• July 3, 2024
  • Search in People's Balita

  • Ang Diyaryong Pinagkakatiwalaan

 

Archive for January 26th, 2022

Peak ng COVID-19, naabot na ng Metro Manila – Duque

Posted on: January 26th, 2022 by @peoplesbalita No Comments

NAG-PEAK na o umabot na sa pinakamataas na bilang ang COVID-19 sa Metro Manila makaraan ang patuloy na pagbaba ng mga kaso sa mga nakalipas na araw.

 

 

“Lumalabas nag-peak na. Nakikita natin na ilang araw nang sunud-sunod na bumababa ang kaso sa NCR at lumiliit ang por­syentong inaambag nito sa ating total caseload,” ayon kay Health Sec. Francisco Duque III sa Laging Handa public briefing.

 

 

Nakahanda ang Metro Manila sa pagbaba sa COVID-19 Alert Level 2, ayon pa kay Duque.

 

 

Sinabi ni Duque na maganda ang vaccination coverage sa Metro Manila at sumusunod naman ang mga mamamayan sa minimum public health standards.

 

 

Aniya, mahalaga ang mataas na vaccination co­verage at ang pag-iingat at pag-iwas ng mga mamamayan sa mga sitwasyon kung saan maaari silang mahawa.

 

 

Pero sinabi rin ni Duque na depende pa rin sa mga nakalatag na pamantayan ang pagbaba ng Alert Level 2 katulad ng two-week growth rate at Average Daily Attack Rate (ADAR).

 

 

Kasama rin aniya sa batayan ang healthcare utilization rate na dapat ay mapanatili na nasa low risk classification o mas mababa sa 50% o 49% pababa ang kabuuang bed utilization at ICU utilization rates.

 

 

Posible aniyang pag-usapan ang pagbaba sa Alert Level 2 kung mababa ang severe at critical cases kahit pa tumaas ang bilang ng mga COVID-19.

 

 

Kasalukuyang nasa Alert Level 3 ang buong rehiyon na magwawakas sa Enero 31 kung kailan magdedeklara muli ng panibagong alert level.  (Gene Adsuara)

12-anyos na estudyante natagpuang patay sa Malabon

Posted on: January 26th, 2022 by @peoplesbalita No Comments

PALAISIPAN sa mga awtoridad at sa pamilya ng 12-anyos na Grade 6 student na natagpuang patay habang may nakapulupot na lubid ng duyan sa leeg sa loob ng kanilang bahay sa Malabon City.

 

 

Dakong alas-7 ng gabi noong sabado nang madiskubre ang bangkay ng 12-anyos na estudyante sa loob ng kanyang silid sa ikalawang palapag ng kanilang tirahan sa Barangay Potrero.

 

 

Sa ulat na nakarating sa tanggapan ni Malabon Police chief P.Col. Albert Barot, huling nakitang buhay ang biktima ng kanyang 20-anyos na nakatatandang kapatid na lalaki dakong alas-5 ng hapon ng Sabado sa kanilang tirahan.

 

 

Nang tumawag ang kanilang ama bandang alas-7 ng gabi ay inutusan ang panganay na tawagin ang biktima para kausapin kaya’t umakyat kaagad ang binata patungo sa silid at dito niya nakita ang kapatid na nakadapa at may nakapulupot na lubid ng duyan sa leeg.

 

 

Kaagad niyang tinawag ang kanilang ina na noon ay nagluluto ng pagkain at mabilis nilang isinugod ang biktima, sa tulong ng mga kapitbahay, sa Fatima University Medical Center kung saan siya idineklarang “dead-on-arrival” ng mga doktor.

 

 

Sinabi ni Col. Barot na hinihintay pa nina P/SSgt Mardelio Osting at P/Cpl. Renz Marlon Baniqued, may hawak ng kaso, ang resulta ng isinagawang pag-awtopsiya sa bangkay ng biktima bago magsagawang muli ng pagsisiyasat sa kaso. (Richard Mesa)

PDu30, papangalanan ang ‘most corrupt’ presidential bet bago ang May 9 polls

Posted on: January 26th, 2022 by @peoplesbalita No Comments

SINABI ni Pangulong Rodrigo Roa Duterte na papangalanan niya ang “most corrupt” presidential candidate bago ang national elections.

 

 

Ani Pangulong Duterte, obligasyon niya na ipaalam sa mga mamamayang filipino ang mga bagay na alam niya upang tulungan ang mga ito sa kanilang desisyon.

 

 

Sa kanyang Talk to the People, araw ng Martes, sinabi nito na ang kanyang hakbang ay hindi isang uri ng politicking o pamumulitika kundi ang ipabatid lamang sa publiko kung ano ang kanyang nalalaman base sa impormasyon na natanggap niya at base sa kanyang personal na karanasan.

 

 

“In due time… I will personally name the candidates and maybe what’s wrong with them na kailangang malaman ng tao because you are electing the president. Sino yung pinaka-corrupt na kandidato,” ayon sa Pangulo.

 

 

“Hindi ako namumulitika ; I’m talking to you as your president… Ito kailangan ilalabas ko because we are talking of elections. We are talking of our country and the next rulers so to say,” dagdag na pahayag nito.

 

 

Binigyang diin ng Chief Executive na isa sa mga kandidato sa pagka-pangulo ay “really cannot be a president” habang ang isa pang kandidato ay hindi maaaring iboto sa pagka-pangulo dahil “too corrupt.”

 

 

“Akala lang kasi ng mga tao malinis pero ‘yung mga nag-transact sa business sa kanya, mga official business, pati yung mga Chinese nagreklamo na na masyadong corrupt daw,” aniya pa rin.

 

 

“Sabi ko, ang magagawa ko is to charge him for corruption. Could be under the Revised Penal Code, it could be under Corrupt Practices Act,” ani Pangulong Duterte.

 

 

Sinabi pa ni Pangulong Duterte, hindi siya nagbanggit ng anumang pangalan subalit giit nito na hindi niya ito ginagawa para personal na atakihin ang isang kandidato.

 

 

“Nakita ko lang. Hindi ako nagsabi na marunong ako. From observation, parang taong nakainom. Malaman mo, medya sumobra siya sa limit ng botelya na kaya nya. Tapos mag-away, tapos magtapang magsalita, masakit. Akala niya may utang ang tao sa kanya, ganun yan eh,” ayon sa Punong Ehekutibo.

 

 

“Sabagay, opportunity comes your way, you jump on it. Maybe baka, maybe it’s your destiny to be a president of the republic,” aniya pa rin.

 

 

Hindi naman malinaw kung papangalan ni Pangulong Duterte ang kandidato.

 

 

Gayunpaman, bahala na aniya ang mga Filipino kung paniniwalaan siya ng mga ito sa kanyang sinabi.

 

 

“Ito bahala na kayo, if you want to believe in me, if you still believe me, I will tell you. But if you reject it at ayaw ninyong maniwala, ang masasabi ko lang, bahala kayo. Besides, it’s also your country, it’s not only mine,” aniya pa rin.

 

 

“Kailangan may malaman kayo na alam ko na hindi ninyo alam . Why? Because I am the president and I get all information from everybody, and not only that, [also] from personal experience,” dagdag na pahayag nito.

 

 

Aniya, masyado pang maaga para siya ay magsalita.

 

 

“Maraming nagtatanong, bakit ako hindi nagsasalita. Maaga pa eh. Gawin lang nilang pulutan ‘yung kalaban tapos siyempre ako yung reference point nila,” ani Pangulong Duterte.

 

 

“Pati ako madala sa galit. Mahirap din yan kasi ayaw mo ng away eh. Mag-retire na ako, tahimik na ang buhay ko. But I feel that there are things I would have to reveal to the Filipino people because it’s my job to tell the truth,” aniya pa rin. (Daris Jose)

Dating DFA Sec. Romulo, pumanaw na

Posted on: January 26th, 2022 by @peoplesbalita No Comments

PUMANAW na si dating ambassador at Department of Foreign Affairs (DFA) secretary Roberto ” Bobby” Romulo, araw ng Linggo, Enero 23 sa edad 83.

 

 

Kinumpirma ito mismo ng kanyang pamangkin na si Department of Tourism Secretary Bernadette Romulo-Puyat.

 

 

Si dating DFA Sec. Romulo ay anak ng namayapang statesmans at United Nations General Assembly President Carlos P. Romulo.

 

 

Sinasabing, taong 1989 nang pumasok ito sa gobyerno makaraang italagang ambassador sa Belgium, Luxembourg at Commission of the European Communities.

 

 

Naging DFA Secretary naman siya noong panahon ni dating Pangulong Fidel V. Ramos.

 

 

At naging chairman siya ng iba’t ibang organisasyon kabilang ang AIG Philippines Insurance, PETNET, Inc. MediLinkk Network Inc. at Nationwide Development Corporation (NADECOR). (Daris Jose)

DEEP INSIDE MY HEART (Chapter 14) Story by Geraldine Monzon

Posted on: January 26th, 2022 by @peoplesbalita No Comments

NAGULAT si Bernard nang tawagin siya ng matanda sa pangalan niya. Mula rito ay nalaman niyang ito ang ama ni Roden na dati niyang kaibigan at ka-officemate.

Humakbang muli si Bernard palapit sa matanda.

 

“What a small world, kumusta na po si Roden?”

 

“Ahm…maayos naman siya…”

 

“Good. Mabuti naman po at nakilala nyo ako.”

 

“U-Una nag-aalangan ako. Pero ikaw pala talaga si Bernard. Natatandaan mo ba noong dumadaan ako sa opisina nyo dati para magbenta ng tocino at kung anu-ano pa?”

 

“Ah oo nga po, natatandaan ko na!”

 

Nagdadalawang isip pa rin si tatang kung aaminin ba niya kay Bernard ang tungkol kay Angela o hindi. Batid niyang sa oras na malaman ito ni Bernard ay tiyak na hindi nito mapapatawad si Roden at pati siya. Isa pa, kilala niya ang kanyang anak na si Roden. Tiyak ring ikakagalit nito ng husto kapag umamin siya kay Bernard.

Subalit sa kabilang bahagi ng kanyang puso ay sinasabi nitong ito na ang tamang panahon upang gawin niya ang tama. Baka nga kaya muling pinagkrus ang landas nila ni Bernard ay upang magkaroon siya ng pagkakataon na ituwid ang pagkakamaling kanyang nagawa sa pagpapaubaya niya kay Angela sa kanyang anak na si Roden.

 

“Ahm, gusto ko pa ho sanang makipagkuwentuhan sa inyo, kaya lang kailangan ko na rin munang umuwi. Babalik na lang ako bukas after work.”

 

“S-Sige hijo…mag-iingat ka.”

 

Paalis na ulit si Bernard nang muli siyang tawagin ng matanda.

 

“Bernard!”

 

“Po?”

 

“Si Angela…”

 

Natigilan ang lalaki at napayuko.

 

“H-Hinahanap ko pa rin ho siya hanggang ngayon…sila ng anak kong si Bela…”

 

“S-Si Angela…” hindi mai-tuloy tuloy ng matanda ang nais sabihin.

 

Pero naisip niyang baka hindi na ulit siya magkaroon ng pagkakataon kung palalampasin pa niya ang ngayon.

 

“Bernard, may kailangan kang malaman.”

 

Napatunghay si Bernard at muling lumapit sa matanda.

 

“Ano hong kailangan kong malaman?”

 

Huminga muna ng malalim si tatang bago sumagot.

 

“Isinama siya ng anak ko…”

 

Nanlaki ang mga mata ni Bernard. Magkahalong tuwa at galit ang naramdaman niya. Tuwa na buhay talaga si Angela at galit na nasa piling ito ni Roden.

 

“Anong sinabi mo?”

 

“Makinig ka sa lahat ng sasabihin ko Bernard. Sasabihin ko sa’yo ang buong pangyayari mula sa simula kung paano napunta sa amin si Angela.” anang matanda na may bigat ang tinig.

 

Hindi mapigilan ni Bernard ang sarili. Pinitsarahan niya ang matanda.

 

“Siguraduhin mo lang na tama ang lahat ng sasabihin mo, dahil buhay namin ni Angela ang nakasalalay dito!” at saka niya ito pabalyang binitawan.

 

Sa pagitan ng kaba at pangamba ay sinimulan ni tatang ang pagtatapat kay Bernard.

 

“May dinalaw akong kaibigan noon sa Villa Luna nang maganap ang nakakatakot na trahedya. Sa gitna ng mala-delubyong pagbaha ay nakita ko si Angela na kumakawag sa tubig. Pilit kong inabot ang mga kamay niya at nang mahawakan ko siya sa braso ay doon na ako napanatag na nailigtas ko na siya. Subalit sigaw siya ng sigaw at tinatawag niya ang pangalang Bela…nagpalinga-linga ako sa paligid sa pagbabakasakali na makita ko ang Bela na tinatawag niya. Kaya lang wala na akong nakita. Malapit na ring bumigay ang sanga ng punong kinakapitan ko noon kaya nagpasya na akong hilahin na siya palayo sa malalim na bahaging iyon ng lugar. Papunta na kami noon sa evacuation nang madaanan kami ng kotse ni Roden. Isinakay na niya kami at hindi na pinabalik roon. Tuwang tuwa ang anak ko. Masayang masaya siya sa pagkakasagip ko kay Angela kung kaya’t binalaan niya akong walang dapat makaalam niyon kung hindi’y masisira ang relasyon namin bilang mag-ama. Inalagaan namin si Angela pero nanatili itong tulala at palaging isinisigaw ang pangalan ng inyong anak. Araw-araw pinipitpit ng konsensya ko ang puso ko pero nag-aalala naman ako para sa aking anak kung isosoli ko si Angela sa’yo. Hanggang isang araw na gusto ko nang gawin iyon,  naunahan naman ako ni Roden. Paggising ko’y wala na sila ni Angela. May kutob akong sa tiyahin niyang si Fe, na taga isla, doon niya dinala si Angela.”

 

Kumuyom ang mga palad ni Bernard. Walang sabi-sabing isinuntok niya iyon sa gilid na bahagi ng hinihigaang kama ng matanda.

 

“AAAHHH!” sa pagsigaw niya ibinuhos ang tinitimping galit.

 

Samantala.

Napansin ni madam Lucia na nakaayos si Cecilia.

 

“Aba Cecilia, mukhang gumaganda ka yata ngayon, mukha ka ng dalaga talaga!”

 

“Cecille po, at saka bakit mukha ba akong ano dati?”

 

“Mukha kang binata.”

 

“Hays, si lola talaga, sige na po lola babalik na ako ro’n at baka hinahanap na ako ni Lola Corazon.”

 

“Sige balik na. Pero Cecilia, maari bang iwanan mo ang puso mo rito?”

 

“Huh? Anong ibig mong sabihin lola?”

 

“Kilala kita apo, nang higit kaninuman. Ang pag-aayos mo ng iyong sarili ay tiyak na may dahilan. Natatakot lang ako na baka si Bernard ang dahilan na iyon.”

 

Natigilan ang dalaga. Hindi siya nakaimik.

 

“Cecilia, hindi siya, hindi siya ang nararapat para sa’yo.”

 

“Ano po bang pinagsasasabi mo lola, sige na po aalis na’ko.”

 

Habang daan pabalik sa Villa Luna ay iniisip ni Cecilia ang sinabi ng kanyang lola. Napangiti na lang siya sa isiping iyon.

 

Hindi na nagpatumpik tumpik pa si Bernard. Nang makuha niya ang address ng isla mula kay tatang ay agad siyang naghanda sa pagtungo rito. Hindi na muna niya iyon sinabi kay Lola Corazon. Basta ang paalam niya rito ay meron lang siyang importanteng bagay na aasikasuhin.

 

(ITUTULOY)

Booster shot para sa Team Philippines sa SEAG

Posted on: January 26th, 2022 by @peoplesbalita No Comments

HIHILINGIN  ng Philippine Sports Commission (PSC) sa Philippine Olympic Committee (POC) na mabigyan din ng booster shot ang mga national athletes na sasabak sa 31st Southeast Asian Games sa Hanoi, Vietnam.

 

 

Ayon kay PSC Commissioner at Team Philippines Chef De Mission Mon Fernandez, naturukan na ng second dose ng vaccine laban sa coronavirus disease (COVID-19) ang mga atleta. Umaasa si Fernandez na muling pamumunuan ni POC president at Tagaytay City Rep. Abraham ‘Bambol’ Tolentino ang pagbibigay ng booster shot sa mga miyembro ng Phl Team.

 

 

“All our athletes have been vaccinated already. So we’re hoping na ma-work out din ni Cong. Bambol na mabigyan din sila ng booster,” wika ni Fernandez sa POC katulong ang Inter-Agency Task Force (IATF).

 

 

Kamakailan ay inihayag ng Vietnam ang kanilang gagamiting “no vaccine, no entry” policy para sa pagdaraos ng SEA Games sa Mayo 12-25.

 

 

“Ang requirement lang ng Hanoi is two jabs for eve-rybody to be able to get in. So we’re fine with that,” sabi pa ni Fernandez.

 

 

Hangad ng Team Philippines na makopo ang back-to-back overall championship matapos magkampeon noong 2019 edition.

 

 

Bukod sa nasabing vaccine requirement ay hihingan din ng Vietnam organizing committee ng negative RT-PCR test result ang bawat delegation member bago papasukin sa kanilang bansa at paya-gang makalahok sa SEA Games. Ang deadline ng entries by name ay sa Marso 12.

DINGDONG at MARIAN, naging tahimik lang sa halos dalawang linggong pakikipaglaban sa COVID-19

Posted on: January 26th, 2022 by @peoplesbalita No Comments

TALAGANG nanahimik lang ang mag-asawang Dingdong Dantes at Marian Rivera sa loob ng halos dalawang linggo na sila pala ay tinamaan din at nag-positibo sa COVID-19.

 

 

Tila buong household nina Dingdong at Marian ang nag-positive. Pero nang makausap namin si Dingdong at kamustahin, lalo na ang dalawang anak nila na sina Zia at Sixto, alam namin na okay na okay na nga sila at naka-recover na dahil sabi niya, “All good na kami.”

 

 

At sey pa niya, ang bilis nga raw talaga na maka-infect ng omicron.

 

 

Tila sabay rin sila ni Marian na magre-resume na sa kani-kanilang trabaho. Pagkatapos nga maging quiet sa socmed, ngayong Lunes lang din nag-post si Marian.

 

 

Sabi niya, “Good morning! Just about to start my day… thinking about everyone going through a tough time, Sending you all hugs and prayers.”

 

 

      Sa isang banda, pinuri naman si Dingdong ng ilang netizens na dapat daw gano’n talaga, na very real lang, no glitz and glam at hindi na niro-romanticize pa ‘yung talagang situwasyon.  Na-appreciate rin nila na tila informative pa ang video nito regarding mga dapat gawin for isolation and vaccines and booster.

 

 

Pero siyempre, meron din nag-comment na tila paraan din daw ni Dingdong para mai-campaign si Vice President Leni Robredo dahil sa nagpasalamat siya sa ipinadalang OVP COVID care package sa kanila.

 

 

Eh, base sa pagkakakuwento naman ni Dingdong, alam mong natuwa talaga ito na nakatanggap sila ng gano’ng malasakit.

 

 

Sey niya, “Isa rin sa mga mahalagang natanggap namin ay iyong COVID Care Package ng Office of the Vice President.

 

 

      “Napakalaking bagay noon dahil naglalaman ng kumpletong mga gamit na kinakailangan ng isang COVID positive patient. Halimbawa iyong oximeter. Siyempre noong time na iyon, nawawala iyong oximeter namin.

 

 

“Maraming maraming salamat sa OVP at siyempre kay VP Leni sa COVID Care Package na pinadala ninyo. Very, very helpful,”

 

 

      ***

 

 

VERY proud si Senator Bong Revilla sa season 2 ng Agimat ng Agila dahil “yes” agad talaga ang sagot niya nang tanungin namin kung mas nahigitan ba ang season 1.

 

 

“Of course, for every project na ginagawa natin, we really need to surpass the first one. So we really need to surpass the Agimat ng Agila Book 1. So ‘yun talaga ang inambisyon natin, ni Direk Rico Gutierrez at ng GMA.

 

 

      “Makikita niyo naman, mahirap magyabang, pero makikita niyo naman pati sa performance ng mga artistang kasama natin.”

 

 

“I’m very proud of this project at magagaling talaga yung mga kasamahan ko.” Mas hardcore action nga ngayon sa book 2 na si Senator Bong mismo ang gumawa ng mga stunts. At the same time, talagang nag-work-out daw siya for this at makikita rin ang difference ng katawan niya ngayon from book 1.

 

 

      “Talagang nagpakundisyon ako physically at siyempre, we’re not getting any younger. Mga bata itong mga kasabay ko, so kailangan magpakitang-gilas din tayo.

 

 

      “I work out almost every day. I do my boxing and kick boxing. Pati yung mga rolling-rolling na iyan, pagulong-pagulong, nandoon pa rin yung training.”

 

 

At hindi na lang si Sanya Lopez ang leading lady niya rito, si Rabiya Mateo na rin na. Proud si Sen. Bong na na-predict nga raw nila ang pagiging “Superstar” na ni Sanya ngayon.

 

 

When asked kung napi-predict din ba niya itong mangyayari kay Rabiya, sey naman niya, “Kayo ang huhusga niyan. But she’s a very good actress at may chemistry rin kami ni Rabiya. At nakikita ko rin na malayo ang mararating ni Rabiya. Malay mom aging Action Queen din ‘yan.”

 

 

***

 

 

TILA sumusunod sa yapak ng Asia’s Multimedia Star na si Alden Richards o ng actor/restaurateur na si Marvin Agustin ang Kapuso actor na si Ken Chan.

 

 

Nagulat kami nang makausap namin recently lang si Ken dahil ang dami na pala niyang businesses na naipupundar.

 

 

Bukod kasi sa ilang branches niya ng gasoline station, ang iFuel, meron din siyang wellness business at ngayon nga, ang kanyang Café Claus na all-year round Christmas ang theme kaya ang mga food, buong taon din na makakabili ng mga bibingka at puto bubong, even Christmas ham.

 

 

Kaka-open lang ng unang branch nila sa Tandang Sora, pero nalaman namin kay Ken na magbubukas na siya sa Greenhills Promenade ngayong February at sa March, sa Eastwood naman at gayundin sa Tagaytay at iba pang provinces.

 

 

Ten years in the business, pero ang dami na niyang nai-invest. Sabi ni Ken, ang dahilan daw, ang pagiging matipid niyang talaga bukod pa sa goal/pangarap niya raw talaga bata pa lamang ang lahat ng negosyo na ipinundar niya.

 

 

In fairness, bumilib din kami dahil kahit pandemic, hindi ito naging hadlang kay Ken para mag-push lang sa mga businesses niya.

 

 

Kasosyo rin ni Ken ang kaibigan na si Ryan M. Kolton na ayon kay Ken, Hollywood actor raw pero, mukhang na-enjoy ang Pilipinas. After ng restaurant business, naka-set na rin ang pagpasok nila sa pagpo-produce ng pelikula.

(ROSE GARCIA)

‘Di na nasamahan ni Sen. CHIZ papuntang Paris: HEART, aminadong na-stress dahil ‘di na sanay na mag-travel na mag-isa

Posted on: January 26th, 2022 by @peoplesbalita No Comments

NASA Paris na muli si Kapuso actress Heart Evangelista. 

 

 

May caption siya sa Instagram niya bago siya umalis ng Pilipinas, “Saturday (so many typos sorry just so stressed) stressed Saturday because it’s my first time to travel by myself!! Anxiety level is high but my determination and higher!!” 

 

 

Hindi kasi sanay si Heart na magbiyaheng mag-isa. Hindi naman siya masamahan ng husband niyang si Sorsogon Governor Chiz Escudero, dahil magiging busy na ito sa election campaign dahil kandidato siyang Senador.

 

 

Anyway, last three weeks na lamang ang GMA Primetime series ni Heart na I Left My Heart in Sorsogon, with leading men Richard Yap and Paolo Contis at ngayon ay inaabangan na ng mga netizens kung sino ang makakatuluyan ni Celest (Heart) kina Nonito (Richard) at Micoy (Paolo).

 

 

At isa pang hinihintay ng mga viewers ay kung magkakabalikan ba sina Sebastian (Mavy Legaspi) at Tiffany (Kyline Alcantara) sa story at behind din sa camera, dahil ang sweet daw nila laging dalawa, “mas matamis pa sa candy.” Ano nga ba ang real score sa #MavLine?

 

 

Napapanood sila gabi-gabi, after ng 24 Oras sa GMA-7.

 

 

***

 

 

SENATOR Bong Revilla is back as Major Gabriel Labrador of Task Force Kalikasan in Agimat ng Agila in a new Season 2, after ng successful first season last year.

 

 

Sa tanong sa virtual presscon ng pagkakaiba nito sa season 1, “mas maaksiyon ito ngayon, mahirap magyabang, pero makikita nyo na mas pinalaki namin ito, medyo mahirap pero makikita ninyo kung paano ito ginawa ni Direk Rico Gutierrez,” sagot ni Sen. Bong.

 

 

“Siyempre may pressure pa rin, pero we gave it our best, kaya siguradong the viewers will enjoy this.”

 

 

Inamin  ni Sen. Bong na nag-work out, nag-training siya sa boxing, stretching at rolling.

 

 

Alam nang sa simula lamang mapapanood ang dating katambal niya na si Kapuso actress Sanya Lopez, pero masaya si Sen. Bong sa kanya na na-predict daw niyang magiging big star rin.

 

 

Humanga naman si Sen. Bong sa new leading lady niya, si Miss Universe Philippines 2021 Rabiya Mateo na “she’s new but she’s a good actress.

 

 

Sa January 29 na ang season premiere ng Agimat ng Agila, na mapapanood every Saturday, 7:15PM sa GMA-7.

 

 

***

 

 

LIBRE na si Kapuso actor Wendell Ramos dahil tapos na tapos at napapanood na ang GMA Afternoon Prime series na Prima Donnas after Eat Bulaga, kaya naharap na niya niya ang mga business niya at pagtulong sa mga nangangailangan.

 

 

Isa si Wendell sa mga nagbigay ng tulong kay Lolo Narding, 83, ng Asingan, Pangasinan na umano’y nanguha ng manga ng kapitbahay kaya gusto siyang ipakulong.

 

 

Pero naging national news ito kaya maraming tumulong at nakalabas din siya matapos magpiyansa ng P 6,000.

 

 

Personal na dinala ni Wendell ang kabuhayang showcase na ipinost niya sa Instagram para kay Lolo Narding, mga manggang hinog para ibenta, food cart na may pangalan pa ng matanda at mga kahon-kahong paninda, para may pagkunan siya ng pang-araw-araw niyang gastusin at pangangailangan, para rin sa pamilyang kasama niya.

 

 

Caption pa ni Wendell: “Mission accomplished!  Lolo Nardo’s dagdag kabuhayan, munting mga regalo at Negosyo mula po sa amin ng @franchise.bscorp. @ofwfamilyclub at @wendell_meathouse.”

(NORA V. CALDERON) 

Kelot itinumba sa Malabon

Posted on: January 26th, 2022 by @peoplesbalita No Comments

ISANG lalaki na hinihinalang sangkot sa illegal na droga ang namatay matapos barilin ng dalawang hindi kilalang mga suspek sa Malabon City, kamakalawa ng gabi.

 

 

Ayon kay Malabon police chief P/Col. Albert Barot, dead on the spot sanhi ng tinamong tama ng bala sa ulo si Jerome Josue, 27 ng 64 Damson St. Brgy. Dampalit.

 

 

Sa pahayag sa pulisya ng dalawang saksi na sina Mark Anthony Aleta, 27 ng Brgy. 8 Caloocan City at Marlon Bocabo, 29 ng Letre Road, Tonsuya, Malabon City, naganap ang insidente dakong alas-8:20 ng gabi sa kahabaan ng Damson Street.

 

 

Galing sa pagbibisikleta ang dalawang saksi at nagpahinga sa naturang lugar nang makita nila ang biktima, kasama ang dalawang suspek na naglalakad patungo sa lugar ng pangisdaan. Nagsalita pa ang biktima sa mga saksi na tinutugis nila ang illegal na nangingisda sa lugar.

 

 

Ilang minuto ang nakalipas, nakarinig ng putok ng baril ang mga saksi at nakita nila ang dalawang lalaki na tumatakbo patungong Bautista St., Brgy. Dampalit habang naiwan ang nakahandusay na katawan ng biktima.

 

 

Narekober ng rumespondeng mga tauhan ng SOCO sa crime scene ang isang heat-sealed transparent plastic sachet na naglalaman ng hinihinalang shabu, pinatuyong dahon ng marijuana na nakabalot sa foil at patalim mula sa biktima.

 

 

Ani Col. Barot, patuloy ang follow up operation ng kanyang mga tauhan para sa posibleng pagkakaaresto sa mga suspek habang inaalam pa ang motibo sa insidente. (Richard Mesa)

People's Balita.
All rights reserved. © Copyright 2024.