lumang bayan ng Polo hanggang sa unti-unting pagbabago nito sa isang urbanisadong lungsod.

Ang “Cultural Night” naman ay isang fashion presentation na nagbibigay-pugay sa kasaysayan at pamana ng kultura ng Valenzuela kung saan ipinakita ang mga gawa ng tatlong pangunahing designers of the fashion industry ng lungsod at ng bansa. (Richard Mesa)

PARA sa patuloy na pagpapanatili ng kaayusan at kalinisan, nagbigay ang Pamahalaang Lungsod ng Valenzuela ng mga bagong 38 dump truck at tatlong heavy equipment na sasakyan sa Waste Management Division (WMD) at Public Order at Safety Office (POSO).

Ang bawat unit ng dump truck ay nagkakahalaga ng PhP 1,973,684.21, habang ang excavator ay nagkakahalaga ng PhP 8,888,888.00, samantala ang wheel loader ay PhP 7,358,888.00, at ang aerial platform ay PhP 6,995,000.00

Ang mga bagong dagdag na sasakyan ay para sa WMD at POSO’s Sidewalk Clearing Operations Group sa pagsasagawa ng kanilang mga serbisyo at tungkulin para sa Pamilyang Valenzuelano, partikular sa pangongolekta ng basura; at pagtiyak na ang lahat ng bangketa ay malinis.

Sa kanyang mensahe, iginiit ni Mayor WES Gatchalian na ang mga dump truck na ito ang magiging solusyon para mapanatili ang kaayusan at kalinisan sa lungsod,

“Tayo po, ang ating bayan ay nakilala bilang isang malinis at maayos na lungsod. Ito na po ang sagot para mapanatili natin at ituloy natin ang kalinisan sa ating mahal na lungsod.” aniya.

Kamakailan, ang Valenzuela ay nakatanggap ng Plaque of Recognition sa panahon ng Department of the Interior and Local Government (DILG) Urban Governance Exemplar Awards 2023 para sa epektibong pagpapatupad ng Lungsod ng Manila Bay Clean-up, Rehabilitation, and Preservation Program kung saan bahagi ng mandamus nito ay ang Solid Waste Management.

Nakiisa rin sa turnover ceremony sina Vice Mayor Lorie Natividad-Borja, miyembro ng Sangguniang Panlungsod, POSO Head Mr. Jay Valenzuela, Public Sanitation and Cleanliness Head Mr. Noel Delesmo at WMD Officer-in-Charge Ms. Mayette Antonio. (Richard Mesa)

REHAS na bakal ang kinasadlakan ng dalawang hinihinalang drug personalities matapos kumagat sa ikinasang buy bust operation ng pulisya sa Caloocan City.

Kinilala ni Caloocan police chief P/Col. Ruben Lacuesta ang naarestong mga suspek na si alyas “Ert”, 53 at alyas “Mekini”, 20, kapwa residente ng Brgy. 19.

Batay sa ulat ni Col. Lacuesta kay Northern Police District (NPD) Director P/BGen. Rizalito Gapas, bandang alas-6:10 ng umaga nang magsagawa ang mga operatiba ng Station Drug Enforcement Unit (SDEU) sa pangunguna ni P/Cpt. Emmanuel Aldana ng buy bust operation laban kay Ert matapos ang natanggap na report hinggil sa pagbebenta nito ng shabu.

Isang pulis na nagpanggap na buyer ang nagawang makipagtransaksyon sa suspek ng P6,500 ng droga at nang tanggapin niya marked money mula sa pulis kapalit ng isang plastic sachet ng shabu ay agad siyang dinakma ng mga operatiba, kasama si Mekini na sinasabing bumili din ng droga kay Ert sa P. Zamora St., Brgy., 19.

Nakumpiska sa mga suspek ang nasa 10 gramo ng hinihinalang shabu na nagkakahalaga ng P68,000.00; at buy bust money na isang P500 bill, kasama ang 6-pirasong P1,000 boodle money.

Pinuri naman ni BGen. Gapas ang Caloocan police sa kanilang pagsisikap kontra ilegal na droga at sa mga taong sangkot sa pagpapakalat nito na nagresulta sa pagkakadakip sa mga suspek na kapwa mahaharap sa kasong paglabag sa R.A. 9165 o Comprehensive Dangerous Drug Act of 2002. (Richard Mesa)

UMABOT na sa mahigit isang bilyong piso ang naipamahagi ng Land Transportation Franchising and Regulatory Board (LTFRB) na ayuda para sa mga tsuper at operators sa ilalim ng fuel subsidy program.

Batay sa datos ng LTFRB, sumampa na sa P1,089,176,500 ang kabuuang halaga ng fuel subsidy na naibigay sa mga tsuper at operators sa buong bansa, simula inumpisahan ito ng pamahalaan.

Ito ay napakinabangan ng mga tsuper at operator ng kabuuang 166,597 units ng mga pampublikong sasakyan.

Ang Fuel Subsidy Program(FSP) ay isang programa ng pamahalaan na nagbibigay ng pinansyal na tulong sa mga tsuper at operators ng mga pampublikong sasakyan, sa layuning maibsan ang epekto ng labis na pagtaas ng presyo ng langis.

Ayon sa LTFRB, magpapatuloy pa rin ito, sa pagnanais na maibsan ang pasanin ng mga tsuper sa buong bansa.

Nagpapatuloy din umano ang koordinasyon ng naturang ahensiya sa state-owned Land bank of the Philippines na siyang nagdi-distibute ng mga subsidiya sa mga kwalipikadong benepisyaryo. (Daris Jose)

NANINIWALA si Pangulong Ferdinand Marcos Jr.  na hindi deserve ni  Vice President Sara Duterte  na  ma-i impeached sa kabila ng naging pahayag ng isang mambabatas na pinag-uusapan na ito ng  ilang miyembro ng Mababang Kapulungan ng Kongreso.

“Binabantayan namin nang mabuti because we don’t want her to be impeached, we don’t want her to… she does not deserved to be impeached so we will make sure that this is something we will pay very close attention to,” ayon kay Pangulong  Marcos sa isang panayam.

Tinuran pa ng Pangulo na  ang “impeachment talks” ay hindi karaniwan mula ng  “there will always be an element that would want to change the result of an election.”

“Well, lahat naman kami mayroong ganyan eh (we all have detractors). So, I don’t think it’s particularly unusual, I don’t think it’s particularly worrisome,” anito.

At  nang tanungin kung mayroong anumang bitak sa  UniTeam, sinabi ng Pangulo na  “I don’t think so. Mas tumitibay nga eh.”

Inilarawan din ng Pangulo ang kanyang relasyon kay  Duterte ay  “excellent.”

“On a professional level, nothing but good things to say about the work she has done in the Department of Education,” ayon sa Chief Executive.

Pagdating naman sa  personal level, sinabi ng Pangulo na magkasundo naman  sila ni VP Sara. (Daris Jose)

HANDA na ang Pilipinas para sa  Artificial Intelligence (AI) kasabay nang pag-imbita sa technology companies at venture capitalists na maging kasosyo ng navigation ng bansa tungo sa bagong technological revolution.

“The Philippines is ready to become your partner in navigating the AI future. As we look to the horizon, let’s ‘Make It Happen in the Philippines,’ where, the promise of a future defined by technological inclusivity and shared growth is not just envisioned but actively realized,” ayon kay Pangulong Marcos sa isang pagpupulong kasama ang mga technology investors sa  sidelines ng kanyang pagdalo sa 30th Asia-Pacific Economic Cooperation (APEC) Economic Leaders’ Meeting and related activities sa San Francisco, California.

Sa isang roundtable meeting kasama ang mga pribadong kompanya, investors, at venture capitalists sa sektor ng teknolohiya, sinabi ng Pangulo na ang Pilipinas ay  nakasuporta sa AI revolution  para dagdagan ang  umiiral na kasanayan ng mga Filipino, itaas ang “productivity of enterprises” at paigtingin ang ‘competitiveness’ ng ekonomiya.

“Currently, the Philippines is embracing this future of AI with the crafting of the National AI Strategy that seeks to augment the existing skillset of Filipino talents with AI.  This strategy also aims to position the Philippines as a Center of Excellence in Artificial Intelligence,” ayon kay Pangulong Marcos.

“We believe AI can uplift the lives of Filipinos, increase the productivity of our enterprises, and enhances the competitiveness of our economy. And I’m certain our discussions here today will help the Philippines steer our roadmaps in a direction that maximizes the skills of Filipinos and helps them achieve their aspirations,”dagdag na wika  nito.

Ang  roundtable meeting ay co-organized nina  NightDragon Chief Executive Officer (CEO) David Dewalt, Bain at Company CEO Emmanuel Maceda at Department of Trade and Industry (DTI).

Kapwa naman dumalo sa meeting sina Dewalt at Maceda kasama sina Crescent Point Group Vice Chairman Thomas Pompidou, Microsoft Managing Director Michelle Gonzalez, Mandiant (A Google Company) CEO Kevin Mandia at Group of the Government of Singapore Investment Corporation (GIC) Head Chris Emanuel.

Present din sa roundtable meeting sina Plug and Play Ventures CEO Saeed Amidi, Altimeter CEO Brad Gerstner, HP (formerly Hewlett-Packard) CEO Enrique Lores, Visa CEO Ryan McInerney, Mastercard Co-President Ling Hai, at Anthropic CEO Dario Amodei.

Sinabi ng Pangulo na “gathering with the businessmen is a momentous occasion as the Philippine economy celebrates a milestone, marking its highest growth rate since 1976 with a 7.6 percent increase in the country’s gross domestic product in 2022.”

Idinagdag pa ng Punong Ehekutibo na ang katayuan ng ekonomiya ng  Pilipinas, samahan pa ng  US$9.2 billion na Foreign Direct Investments noong nakaraang taon ay “narrates a story of economic resilience and dynamism.”

“This remarkable growth, it mirrors the persistent dedication of this Administration, harmonized with our private sector partners and with their initiatives, to cultivate a business ecosystem that is not only conducive but also competitive and innovative,” ayon sa Pangulo.

Binigyang diin din ng Pangulo na ginawa na itong madali ng gobyerno ng Pilipinas para sa mga  foreign investors sa pamamagitan ng pagbibigay ng fiscal incentives at i-promote na madaling magtayo ng negosyo sa bansa.

Binigyang-diin ang “brand of quality service” ng mga Filipino at  masiglang ekonomiya ng bansa.

“To our current and future partners, I hope that this meeting will serve as an opportunity to create a shared vision for a future where the Philippine workforce is empowered, skilled, and ready to shape the digital age,” ani Pangulong Marcos.

“We stand on the cusp of the Artificial Intelligence revolution and that promises untold advancements but it also presents some rather unexpected challenges. It hinges on a workforce equipped with the necessary skills and an ecosystem that embraces technological inclusivity,” aniya pa rin.

Samantala, sa nasabi pa ring pagpupulong, binigyang-diin ni Pangulong Marcos ang kahalagahan ng “upskilling at training” para ma-meet ang kasalukuyan at ang hinaharap na talento na kailangan at  hinahanap sa bawat  industriya sa Pilipinas,  sabay sabing   “task of cultivating a future-ready workforce” ay ibinahaging responsibilidad. (Daris Jose)

MALABO nang magkaroon ng pagpupulong sina Pangulong Ferdinand Marcos Jr.  at   US President Joe Biden  sa  sidelines ng 2023 Asia-Pacific Economic Cooperation (APEC) Summit.

“No plans on this trip,”  ayon kay Philippine Ambassador to Washington Jose Manuel Romualdez  sa isang panayam.

Inamin ni Romualdez  na may request mula sa tanggapan ni  Vice President Kamala Harris na makapulong si Pangulong  Marcos sa sidelines ng Summit.

“There is a request from the office of VP Kamala for sideline meeting with PBBM,” ani Romualdez.

Sa kabilang dako, nauna nang sinabi ng White House na pag-uusapan nina Biden at Chinese President Xi Jinping  ang pagpapalakas sa komunikasyon  at pangasiwaan ang kompetisyon kapag nagpulong ang mga ito  sa sidelines ng APEC ngayong linggo.

Ang face-to-face meeting sa San Francisco Bay Area ay ang  kauna-unahan sa pagitan nina  Biden at Xi ngayong taon, mayroong  high-stakes diplomacy na naglalayong pigilin ang tensyon sa pagitan ng dalawang bansa.  (Daris Jose)