NASAWI ang dalawang rider nang mabangga ng trailer truck ang kanilang sinasakyang motorsiklo sa Ermita, Maynila kahapon ng madaling araw.

Kinilala ang  mga biktima na si Jake Tiburania,nasa hustong gulang ng 14 San Vicente St., Pineda, Pasig City at backride na si Brix Deuna Urot, nasa hustong gulang at nakatira sa 0009 Sitio Udioncan Macabud Rodriguez, Rizal.

Base sa ulat ng MPD-Traffic Enforcemen Unit, alas 3:15 Martes ng madaling araw nang mangyari ang insidente sa kahabaan ng UN Avenue kanto ng San Marcelino St, sa Maynila.

Sakay ang biktima ng Honda motorcycle at binabagtas ang westbound ng UN Avenue  habang ang Tractor head na may trailer at may plakang DCQ6565 at minamaneho naman ni  Randy Layda Y Luzano ng B10 L7 Paradahan 2 Tanza, Cavite ay binabagtas ang southward ng San Marcelino St.

Pagsapit sa intersection ng UN Avenue at San Marcelino, ang harapang bahagi ng motorsiklo ay nabangga ng tractor head kung saan tumilapon pa ng ilang metro ang mga biktima na nagresulta ng kanilang agarang kamatayan.

Nasa kustodiya na ng pulisya ang driver ng tractor head at nagpapatuloy pa ang imbestigasyon. (BISHOP JESUS “JEMBA” M. BASCO)

NADAGDAGAN pa ang bilang ng bakunahan kontra COVID-19 sa bansa ayon sa Department of Health (DOH).

Sa datos ng kagawaran, mula noong buwan ng Marso ay tumaas pa hanggang 200,000 ang bilang ng mga indibidwal na nababakunahan sa bansa mula noong buwan ng Marso.

Sinabi ni Health Undersecretary Maria Rosario Vergeire, sa ngayon ay hindi pa nakakamit ng lahat ng rehiyon sa Pilipinas ang kanilang 50 percent target population sa bakunahan naman ng booster shot.

Habang ang National Capital Region (NCR) naman aniya ang pinakamalapit nang maabot ang target na umaabot na sa 43 percent ng target population nito.

Bukod dito ay ibinalita rin ni Vergeire na inatasan din ni Pangulong Ferdinand “Bongbong” Marcos Jr. ang DOH na lalo pang paigtingin ang bakunahan ng booster shot sa bansa.

Hihingi rin aniya sila ng tulong sa iba’t ibang ahensya ng gobyerno tulad ng Department of Labor and Employment (DOLE), Department of Interior and Local Government (DILG), at marami pang iba.

Sa ngayon ay umaabot na sa 70.8 million na mga Pilipino ang nakatanggap na ng kumpletong bakuna laban sa nakamamatay na sakit, habang 15.2 million naman sa mga ito ang naturukan na ng booster shot batay sa pinakahuling datos na inilabas ng DOH.

NAGHAHANAP ng karagdagan pondo ang Department of Transportation (DOTr) na nagkakahalaga ng P1.4 billion upang maipagpatuloy ang programang libreng sakay sa EDSA Carousel.

“The libreng sakay program demands a certain funding If we want to implement the free bus rides until December, we will need additional funding of around P1.4 billion, which is not available in our existing budget,” wika ng bagong talagang DOTr Secretary Jaime Bautista.

Inilungsad ang libreng sakay bilang isa sa mga solusyon ng pamahalaan upang mabawasan ang epekto ng tumataas na presyo ng produktong gasolina at iba pang pangunahing pangangailangan ng mga tao.

Mismong si President Marcos ang nagbigay ng kautusan upang palawigin ang programa sa libreng sakay hanggang katapusan ng taon kasalukuyan. Kung kaya’t isang memorandum ang ginawa at inaprobahan naman ng ating pangulo.

Samantala, kasama rin sa memorandum ang pagbibigay ng libreng sakay sa mga rail lines para sa mga estudyante na sasakay sa Metro Rail Transit (MRT 3), Light Rail Transit Line 2 (LRT2) at Philippine National Railways simula sa pagbubukas ng klase sa August 22 hanggang November 4,

Tinapos naman ng pamahalaan ang pagbibigay ng libreng sakay sa mga pasahero ng MRT 3 kung saan ay nabigyan ng benipesyo ang mahigit sa 29,000 na sumakay dito simula noong March 28 at natapos ng June 30.

Nagkaron ng P515.91 million revenues losses ang MRT 3 dahil sa programang libreng sakay dito.

Sa kabilang dako, pinagutos ni Bautista ang pagbibigay ng P1,000 fuel subsidies sa mga qualified na tricycle drivers na may bilang na 617,806.

Inutusan rin niya ang mga transport officials na madaliin ang deployment ng karagdagan 550 buses para sa EDSA Carousel lalo na kung rush hours. Magkakaron ng pagpupulong ang mga consortium na pumapasada sa EDSA kasama si Bautista at mga bus operators.

Sinabi rin ni Bautista na upang mabigyan ng solusyon ang problema sa kakulangan ng mga buses kapag nagsimula na ang klase, ang LTFRB ay dapat maging mabilis sa pagbibigay ng mga franchises sa mga buses na dumadaan sa mga paaralan.

“We are looking at accelerating the grant of franchises for buses on routes used by students such as the Katipunan Avenue, Commonwealth and Recto,” saad ni Bautista. LASACMAR