BALITANG may balak ang Viva Films na gawan ng sequel ang pelikulang “Maging Sino Ka Man” na pinagtambalan noon nina Sharon Cuneta at Robin Padilla. 

Ayon kay Sharon, kinausap daw siya ni Boss Vic del Rosario na balak nilang gawin ang sequel nito.  Hindi pa raw naman ito confirmed pero isa raw ito sa naka-line nilang project sa 2024.

Balita ring tuloy ang paggawa ni Sharon ng movie na katambal naman si Senator Bong Revilla.

Pero sa ngayon, hindi pa raw sure dahil sa busy schedule ni Sharon.  Hindi pa kasi tapos ang “Dear Heart: The Concert” nila ni Gabby Concepcion sa Cebu this November 17.

Kaya hindi pa rin sure kung matutuloy ang U.S. tour nila.  Pinag-uusapan na raw. Pero nagpahayag na si Sharon na kung matutuloy ang U.S. tour nila, gusto niya ay kasama nila ni Gabby ang anak nilang si KC Concepcion.

After nga ng Cebu concert, magiging busy na si Sharon sa pagpu-promote ng movie nila ni Alden Richards na “Family of  Two (A Mother and Son Story)” para sa 49^th Metro Manila Film Festival na magsisimula sa December 25, na produced ng Cineko Productions.

Sa lahat ng ito, labis na grateful si Sharon sa mga fans na hindi nagsasawang ibigay ang suporta sa kanya sa nakalipas na panahon.

***

KITANG-KITA na ang husay ni Ruru Madrid sa Martial Arts, kaya may mga nagtatanong sa kanya,  paano kung mapasabak siya sa gulo at makursunadahan dahil alam ng lahat na bihasa na siya sa martial arts, iiwas ba siya sa gulo?

“For me, pag may mga ganyang bagay, siyempre gusto ko pangalagaan kung ano yung imahe ko bilang artista” sagot ni Ruru.

“Kapag may pagkakataon po na ganyan, hindi ko pwedeng pigilan ang sarili ko, lalo na kapag ibang tao ang nasasaktan.”

Paano kung ang naagrabiyado ay ang pamilya niya, especially kung ang girlfriend niyang si Bianca Umali ang concerned

“Sabi ko, okey lang na ako ang kantiin, kung ano ang sabihin nila sa akin, i-down ako, basta huwag lang po iyung ibang taong malapit sa akin, lalo na kung si Bianca or ang pamilya ko o kung sino man.

“Doon, talagang hindi ko po alam kung ano yung magagawa ko.  Pero siyempre, ang mahalaga, kapag may ganyang pangyayari, uunahin mo talaga… huwag mong unahin yung init ng ulo, dapat alam mo kung paano mo ito iha-handle.

“Pero kapag naman po nakapag-undergo ka ng mga trainings ng MMA, ituturo sa iyo yung pagiging disiplinado pagdating sa mga ganyang bagay. At hanggang kaya mong umiwas, iiwas ka talaga,” dagdag pa ni Ruru.

Gabi-gabi ay tumataas ang rating ng “Black Rider” sa GMA-7, 8pm sa GMA-7, pagkatapos ng “24 Oras” dahil tapos na ang training niya at siya na ang personal na tumutugis sa mga kaaway niya sa mga eksena.

(NORA V. CALDERON)

INIHAYAG ng Kapuso aktres na si Carla Abellana, sa pamamagitan hg kanyang social media platform na Threads nitong November 10, 2023, na natuklasan niyang may nai-charge sa kanyang credit card na halagang 11,087.33 dollars o humigit kumulang sa 620,279.64 pesos.

“Lord, how will i pay for the $11,087.33 that was charged to my BDO Mastercard,” lahad na pagkukuwestiyon ni Carla.

Dalawang magkasunod na posts pa ng shock at pagkadismaya ang pinost ng ‘Stolen Life’ lead actress.

“Heartbreaking” at “Losing hope…” ang mga pahayag pa rin ng panlulumo ni Carla sa pamamagitan pa rin ng Threads.

Walang anumang paliwanag si Carla kung ano ang nangyari at kung paano na-charge ang lampas sa kalahating miyong piso mula sa kanyang credit card.

***

NAMANHID daw ang mukha ng young actress na si Jhassy Busran sa sampal na natikman niya mula kay Gladys Reyes.

May eksena kasing sinampal ni Gladys si Jhassy sa pelikula nilang “Unspoken Letters” na mapapanood sa mga sinehan sa December 13.

Kuwento ni Jhassy…

“Yung eksena po namin na sinampal ako ni Miss Gladys ang isa sa pinaka-memorable scene ko sa “Unspoken Letters”.

“Kahit namanhid po yung pisngi ko dahil sa sampal niya, sobrang saya po at nangibabaw yung proud ako sa sarili ko, na nasampal ako ni Miss Gladys.”

Idolo kasi ni Jhassy si Gladys.

At ikatutuwa mo, Rohn Romulo my dear editor, dahil bukod kay Gladys, kabilang sa mga tinitingalang aktres ni Jhassy si Sylvia Sanchez.

Natanong kasi si Jhassy kung bukod kina Gladys, Glydel Mercado at Matet de Leon na pawang mga co-stars niya sa “Unspoken Letters” ay sino pa ang ang nais niyang makatrabaho sa future projects niya.

“Marami po like si Miss Jaclyn Jose, Miss Sylvia Sanchez, Miss Lorna Tolentino at si Miss Maricel Soriano,” paglalahad ni Jhassy.

“Kasi bukod sa ang tagal na po nila sa industriya, versatile actors pa sila.

“Alam kong kapag nakatrabaho ko sila o nakasama, marami akong aral na mapupulot sa kanila, lalo na sa larangang ito, sa showbiz, at hindi lang sa larangang ito, kundi pati na rin sa buhay mismo.”

Sa tanong naman kung sino ang gusto niyang maka-loveteam…

“Kung mabibigyan po ako ng chance, ang gusto ko po, si Elijah Canlas,” ang natatawang sagot ni Jhassy.

“Kasi ang galing-galing po niyang umarte.

“Actually, he is one of my celebrity crushes din po,” aniya pa.

Crush din ni Jhassy si Daniel Padilla.

Gaganap si Jhassy sa “Unspoken Letters” bilang si Felipa, na isang special child.

“Noong nabasa ko yung script, doon ko po na-realize na kaya “Unspoken Letters” kasi may mga bagay tayong kinikimkim sa sarili, na hindi natin sinasabi sa pamilya natin.

“So iyon yung pagkakaintindi ko. Okay, “Unspoken Letters”, hindi nila nasasabi yung tunay nilang nararamdaman.

“So parang napapangunahan sila ng galit nila, na hindi nila nalalaman kung ano ba yung tunay na nangyayari.

“And ayun, parang ang laki na ng pain na hawak mo hanggang sa pagtanda mo, na hindi mo alam na parang nakatago lang sa puso mo, yung bigat niya, nandoon lang, na kinikimkim mo.

“So, pag naiinis ka or what, sabihin mo, para wala kang hahawakang sakit hanggang sa pagtanda mo,” paliwanag pa ni Jhassy.

Gaganap rin sa mahahalagang papel sa “Unspoken Letters” sina Tonton Gutierrez, Simon Ibarra, Daria Ramirez, Deborah Sun, Orlando Sol, John Heindrick, Christine Samson at MJ Manuel.

Ang Unspoken Letters ay sa panulat at direksyon ni Gat Alaman na siya ring executive producer ng pelikula, co-director naman niya si Paolo Bertola at associate director si Andy Andico.

Mula ito sa Utmost Creatives Motion Pictures.

(ROMMEL L. GONZALES)