2022 April 12 Archive - People's Balita

December 22, 2024
Search in People's Balita
Ang Diyaryong Pinagkakatiwalaan

Archive for April 12th, 2022

Operasyon ng ilang tren sa Metro Manila, suspendido muna para sa Holy Week – DoTr

Posted on: April 12th, 2022 by @peoplesbalita No Comments

PANSAMANTALA munang sususpindehin ang railway services sa Metro Manila ng ilang araw dahil na rin sa Holy Week.

Ayon sa Department of Transportation (DOTr), ang Metro Rail Transit-Line 3 (MRT 3) at Light Rail Transit-Line 2 (LRT2) ay isasara sa April 13 (Holy Wednesday) hanggang April 17 (Easter Sunday).

Ang regular na operasyon ay asahan daw na ibabalik na sa Abril 18.

Samantala, sa April 12, Holy Tuesday, ang LRT2 operations ay magsisimula mula alas-5 ng umaga hanggang alas-8:00 ng gabi habang ang operasyon naman ng MRT3 ay susundin ang normal schedule.

Sa kabilang dako, ang Philippine National Railways (PNR) naman ay pansamantalang ititigil ang kanilang operasyon sa April 14 (Maundy Thursday) hanggang April 16 (Black Saturday).

Asahan ang normal operations sa April 17, Easter Sunday.

Una rito, inanunsiyo ng management ng Light Rail Transit-1 (LRT1) na ang kanilang operasyon ay sususpendehin mula Abrl 14 hanggang 17 para sa annual maintenance activities.

Mula April 11 hanggang 13, ang LRT1 operating hours ay magsisimula dakong alas-4:30 ng madaling araw.

Ang huling tren namang mula sa Baclaran Station ay mag-o-operate dakong alas-9:15 at ang nasa Balintawak Station ay bibiyahe dakong alas-9:30 ng gabi.

Ang regular LRT1 operations ay babalik naman sa Lunes April 18 ayon sa DoTr.

Ngayong araw ay naka-heightened alert na rin ang Land Transportation Franchising and Regulatory Board (LTFRB) dahil sa asahang pagbuhos ng mga commuters para sa Holy Week at summer season.

PITX may paglilinaw, lahat ng mga drivers negatibo raw sa drug test

Posted on: April 12th, 2022 by @peoplesbalita No Comments

NILINAW ngayon ng pamunuan ng Parañaque Integrated Terminal Exchange (PITX) na walang nag-positibo sa drug test na mga drivers na gumagamit sa bus terminal.

Ang naturang drug test ay isinagawa noong nakaraang linggo.

Nilinaw ito ni PITX spokesperson Jason Salvador kasunod na rin ng mga napaulat na mayroong mga drivers ng bus na nagpositibo sa isinagawang random drug tests.

Aniya, ang naturang mga drivers ay naka-deploy daw sa ibang terminal at hindi sa PITX.

Noong Sabado nang magsagawa ang Philippine Drug Enforcement Agency (PDEA) ng drug test sa iba’t ibang bus terminal at nasa 61 public utility vehicle drivers, conductors at dispatchers ang nag-positibo sa iligal na droga.

Ang isinagawang random drug test ay bilang paghahanda pa rin ng pamahalan sa Holy Week.

Ayon sa PDEA, nasa 4,210 individuals ang sumailalim sa screening sa nationwide implementation ng Oplan Harabas noong Biyernes na isinagawa dahil sa asahang pagbuhos ng mga Holy Week travelers.

Samantala, kahapon, Palm Sunday, mas kaunti raw ang naitalang pasahero sa PITC kumpara sa mga nakaraang mga araw.

Noong Biyernes, mahigit 100,000 na pasahero daw ang bumuhos sa PITX.

Inaasahan naman daw ng PITX management na asahan ang pagbuhos ng maraming pasahero bukas hanggang Good Friday dahil sa mga uuwing mga pasahero sa probinsiya para sa Holy Week.

Publiko, masyadong naging kampante nang ibinaba ang Alert level 1 sa maraming lugar sa bansa – NTF Against COVID-19

Posted on: April 12th, 2022 by @peoplesbalita No Comments

NAGING relax o naging kampante ang maraming Filipino magmula ng ipinatupad ang Alert level 1 sa maraming lugar ng bansa.

Ito ang ipinahayag ni NTF Against COVID-19 medical adviser Dr Ted Herbosa na kung saan, naging barometro nito ang bilang ng mga dapat sana’y kuwalipikado ng magpa- booster shot subalit hindi naman ginawang magpaturok.

Aniya, naipit na sa labing dalawang milyon lamang ang mga nagsipag- booster shot samantalang nasa 66 na milyon na ang may 2nd dose.

Malayo aniya ang hahabulin na datos kaya panawagan ni Herbosa sa publiko. Sana ay samantalahin ang Holy Week at walang trabaho.

At kung nasa bakasyon naman, mayroon din namang vaccination sa mga lalawigang pupuntahan at ang ipapakita lang naman ay ang vaccination card na may two doses at lampas na ng three months .

“Medyo nag-relax iyong mga kababayan natin noong bumaba tayo sa Alert Level 1. Naipit tayo sa 12 million lang na naka-booster, whereas, 66 million na ang may two doses. So, malayo iyong hahabulin,” ayon kay Herbosa.

“So, reminder: Habang Holy Week at walang trabaho, siguro ang maganda ay puwede na tayong magpa-booster. And by the way pati doon sa mga probinsiya na bibisitahin ninyo, puwede tayong magpa-booster doon. Ipakita ninyo lang iyong inyong vaccination card na may two doses at kung lampas three months na puwede kayong makatanggap ng booster shot doon sa lugar na iba sa inyong address,” dagdag na pahayag nito. (Daris Jose)

Overseas absentee voting larga na

Posted on: April 12th, 2022 by @peoplesbalita No Comments

UMARANGKADA na kamakalawa ang ‘overseas absentee voting’ para sa Halalan 2022 na inaasahan ng Commission on Elections (Comelec) na sasamantalahin ng mahigit 1.6 milyong nakarehistrong botante.

Sa ilalim ng Overseas Absentee Voting Act, ang mga rehistradong botante sa abroad ay pipili ng presidente, bise-presidente, mga senador at party-list groups.

Ayon sa Comelec, ang United Arab Emirates ang may pinakamalaking bilang ng rehistradong absentee voting na nasa 290,182.

Nagkaroon naman ng bahagyang kaguluhan sa Hong Kong nang ipatigil ng konsulada ang pagboto dahil sa hindi na makayanang tanggapin ang mga dumagsang botante sa unang araw ng OAV. Nasa higit 93,000 ang rehistradong botante doon. Hinimok na lang ng konsulado ang mga botante na bumoto sa ibang araw.

Nasa higit 150,000 naman ang aktibong rehistradong botante sa buong Europa. Ang Italya ang may pinakamarami na umabot ng 38 libo kasunod ang United Kingdom, mahigit 30 libo at Espanya na mahigit 20 libo.

Sa konsulado ng Pilipinas sa Milan, magpapatupad ng ‘mixed-mode voting’ o parehong personal at postal voting.

Postal voting din ang ipatutupad sa Philippine Embassy sa Rome, Albania, Malta at San Marino. Personal voting naman ang ipatutupad sa Philippine Embassy to the Holy See.

Ang local absentee voting ay tatagal hanggang sa Mayo 9, araw ng eleksyon dito sa Pilipinas. (Daris Jose)

Cebu City, isinailalim na sa state of calamity dahil sa Bagyong Agaton

Posted on: April 12th, 2022 by @peoplesbalita No Comments

TULUYAN nang nagdeklara ng state of calamity si Cebu City Mayor Mike Rama sa gitna ng pananalasa ng Bagyong Agaton na nagdala ng walang humpay na pag-ulan sa lungsod.

Alinsunod sa rekomendasyon ng City Disaster Risk Reduction and Management Council, ipinatupad rin ng alkade ang “no work, no classes” ngayong araw bilang preventive measure.

Kanselado na rin ang lahat ng biyahe sa mga sasakyang pandagat at dahil dito, may mga stranded na pasahero na ang naitala sa mga pantalan.

Nabatid na ang pag-ulan ay nagdulot na ng ilang pagbaha at pagguho ng lupa lalo na sa probinsiya ng Cebu.

May tumaob din na RoRo vessel sa Consuelo Port, San Francisco sa isla ng Camotes dahil sa malalaking alon na humampas sa pantalan.

Ang nasabing vessel ay may dalang 5,439 liters na diesel oil at 68 liters na lube oil, pero ligtas naman ang 14 na crew members na sakay nito.

Sa ngayon, nararanasan pa rin sa lungsod ang maulap na kalangitan at hindi naman gaanong kalakasan ang ulan ngunit nararamdan ang malakas na bugso ng hangin.

Maliban sa Cebu, ramdan na rin ang Bagyong Agaton sa iba’t ibang bahagi ng Visayas at may naitala na rin umanong namatay dahil sa epekto na dala ng bagyo.

Sa Negros Oriental, tatlo na ang naitalang nasawi kung saan isa rito ay isang apat na taong gulang na bata na naiulat na nalunod sa isang sapa sa Barangay Bongalonan, Basay, Negros Oriental.

Sa kasalukayan, itinaas na sa signal number 1 ang the northeastern portion sa Cebu (Daanbantayan, Medellin, Bantayan Islands, Bogo City, San Remigio, Tabogon, Borbon, Tabuelan, Sogod, Catmon, Carmen, Danao City, Compostela, Liloan) including Camotes Island, at eastern portion sa Bohol (Buenavista, Danao, Dagohoy, Pilar, Guindulman, Candijay, Mabini, Alicia, Ubay, San Miguel, Pres. Carlos P. Garcia, Trinidad, Bien Unido, Talibon, Jetafe). (Daris Jose)

Ads April 12, 2022

Posted on: April 12th, 2022 by @peoplesbalita No Comments

Higit 60K dumalo sa ‘Pure Love’ rally ng ‘KakamPing’ sa QCMC

Posted on: April 12th, 2022 by @peoplesbalita No Comments

TINATAYANG umabot sa mahigit 60,000 mga Pilipino na nagnanais ng bagong liderato ang dumagsa sa Quezon City Memorial Circle (QCMC) noong Sabado (Abril 9) para ipakita ang kanilang pagsuporta sa kandidatura nina presidential bet Panfilo ‘Ping’ Lacson at running mate na si Senate President Vicente ‘Tito’ Sotto III.

Tinaguriang ‘Pure Love’ ang nasabing rally na dinaluhan ng ilang mga sikat na performer at celebrity guests mula hapon hanggang gabi. Inorganisa ang aktibidad ng mga miyembro ng Lacson-Sotto Support Group (LSSG) mula sa Metro Manila at mga kalapit na probinsya sa Luzon.

Itinaon ang naging pagtitipon sa paggunita ng ‘Araw ng Kagitingan’ kung saan lumagda ng isang manifesto ang tambalang Lacson-Sotto para isulong ang tapat na pamahalaan at protektahan ang tiwalang ibibigay sa kanila ng taumbayan sakaling mahalal bilang susunod na pangulo at pangalawang pangulo ng bansa.

“Sisiguraduhin naming walang bahid ng katiwalian ang aming panunungkulan upang hindi masayang ang inyong boto. Ang lahat ng plataporma na aming inihain ngayong kampanya ay aming tutuparin nang may kagitingan, buong husay at katapatan,” pangako nina Lacson and Sotto sa kanilang manifesto.

Hinikayat ni dating Bureau of Internal Revenue (BIR) Commissioner Kim Jacinto-Henares, assistant campaign manager ng tambalang Lacson-Sotto, ang mga botante na pumili ng isang pinunong handang solusyunan ang mga problema ng bansa alang-alang sa mga susunod na henerasyon ng Pilipino.

Kumbinsido naman si retired Gen. Raul Gabriel Dimatatac, pinuno ng LSSG Metro Manila chapter at iba pang mga tagapagtaguyod ng LSSG sa Laguna, Nueva Ecija, Rizal, Cavite, Bulacan at Batangas na kaya nilang ipanalo ang tambalang Lacson-Sotto ngayong Halalan 2022 dahil nasa likod nila ang puwersa ng tinatawag na ‘silent majority.’

Sa kanyang talumpati, pinasalamatan ni Lacson ang kanilang mga ‘KakamPing Tunay’ mula sa LSSG at mga organizer ng ‘Pure Love’ rally na pursigidong ikampanya sila ni Sotto, gayundin ang kanilang mga adbokasiya. Organisado ang LSSG sa 59 na lalawigan sa buong bansa.

“Hindi lang sila kumikibo, hindi lang sila masyadong maingay, pero tahimik po silang nagtatrabaho, tahimik silang nagsasagawa ng kanilang ground work at para kumumbinsi ng ating mga kababayan upang ipahayag ang ating mga kuwalipikasyon, ang ating karanasan, ang ating competence sa pamumuno, at ang aming walang pag-iimbot na hangarin para magsilbi sa ating bansa sa susunod na anim na taon,” sabi ni Lacson sa kanilang masugid na mga tagasuporta.

Omicron XE makakapasok sa Pinas sa Mayo

Posted on: April 12th, 2022 by @peoplesbalita No Comments

NAGBABALA ang grupo ng mga doktor na posibleng makapasok na at maramdaman sa bansa ang Omicron XE sub-variant sa Mayo kung magpapatuloy ang mababang bilang ng nagpapa-booster shot kontra COVID-19.

Sinabi ni Philippine College of Physicians (PCP) president Dr. Maricar Limpin na bumababa na ang immunity ng mga taong nakakumpleto ng dalawang doses ng COVID-19 vaccines na magreresulta ng pagkakalantad nila sa impeksyon ng mga bagong variants ng virus na higit na nakakahawa ngayon.

Sa datos ng Department of Health (DOH), nasa 12.2 milyong indibidwal pa lamang ang nakatanggap ng booster shots habang 66.2 milyong Pilipino na ang ‘fully-vaccinated’.

Sa kabila naman na wala pang pagtaas ng kaso ng COVID sa bansa at hindi pa natutukoy ang Omicron XE, malaki ang posibilidad na makapasok rin ito sa Pilipinas lalo na’t bukas na ang lahat ng borders ng bansa sa mga dayuhang biyahero at turista. (Daris Jose)

Malakanyang, pinayuhan ang publiko na mag-ingat kahit pa humina ang bagyong ‘Agaton’

Posted on: April 12th, 2022 by @peoplesbalita No Comments

PINAYUHAN ng Malakanyang ang publiko na mag-ingat kahit pa humina na ang bagyong “Agaton” (international name Megi) at naging tropical depression na lamang.

Partikular na pinaalalahanan ng Malakanyang na mag-ingat ang mga residente sa mga apektadong lugar.

“Muli kaming nananawagan sa publiko, lalo na sa mga lugar na naapektuhan ng bagyo, na magsagawa ng kinakailangan precautionary measures. Magbasa at manood ng pinakabagong weather advisories at bulletins,” ayon kay Acting Presidential Spokesperson Sec. Martin Andanar.

Ipinag-utos din ng Malakanyang ang publiko na makipag-ugnayan sa mga opisyal at ahensiya para sa posibleng rescue operations.

Tiniyak naman nito na masusing naka-monitor ang executive branch sa itinatakbo ng tropical depression at maging ang pagsisikap ng mga ahensiya na tugunan ang weather disturbance.

“Government’s hands are on deck to assist affected residents,” ayon kay Andanar.

Sa kasalukuyan, ang National Disaster Risk Reduction and Management Council ay nakikipag-ugnayan na sa disaster councils ng mga apektadong lugar para suportahan ang relief activities.

“As of 8 a.m. Monday,” mayroong 201 apektadong barangay na may 3,717 displaced families ang nasa loob ng 71 evacuation centers sa Region 6, Region 7, Region 8, Region 10, Region 11, Region 12, Caraga at BARMM.

May kabuuang 15 lungsod/ munisipalidad ang nakaranas naman ng power interruption/shortage, kung saan ang power supply sa apat na lungsod/ munisipalidad ay na-restore na o naibalik na ang suplay ng kuryente.

Sa ‘8 a.m. bulletin,’ sinabi ng Philippine Atmospheric, Geophysical and Astronomical Services Administration na si Agaton ay namataan sa coastal waters ng Tanauan, Leyte.

“Agaton” now packs maximum sustained winds of 55 kilometers per hour near the center, and gustiness of up to 75 kph. It is slowly moving north northwest,” ayon sa ulat.

Binawi naman ang Tropical Cyclone Wind Signal (TCWS) No. 2 sa mga lugar na unang naapektuhan ng nasabing bagyo.

Samantala, itinaas ang TCWS No. 1 sa katimugang bahagi ng Masbate (Dimasalang, Palanas, Cataingan, Pio V. Corpuz, Esperanza, Placer, Cawayan); Eastern Samar, Samar, Northern Samar, Biliran, Leyte, Southern Leyte, hilagang-silangang bahagi Cebu (Daanbantayan, San Remigio, Medellin, City of Bogo, Tabogon, Borbon, Sogod, Catmon, Carmen, Danao City, Compostela, Liloan) kabilang na ang Camotes Island, at silangangang bahagi ng Bohol (Getafe, Talibon, Bien Unido, Trinidad, Ubay, San Miguel, Pres. Carlos P. Garcia, Mabini); Surigao del Norte at Dinagat Islands. (BISHOP JESUS “JEMBA” M. BASCO)

5 kulong sa higit P138K shabu sa Valenzuela, Malabon

Posted on: April 12th, 2022 by @peoplesbalita No Comments

LIMANG hinihinalang tulak ng iligal na droga, kabilang ang isang lolo ang arestado matapos makuhanan ng higit P.1 milyon halaga ng shabu sa magkahiwalay na buy bust operation sa Valenzuela at Malabon Cities.

Ayon kay P/Lt. Joel Madregalejo, hepe ng Station Drug Enforcement Unit (SDEU) ng Valenzuela police, dakong ala-una ng madaling araw nang magsagawa ang mga operatiba ng SDEU sa pangunguna ni P/Lt. Doddie Aguirre ng buy bust operation sa East Service Road, Brgy. Paso De Blas na nagresulta sa pagkakaaresto kay Aron Cedrick Gomez, 21, mekaniko, at Javier Villamor, 18.

Ani PCpl Pamela Joy Catalla, nasamsam sa mga suspek ang humigi’t-kumulang 8 grams ng hinihinalang shabu na may standard drug price P54,400, marked money, P200 cash, 2 cellphones, motorsiklo at coin purse.

Bandang ala-1:50 naman ng madaling araw nang matimbog din ng kabilang team ng SDEU sa buy bust operation sa Sto. Rosario Brgy., Mapulang Lupa si Joseph Cortez alyas “Boss”, 40.

Ani PCpl Christopher Quiao, nakuha sa kanya ang humigi’t-kumulang 10 grams ng hinihinalang shabu na may standard drug price P68,000, buy bust money na isang tunay na P500 bill at limang P500 boodle money.

Sa Malabon, naaresto naman ng mga operatiba ng SDEU ng Malabon police sa ilalim ng pamumuno P/Col. Albert Barort sa buy bust operation sa P. Concepcion St. Brgy. Tugatog sina Rogelio Madeja alyas “Dida”, 61, (Pusher/Listed) at Khaleb Guevara alyas “Khay”, 28.

Nakumpiska sa mga suspek ang humigi’t-kumulang 2.38 grams ng hinihinalang shabu na may standard drug price P16,184.00 at buy bust money.

Nahaharap ang mga suspek sa kasong paglabag sa RA 9165 o ang Comprehensive Dangerous Drug Act of 2002. (Richard Mesa)