DAHIL nauuso na naman ang mga sexy movies, handa raw ang Kapuso hunk na si David Licauco na subukan ito.

May malaking advantage si David dahil maraming netizen na parating inaabangan ang mga sexy pictorial niya for Bench Body. Kung sakaling gumawa ng sexy movie ito, tiyak na maraming beki ang manonood nito, mapa-big screen or streaming.

“Bakit naman hindi? Nag-usap naman kami ng manager ko na puwedeng iyon na ang next step sa career ko. Kung magpapa-sexy ako, gusto ko all out na. Yung ipapakita ko na lahat, ‘di ba? Para walang mabitin!” tawa pa niya.

Sa ngayon daw, pa-wholesome muna si David sa mga susunod na projects niya sa GMA.

“Gusto ko munang sagarin ang pagpapa-cute sa mga teleserye. May mga roles pa akong gustong gawin on TV at may mga gusto rin akong makatrabaho pa. Like sina Barbie Forteza and Bea Alonzo.

“Si Barbie, nakasama ko siya sa ‘Heartful Cafe’. Marami akong natutunan sa kanya na paraan sa pag-arte. Si Bea naman, fan ako ng loveteam nila ni John Lloyd Cruz. Tsaka magaling umarte si Bea kaya gusto ko rin siyang makasabay sa pag-arte.”

Kabilang pala si David sa pinag-renew ng kontrata ng GMA Artist Center.

***

NAIKUWENTO ni LJ Reyes na patuloy ang communication ng panganay niyang si Aki sa biological father nitong si Paulo Avelino.

Noong magkaroon ng pandemic, parati raw nag-uusap ang dalawa na ikinatuwa ni LJ.

“Hindi na dumadaan sa akin. Diretsong tumatawag si Paulo kay Aki. Natuwa ako na nandoon ang concern niya kay Aki. Lagi silang nagkukumustahan.

“Pinapabayaan ko lang kasi Aki is turning 11-years old na at kailangan makilala niya ng husto ang father niya.”

Nag-renew si LJ ng kontrata with GMA Artist Center at thankful siya sa pag-alaga at pag-intindi sa kanya ng GMA.

“It’s been 17 years since I became a talent of GMA after StarStruck 2. I am thankful sa pag-alaga ng GMA sa akin na minsan nahihiya na ako sa kanila. 

“Naging supportive sila noon pang nag-aaral ako hanggang sa naka-graduate ako. Ngayon ay supportive pa rin sila sa akin when it comes to the security and health of my family.”

May usapan daw sila ng partner niyang si Paolo Contis na hindi sila sabay tatanggap ng project para may isa sa kanilang maiwan sa mga bata.

***

PATULOY pa rin daw nakakatanggap ang Kapuso Power Diva na si Jessica Villarubin ng bashing sa social media.

Kung noon daw ay sobra siyang naaapektuhan ng mga panlalait sa kanya, ngayon ay natuto na raw siyang dedmahin ang mga ito.

“Hindi po nawawala ang bashers talaga. Kahit ano pa po ang gawin natin, may sasabihin pa rin silang hindi maganda. Ngayon po, hindi na ako masyadong apektado tulad noon.

“Natutunan ko na rin po ang huwag na lang basahin yung mga comments nila sa akin. Naka-focus na lang po ako sa positive side ng buhay,” sey ni Jessica.

Ang positibo naman na nangyayari kay Jessica ay ang pagiging inspirasyon niya sa maraming tulad niya na kontesera at minamaliit. Ngayon ay maraming humihingi ng advise sa kanya para matupad ang pangarap nila.

“Nakakatuwa lang po na maraming nagme-message sa akin na humihingi ng advise, inspiration daw po nila ako para maabot ang mga pangarap nila. Yun po ang nakakabigay ng ngiti sa akin araw-araw. “Knowing na may mga tao pala na napapalakas ko ang loob at lumalaban para maabot nila ang gusto nila sa buhay. Lagi ko namang sinasabi na maniwala sila sa sarili nila at magdasal sa Panginoon. Walang imposible kay God,” diin pa niya.

Isa si Jessica sa pinapirma ng GMA Artist Center bilang official talent ng Kapuso network. Available for streaming sa ilang music platforms ang kanyang dalawang singles under GMA Music na “Beautiful” and “Ako Naman”.

(RUEL J. MENDOZA)

TIYAK na ikalulungkot ng mga fans ni Willie Revillame at mga tagasubaybay ng daily program na Wowowin, kung iiwanan na niya ang show, tulad nang ipinahiwatig niya sa kanyang post. 

Sa ngayon ay hindi pa malinaw ang sinabi niya na may matindi siyang pinag-iisipang desisyon, pero sana raw ay ipagpatuloy ng GMA Network ang ganoong show na tutulong sa marami nating mamamayan na nangangailangan.

May mga nagtatanong kung may sakit daw ba si Willie, dahil noong isang araw na nag-report siya sa show, sinabi niyang paggising niya ng umaga, wala na siyang boses, kahit anong pilit niyang magsalita, walang boses na lumabas, kaya maghapon daw siyang hindi nagsalita, at nagpasalamat siya sa Diyos na nang mag-report na siya sa show ay may boses na siya.

Isa rin kaya sa pinag-iisipan ni Willie ay kung tutuloy siyang kumandidato sa darating na Election 2022?

Matagal na kasi siyang kinakausap ni President Rodrigo Duterte, na kumandidato sa kanilang partido.

Kaya, hintay-hintay na lamang tayo sa magiging final decision ni Willie, kung anuman iyon, ay tiyak na sa ikabubuti ng kanyang mga kababayan.

***

KATATAPOS lamang nag-renew ng contract niya si Kapuso actress Max Collins sa GMA Network at sa GMA Artist Center.

At sinagot na rin niya ang tanong kung hiwalay na sila ng asawang si Kapuso actor Pancho Magno. Napapansin kasi ng mga netizens na hindi na tulad nang dati na laging nagpo-post sina Max at Pancho sa kani-kanilang Instagram account.

Madalas din laging sina Pancho at ang one-year old son nilang si Skye ang magkasama sa picture.  Nag-post si Max ng picture nila ni Skye nang mag-celebrate ng birthday ang anak last July 7, wala si Pancho dahil may work ang actor.

Ayon kay Max, nagdesisyon sila ni Pancho na gawing private na ang buhay nila kaya inihinto rin nila ang kanilang vlogs. Nagpasalamat din si Max na nagkaroon siya ng very supportive husband na naiintindihan kung ano ang gusto niya sa kanyang career.

Sa ngayon ay naka-lock-in taping na siya muli ng upcoming teleserye nilang To Have And To Hold na makakasama niya sina Rocco Nacino at Carla Abellana.

Sexy nga ba ang role na gagampanan ni Max sa serye?

***

NAPAPANOOD na sa The World Between Us na sina Alden Richards, Jasmine Curtis-Smth at Tom Rodriguez ang gumaganap sa role nila bilang sina Louie, Lia at Brian, respectively, at magaganda ang feedbacks ng acting nila sa mga netizens.

Kasabay na rin na tumanggap ang show ng positive feedbacks sa pilot episode na isa sa pinuri nila ang cinematography.

sabi ni @itsmeDan, “lupet ng cinematography at video editing ng pagkabundol scene (ni Glydel Mercado), iba kayo!” @Cade “my mom was watching this new Kapuso series when I enter our house. And guess what? Namangha at nagulat ako because of its cinematography! “It’s like I am watching some K-drama series. It was awesome for its pilot episode.  Kudos to GMA and actors!”

Sabi naman ng iba, “movie feels and the texture I like,” “can we talk about the motion graphic intro ng #TheWorldBetweenUs, ang ganda!”     “pwede nang makipagsabayan sa Kdramas, pang-Netflix ang dating, yung tipong maipagmamalaki mo na gawang Pinoy.”

Nagpasalamat ang production sa patuloy na magagandang feedbacks na natatanggap nila.

Napanonood ang TWBU gabi-gabi, pagkatapos ng 24 Oras.

(NORA V. CALDERON)