Ang Diyaryong Pinagkakatiwalaan
Inilampaso ng Phoenix Suns ang Washington Wizards, 118-98.
Dinomina ang Suns players ang laro sa pangunguna nina Deandre Ayton, JavVale McGee at Chris Paul upang itala ang kanilang ika-23 panalo.
Dahil dito napantayan na ng Suns ang Warriors sa pagiging top team ngayon sa NBA.
Mula noong Oct. 27 umabot na sa 22 ang naipanalo ng Suns mula sa huling 24 games.
Nagposte ng 17 points si McGee, 15 kay Ayton at meron namang 12 points at six assists si Paul.
Dumagsa ang libu-libong donasyon sa isinagawang ‘donation drive’ ni Manila City Mayor Isko Moreno para sa mga pamilyang nasalanta ng bagyong Odette sa Visayas at Mindanao.
Daan-daang sako ng bigas at mga donasyong pagkain ang dinala ng mga may mabubuting-loob na mamamayan sa repacking station sa P. Noval Street sa Maynila na dinagsa rin ng mga volunteers.
Pinasalamatan ni Moreno ang mga donors at kaniyang mga tagasuporta sa pagtugon sa kaniyang panawagan ng tulong sa mga kababayan.
Nitong Biyernes lamang inilunsad ni Moreno ang “Tulong ng Manilenyo sa mga Nasalanta ni Odette donation drive” kasabay ng apela sa mga negosyanteng Manilenyo na mag-ambagan.
“Maraming Salamat sa mga nagpadala ng tulong! Tuloy-tuloy po ang ating isinasagawang Bayanihan para sa mga kababayan nating nasalanta ng Bagyong Odette sa Visayas at Mindanao,” ayon kay Moreno.
Una na ring inaprubahan ng Sangguniang Panglungsod sa pangunguna ni Vice-Mayor Honey Lacuña ang pagpapalabas ng P2.5 milyong pondo na itutulong sa mga nasalanta.
Hahatiin ito ang P1 milyon para sa Cebu, P500,000 sa Bohol, P500,000 sa Leyte, at P500,000 sa Surigao del Norte. (Bishop Jesus “Jemba” M. Basco)
Inanunsiyo ngayon ng Brooklyn Nets na papayagan na rin nilang makalaro ang kontrobersiyal na All-Star guard na si Kyrie Irving.
Kung maalala mula nang magsimula ang NBA season ay hindi na nakalaro si Irving dahil sa mahigpit na patakaran ng New York laban sa mga players na hindi pa nagpapabakuna laban sa COVID-19.
Nilinaw naman ng Brooklyn na papayagan lamang nila si Irving bilang part-time player sa mga games na gagawin sa labas ng New York at Toronto.
Ginawa ng Brooklyn ang hakbang dahil na rin at umabot na sa pitong players ang hindi nakakapaglaro bunsod ng injuries at pag-quarantine sa mga ito kasama na ang isa pang superstar ng Nets na si James Harden.
Kabado rin ang koponan lalo na at sila ang top team sa Eastern Conference ay mawawala pa ang dating MVP na si Kevin Durant upang pagpahingahin muna.
Ang next road game ng Nets ay sa Dec. 24 laban sa Blazers.
NAG-ABISO sa mga motorista ang Department of Public Works and Highways (DPWH) na hindi pa rin maaaring madaanan ang walong kalsada habang limitado ang access ng limang pang kalsada dahil sa pagbaha, landslide, bumagsak na tulay at soil collapse o pagguho ng lupa.
Ayon sa Department of Public Works and Highways-Bureau of Maintenance (DPWH-BOM) ang mga saradong kalsada ay ang Puerto Princesa North Road, section sa Langogan Bridge at iba pang section sa Brgy Langogan, Puerto Princesa City sa Palawan;Daang Maharlika sa Southern Leyte; Misamis Oriental – Bukidnon – Agusan Road sa Brgy. Siloo at Brgy. San Luis. Malitbog, Bukidnon; Butuan City – Cagayan de Oro City – Iligan City Road, Old Mambayaan Bridge; Sta. Filomena – Bonbonon – Digkilaan, Rogongon Road; Sitio Salinsing, Brgy. Rogongon, Ilagan City; Dinagat-Loreto Road Mahayahay, San Jose, Dinagat Islands;Bayugan-Calaitan-Tandag Road sa Brgy. Sto. Nino, Bayugan City, Agusan del Sur; Bayugan-Esperanza Road, Brgy. Nato at Brgy Hawilian, Esperanza, Agusan del Sur.
Limitado naman ang access sa Anini-Y – T. Fornier – Hamtic Road, sa Antique, Jct. SH Impasug-ong – Patulangan By-Pass Rd, sa Bukidnon; Dinagat-Loreto Road , Mahayahay, San Jose, Dinagat Islands; NJR Bah-Bah-Talacogon Rd., sa Brgy, Lucena, Prosperidad, Agusan del Sur; at Butuan City-Pianing-Tandag Rd. Brgy. Anticala, Butuan City, Agusan del Norte.
Nasa 29 kalsada naman ang nalinis na at binuksan na ng DPWH Quick Response Teams mula sa Regional Offices at District Engineering Offices sa mga apektadong lugar simula December 16, 2021.
Ang partial cost ng pinsala sa public infrastructure ay nanatiling aabot sa P308.9 milyon. GENE ADSUARA
PANGANGASIWAAN ni DSWD Secretary Rolando Bautista ang Crisis Management Group na tututok sa mabilis na paghahatid ng kailangang tulong para sa mga residenteng lubhang tinamaan ng nagdaang bagyong Odette.
Ayon kay Acting Presidential Spokesperson at Cabinet Secretary Karlo Nograles, partikular na pinatututukan ni Pangulong Rodrigo Roa Duterte kay Bautista ang Siargao, Dinagat Island at ang Surigao city.
Makakatulong ni Secretary Bautista si NDRRMC Executive Director Ricardo Jalad na kapwa tututok sa agarang paghahatid ng tulong sa mga sinalanta ng kalamidad.
Ani Nograles, nais ng Pangulo na maging paspasan ang pagpapadala ng tulong gaya ng tubig, food at non- food items gayundin ng kailangang tents.
Sinabi pa nito na magkakaroon na rin ng assessment sina Bautista at Jalad para sa posibilidad na pagsasagawa na ng food at cash for work. (Daris Jose)
Aabot lang sa 203 ang bilang ng bagong COVID-19 cases sa Pilipinas matapos na 41 laboratoryo sa bansa ang sinuspinde ang kanilang operations at hindi nakapagsumite ng datos dahil sa Bagyong Odette.
Sinabi ng Department of Health (DOH) na 395 pa ang gumaling sa sakit, at 64 ang nadagdag sa mga nasawi.
Ang active cases naman sa ngayon ay nasa 9,729 ang bilang, kung saan 42.9 percent ang mild o asymptomatic.
Sa kabuuan, mayroon na ang Pilipinas na 2,837,577 confirmed COVID-19 cases.
Sa naturang bilang, 2,777,109 ang gumaling na pero 50,739 naman ang namatay.
Mistulang ikot ng washing machine ang hangin ng Bagyong Odette.
Ito ang pagsasalarawan ni Jeffrey Crisostomo, public information chief ng Dinagat Islands nang hambalusin ni Odette ang lalawigan.
“Para siyang washing machine na paikot ka. ‘Di mo alam kung saan ka tatakbo kung matamaan ka ng ganu’ng klaseng hangin,” ani Crisostomo.
Kasunod nito, sinabi ni Crisostomo na 10 katao ang iniwang patay ni Odette habang nasa 90 hanggang 95 porsiyento naman ang mga bahay ang winasak.
Tinatayang nasa 128,000 katao ang naapektuhan.
Ang Dinagat Island ang ikalawang binayo ni Odette noong Huwebes matapos ang pananalasa sa Siargao Island.
Ayon kay Crisostomo, kailangan ng Dinagat Islands ng malinis na tubig at pagkain.
Sinisikap din nilang maibalik ang linya ng komunikasyon at kuryente sa Dinagat Islands upang mas maging madali at mabilis ang pagtugon at koordinasyon ng tulong sa mga nasalanta. (Daris Jose)
Kaagad nang ipapamahagi sa mga apektadong pamilya sa Bohol ngayong araw ang mga relief supplies na dala ng BRP Tubbataha.
Ito ay matapos na makarating na sa Central Visayas ang naturang barko ng ulan ang 270 sako ng bigas, 37 piraso ng tarpaulin, apat na drum ng gasolina, apat na solar sets, dalawang generator sets, at kahun-kahong canned goods at instant noodels.
Kaagad din naman tinurn-over ang nasabing relief supplies sa Philippine Coast Guard District Central Visayas para kaagad din itong maibigay sa mga sinalanta ng Bagyong Odette sa Bohol ngayong araw.
Nauna nang naglabas ng direktiba si Pangulong Rodrigo Duterte na gamitin lahat ng assets at resources ng pamahalaan para makatulong sa agarang pagbangon ng mga pamilyang nabiktima ng Bagyong Odette.
Aabot na sa P7.3 million halaga ng family food packs ang naipamahagi ng Department of Social Welfare and Development (DSWD) sa mga apektado nang pananalasa ng Bagyong Odette.
Sa Laging Handa public briefing, sinabi ni DSWD spokesperson Irene Dumlao na bukod sa mga family food packs mayroon ding P1.1 million halaga ng sleeping kits at beds na ipinamamahagi ang kanilang kagawaran.
Sa tulong ng Philippine Army at private shipping company ay naipahatid na ng DSWD ang mga family food packs sa mga probinsya ng Dinagat Islands at Siargao.
Bukod sa mga relief supplies na nanggagaling sa kanilang central office, sinabi ni Dumlao na mayroon ding mga stockpiles ang iba’t ibang opisina ng DSWD sa rehiyon.
Sa katunayan, ang kanilang opisina sa Region 9 at Region 12 ay nakapaghatid na rin ng augmentation sa mga field offices sa Caraga region.
Sa ngayon, patuloy aniyang namamahagi ang kagawaran ng mga family food packs sa mga apektadong residente sa Eastern at Western Visayas. (Daris Jose)