2022 October 20 Archive - People's Balita

November 18, 2024
Search in People's Balita
Ang Diyaryong Pinagkakatiwalaan

Archive for October 20th, 2022

2 bagong State-of-the-Art Buildings sa Valenzuela, itatayo na

Posted on: October 20th, 2022 by @peoplesbalita No Comments

SISIMULAN na ng Pamahalaang Lungsod ng Valenzuela sa pamumuno ni Mayor WES Gatchalian ang pagtatayo ng bago at modernized na Finance Center Building at Legislative and People’s Center Building kasunod ng isinagawang groundbreaking ng mga ito bilang sagot sa mga umiiral na isyu sa city hall.

Ayon kay Mayor Gatchalian, napanssin niya ang mga isyung naobserbahan niya nang mag-ikot siya sa unang linggo ng panunungkulan ay ang limitadong parking slots, kakulangan ng storage area, at kawalan ng disenteng cafeteria na kayang tumanggap ng humigit-kumulang 13,000 empleyado ng city hall.

Ang New Finance Center Building ay isang anim na palapag na gusali na may basement parking na may kabuuang 157 car slots at 113 motorcycle slots. Ito ay maglalaman ng mga opisinang nagbibigay ng kita ng Lungsod, tulad ng Treasurer’s Office, Business Permits and Licensing Office (BPLO), City Assessor’s Office, Geographical Information System – Data Management Office (GIS-DMO), Office of the Building Official (OBO), City Business Inspection and Audit Team (CBAT), Local Civil Registry, Zoning Office, at City Environment and Natural Resources Office (CENRO), at Valenzuela City Information and Communication Technology Office (ICTO).

Samantala, ang Legislative and People’s Center Building ay dinisenyo bilang isang apat na palapag na gusali na may dalawang basement parking. Ang bago at mas modernong Legislative building na ito ay naghihintay sa mga opisina ng Sangguniang Panglungsod ng Valenzuela, Plenary Hall, ang 100-seater food hall para sa mga empleyado, at ang mas malaki at mas magandang City Child Protection Center.

“Isang karangalan sa akin na sa first 100 days ko in office na personally ipresent sa inyo ang dalawang imprastraktura na magiging landmark in the history ng ating mahal na lungsod.” Pahayag ni Mayor WES.

Kinilala ng alkalde si Senador WIN Gatchalian sa pagtulong sa lokal na pamahalaan na makakuha ng pondo upang bigyang-daan ang bago, mas malaki, mas mahusay, at makabagong mga gusali na tutugon sa mga pangangailangan ng bawat Valenzuelano at mas mapagsilbihan ang mga nagbabayad ng buwis sa lungsod na tinawag niyang “Proyektong Kakaiba”. (Richard Mesa)

Susunod na laban ni Ancajas gagawin na sa Pilipinas

Posted on: October 20th, 2022 by @peoplesbalita No Comments

GAGAWIN na sa Pilipinas ang susunod na laban ni dating world super flyweight champion Jerwin Ancajas.

Sinabi nito na gagawin sa Pebrero 2023 ang nasabing laban.

Ang 30-anyos na si Ancajas ay galing sa pagkatalo kay Fernando Martinez noong nakarang mga linggo.

Sa mga susunod na araw aniya ay iaanunsiyo nito kung saan at sino ang makakalaban niya.

Dagdag pa nito na aakyat siya ng timbang sa 118 pound division sa susunod nitong laban.

Mayroon siyang 33 panalo, tatlong talo at dalawang draw ang record.

YUL SERVO, MANUNUNGKULAN BILANG MAYOR NG MAYNILA

Posted on: October 20th, 2022 by @peoplesbalita No Comments

PANSAMANTALANG manunungkulan bilang Alkalde ng Lungsod ng Maynila si Vice Mayor John Marvin “Yul Servo” Nieto dahil sa pagdalo ni Mayor Honey Lacuna-Pangan sa C4 World Mayors Summit na gaganapin sa Buenos Aires, Argentina.

Ayon kay Acting Mayor Yul Servo, ibinilin nito sa kanya ang pagpapanatili ng maayos, malinis at tapat nilang paghahatid ng serbisyo sa mga kapwa Manilenyo.

Nabatid din sa bise alkalde na hahalili pansamantala sa kanya si 3rd District Councilor Johanna “Apple” Nieto-Rodriguez na siya ring mauupo bilang presiding officer ng Sangguniang Panlungsod.

Hiling naman ni Servo Nieto sa mga opisyal at kawani ng lokal na pamahalaan na magkaisa nilang ipanalangin ang mapayapa at ligtas na paglalakbay ng alkalde pati na rin ang matagumpay na pakikilahok niya sa pandaigdigang summit ng mga mayor mula sa iba’t ibang sulok ng daigdig.

“Sa pagdalo ni Mayor Honey Lacuna sa C4 World Mayors Summit sa Buenos Aires, Argentina na naglalayong pagtuunan ng pansin ang seryosong usapin sa climate change at ang mahalagang responsibilidad ng mga pamahalaan na pangunahan ang mga hakbang upang tiyakin ang pagbibigay proteksiyon sa ating kalikasan, atin sanang ipanalangin ang kanyang mapayapa at ligtas na paglalakbay, gayun din ang mabunga at matagumpay na pakikilahok sa pandaigdigang summit ng mga mayor mula sa iba’t-ibang sulok ng daigdig,” pahayag ni Acting Mayor Yul Servo.

Napag-alaman na tanging ang alkalde ng Pamahalaang Lungsod ng Maynila at alkalde ng Pamahalaang Lungsod ng Quezon lamang ang naimbitahang dumalo sa tatlong araw na summit mula sa mga siyudad sa bansa.(Gene Adsuara)

Pagtanggal ng pagtuturo ng ‘mother tongue’ bilang asignatura, hindi pa pinal – Department of Education

Posted on: October 20th, 2022 by @peoplesbalita No Comments

NILINAW ng Department of Education (DepEd) na hindi pa pinal ang pagtanggal ng pagtuturo ng mother tongue o sariling dialect bilang asignatura.

Ito ay dahil kasalukuyang nakabinbin pa ang paglalabas ng final curriculum para sa Kinder to Grade 10 (K-10) program.

Ginawa ni DepEd spokesperson Michael Poa ang naturang pahayag kasunod ng naunang pahayag ni Education Undersecretary Epimaco Densing III sa planong pagtanggal ng 50 minutes Mother tongue subject para sa Grade 1 hanggang Grade 3 para ma-decongest ang kasalukuyang curriculum ng mga estudyante.

Paliwang pa ni USec. Densing na hindi na kailangan ng Mother tongue subject dahil ito ang pang-araw-araw na ring ginagamit ng mga mag-aaral na dialect sa eskwelahan, sa komunidad at sa pakikipagusap sa kanilang pamilya. Sa halip ay dapat na ilaan na lamang ang oras sa pagtuturo ng asiganaturang mother tongue sa reading at national math programs.

Subalit, ayon kay Poa na kasalukuyang nasa proseso ang DepEd ng pagkonsulta sa stakeholders, sa academe at iba pang government agencies kaugnay sa pag-review ng K-10 curriculum.

Sa halip na magpasa ng mga batas na makatutulong: Sen. ROBIN, nais ipa-ban ang K-dramas at pabor din si Sen. JINGGOY

Posted on: October 20th, 2022 by @peoplesbalita No Comments

HINDI kami pabor sa sinasabi nina Senator Robin Padilla at Senator Jinggoy Estrada na dapat i-ban ang mga K-dramas sa Pilipinas.

Sabi ni Sen. Jinggoy, kung minsan daw ay naiisip niyang solution sa pag-angat ng TV shows ay ang pag-ban ng K-dramas. Pero ito raw ay obserbasyon lamang niya.

Pareho sila ng sentiment ni Senator Robin – na ang paraan para itaas ang kalidad ng TV shows sa Pilipinas ay patayin ang competition from foreign series. Na dapat puro Filipino shows lang ang dapat ipalabas sa ating TV screens.

But is this the right solution?

May mungkahi pa si Robin na dapat taasan ang taxes na ipinapataw sa mga foreign shows na dumarating sa Pilipinas.

Mali po ito kasi paano uunlad ang quality ng TV shows natin kung iisang peg ang ating sinusundan? Dapat global na ang puntirya natin, hindi lang basta local audience.

Sa dinarami ng mga artista na naupo sa Senado at Kongreso, wala naman kahit sa kanila ang nakaisip na magpasa ng batas na makatutulong sa mga manggagawa sa entertainment industry.

Bago sila naging senador ay mga artista sila kaya alam na alam nila for sure ang mga problema sa entertainment industry – piracy, mataas na taxes, mababang pasuweldo, just to name a few.

Pero kahit isa sa mga artistang naluklok sa Senado at Kongreso ay wala nagawa para tulungan ang mga kasamahan nila sa entertainment industry. Walang naipasang batas para maibaba ang taxes o protektahan ang mga workers sa entertainment industry.

Kung sakaling may mga Pinoy shows na sumikat sa ibang lugar sa mundo, ikatutuwa ba natin kung ang iba-ban din tayo sa ibang bansa dahil sikat tayo?

Bilang mga televiewers, nasa atin ang choice kung ano ang gusto natin panoorin. Bahagi iyon ng freedom of choice.

Kaya sa halip na mag-isip kayo na ipa-ban ang K-dramas, magpasa kayo ng batas na makatutulong para umunlad ang entertainment industry.

***

NATUTUWA kami for Keempee de Leon dahil nagbabalik-pelikula ang actor.

Kasali si Keempee sa cast ng ‘I Love You, Beksman’ kung saan gumaganap siyang gay dad ni Christian Bables.

Hindi na namin matandaan when was the last time napanood namin si Keempee sa pelikula. He is one of the more competent actors of his batch at naniniwala kami na given the right material and handled by a good director, pwedeng-pwede siyang mag-excel sa acting.

Sa ngayon ay napapapanood si Keempee sa ABS-CBN series sa Netflix na ‘2 Good 2 Be True.’

Hindi namin alam kung paano na-convince ni Direk Perci Intalan si Keempee to play the gay dad of Christian sa ‘I Love You, Beksman’ pero tama naman na lumabas siyang muli sa pelikula, gay role man iyan o hindi.

Keri naman niya ang role bilang flamboyant guy na asawa ni Katya Santos sa pelikula.

We hope to see Keempee doing more movies kaya sa masundan pa itong paglabas niya sa ‘I Love You, Beksman.’

(RICKY CALDERON)

Bagong highly transmissible Omicron XBB subvariant at XBC variant, na-detect na sa PH

Posted on: October 20th, 2022 by @peoplesbalita No Comments

NAKAPAGTALA na ang Pilipinas ng bagong mas nakakahawang Omicron XBB subvariant at XBC variant ayon sa Department of Health (DOH).

Iniulat ng DOH na nasa 81 kaso ng Omicron XBB subvariant ang na-detect mula sa dalawang rehiyon sa bansa.

Ayon kay DOH officer-in-charge Maria Rosario Vergeire, nasa 70 dito ay nakarekober na, walong pasyente ang sumasailalim pa sa isolation habang ang status naman ng tatlo pang pasyente ay kasalukuyang biniberipika.

Sa kabutihang palad ay walang naitalang nasawi.

Batay sa preliminary studies, nauna ng ipinaliwanag ng DOH na ang XBB sublineage ay nagpapakita ng mas mataas na immune evasion ability kumpara sa BA.5. Ito ay nasa ilalim ng omicron subvariants na kabilang sa minomonitor ng World Health Organization (WHO).

Samantala, ang 193 kaso naman ng XBC variant ay na-detect sa 11 rehiyon.

Sa kasamaang palad, ayon kay Vergeire may limang pasyente na dinapuan ng XBC variant ang nasawi.

Nasa 176 katao naman ang nakarekober na, 3 ang sumasailalim pa sa isolation habang ang status ng iba pang pasyente ay kasalukuyang beniberipika pa ng Health department. (Gene Adsuara)

Murder inihain vs 4 katao sa pagpatay sa brodkaster na si Percy Lapid

Posted on: October 20th, 2022 by @peoplesbalita No Comments

HAHARAP na sa reklamong murder si Joel Estorial at tatlo pang suspek para sa pagkamatay ng ng radio commentator na si Percy Lapid (Parcival Mabasa), ito matapos umamin sa krimen ang nauna.

Martes nang iharap sa media ng pulisiya ang sumukong si Estorial habang itinuturo sina “Orly Orlando,” Edmon Adao Dimaculangan at Israel Adao Dimaculangan na binayaran diumano ng P550,000 para itumba si Lapid. Pare-parehong “at large” pa sina Orlando at ang magkapatid na Dimaculangan.

Makikitang hawak-hawak ni Roy Mabasa, kapatid ni Percy, ang reklamo para sa paglabag sa Article 248 ng Revised Penal Code (Murder).

Una nang sinabi ni Estorial na natakot siya at nakonsensya sa kasalanan niya, habang galing daw sa loob ng Bilibid ang utos na ipapatay si Lapid.

Tiniyak naman ni Interior Secretary Benhur Abalos na totoong gunman si Estorial at hindi basta iprinesenta lang bilang “fall guy” lalo na’t nag-match ang slug, ballistics atbp. sa imbestigasyon ng mga pulis. Sa kabila nito, marami pa ring duda.

“This is great police work. Binacktrack po ‘yan, tinyaga po ‘yan ng ating kapulisiyahan,” ani Abalos.

Una nang inilagay sa P6.5 milyon ang pabuya para sa sinumang makapagbibigay ng impormasyon sa ikakukulong ng mga suspects ng krimen.

Kilala ang biktima bilang kritiko ni Pangulong Ferdinand Marcos Jr. at dating Pangulong Rodrigo Duterte, at sinasbaing ikalawang media man na pinatay sa ilalim ng panunungkulan ni Marcos Jr.

Umani ng malaking pagkundena ang karumaldumal na pagpatay kay Lapid sa Las Piñas ngayong buwan, dahilan para magmobilisa ang National Union of Journalists of the Philippines at magsalita ang sari-saring political figures.

(Daris Jose)

Ads October 20, 2022

Posted on: October 20th, 2022 by @peoplesbalita No Comments

Proud na rumampa sa Cannes, France kasama ang pamilya: ‘Cattleya Killer’ nina ARJO, first Filipino drama na pinalabas sa MIPCOM

Posted on: October 20th, 2022 by @peoplesbalita No Comments

DUMALO ang award-winning actor and first-termer bilang Representative ng Quezon City District 1 na si Arjo Atayde para sa international premiere ng ABS-CBN’s six-part drama series na “Cattleya Killer” sa MIPCOM Cannes, France.

Ang MIPCOM (Marché International des Programs de Communication), o ang International Market of Communications Programs, ay isang taunang trade show na ginaganap sa movie capital ng France na tumatakbo sa loob ng apat na araw sa Oktubre.

Sa Instagram post, masayang nag-pose si Arjo sa harap ng Palais des Festivals, na kung saan ipinapakita ng napakalaking billboard ng “Cattleya Killer,” ang first Filipino drama na pinalabas sa MIPCOM, ang itinuturing na largest content market sa buong mundo.

Sa kasunod na post ay makikita ang delegasyon ng Pilipinas sa pangunguna ng ABS-CBN International Production at executive producer na si Ruel Bayani.

Ang “Cattleya Killer” ang unang mainstream starring role ni Atayde mula nang manalo bilang Congressman sa unang distrito ng Quezon City sa pamamagitan ng landslide victory last May 2022 elections.

Si Cong. Atayde ay nakapag-propose na ng mahigit 41 na panukalang batas, kabilang ang House Bill 457, na naglalayong ideklara ang Quezon City bilang Film and TV Arts Capital of the Philippines.

Samantalang ang HB 459, na tungkol sa occupational safety para sa mga artista at manggagawa sa ang sektor ng pelikula at telebisyon.

Bilang vice chairman ng Creative Industry and Performing Arts Committee ng 19th Congress, kabilang sa mga responsibilidad ni Arjo ang pag-promote ng mga pelikulang Pinoy at serye sa pandaigdigang komunidad.

Ang premiere screening ng “Cattleya Killer” ay ginanap noong Miyerkules, Oktubre 19, sa Palais Auditorium na pinangunahan ng Asian Academy Creative Awards 2020 Best Actor, kasama ang kanyang kapatid na aktres at producer din na si Ria Atayde, ina at premyadong aktres na si Sylvia Sanchez, at negosyanteng ama na si Art Atayde. Sila nga ang nasa likod ng Nathan Studios Inc. na kasosyo sa drama serie. Nagsimula na nga silang mag-produce ng shows (‘Becoming Ice’), series at films.

At sa unang pagpapalabas ng ‘Cattleya Killer’ sa Cannes ay opisyal na minarkahan ang unang pagkakataon na ang isang seryeng Filipino ay ipapakita sa mga gumagawa ng desisyon sa industriya ang pag-aasam na makakuha ng kasosyo para sa global distribution.

Mula ito sa mabusising direksyon ni Dan Villegas, kasama rin sa serye sina Jake Cuenca, Christopher de Leon at Zsa Zsa Padilla.

Ang drama series ay tungkol sa nakaka-intrigang imbestigasyon ng misteryosong pagpatay ng isang copycat ng isang kilalang serial killer na nanakot sa Maynila, dalawang dekada na ang nakararaan.
Ang isang anak ng pulis na nagbukas sa kaso ay magiging pangunahing suspek kapag nabunyag ang mga nakaraang trauma at matagal nang nakabaon na mga lihim.

Ang proyekto ay kinunan sa Filipino at mayroon na ngayong English subtitles at overdubs para sa international screening.

Ang “Cattleya Killer” ay bahagi ng pelikula sa 2021 Full Circle Series Lab, isang Southeast Asian talent development initiative ng Film Development Council at French film company, Tatino Films, na may creative development na ginagabayan ng mga International mentor mula sa South Africa, Israel at Germany.

Proud na proud naman si Sylvia sa latest achievement na ito ng kanyang mga anak na sina Arjo at Ria (na maraming pumupuri sa kanyang litaw na litaw na kagandahan)

Of course, rumampa si Sylvia suot ang mga creations ni Frankie De Leon, na Pinoy na Pinoy ang dating.
Goodluck sa Cattleya Killer at sa Nathan Studios!

(ROHN ROMULO)

DSWD, pinagtibay ang suporta sa mas pinalakas na Asean regional cooperation

Posted on: October 20th, 2022 by @peoplesbalita No Comments

PINAGTIBAY ni Department of Social Welfare and Development (DSWD) Secretary Erwin Tulfo ang commitment ng Pilipinas na suportahan ang development policies ng Association of Southeast Asian Nations (Asean), tumutugon sa kakailanganing pagbabago para sa marginalized at vulnerable sectors sa gitna ng coronavirus disease 2019 (Covid-19) pandemic.

Sa isang kalatas, sinabi ng DSWD na nakiisa si Tulfo sa ibang ranking officials mula sa member-states ng regional block para talakayin ang development policies na naglalayong palakasin ang regional cooperation noong idaos ang 28th Asean Socio-Cultural Community (ASCC) Council meeting sa Phnom Penh, Cambodia mula Oktubre 12 hanggang 14.

Pinag-usapan sa miting ang ASCC priority areas na nakamit para sa taong 2022 at maging ang “concerns and cross-pillar issues” kabilang na ang polisiya para palakasin ang “social protection, climate change adaptation, Covid-19 recovery, and reduction of inequalities in the Asean region.”

Inendorso rin nito ang “substantial outcome documents” para sa adoption at notation ng mga Asean leaders sa panahon ng nalalapit na Asean summits sa Nobyembre.

Sa naging talumpati ni Tulfo sa senior officials meeting para sa ASCC, muling inulit ng Kalihim ang strong advocacy ng Pilipinas at nanawagan para sa “heightened efforts and investments” para sa paghahatid ng basic health, education, at social welfare services”. Tinukoy ang mga naging karanasan at hamon sa kasagsagan ng pandmiya at post recovery efforts.

“Now more than ever, shock responsive and adaptive social protection interventions will help safeguard the progress we have made in building resilient communities and social protection systems sustainable even with the fast-changing environment and shocks,” wika ni Tulfo.

Nagpahayag din ng pagsuporta si Tulfo para sa advancement ng social work profession sa Asean region.

“Consistent with the mainstreaming of the Asean Roadmap to Implement the Hanoi Declaration on Strengthening Social Work Towards a Cohesive and Responsive ASEAN Community, we reiterate our strong commitment and support for the advancement of the social work profession, building positive perception and greater recognition on the role of Social Work and the wider social service workforce in Social Protection and allied sectors,” ang pahayag ni Tulfo.

“The Philippines is looking forward to the notation of the regional guidance that will support policymakers, managers, and members of the social service workforce to further strengthen the role of social work in contributing to the enhanced equitable access of the poor and the vulnerable to responsive, effective, and inclusive social welfare programs,” aniya pa rin.

Ang ASCC ay isa sa tatlong pillars ng Asean community na committed na itaas ang kalidad ng buhay ng mga mamamayan ng member-states sa pamamagitan ng cooperative activities na “people-oriented, people-centered, environmental-friendly, at socially responsible.” (Daris Jose)