Nagkasundo ang Moderna Inc. at gobyerno ng Pilipinas para sa pagbili ng 13 milyong doses ng bakuna ng kumpanya na nakatakdang ideliber sa bansa sa kalagitnaan ng taon.

Kinumpirma ito mismo ng Moderna Inc. kasabay ng pagsasabi na agad na aasikasuhin ang mga kinakailangang panuntunan tulad ng pagkuha muna ng ‘emergency use authorization (EUA)’ buhat sa Food and Drugs Administration (FDA).

Bukod sa 13 mil­yong doses sa pagitan ng pamahalaan, inaasahan din na magkakaroon ng hiwalay na kasunduan ang Moderna para suplayan ng pitong milyong doses ang pribadong sektor.

Kasalukuyang ang Pfizer-BioNTech, AstraZeneca at Sinovac vaccines pa lamang ang nabibigyan ng FDA ng EUA para magamit ang kanilang mga bakuna sa bansa kahit nasa development stage pa rin ang mga ito.

Isa pang manufacturer, ang Chinese firm na Sinopharm ang nag-aplay na para sa EUA sa FDA sa kabila na nabig­yan ito ng ‘compassio­nate permit’ makaraang ilang tauhan ng pamahalaan at militar ang unang mabakunahan nito.

Para masiguro ang kaligtasan ni Pangulong Rodrigo Duterte, lilimitahan ng Presidential Security Group (PSG) ang bilang ng mga tao na lalapit sa Pangulo sa mga event na dadaluhan nito sa Malakanyang.

Ayon kay Cabinet Secretary Karlo Nograles, hindi basta-basta makakalapit ang mga tao sa Pangulo at kabilang sa safety measures na ipinapatupad ng PSG ay ang pagbabawal sa pagkuha ng litrato kasama ang Pangulo at pagsasailalim ng mga bisita sa COVID-19 test at symptoms checks gayundin ang pagsusuot ng face masks at social distancing.

Noong nakaraang linggo ay limang events lang ang dinaluhan ng Pangulo kabilang dito ang pagdalo sa turnover ng Sinovac at AstraZeneca vaccines, inauguration ng school buildings sa Bulacan at Valenzuela.

Gayundin ang meeting ng anti-insurgency regional task force sa Cagayan de Oro at ang meeting sa go­vernment’s pandemic task force at sa mga miyembro ng gabinete.

Tinatayang 16,487 ang naitalang tourist arrival sa Boracay noong nakaraang buwan na nasa gitna pa rin ng kinakaharap na pandemya.

Batay sa datos mula sa Malay Municipal Tourism Office, 63.36 percent o 10,446 sa kabuuang bilang ng mga nagbakasyon sa isla ay mula sa National Capital Region (NCR).

Sumunod dito ang CALABARZON (Cavite-Laguna-Batangas-Rizal-Quezon) na may 2,984 tourist arrival; at sa Western Visayas na umabot sa 1,741.

Kabilang sa Top 10 visitors ng Boracay ay mula sa Central Luzon na may 966 tourist arrival; Central Visayas na may 78; Ilocos Region, 52; Northern Mindanao at Cagayan Valley na may tig-34; Cordillera Administrative Region, 33; Bicol 31; at Davao na may 22 tourist arrival.

Dagdag pa nito, majority sa mga turista ay may edad na 22 hanggang 59-anyos na may kabuuang bilang na 14,019 arrivals; habang 2,174 tourists naman ang may edad mula zero month old hanggang 21-anyos; at nasa 294 ang mga senior citizen.

Naalarma ang mga healthcare workers ng Philippine General Hospital (PGH) makaraang biglaang sumirit ang kaso ng COVID-19 kabilang ang isang kaso ng South African variant.

Sinabi ni PGH Spokesperson Dr. Jonas del Rosario na nakapagtala na ng 105 bagong kaso ng COVID-19 nitong nakaraang Sabado. Ito na ang pinakamalaking bilang na naitala sa nakalipas na apat na buwan sa naturang pagamutan.

Sa impormasyon na ipinarating ng Philippine Genome Center (PGC) sa PGH, sa 30 samples na kanilang sinuri ay isa ang nagpositibo sa South African variant. Nasa 15 healthcare workers na rin umano ang infected ng COVID-19 mula Marso 1 hanggang 4.

Dahil dito aniya, nagsasagawa na ang PGH ng malawakang contact tracing, testing at pag-qua­rantine sa kanilang mga empleyado na na-exposed sa mga pasyente.

Sinuspinde na rin ang ‘clinical rotations’ ng mga medical clerks at interns para maiwasan na mahawa rin sila ng virus.

Ang lahat naman ng kanilang eligible staff ay pinayuhan nang magpaturok ng COVID-19 vaccine upang madagdagan ang kanilang proteksiyon laban sa virus.

Pansamantala na ring sinuspinde ang elective surgical procedures habang ang outpatient consultation ay dapat isagawa sa pamamagitan ng telemedicine. Hindi rin muna tatanggap ngayon ng ‘walk-ins’ ang kanilang outpatient department.