NANGANGAMOY hiwalayan o hiwalay nga nga ang magkarelasyon na sina Devon Seron at Kiko Estrada.

Naka-off ang comment section ng Instagram post ni Devon sa post niyang “The tounge may hide the truth but the eyes never.” Marami ang naka-get na patama ito ni Devon sa boyfriend.   Nasundan pa ng post din ng kapatid ni Devon na nag-post ito ng picture ng heaven at may caption na “This doesn’t suit you” at kasunod ang picture ng hell na “This suit you.”

Ipinagpapalagay ito ng netizens na give-away ang clue. Ang picture ng heaven bilang si Heaven Peralejo raw na siyang kasama sa lock-in taping ni Kiko at balitang-balita na ngang third party sa mukhang break-up na nga nina Kiko at Devon.

Naku ha, una, mukhang marami ang nagaganap din na “milagro” sa lock-in taping. Pangalawa, pagkatapos ng chakang isyu kay Heaven kaugnay ng diumano’y panghihingi nito ng tulong/pera kay Manny Pacquiao (ama ng ex-boyfriend niya) at kahit paano, medyo na-redeem siya dahil itinanggi ito ni Jinkee Pacquiao, heto’t kontrabida ang tingin sa kanya ng netizens bilang lumalabas ngang third party raw.

Eh, once you’re the reason of any break-up, parang maka-recover man, matagal sa galing at pagka-imbyerna ng netizens huh.

At pangatlo, strike two na rin si Kiko dahil bigla rin nabuhay ang short-lived romance nila ni Barbie Forteza noon at si Kiko rin ang tinuturong dahilan bakit hindi ito nagtagal.

In short, medyo nakakabawi sana siya ngayon sa relasyon nila ni Devon na kaya naman pala niyang mag-alaga ng relasyon, and yet here it is…

Pero sa lahat ng ito, kuhang-kuha ni Devon ang simpatiya ng netizens. At karamihan sa comments sa kanya, “Love yourself Devon.” “So many people love you. Remember that.” “You will get through this. Hindi mo deserve ang ganyang lalaki.”

Naging kapansin-pansin na rin kasi na bigla raw nawala na ang mga pictures nila ni Kiko sa Instagram nito.

***

PURING-PURI ni Direk LA Madridejos si Sanya Lopez sa siyang gumaganap na nga bilang Yaya sa bagong primetime series ng GMA-7 na First Yaya.    

Alam naman ng lahat na ang Kapuso Primetime Queen na si Marian Rivera talaga ang orihinal sana sa role, pero ito na mismo ang nag-beg-off.

Sabi nga ni Direk LA, “Una po, hindi naman po talaga siya kung sino ang gaganap na First Yaya. Kumbaga, ang kuwento ni Melody ay kuwento ni Melody. Hindi ni Marian o kung sino man.”

Isa rin naman daw siya sa mga unang tinawagan ni Marian na hindi niya ito magagawa at bumilib daw siya kay Marian do’n, lalo na sa dahilan kung bakit hindi nito magagawa.

Sey pa ni Direk, “Kay Sanya, masaya ako sa kung ano napanood niyo at sa performance ni Sanya. Masaya ko hindi lang sa kung paano siya umarte kung hindi kung paano siya tumatanggap. 

“I’m really happy with Sanya. Minahal niya yung trabaho at wala siyang mentality na hindi naman ako yung una sa project, wala siyang ganun. Basta siya, ibibigay niya yung best niya.”

Masaya rin daw si Derek LA sa nakita niyang chemistry sa pagitan nina Sanya at Gabby Concepcion na siyang gumaganap naman bilang Presidente ng bansa.

Sa Lunes, March 15 na sa GMA Telebabad ang pagsisimula ng First Yaya.

***

TATLO sa mga Kapuso stars ang pinarangalan ng 2^nd VP Choice Awards (VPCA) ng Village Pipol Magazine noong March 6.

Sa pamamagitan ng isang virtual ceremony ginanap ang awarding. At sina Alden Richards, Jennylyn Mercado at Sofia Pablo ang nakatanggap ng karangalan.

Nagwagi ang December 2020 Village Pipol cover ni Alden na “The End/The Start: A Decade of Reflections with Alden Richards” ng cover of the year.

Si Sofia naman, panalo naman ang February 2020 issue niya sa exclusive feature bilang “In the Making” ng Spotlight of the Year.

At si Jennylyn bilang TV Actress of the Year dahil sa pagganap niya bilang Dra. Maxine sa Descendants of the Sun.

     Bukod sa mga artista, kinilala rin ng VPCA ang mga patok na brands at mga individual na namumukod-tangi sa kani-kanilang karera. (ROSE GARCIA)

NAGBAGO na pala ng plano si Kris Aquino kung saan siya susunod na lilipat ng tirahan. 

Kung dati ang gusto niya ay bumili ng isang beachfront house, na titirahan niya ng ilang buwan, hanggang sa makahanap siya ng susunod na titirahan para malayo siya sa city.

At ang balak niya, ay bibisitahin na lamang niya every six weeks ang panganay niyang si Josh, na nakatira na sa Tarlac, kasama ni former President Noynoy Aquino, at ayaw nang sumama sa kanila ng bunso niyang si Bimby.

Ngayon ay nag-desisyon na si Kris na gusto na niyang permanently, manirahan na sa kanila sa Tarlac. Marami na siyang kinu-consder na locations doon, dahil gusto na rin niya talagang lumayo sa city.

   “Cards on the table, I was readying to switch my voter’s registration to Sitio Alto, Barangay Central, Tarlac,” Instagram post ni Kris last Monday, March 8.

Magbago pa kaya ang plano ni Kris?

***

NAG-CELEBRATE ang aktor na si Gerald Anderson ng kanyang 32^nd birthday kasama ang 300 Aeta families sa Lupang Pangako Resettlement Area in Barangay San Agustin in Iba, Zambales, at siyempre pa, kasama ang kanyang love na si Julia Barretto.

Ang relief operation ay pinost ng Philippine Coast Guard (PCG) sa kanilang Facebook account, dahil sila ang tumulong kay Gerald sa pagdi-distribute ng mga basic commodities tulad ng bigas, canned goods, instant noodles, biscuits, coffee, chocolate drink at supplies for personal hygience.

Sumapi pala si Gerald sa Philippine Coast Guard on December, 2016, may rank siyang Lieutenant Commander, at officially part of the agency’s K9 Special Support Squadron.

Nagpasalamat si Gerald sa PCG Public Affairs led by Commodore Armand Balilo, PCG Logistics Systems Command, PCG Station Subic, and the World Vision Philippines na siyang naglipat sa may 300 Aeta families from Botolan, Zambales to Lupang Pangako Resettlement Area, sa maayos at matagumpay na relief operations.

***

SUNUD-SUNOD nang nagtatapos ang mga GMA afternoon prime at primetime teleseryes, kaya naman excited na rin ang mga netizens na malaman ang mga kaganapan sa bawat serye na magtatapos na.

Tinututukan tuwing 2:30 PM ang Magkaagaw nina Sheryl Cruz, Sunshine Dizon, Klea Pineda at Jeric Gonzales dahil gusto nilang malaman kung paano ipagtatanggol ni Clarisse (Klea) ang karapatan niya sa asawang si Jio (Jeric) at patunayan ang mga kasalanan ni Veron (Sheryl) sa kanya at sa kanyang inang si Laura (Sunshine).

Kasunod na ring magtatapos ang Bilangin ang Bituin Sa Langit nina Ms. Nora Aunor, Mylene Dizon, Kyline Alcantara, Zoren Legaspi, Ina Feleo, Yasseer Marta at Isabel Rivas.

Maraming revelations na magaganap sa mga tauhan ng serye na dinidirek ni Laurice Guillen, na napapanood at 4:15 PM sa GMA-7.

At sa dami rin ng mga bagong teleseryes ng GMA Network, anu-ano kaya ang ipapalit sa dalawang afternoon prime at sa dalawang primetime telebabad na Anak Ni Waray Vs. Anak ni Biday na magwawakas na ngayong gabi at Love of My Life na nasa last two weeks of airing na? (NORA V. CALDERON)

MULING nagsanib-pwersa ang Society of Philippine Entertainment Editors (SPEEd) at ang Film Development Council of the Philippines (FDCP) para sa ikaapat na edisyon ng EDDYS (Entertainment Editors’ Choice) na magaganap sa Marso 22.

Sa ikatlong pagkakataon, buo pa rin ang suporta at tiwala ng FDCP sa SPEEd, pati na rin sa EDDYS, ng pamunuan ni Chairperson at CEO Liza Diño.

Virtual idaraos ang 4th EDDYS kung saan magtatagisan ng galing at husay ang mga de-kalibreng pelikulang Filipino na ipinalabas sa iba’t ibang platforms sa kabila ng Covid-19 pandemic. Labing-apat na kategorya ang paglalabanan, kabilang na ang Best Picture, Best Director, Best Actress at Best Actor.

Worldwide ito pwedeng mapanood sa pamamagitan ng streaming sa iba’t ibang platforms, tulad ng SPEEd Facebook page, sa YouTube channel ng mga miyembro ng SPEEd at sa official FDCP channel (fdcpchannel.ph).

Bukod sa FDCP, magiging katuwang din ng SPEEd sa pagdaraos ng 4th edition ng Entertainment Editors’ Choice bilang major sponsors ang Toktok courier service/delivery app at ang Beautederm Corporation ni Rhea Anicoche-Tan.

Makikipagtulungan din sa awards night ng SPEEd ang San Miguel Corp., Tiger Crackers at Smart Shot, kasama rin sina Speaker Allan Lord Velasco, Raffy Tulfo, Willie Revillame at si Cong. Nina Taduran ng Patrylist na ACT-CIS.

Tulad ng mga nakaraang taon, ang auditing firm pa rin nina Juancho Robles (Chan Robles & Company, CPAs) ang mamamahala sa pagbibilang ng mga boto para sa ikaapat na edisyon ng EDDYS.

Sa Lunes, Marso 15, lalabas ang listahan ng mga nominado sa acting at technical categories. Bukod dito, ilulunsad ng SPEEd ang Isah V. Red Award bilang pagkilala at pag-alala sa yumaong founding president ng grupo na si Isah V. Red.

“This recognition is given to individuals like him — a dynamic and spirited renaissance man with a deep love for God, country and community — who beyond the realm of entertainment has so enriched and made a difference in the lives of many, in his most colorful, gregarious and inimitable way,” ayon sa SPEEd President na si Ian Fariñas.

Unang tatanggap ng IVR award sina Senator Ramon ‘Bong’ Revilla Jr., Angel Locsin, Kim Chiu, Ramon Ang, Rhea Anicoche-Tan at Claire de Leon-Papa para sa kahanga-hanga at walang katulad na pagbabahagi ng tulong sa mga Filipinong naapektuhan ng global health crisis.

Ang EDDYS Icon awardees naman ngayong 2021 ay sina Gloria Sevilla, Ronaldo Valdez, Pilar Pilapil, Boots Anson-Rodrigo, Gina Pareño, Dante Rivero, Tommy Abuel, Caridad Sanchez, Joel Lamangan at Ricky Lee.      Samantala, ang recipients ng EDDYS special awards na Joe Quirino Award ay ang TV-radio host-columnist na si Lolit Solis; Manny Pichel Award, entertainment columnist Mario Bautista; Rising Producers’ Circle, Blacksheep Productions; Producer of the Year, The IdeaFirst Company.

Bibigyan naman ng posthumous recognition sina Peque Gallaga, Tony Mabesa, Menggie Cobarrubias, Ramon Revilla Sr. at Tony Ferrer.

Ang pagbibigay-parangal ng SPEEd ay isang paraan para hikayatin, lalong pataasin ang morale at patuloy na magbigay-inspirasyon sa Filipino filmmakers, producers, writers, actors at iba pang kasama sa pagbuo ng isang matino at de-kalidad na pelikula. Ang SPEEd ay samahan ng mga entertainment editor ng major broadsheets at tabloids sa bansa. (ROHN ROMULO)