MAAARI nang makapasok sa Pilipinas ang mga biyahero na ang ipakikita lamang ay ang antigen test na gawa ng healthcare professionals.

Ito’y matapos na sang-ayunan ng mga miyembro ng Inter-Agency Task Force for the Management of Emerging Infectious Diseases (IATF-EID), Miyerkules ng gabi na payagan ang paggamit ng rapid antigen test na gawa ng healthcare professionals bilang entry requirement para sa mga byahero.

Sinabi ni Acting Presidential Spokesperson at Communications Secretary Martin Andanar na ang antigen test ay kailangan na “administered and certified by a healthcare professional in a healthcare facility, laboratory, clinic, pharmacy, or other similar establishments from the country of origin of the traveler.”

Sa ilalim ng umiiral na IATF-EID Resolution 165, maaaring makapasok ng Pilipinas ang foreign travelers, sa kondisyong kailangan na fully vaccinated ang mga ito laban sa coronavirus disease 2019 (Covid-19) at may katanggap-tanggap na proof of vaccination.

Required din ang mga dayuhan na mag-prisinta ng negatibong reverse transcription-polymerase chain reaction (RT-PCR) test na ginawa sa loob ng 48 oras o negative laboratory-based antigen test na ginawa sa loob ng 24 oras bago pa ang kanilang pagdating sa bansa.

Sa kabilang dako, inaprubahan din ng IATF-EID ang “acceptance and recognition” ng national Covid-19 vaccination certificates ng mga bansang Bangladesh, Mexico, Panama at Slovak Republic, para sa arrival quarantine protocols, at maging para sa interzonal o intrazonal movement.

“This is in addition to other countries/territories/jurisdictions whose proofs of vaccination the IATF has already approved for recognition in the Philippines, and without prejudice to such other proofs of vaccination approved by the IATF for all inbound travelers,” ayon kay Andanar.

Sinabi pa ni Andanar na ang Bureau of Quarantine, One-Stop-Shop ng Department of Transportation at Bureau of Immigration ay inatasan na kilalanin lamang ang proofs of vaccination na aprubado ng IATF.

Ayon sa Resolution 165 na ipinalabas ng IATF-EID, ang iba pang katanggap-tanggap na proofs of Covid-19 vaccination ay kinabibilangan ng World Health Organization International Certificate of Vaccination and Prophylaxis, VaxCertPH, national o state digital certificate ng foreign country na tumatanggap ng VaxCertPH, at iba pang proof of vaccination na pinayagan ng IATF-EID.

Pinayagan na ng pamahalaan ang mga foreign travelers na bisitahin ang bansa kahit pa walang entry exemption document (EED), kailangan lamang na sumunod ang mga ito sa applicable visa requirements at immigration entry at departure formalities.

Ang Foreign travelers ay kailangan na mayroong pasaporte na balido ng hanggang anim na buwan sa oras ng kanilang pagdating sa bansa at balidong tickets para sa kanilang pagbabalik sa lugar na kanilang pinanggalingan o susunod na destinasyon, na hindi lalagpas sa 30 araw mula sa “date of arrival.”

“Prior to their arrival in the Philippines, they must obtain travel insurance for the Covid-19 treatment costs from reputable insurance providers, with a minimum coverage of USD35,000 for the duration of their stay in the country,” ayon sa resolusyon.

Ang mga dayuhan na mabibigong sumunod sa kondisyon at mga kinakailangan na itinakda ng IATF-EID ay tatanggihan na tanggapin sa bansa at malalagay sa angkop na “exclusion proceedings.”  (Daris Jose)

TINATAYANG  nasa mahigit 300 na ang bilang ng mga sibilyang pinatay ng mga sundalo ng Russia sa Bucha sa Ukraine.

Sa isang pahayag ay sinabi ni Bucha Mayor Anatoly Fedoruk, na personal niyang nasaksihan ang walang habas na pagpatay sa maraming mga sibilyan na kabilang sa 320 nasawi sa kanilang lungsod.

Inalala ni Fedoruk kung paano brutal na pinagbabaril ng Russian forces ang tatlong civilian cars na sinubukang ilikas ang kanilang sarili patungo sa Kyiv.

Mayroon din aniya siyang nasaksihang isang lalaki na nagmamakaawa sa mga tropa ng Russia na huwag barilin ang kanyang nagdadalang-tao asawa, ngunit binaril pa rin nila ang mga ito.

Bukod dito ay sinabi rin ni Fedoruk na hina-hunting daw ng Russian military ang mga local poticians.

Samantala, hinamon naman ng Bucha mayor na magtungo sa kanilang lugar si Russian Foreign Minister Sergei Lavrov upang makita nito ang nagkalat na mga bangkay ng maraming sibilyan sa daan at ang sitwasyon ngayon doon, at tignan ng diretso ang mga mata ng naiwang pamilya ng mga biktima ng nasabing massacre.

Magugunita na una nang nagpahayag si Lavrov nang tila paghuhugas-kamay sa mga alegasyon ng war crimes sa Moscow at sinabing walang kinalaman ang Russian military sa nangyaring kalunus-lunos na pagpatay sa mga sibilyan sa Bucha.

HINDI na rin nakaligtas ang mga anak na babae ni Russian President Vladimir Putin matapos na magpataw pa ng panibagong mga sanctions ang Estados Unidos sa Russia.

Kaugnay pa rin ito sa mas lumalalang sigalot sa pagitan ng Russia at Ukraine.

Target ng mga bagong sanctions na ito ang mga anak ni Putin na sina Mariya Putina at Katerina Tikhonova, gayundin ang iba pang miyembro ng Russian elite, kabilang na asawa at anak ni Foreign Minister Sergei Lavrov, Russian Prime Minister Mikhail Mishustin, at former president at prime minister Dmitry Medvedev.

Kabilang din ang Sberbank, na pinakamalaking financial institution ng Russia, at ang Alfa Bank, na pinakamalaking bangko sa Russia sa mga pinatawan ng mas pinaigting pang mga kaparusahan.

Bukod dito ay magsasagawa din ng aksyon ang Treasury Department na hahadlang sa bagong investments U.S. entities sa Russia, at magpapataw din ito ng bago at malawak na mga parusa sa ilang negosyong pag-aari ng estado.

Nakatakda namang lagdaan ni U.S. President Joe Biden ang isang executive order na magbabawal sa mga bagong investment ng sinumang U.S. person sa Russia.

Samantala, inaasahan naman na ia-anunsyo na ng European Union ang kanilang magiging desisyon hinggil sa rekomendasyong ipagbawal na dito ang coal imports mula sa Russia bilang bahagi ng plano ng Western allies na pigilan ang Moscow na kumita upang tustusan ang ginagawang pagsalakay nito sa Ukraine.