UMAABOT na sa P433.16 bilyon ang ginastos ng pamahalaan mula Enero hanggang Oktubre ngayong taon sa pagbayad lamang ng utang, higit doble ng budget ng Department of Social Work and Development ngayong taon.

Sa datos ng Bureau of the Treasury (BTr), P387.93 bilyon ang kabuuang ginastos ng pamahalaan nitong Oktubre at P33.18 bilyon ang gastos para sa interest payments.

Samantala, ang kita ng pamahalaan ay nasa P288.87 bilyon at short ito ng P99.06 bilyon para matustusan ang lahat ng gastusin kaya’t kinailangan nitong mangutang.

Ayon sa BTr, ang budget deficit ng pamahalaan mula Enero hanggang Oktubre ngayong taon, o ang short nito, ay umaabot na sa P1.11 trilyon.

“ANONG  umento sa mga kawani ng gobyerno sa 2023 [ang] ipinagmamalaki ng DBM (Department of Budget and Management) gayung ni hindi makabili ng 1 sachet ng 3-in-1 coffee ang barat na umentong binigay ng pamahalaan sa nakaraang apat na taon?”

Ito ang patutsada ni Alliance of Concerned Teachers (ACT) chairperson Vladimer Quetua sa DBM na nasa ilalim ng pamumuno ni Secretary Amenah Pangandaman, dahil P4.85 lamang umano ang magiging umento sa pang-araw-araw na minimum na sahod ng mga manggagawa sa gobyerno mula pa noong 2018.

Ang pahayag ay ginawa matapos tiyakin ng DBM sa mga manggagawa ng gobyerno na magkakaroon ng taas sa suweldo sa 2023 sa ilalim ng Salary Standardization Law 5.

Batay sa kalkulasyon ng grupo, ang mga manggagawa sa gobyerno sa ilalim ng Salary Grade (SG) 1 ay tumatanggap lamang ng pagtaas ng P106 buwanan o P4.85 kada araw mula 2018 hanggang 2022 dahil sa tumataas na inflation.

Ayon sa ACT, ang kabuuang pagtaas ng sahod sa nakalipas na apat na taon ay P2,061 para sa antas ng suweldo.

Sinabi ni Quetua na ang mga empleyado ng SG 1 ay kasalukuyang tumatanggap ng P12,517 buwanang sweldo, mas mababa sa basic pay ng mga minimum wage earner sa National Capital Region (NCR), na P570 araw-araw o P14,820 kada buwan.

Samantala, ang mga empleyado ng SG 1 ay nakatakdang makatanggap ng P13,000 simula Enero 1, 2023, kasunod ng kaapat na tranche ng Salary Standardization Law 5 na nilagdaan noong administrasyong Duterte.

Giit pa ni Quetua, humihiling sila ng P33,000 minimum salary para sa mga manggagawa sa gobyerno, bilang karapatan nilang mabuhay, batay sa sariling datos ng gobyerno sa family living wage.

“Alongside, we demand for a four-grade adjustment to teachers’ salaries, starting from the upgrading of Teacher 1 positions from Salary Grade 11 to Salary Grade 15, for their pay to be at par with those of other professionals with comparable qualifications, such as the uniformed personnel and nurses,” dagdag pa niya.

Una rito, sinabi ng DBM na nasa P47 milyon ang inilaan sa Governance Commission para sa GOCCs sa ilalim ng proposed 2023 budget para pag-aralan ang government compensation structures. (BISHOP JESUS “JEMBA” M. BASCO)

NAGTULUNGAN ang Pamahalaang Lungsod ng Navotas at Department of Agriculture (DA) para palakasin ang Enhanced Kadiwa ni Ani at Kita Financial Grant Assistance Program.

Nilagdaan ni Mayor John Rey Tiangco at tagapagsalita ng DA at Assistant Secretary for Consumer Affairs na si Kristine Y. Evangelista ang memorandum of agreement noong Nobyembre 21.

Sa ilalim ng MOA, ang Navotas ay tatanggap ng P5,000,000 na gagastusin sa paggawa ng NavoBangka fiberglass boats para sa 30 rehistradong Navoteño fisherfolk.

Ang dating tulong pinansiyal ng Kadiwa mula sa DA ay ginamit sa pagbili ng mga lambat at iba pang kagamitan sa pangingisda, na ipinamahagi sa mga kwalipikadong benepisyaryong mangingisda.

“Our fisherfolk also served as modern day heroes, especially at the height of the pandemic. While many establishments stopped operations, they continued to provide food on our table,” ani Tiangco.

“We want to give them as much support as we can to uplift their livelihood and help them secure a stable source of income,” dagdag niya.

Ang mga benepisyaryo ng NavoBangka ay sumasailalim sa pagsasanay sa paggawa ng bangka, pagkukumpuni, at maintenance mula sa Bureau of Fisheries and Aquatic Resources.

Pagkatapos ng pagsasanay, gumawa sila ng sariling bangka gamit ang mga materyales na pinondohan ng lokal na pamahalaan at iba pang gamit mula sa BFAR. (Richard Mesa)