2023 April 22 Archive - People's Balita

July 3, 2024
Search in People's Balita
Ang Diyaryong Pinagkakatiwalaan

Archive for April 22nd, 2023

LAGUSNILAD UNDERPASS SA MAYNILA, ISASAILALIM SA REHABILITASYON

Posted on: April 22nd, 2023 by @peoplesbalita No Comments

NAGLAAN ang lokal na pamahalaang Lungsod ng Maynila ng pondo para sa rehabilitasyon at pagsasaayos ng Lagusnilad vehicular underpass na matagal nang nakatiwangwang na inumpisahan noon pa ng Department of Public Works and Highways (DPWH) subalit sa hindi malamang dahilan ay nabimbin ang pagsasaayos na nagdudulot ng pagsisikip ng daloy ng trapiko.

Ayon kay Manila Department of Engineering and Public Works (DEPW) City Engineer Armand Andres, sasagutin na ng lokal na pamahalaang lungsod ng Maynila ang rehabilitasyon ng Lagusnilad na nasa ilalim ng pamamahala ng pambansang pamahalaan dahil na rin sa napakaraming reklamong natatanggap ng opisina ni Manila Mayor Honey Lacuna-Pangan mula sa mga motorista na dumadaan dito.

Bukod sa pagsisikip ng daloy ng trapiko sa Lagusnilad, madalas ding magkaroon ng disgrasya sa lugar, lalu na ang mga nagmo-motorsiklo, bunga ng pagiging madulas at hindi pantay ang lansangan makaraang kayurin ang lansangan subalit hindi na nalagyan ng aspalto.

Ayon kay Engr. Andres, mapapasimulan nila ang proyekto sa mga susunod na isa hanggang dalawang linggo dahil kinakailangan pa nilang pag-aralan ang mga lugar na na gagamitin sa isasagawang traffic re-routing.

Kailangan din aniya nilang maglagay ng mga karatula o signages na magiging gabay ng mga motorista upang malaman nila na isasara sa daloy ng trapiko ang Lagusnilad at kung saan dapat dumaan.

Umaasa si Engr. Andres na matatapos nila ang proyektong pagsasailalim sa rehabilitasyon ng Lagusnilad bago pa dumating ang panahon ng tag-ulan.

Ang Lagusnilad Underpass ay bahagi ng lansangan ng Taft Avenue na isang pambansang daanan na nasa ilalim ng pamamahala ng national government.

Ang Lagusnilad ang kaunaunahang underpass na daanan ng mga sasakyan sa Pilipinas at maging sa buong Asya na ginawa noong taong 1960 sa panahon ni dating Mayor Antonio Villegas. (BISHOP JESUS “JEMBA” BASCO)

Pagdami ng miyembro ng Pag- Ibig, indikasyon na maraming mga Pinoy ang nais na magkaroon ng sariling tahanan -PBBM

Posted on: April 22nd, 2023 by @peoplesbalita No Comments

PATULOY ang pagdami ngayon ng mga miyembro ng Pag-IBIG Fund Ngayon.

Sinabi ni Pangulong Ferdinand R Marcos Jr. na ito’y isang indikasyon na sadyang maraming mga Filipino ang may interes na magkaroon ng sariling bahay.

Ayon sa Pangulo, may market ang pabahay at tama lang aniya na tinutugunan ng gobyerno ang problema ukol sa kakulangan sa bahay ng mga Pilipino.

Sa kabilang dako, sa harap nito’y binigyang diin ng Chief Executive na palalawakin pa ang proyektong pabahay ng kanyang administrasyon at marami pa siyang pupuntahang mga lugar sa bansa.

Aniya, ito’y ipatutupad sa iba’t ibang bahagi ng Pilipinas sa gitna ng target na makapag tayo Ng anim na milyong Bahay sa kanyang termino. (Daris Jose)

Ads April 22, 2023

Posted on: April 22nd, 2023 by @peoplesbalita No Comments

Tinitilian sa shirtless scenes: JM, nagpakilig at pinamalas na naman ang husay bilang aktor

Posted on: April 22nd, 2023 by @peoplesbalita No Comments

GAGANAP bilang Mary Ann Armstrong si Carla Abellana sa Voltes V: Legacy.

Anak ni Mary Ann sina Steve, Big Bert at Little Jon sa kuwento ng Voltes V: Legacy na eere sa GMA ngayong May 8.

Hindi ba na-overwhelm si Carla na tatlong lalakiang anak niya sa series gayong sa tunay na buhay ay wala pa siyang anak?

Tumawa muna si Carla bago sumagot…

“Nakakatuwa, lalo na kasi iba-iba sila ng personalities, yung tatlong Armstrong boys iba-iba ng special abilities or ng talents, kanya-kanya, iba-iba po.

“Medyo extremes, may isang napakakulit, may isang napakasobrang talino, may isa namang medyo matikas or yun bang very stern, very ano siya… serious, yung ganun, serious si Steve Armstrong.

“So iba-iba sila and nakakatuwa kasi tama lang yung blend, tama lang actually yung combination of the three Armstrong boys and Mary Ann Armstrong, so hindi po ako nahirapan.

“Siguro as a real life Mary Ann Armstrong kahit sino mahihirapan po sa ganung role, pero ako sobrang na-enjoy ko po yun, talagang super favorite ko sila and iba-iba din po kasi sila in real life and I really enjoyed working with the three boys, sina Matt Lozano, si Miguel Tanfelix and si Raphael Landicho, sobrang na-enjoy ko po yun,” kuwento sa amin ni Carla.

***

NAPANOOD namin sa red carpet premiere ‘Ang Adik Sa ‘Yo’ ng Viva Films.

Tumatalakay ang pelikula sa isyu ng droga at ang masamang idinudulot nito sa isang user at pusher.

Taliwas sa mga pelikula ng Vivamax, wholesome ang pelikulang ito pinagbibidahan nina JM de Guzman at Cindy Miranda, walang hubaran at matinding lovesenes

Napakaguwapo ni JM sa screen, at sa personal siyempre, at tinilian ng ilang beses ang eksena na walang siyang suot na pang-itaas, kita ang kanyang katawang walang bilbil at may mga tattoo.

May pabukol rin siya sa isang eksenang nakatapis lamang siya ng tuwalya na lumabas sa banyo.

Katulad sa mga nakaraang niyang pelikula, ipinamalas ni JM ang husay niya bilang aktor, at kahit hindi sinasadya, nandun pa rin ang pagpapakilig niya sa kanyang mga female and gay fans.

Panay nga ang tilian sa loob ng Cinema 2 ng mga gay fans ni JM lalo na kapag shirtless scenes na niya ang nasa screen.

Karamihan sa kanila ang pumuno sa cinema 2 ng Megamall making the premiere a success.

Nagulat kami kay Cindy Miranda dahil kaya niyang magpatawa onscreen sa unahang bahagi ng pelikula at magpaiyak sa bandang huli.

At muli na naman naming napansin ang malaking pagkakahawig nina Cindy at Sanya Lopez.

At si Candy Pangilinan, komedyana pero nag-drama siya sa pelikula, at naitawid naman niya.

Happy rin kami na mapanood sa Adik Sa ‘Yo ang Facebook friend naming hunk actor na si Mike Liwag although medyo hindi kami happy dahil walang hubad na eksena si Mike sa pelikula.

Sa direksyon ni Nuel Naval, palabas na ito ngayon sa mga sinehan.

(ROMMEL L. GONZALES)

Malakanyang, pinangalanan ang mga bagong Marcos appointees sa DTI, NAP, DND

Posted on: April 22nd, 2023 by @peoplesbalita No Comments

INANUNSYO ng Presidential Communications Office (PCO) ang bagong appointees ng administrasyon ni Pangulong Ferdinand Marcos Jr.

Ang mga bagong opisyal na itinalaga sa National Archives of the Philippines (NAP), Department of Trade and Industry (DTI), at Department of National Defense (DND) ay sina: Victorino M. Manalo, Executive Director ng NAP. Manalo, humahawak ng kaparehong posisyon noong termino ni dating Pangulong Benigno Aquino III, at itinalaga bilang Chairperson ng National Commission for Culture and the Arts noong Enero 2023.

Si Wena M. Buston ay itinalaga bilang Provincial Trade and Industry Officer sa DTI, ayon sa PCO.

Sina Manalo at Buston ay kapwa itinalaga noong Abril 18.

Sa DND naman ay may tatlong bagong appointments noong Abril 13, dalawang opisyal ang napasama sa ranks ng Brigadier General sa Armed Forces of the Philippines (AFP) –Philippine Army, ang mga Brig. Gen. Erwin Alea at Brig. Gen. Eugene Mata.

Si April Bayabao ay na- promote naman bilang Lieutenant Commander ng AFP- Philippine Navy, ayon sa PCO. (Daris Jose)

LTO, nagpaliwanag kaugnay ng malapit nang maubos na driver license card

Posted on: April 22nd, 2023 by @peoplesbalita No Comments

NAGPALIWANAG ang pamunuan ng Land Transportation Office kaugnay ng nagkakaubusang drivers license card para sa mga kumukuha ng lisensya.

Ayon sa kay Land Transportation Office Chief Jay Art Tugade, hindi na hawak ng kanilang ahensya ang procurement nitong license card.

Sa bisa ng special order ng Department of Transportation nitong January, lahat ng procurement na may halagang 50 million and above ay ipoproseso sa central office ng ahensya.

Kung maaalala mayroon nalang halos 147,000 na drivers license card base sa imbentaryo ng ahensya.

Sa halos 30,000 na transaksyon sa kada araw, itong supply raw ay aabot na lamang ng limang araw.

Bilang solusyon dito ay mag iimprenta na lamang muna umano sa papel ng mga permit. (Daris Jose)

2 mataas na opisyal ng gobyerno ipapapatay ako – Rep. Teves

Posted on: April 22nd, 2023 by @peoplesbalita No Comments

IBINUNYAG ng kontrobersyal na si dating 3rd District Negros Oriental Rep. Arnolfo “Arnie” Teves na dalawang mataas na opisyal umano ng gobyerno ang nagpaplano ng ‘assassination plot’ laban sa kanya.

Si Teves ang itinuturong mastermind sa pagpatay kay Negros Oriental Gov. Roel Degamo at 8 iba pa.

Sa isang television interview via zoom, sinabi ni Teves na hindi ligtas para sa kanya ang umuwi dahilan sa banta sa kaniyang buhay. Tumanggi naman ang opisyal na kumpirmahin ang ulat na nasa Cambodia siya para umano sa kaniyang kaligtasan.

“Dalawa silang mataas na opisyal ng gobyerno, they want me dead,” ayon kay Teves pero tumanggi na tukuyin ang mga pangalan ng naturang mga opisyal dahilan baka umano siya ma-libel.

Ayon kay Teves, nakarating sa kaniya ang impormasyong may ‘kill order’ laban sa kaniya noong una pa man na i-raid ng mga pulis ng kaniyang tahanan sa Negros kung saan plano umanong todasin na siya at palitawin na lamang na nanlaban kaya nabaril sa operasyon.

Sinabi ni Teves na kung may ebidensya laban sa kaniya ay ilutang at sampahan siya ng kaso sa halip na puro hearsay o gawa-gawa lamang ang pinagsasabi kung saan nahahatulan na siyang guilty sa ‘trial by publicity’ na sobrang ‘unfair’ umano.

Inihayag ni Teves na maari niyang ikonsidera ang pag-uwi sa bansa kung makita niya na mayroon ng ‘fairness’ o patas na hustisya sa bansa pero sa kasalukuyan ay hindi pa niya ito magagawa dahil sa seryosong banta sa kaniyang buhay. (Daris Jose)

GSIS, mamumuhunan ng $300 milyong dolyar para sa global infrastructure projects

Posted on: April 22nd, 2023 by @peoplesbalita No Comments

SINABI ng Presidential Communications Office na nakatakdang mag-invest ang Government Service Insurance System o GSIS ng 3 daang milyong dolyar para sa proyektong imprastraktura partikular na may kinalaman sa transport, energy at digitalization.

Kasunod na rin ito ng tinintahang kasunduan sa pagitan nina GSIS President, General Manager at Acting Board Chairman Wick Veloso at James Amine ng Global Infrastructure Partners Emerging Markets Fund.

Ang hakbang na partnership ay naglalayong maikalat ang assets at makakuha ng mataas na returns para na rin sa kapakinabangan ng may mahigit sa 2 milyong miyembro at pensioners ng ahensiya.

Sa ulat, ang New York based Global Infrastructure Partners ang nagungunang independent infrastructure fund manager na may 87 billion dollar asset at namumuhunan sa power and utilities, natural resources infrastructure, air transport infrastructure, seaports, freight railroad, water distribution and treatment at waste management.

Kilala ang naturang firm sa pakikipag-partner sa public sector at stakeholders na konektado sa pagpapaunlad ng imprastraktura. (Daris Jose)

Kakulangan ng valid ID at digital literacy, dahilan ng mabagal na SIM registration sa bansa

Posted on: April 22nd, 2023 by @peoplesbalita No Comments

KAKULANGAN sa government valid IDs at digital literacy ng mga SIM card subscribers ang itinuturong dahilan ngayon kung bakit nagiging mabagal ang pag-usad ng SIM registration sa bansa.

Sa ngayon kasi ay aabot pa lamang sa 66 million o 39 percent ng kabuuang bilang na 168 million ng mga SIM card users sa buong bansa ang nakakapagparehistro pa lamang ng kanilang mga SIM card noong Abril 11, 2023.

Ayon sa ilang eksperto, dahil dito ay kinakailangan ng hand-holing partikular na sa mga customers na nasa mga probinsya dahil nandoon aniya ang mga lugar na may mababang bilang ng registration.

Kaugnay nito ay sinabi naman ng Department of Information and Communications Technology na pinag-aaralan na nito kasama ang National Telecommunications Commission ang posibilidad ng pagpapalawig pa sa deadline ng SIM registration act.

Mag-utol na HVI, 1 pa isinelda sa P500K shabu sa Caloocan

Posted on: April 22nd, 2023 by @peoplesbalita No Comments

NASAMSAM ng pulisya ang mahigit kalahating milyong peso halaga ng shabu sa tatlong tulak ng illegal na droga, kabilang ang magkapatid na listed bilang high value individual (HVI) na naaresto sa magkahiwalay na buy bust operations sa Caloocan City.

Sa ulat ni District Drug Enforcement Unit (DDEU) chief P/Maj. Dennis Odtuhan kay Northern Police District (NPD) Director P/BGen Ponce Rogelio Peñones Jr, ala-1:40 ng madaling araw nang magsagawa ang mga operatiba ng DDEU sa pangunguna ni PSMS Michael Tagubilin ang buy bust operation sa NHC-LD Road, Brgy. 186.

Kaagad sinunggaban ng mga operatiba ang magkapatid na Ronald Alinapon alyas “Dudong”, 45, at Rey Manuel Alinapon alyas “Tata”, 40, kapwa ng Domato Avenue, Cor. King David St., Phase 12, Brgy. 188, matapos bentahan ng P7,500 halaga ng shabu ang isang pulis na nagpanggap na buyer.

Nakuha sa mga suspek ang humigi’t kumulang 60 grams ng hinihinalang shabu na may satandard drug price value na P408,000.00 at buy bust money na isang tunay na P500 at P7-pirasong P1,000 boodle money.

Nauna rito, natimbog din ng mga operatiba ng DDEU sa buy bust operation sa 105 BMBA Compound, 3rd Avenue, Brgy. 118, dakong ala-1:30 ng hapon ang 18-anyos na si John Michael Paguia alyas “Nognog”.

Nakumpiska sa kanya ang nasa 15 grams ng hinihinalang shabu na may SDP value na P102,000.00 at buy bust money na kinabibilangan ng isang tunay na P500 bill at pitong pirasong P1,000 boodle money.

Pinuri naman ni BGen Peñones ang DDEU sa kanilang matagumpay na drug operation na nagresulta sa pagkakadakip sa tatlong notoryus umanong drug pushers na nahaharap sa kasong paglabag sa RA 9165 o ang Comprehensive Dangerous Drug Act of 2002. (Richard Mesa)