KINAGILIWAN ng mga netizens ang latest IG post ni Maris Racal na kung saan ang OOTD niyang white little dress ay nabili niya sa ukay-ukay.

Caption ni Maris sa kanyang larawan na kuha sa New York City, “My ukay ukay dress made it to nyc.”

Dahil sa ginawa niya, marami talagang natuwa at hindi makapaniwala na ang outfit na sinuot ni Maris sa New York ay second-hand dress, na nagmula nga sa isang ukayan ng lumang damit.

Napa-comment nga si Direk Antoinette Jadaone na, “Yan ba yung sa Session Road???”

Na sinagot naman ni Maris ng, “Iba pa yun direk.”

Ayon nga sa mga netizens at followers ng young actres:

“Love your fashion sense, girl! A proof that fashion doesn’t only have to be expensive stuff.”

“True. Nasa pagdala lang yan at nagsusuot. Aanhin mo yong expensive kung di naman bagay sayo diba?”

“Ganda Ng ukay dress mo ghorl.”

“Wow bet mo rin ukay2 ganda!”

“Love it! Where did you buy?”

“Grabe naman this girl so beautiful, talented and sexy.”

“Mas hot pa sa init ng araw.”

Pak apakaganda… next Victoria secret model.”

Samantala, kinumpara ni Vivian Velez ang naturang outfit ni Maris sa designer clothes ni Heart Evangelista at caption niya, “Heart’s designer outfit in Paris vs ukay ukay of Maris Racal in NYC.

“You don’t have to buy expensive, you just need to look like one hahaha.”

Super-react naman ang mga netizens sa obserbasyon na ito ni Ms. Vivian Velez, may nag-agree at meron ding nag-nega.

***

ISANG taos pusong mga sandali ang ibinahagi ni Senadora Imee Marcos sa mga kababayan sa Norte na mapapanood sa kanyang latest vlog entry ngayong weekend.

Naka-sentro sa vlog ang pagbisita niya sa Vigan, Abra, at Laoag, na talaga namang naapektuhan ng magnitude 7 na lindol, na nagwasak sa hilagang bahagi ng bansa.

Namahagi si Sen. Imee ng tulong sa mga pamilya sa rehiyon at kumunsulta sa mga tao upang alamin ang iba pa nilang pangangailangan.

Nilibot din niya ang mga historical sites na naapektuhan ng mapinsalang lindol.

Ipakikita rin sa vlog ang eksklusibo at never-before-seen na snippets sa kanyang pagpupulong kasama si Presidente Bongbong Marcos at iba pang lokal na opisyal.

Na kung saan pinag-usapan nila ang mga karagdagang safety measures at tulong para sa mga tao, sa muling pagpapatayo ng mga napinsalang mga tahanan at para maharap nila ang resulta ng lindol.

Tunghayan ang pagbisita ni Senator Imee Marcos sa Norte at mag-subscribe sa kanyang official YouTube Channel
sa https://www.youtube.com/c/ImeeMarcosOfficial/featured.

(ROHN ROMULO)

IT seems non-stop ang success ni Asia’s Limitless Star Julie Anne San Jose.  

Sabi nga, bukod sa lucky in love si Julie dahil kay Rayver Cruz, very lucky rin ang Sparkle star na tumanggap ng Silver Award para sa “Limitless: A Musical Trilogy” mula sa 2022 New York Festivals TV and Film Awards.

Nasundan agad ito ng magkaroon siya ng special collaboration kay Gary Valenciano, na dream come true para sa kanyang makatrabaho ang singer-songwriter na siyang sumulat ng kantang “Di Ka Akin,” na ngayon ay mapapakinggan na sa lahat ng digital music streaming platforms.

Balik-acting din si Julie dahil kasama siya sa historical portal fantasy series na “Maria Clara at Ibarra.” Si Julie ang gaganap bilang Maria Clara at makakatrabaho niya si Kapuso Drama King Dennis Trillo as Ibarra at si Kapuso Primetime Princess Barbie Forteza, as Klay na papasok sa mundo nina Maria Clara at Ibarra.  Nagsimula na silang mag-taping ng fantasy series.

At sa September 24 and 25, GMA Pinoy TV will present the US concert “Together Again” ng mga judges ng “The Clash,” sina Ai Ai delas Alas, Lani Misalucha, Rayver Cruz at Julie Anne, with special guests Dingdong Dantes and Bea Alonzo, sa Pechanga Theater ng Pechanga Resort Casino sa Temecula, California, produced by Starmedia Enterprises.

***

MASAYANG-MASAYA si Katrina Halili at nagpasalamat sa GMA Network for another ‘mabait’ role sa upcoming Afternoon Prime series na “Unica Hija.”

“Mukha ba talaga akong mabait,” biro ni Katrina nang malamang gaganap siyang loving and protective mom ni Kate Valdez.

“Thank you po for considering me to play nanay ni Kate. Pero talagang nagulat din ako, dahil sanay naman akong kontrabida, bago ko ginawa ang ‘Prima Donna’ book one and two,  I’m looking forward na maging one big family rin kami ng cast ng ‘Unica Hija,’ para masayang magtrabaho.”

Makakasama nina Katrina at Kate sina Kelvin Miranda, Mark Herras, Faith Da Silva, Athena Madrid, Boboy Garrovillo and Alfred Vargas in a very special role.  Kasama rin sina Maricar de Mesa, Bernard Palanca, Maybelyn dela Cruz, Biboy Ramirez, Jennie Gabriel at Jemwell Ventenilla.

***

MASAYA at labis ang pasasalamat ni Dominic Ochoa na muling makatrabaho si Carmina Villarroel, he accepted the offer without hesitation.

Malaking tulong daw para sa kanya na kilala na niya ang makakatrabaho niya sa GMA Afternoon Prime na “Abot Kamay Na Pangarap,” pangungunahan nina Carmina at Jillian Ward, na gaganap na mag-ina.

“I’ve known Carmina for quite sometime, nagkatrabaho na kami sa isang movie in 2020,” kuwento ni Dominic.

“Actually, nalaman ko ito sa wife ko, pero sabi ko wala pa namang tumatawag sa akin.  After a week, natanggap ko ang tawag, at tinanggap ko agad.  Salamat na muli kong makakatrabaho si Carmina, si Richard Yap, at makasama rin ang iba pang Kapuso stars.”

***

MATAGAL nang kumakalat ang balitang lilipat si Matteo Guidicelli, hindi pala ang wife niyang si Sarah Geronimo, sa Kapuso Network.

This month, malapit nang makilala si Matteo bilang bagong co-host ng ‘Unang Hirit,’ ang morning talk show ng GMA-7.  Magiging abala muna si Matteo sa promo guestings para sa show.

Welcome addition si Matteo sa pamilya ng UH na marami nang karanasang maibabahagi tulad ng pagiging actor, singer, businessman, at reservist ng Philippine Army.

Hindi na rin naman baguhan si Matteo sa GMA-7 dahil naging bahagi siya noong 2009 ng Sunday noontime musical-variety show na ‘SOP Fully Charged’.

(NORA V. CALDERON)

MINSAN lang gumawa ng pelikula ang tinaguriang Asia’s Fastest Woman noong dekada ’80 na si Lydia de Vega.

Ginawa niya ang pelikulang ‘Medalyang Ginto’ noong 1982 at kuwento ito kung paano siya noon nagkaroon ng simpleng pangarap, hinarap ang mga pagsubok sa buhay, ang kanyang mga sakripisyo sa pamilya hanggang sa maipanalo niya sa Pilipinas ang gintong medalya sa 1982 Asian Games.

Nakasama ni Lydia sa pelikula sina Tony Santos Sr., Perla Bautista, Joseph Sytangco at Dave Brodett. Dinirek ito ni Romy Suzara. Inalay pa ni Lydia ang pelikula sa lahat ng Pinoy na siyang naging inspirasyon niya para makapag-uwi ng medalyang ginto.

Kahit na maraming naging offers si Lydia noon na gumawa ng maraming pelikula, mas pinili niya ang mag-focus sa kanyang pagtakbo kaya muli siyang nakauwi ng gold medal sa 1986 Asian Games at nakapag-compete din siya sa 1984 at 1988 Olympic Games.

Nagretiro si Lydia noong 1994 na hawak pa rin ang fastest record sa 100-meter and 200-meter run for 30 years.
Noong Miyerkules ay pumanaw na ang Filipino athletic legend sa edad na 57 dahil sa kanyang sakit na breast cancer.
Noong nakaraang July 20 ay naging critical ang kondisyon ni Lydia sa kanyang sakit nilabanan niya simula pa noong 2018.

Maraming mga atleta ang nag-ambag-ambag ng tulong para sa medical expenses ni Lydia na naka-confine noon sa isang ospital sa Makati City.

Huling nakita sa publiko si Lydia ay noong 2019 nang isa siya sa maging flag bearers sa opening ceremony ng 30th Southeast Asian Games na ginanap sa Philippine Arena.

Ang anak niyang si Stephanie, na isang volleyball player for De La Salle University, ang nagbalita ng pagpanaw ng kanyang ina.

***

TATLONG taong dumanas nang matinding depression ang aktor na si Ian de Leon.

Ang sakit daw niyang ito raw ang naging dahilan daw kung bakit siya lumayo sa mga taong gustong tumulong sa kanya, kasama na rito ang sarili niyang pamilya.

Kinuwento ng aktor ang tungkol sa pinagdaanang mental health condition sa podcast na ‘Surprise Guest with Pia Archangel.’

Sinara raw ng aktor ang kanyang sarili sa mga taong handang tulungan siya. Pati raw ang magdasal ay nakalimutan na rin niyang gawin.

Ayon kay Ian: “When I hit rock bottom talaga, I was searching for answers eh. I strayed away from family for a while. I didn’t want to see anyone, I didn’t want to talk to anyone. I didn’t want anyone asking me how I am. I just had that spiraling depression moment in my life where it took me three years to get over it, and it was a really dark and difficult time for me. I forgot about God, I forgot about people who cared for me, people who loved me and I just shut myself off from the world.”

Hindi rin daw maintindihan ni Ian kung bakit nangyari iyon sa kanya. Gustuhin man daw niyang humingi ng tulong, pero nahihiya raw siyang magkuwento nang pinagdaraanan niya.

“What was going on sa buhay ko during that time was I felt so empty and depressed that I couldn’t feel anymore. I woke up one night thinking ‘What is wrong with me? What is going on? What should I do? Who should I go to? Who should I talk to? I don’t want to talk to anyone, I don’t want to see anyone,” diin pa niya.

Pero kahit daw pilit na lumalayo si Ian, hindi raw siya sinukuan ng kanyang pamilya. Nanatili raw silang nasa tabi ng aktor dahil alam nilang kailangan nito ng tulong.

Nagpasalamat ang ‘Lolong’ star sa kanyang asawa na si Jennifer Orcine dahil sa pagmamahal at sa pagtiyaga nito sa kanyang pinagdaanang depression.

***

KABILANG ang aktor na si John Travolta sa nadurog ang puso sa pagpanaw ng singer-actress na si Olivia Newton-John sa edad na 73 noong nakaraang August 9 pagkatapos ng 30-year battle nito with cancer
Si Travolta ang naging leading man ni Olivia sa 1978 hit musical film na ‘Grease.’

Sa kanyang Instagram post, ramdam ang labis na kalungkutan ng aktor dahil sa pag-alala ng mga pinagsamahan nila ni Olivia noong ginawa nila ang pelikulang ‘Grease’ at noong magtambal ulit sila sa 1983 comedy na ‘Two of a Kind’.
“My dearest Olivia, you made all of our lives so much better. Your impact was incredible. I love you so much. I will see you down the road and we will all be together again. Yours from the first moment I saw you and forever! Your Danny, your John,” caption pa ng aktor.

Sa naging 40th anniversary ng ‘Grease’noong 2018, sinabi ni Travolta na na-in love siya kay Olivia noong ginagawa nila ang pelikula. Ginampanan nila ang characters na sina Danny Zuko and Sandy Olsson.

“She was my favorite thing about doing Grease. If you were a young man in the ’70s…, if you remember that album cover with Olivia with that blue shirt on, with those big blue eyes staring at you. Every boy’s, every man’s dream was: ‘Oh, I would love for that girl to be my girlfriend’.”

Noong 2020, pumanaw din sa sakit na breast cancer ang misis ni Travolta, ang aktres na si Kelly Preston sa edad na 57.

(RUEL J. MENDOZA)