UMAMIN si Pangulong Rodrigo Roa Duterte na kanyang ikinunsidera na palitan na si retired general Reynaldo Guerrero bilang pinuno ng Bureau of Customs (BOC).

Subalit nilinaw ng Pangulo na hindi ito dahil sa korapsiyon kundi dahil sa ipinagkakaloob nitong tiwala  sa mga taong hindi naman dapat pagtiwalaan.

Special mention dito ng Pangulo si BOC Chief of Staff Teodoro Jumamil na para sa kanya ay matagal na niyang sinabi kay Guerrero na alisin sa puwesto dahil corrupt.

“Well, I was considering — Jagger, I was considering of replacing you not because of anything. I can vouch na malinis ka. Problem is ‘yung — do not entertain loyalties especially in government. If you think that that idiot is going to destroy you, you destroy him first,” ayon sa Pangulo.

Sinabi pa ni Pangulong Duterte na may hawak  na dalawang  posisyon si Jumamil, isa aniya sa DBP at  empleyado rin ng Customs Bureau.

Giit ng Pangulo na hindi dahil sa nakatulong sa kanya si Jumamil ay magpipikit mata na siya sa mga ginagawa nito na aniyay matagal ng namamayagpag at sisira kay Guerrero.

Walang duda ayon sa Pangulo na malinis si Guerrero na ang kailangan ngayon ay tulong sa Customs.

Bukod sa PHILHEALTH, BOC naman ang pinasisiyasat ni Pangulong Duterte sa DOJ kaugnay ng sinasabing namamayagpag pa ding katiwalian sa ahensiya. (Daris Jose)

PINAYUHAN si Pangulong Rodrigo Roa Duterte ng kanyang doktor na iwasan na ang pag-iinom ng alak.

Ito ayon sa Pangulo ay dahil malapit na di umano sa Stage 1 cancer ang kasalukuyan niyang Barrett’s esophagus.

Magugunitang, una nang sinabi noon ng Chief Executive, 75 taong gulang sa kaniyang mga nakaraang talumpati na mayroon siyang myasthenia gravis, Buerger’s disease, acid reflux, Barrett’s esophagus at spinal issues.

“Matagal na kami sa gobyerno, magpa-retire na lang, bakit pa namin pagsayangan? Kakaunting panahon na lang ang naiwan so walang — walang — walang ganang — wala nang ganang kumain,” ayon sa Pangulo.

“May pera ka naman, hindi ka na makakain kay sabi ng doktor huwag kang kumain ng taba kasi mamatay ka. Ikaw Duterte, huwag ka nang uminom kasi ‘yang Barrett mo nearing Stage 1 ka sa cancer. So hindi na rin,” aniya pa rin.

Bukod aniya sa kanya ay may miyembro rin siya ng gabinete ang may sakit.

“Si Bebot ‘yung paa ewan ko kung puputulin ‘yan o hindi. Puro na may sakit so what do we get if we…? T*** i***** ‘yan. Wala na.

Ang amin, ang iwan na lang ang trabaho. Kasi pagharap namin sa Diyos and tanungin ka na, “O ikaw Rodrigo, anong ginawa mo?” Sabi ko, “Ginawa ko man lahat. Ito man si Dominguez ang walang pera.” Totoo. Eh saan ‘yang pera? Eh naubos na niya, inutang na niya lahat eh, wala nang magpautang. Si Lorenzana, ah wala ‘yan. Kung bala pati armas may maibigay ‘yan pero medisina kailangan pera, cold cash talaga ‘yan,” lahad nito.

Kamakailan lamang ay sinabi ni  Presidential Spokesperson Harry Roque na mabuti  ang kalagayan ng Pangulo ngayon kahit marami sa miyembro ng kanyang gabinete ang naging positibo sa Covid- 19.

Itinanggi rin ni Sec. Roque ang kumalat kamakailan lang na mga balitang lumipad ang Pangulo patungong Singapore para sa isang emergency treatment.

Kaugnay nito ay may ilang petisyon na ang naihain  sa Korte Suprema para maisapubliko ang medical records ng Pangulo para malaman kung nasa tamang kondisyon ba siya para pamunuan ang bansa, pero hindi ito kinakatigan ng mataas na hukuman dahil umano sa kawalan ng matibay na basehan. (Daris Jose)