MAKATUTULONG kaya o hindi ang pag-amin nina James Reid at Issa Pressman sa kanilang relasyon sa bagong teleserye ni Yassi Pressman sa TV5?
Pati kasi siya ay dawit sa bash at hate comments ng mga netizens na malamang, karamihan dito ay mga tagahanga ng dating magka-loveteam real and reel na sina Nadine Lustre at James.
Pinaniniwalaan kasi ng mga fan na inahas ni Issa si James kay Nadine. At ito ay sa kabila raw ng kaibigan ang turing ni Nadine sa magkapatid na Yassi at Issa.
Obviously, sagot ni Yassi ang kanyang Instagram post kahit walang direktang mga pangalan na tinukoy, nai-connect agad ito, lalo na ng mga netizens sa isyu.
Sabi lang ni Yassi, kung maka-judge raw ang iba at magli-limit na lang din daw siya ng pwedeng mag-comment sa IG niya.
“Smiling cause you don’t know anything about our personal relationships. Kung maka-judge!! Ang i-judge nyo na lang ay si Kuring at si Daphne mamaya ng 6pm sa Kurdapya- at ayan siguradong mas laughtrip pa!
“Sabi nga ni Kuring “peezawt mga tropapeeps peezawt
“Baka rin i-limit ko ang comments section kung may hurtful words, I only welcome positivity, love & kindness here, peezawart!”
Sinabihan naman si Yassi ng ilang fan na dedma na lang daw ito sa mga toxic at negativities.
***
MALAKAS na ang balita sa teleserye comeback ng DonBelle, ang isa sa pinakasikat na loveteam ngayon na sina Donny Pangilinan at Belle Mariano.
Wala pa rin detalye tungkol sa pagsasamahan nilang bagong teleserye, pero last December, kasama na sa omnibus trailer ng network at under Star Creatives.
Pero this time, ang mismong director na si Mae Cruz Alviar na ang nag-post sa kanyang Instagram account. Nag-post ito ng larawan niya kasama sina Donny at Belle. At may caption na, “Here we go!”
Siyempre, dahil sa IG post na ito, excited na lalo na ang mga DonBelle fans. At may pakiusap na agad ang ilan sa mga fan. Sey sa comment, “No toxic thirdwheel po sana direk! No thirdwheel extra skinship please po. A different conflict would be nice and fresh.”
Habang may nagpapasalamat naman at masaya na si Direk Mae raw kasi ang hahawak ng bagong proyekto ng dalawa. So ‘di malayong ang bagong teleserye nila ay ngayong summer.
(ROSE GARCIA)