KAHIT naghiwalay na, hindi kinalimutan ni Daniel Padilla na batiin ang kanyang ex-girlfriend na si Kathryn Bernardo na nagdiwang ng kaarawan.

Nitong hatinggabi ng Martes, nag-post sa Instagram si Daniel ng isang graphic image nila ng dating nobya na may Japanese character na nagsasaad ng “Happy birthday to you.”

May sunflower emoji sa nakalagay sa ibabang bahagi ng kaniyang IG story na indikasyon na para kay Kathryn ang pagbati.

November 2023 nang ianunsyo ng dalawa ang kanilang paghihiwalay matapos ang 11 taong relasyon.

Hindi nila binanggit ang dahilan ng kanilang paghihiwalay pero mapapansin pa rin ang respeto nila sa isa’t isa sa kanilang mga inilabas na pahayag.

Ayon kay Kathryn, sinubukan nila ni Daniel na ayusin ang kanilang relasyon.

“We ultimately had to accept that we can’t go back to where we used to be. It just won’t be fair to pretend that everything is still the same.”

Nagpasalamat si Kathryn sa patuloy na suportang ibinibigay sa kanila ng fans habang pinoproseso nila ni Daniel ang kanilang break-up.

“Our love story began with respect and ended with respect,” sabi niya.

Si Daniel, inihayag na mananatili ang pagmamahal niya kay Kathryn.

“Bal, ang pagmamahal ko sayo ay walang hanggan at walang katapusan,” sey ng binata.

Dalawang buwan matapos ang kanilang breakup, in-unfollow ng aktres si Daniel sa Instagram.

***

BUKOD kay Marian Rivera, isang Kapamilya actor ang nais na makatrabaho ni Carla Abellana.

Sa latest YouTube vlog ni Carla na bisita niya si Alex Gonzaga, sinagot ng dalawa ang ilang tanong para sa “Truth or Truth” video.

Kabilang sa mga tanong na kanilang sinagot ay: Who do you want to work with in the future?

“Marian Rivera, why not? Bilang lagi ko namang sinasabi, same lang kami ng manager,” sagot ni Carla.

Idinagdag pa ng Kapuso actress: “Papa P, isa ‘yan sa mga nasasabi ko. Piolo Pascual. Mga dream kong maka-work.”

Nitong nakaraang Enero, nag-renew ng kontrata si Carla sa Kapuso Network.

After ng “Stolen Life”, bibida naman si Carla sa GMA murder mystery series na “Widows’ War” kasama si Bea Alonzo at Gabbi Garcia.

***

HAPPY si Andi Eigenmann na naipakita niya sa kanyang kapatid na si Gwen Ilagan ang kanyang buhay sa Siargao na hindi nila nagawa ng kanilang namayapang ina na si Jaclyn Jose.

Sa Instagram, nag-post si Andi ng mga larawan habang nagbabakasyon si Gwen sa Siargao matapos ang inurnment ng kanilang ina.

“An introduction to the island life for my (not so) little brother. It did not happen in the circumstance we had hoped for, but I’m glad to finally do this nonetheless,” saad ni Andi sa caption niya sa post.

“Nanay never made it, but I would like to believe she lovingly watched over us from her paradise. After all, all I can do now is to believe,” sey ni Andi.

March 2 nang biglang bawian ng buhay si Jaclyn dahil sa sakit sa puso.

Sa huli, nagbigay ng paalala si Andi patungkol sa mga mahal sa buhay: “Life is uncertain. Look after your people. Hug them. Love them. Cherish them. Hold your loved ones close.”

(RUEL J. MENDOZA)

DAPAT talagang ipagmalaki ni Kapuso Primetime King at Box-Office King na si Dingdong Dantes ang kanyang latest achievement sa pagiging reservist ng Philippine Navy.

Isa na ngayong certified naval combat engineering officer ang award-winning actor, matapos nang matinding training na kanyang pinagdaanan.

Last Monday, March 25, tinanggap ni Dingdong ang kanyang certificate of completion sa Brigade Training and Doctrine Center (Naval Combat Engineer Officer Basic Course Class 07-23), sa Fort Bonifacio, Taguig City.

Kasama niya siyempre sa seremonya ang kanyang asawa na si Marian Rivera na nag-pin sa kanya ng “Rifle Expert Badge” at “Kapanalig Medal”.

Sa kanyang Instagram post, ibinahagi ng host ng ‘Family Feud’ at ‘Amazine Earth’ ang ilang photos na kuha sa naganap na seremonya sa Fort Bonifacio.

Sa una niyang post, may caption ito ng, “When I left the house this morning, Sixto was surprised to see me in this gala uniform. He asked, ‘Dada, where are you going?’

“I said that I would attend my graduation rites in the Seabees Headquarters.

“From the second floor, to my surprise, I heard the strong, coarse voice of Zia screaming, ‘What? You will graduate? Are you a student?’ (laughing and crying emojis).”

Dagdag pa ni Dong, “I just smiled and answered that, yes, even old people can still study and finish anything as long as they want to, because learning should never stop.

“As a reservist, it is a privilege to be given these opportunities to acquire new skills which can definitely enhance many aspects of my life as a professional, father, and husband.

“And what an honor to receive the certificate of completion from King Bee himself, Commodore Rolando Sarmiento.”

Next IG post niya ay ang photo nila ni Marian, at nagbigay din siya message para kay Kapuso Primetime Queen na nagbabalik-serye ‘My Guardian Alien’ na magsisimula na sa Monday, April 1, “Major shoutout sa aking super supportive na Misis for showing up today and pinning the ‘Rifle Expert Badge’ and the ‘Kapanalig Medal’ on me.

“I’m frozen in place—wouldn’t want to risk becoming a human pincushion!”

Bumuhos ang pagbati sa comments section na kung saan puring-puri nila ni Dingdong, pati na rin si Marian na super supportive talaga bilang asawa.

***

NGAYONG Linggo (March 31), samahan si Atom Araullo na kilalanin ang mga kababayan nating may matayog na pangarap sa mundo ng boxing sa dokumentaryong “Totoy Bagsik” ng “The Atom Araullo Specials.”

Hindi maitatangging masidhi ang pagmamahal ng mga Pilipino sa boxing, sa atin nga nagmula ang ilang pinakakamamagaling na boksingero sa mundo tulad ni Manny Pacquiao.

Sa probinsiya ng Masbate, hindi lang mga matatanda ang sumusubok gumawa ng pangalan sa ganitong sports, maging ang ilang bata.

Pagkatapos ng klase, diretsong uwi sa bahay ang siyam na taong gulang na si Nilo. Hindi paglalaro ang inaatupag niya kundi ang pag-eensayo ng boksing. Walang boxing gloves si Nilo, mga retaso ng tela lang ang binabalot niya sa kanyang mga kamay at ang kanyang nagsisilbing punching bag, mga puno ng saging kalapit ng kanilang bahay. Pursigido ang kanyang pag-eensayo dahil nakatakda siyang sumabak sa isang exhibition match sa kanilang lugar.

Puspusan ang training ni Nilo. May nais daw kasi siyang gawin sa premyo kung sakaling manalo siya sa sasalihang palaro sa kanilang probinsiya.

Abangan ang dokumentaryong “Totoy Bagsik” ngayong Linggo (March 31) sa 2024 NYF TV & Film Awards finalist na “The Atom Araullo Specials,” 3 PM, pagkatapos ng “Recipes of Love” sa GMA.

Maaari ring mapanood ng Global Pinoys ang “The Atom Araullo Specials” sa GMA Pinoy TV.

Para sa ibang updates sa GMA Network, bisitahin ang www.GMANetwork.com.

(ROHN ROMULO)

KUNG noon ay tinanggihan ng TV host/actor na si Luis Manzano ang pagpasok sa mundo ng pulitika, sa darating na 2025 elections daw ay mukhang “go” na siya.

Ayon sa nakausap namin na isa sa department heads ng Lipa City hall ay malamang daw si Luis na ang susunod na mayor ng Lipa City.

Last term na raw kasi ni incumbent Mayor Eric Africa. Wala pa raw namang lumutang na nakahandang pumalit sa pwesto na dating hawak ng inang si Vilma Santos-Recto.

Pinag-uusapan na raw sa buong Lipa ang nakatakdang pagpasok sa pulitika ni Luis at marami raw ang natutuwa sa balitang tatakbo siyang mayor sa naturang lugar.

Kumbaga tuloy-tuloy raw ang asenso ng Lipa at magpapatuloy ang pagiging progreso ng siyudad na sinimulan ng ina niyang naging kauna-unahang alkalde ng Lipa.

Sa latest episode ng “Showbiz Now Na” nitong Lunes, Marso 25, nagpahayag si Cristy Fermin ng suporta kay Luis kung sakali man daw na tumakbo itong mayor. Magaling na TV host si Luis at sa totoo lang din ay magiging isang magaling ding pulitiko.

“Saka ang dami niyang natutulungan. Bilang celebrity, ang dami-dami niyang natutulungan. At ang kanyang pagtulong po ay hindi niya ipinagmamakaingay,” pahayag pa ni Nay Cristy. Dagdag pa syempre rito ang kanyang mga natutuhan umano sa ina na ilang taon din na nanilbihan sa gobyerno bilang mayor, governor, at congressman sa Batangas.

Pero wait lang natin dahil may pormal daw na announcement si Luis hinggil dito, huh! Samantala, bukod kay Luis ay may tsikang papasukin na rin ang mundo ng pulitika ng bunsong anak ni Ate Vi at ni Sec. Ralph Recto, huh!

***

SI Angelu de Leon ang unang pinasaringan ni Claudine Barretto sa anniversary party ng mag-asawang Gladys Reyes at Christopher Roxas.

Ayaw raw makasama ni Claudine si Angelu sa supposed movie na gagawin nila with Judy Ann Santos at Gladys. Nabalita rin hindi na lang pinalaki ang ‘di pag-attend ni Jodi Sta. Maria sa ‘Night of 100 Stars for Mr. M’ (Johnny Manahan) dahil din daw kay Claudine na kinarir ang pag-attend.

Baka raw naman may prior appointment naman talaga si Jodi kaya ‘di siya nakadalo. Pero ngayon pati rin daw pala si Jolina Magdangal ay isinasangkot din sa pagkakabangga kay Claudine. Dahil pa ba ito sa ‘Iglot’ noon? Eh ‘di kung ganoon, ang dami palang umiiwas kay Claudine, huh!

(JIMI C. ESCALA)

TINANONG namin sina Buboy Villar, Kokoy de Santos at Mikael Daez kung ano ang pinakamaganda o memorable nilang karanasan nang nag-shoot sila ng second season ng ‘Running Man Philippines’ sa South Korea kamakailan.

Lahad ni Buboy, “Actually ang magandang memory po namin doon ay yung meron kaming mga guests. Kasi hindi po namin in-expect yung mga pangyayari.”

Sekreto pa kung sino ang mga celebrities na tinutukoy ni Buboy, na ang iba ay malamang mga Koreano.

“Hindi ko po masasabi sa inyo, pero gusting-gusto na po naming ipalabas itong Running Man Philippines kasi sobrang nakaka-proud bilang isang artista po dito sa Pilipinas na maranasan po yung ganung pangyayari.

“Huwag po kayong mag-alala dahil kung ano po yung sinasabi ko malalaman niyo rin po iyon. So abangan niyo po yung mga guest.”

“Bukod po sa mga pina-experience sa amin na mga talagang never namin na-imagine na mae-experience namin sa South Korea bukod sa guests, yung winter,” bulalas naman ni Kokoy.

“First [time], feeling ko tayong tatlo, ‘no, first,” sabay-baling ni Kokoy kina Mikael at Buboy na katabi niya sa mediacon ng ‘Basta’t Sama Sama… Best Time Ever’ ng GMA.

“Lalo na yung snow, first time kong maka-experience ng snow, at siyempre Running Man [Philippines] pa yung nagpa-experience sa akin,” sinabi pa ni Kokoy.

“Dagdag lang ako sa kuwento ni Kokoy,” umpisang pahayag naman ni Mikael, “yung pinakamalamig na araw namin sa Korea was negative twenty-two degrees! “Sobrang lamig niya pero matutuwa kayo kasi nahirapan talaga kami pero masaya pa rin siya,” at natawa si Mikael.

Pagpapatuloy pa ni Mikael.

“Part iyon ng challenge and dagdag ko lang din, actually hindi lang sa kanila pero a lot of people here nakatabaho ko na rin and tama yung sinabi ni Art e, it’s a family and saktung-sakto nga yung motto nila na Best Time Ever kasi I’ve had a lot of really good times with everyone here.

“Well most of them some the others I’ve just met, sina Cheska, and then Angel, I just met her now, Matt.

“But I think dun sa ginagawa namin sa Running Man PH mag-e-enjoy talaga yung mga Kapuso, yung mga nanonood dahil totoong nag-enjoy kami, naging pamilya talaga kaming mga runners.

“And sa tingin ko, iyon ang naihatid namin dun sa mga pinagagagawa naming mga games, mga mission, and iyon din yung feeling kong magiging parang strength ng Running Man PH, na matutuwa yung mga tao dahil natutuwa talaga kami ng totoo, so iyon.”

Ang mediacon ng ‘Basta’t Sama Sama… Best Time Ever’ na campaign ng GMA Entertainment Group.

Dinaluhan ito, bukod nina Buboy, Kokoy at Mikael, ng mga cast members ng Bubble Gang na sina Chariz Solomon, Cheska Fausto, Matt Lozano, EA Guzman, Betong Sumaya at Paolo Contis; ng cast ng  Pepito Manaloto na sina Chariz, Angel Satsumi, Arthur Solinap, at Jake Vargas; at ni Dingdong Dantes ng Family Feud at Amazing Earth.

***

ANG female singer/songwriter na si Moira dela Torre ang newest brand ambassador ang 15-in-1 coffee na Bona Slim.

Natanong si Moira kung anong mga bagay na nakapagpapasaya sa kanya.

Tumawa muna siya bago sumagot, “Tulog po, tsaka ano… yung pusa ko po, I think… hindi po ako ready sa tanong ninyo,” at muli itong natawa.

“Tinatapos ko po kasi yung album ko ngayon, so medyo naka-work mode po talaga ako, I think that does make me feel good, accomplishing things and you know, finishing something I started.

“Lalo na kung matagal na siyang kailangan natapos,” at muli siyang tumawa, “but good things take time and when it finally comes into completion after a very long time of waiting, that makes you feel very good, tsaka French fries po,” at natawang muli si Moira.

Ano ang mensahe niya para sa mga tao na kasalukuyang nagdurusa dahil sa weight issues at nakakaranas ng pambu-bully?

“Don’t be too hard on yourself,” saad ni Moira.

“I think…I know that that’s such a cliché, and to be honest po parang how I started losing weight, it is when I stopped trying.

“So, in 2020 I actually started all these diets, I was vegan for a while, I did keto, I did intermittent, I did everything, I’ve tried everything, and I’m sorry but I have to say this for parang trigger warning… I became bulimic for 2 years in 2020 to 2022, and it only worsened my situation, and it got me to gain more weight actually,” deretsahang pag-amin ni Moira.

“And when I stopped putting pressure on myself and when I just started allowing myself to just be, dun po parang kumalma yung katawan ko and I started losing weight gradually.

“I think alam ng katawan natin pag naalagaan siya ng tama, alam ng katawan natin kapag minamahal siya ng tama, so self-love is not a selfish thing, and to the people who are trying to lose weight, to the people who are trying to not care about the bullying, I want you to care more about what you think about yourself, because that matters more and it… I had to take so much time to think that I was beautiful before I saw any change physically, and then the physical change happened.

“We are beautiful and ang dami mo ng magagandang traits bago ka pa… bago mo pa makuha yung goal mong weight, ‘coz weight can fluctuate but your heart, that’s where real change happens, and I’m just very, very thankful because everything happened so gradually, it wasn’t like a quick thing, it wasn’t a quick fix, and so when Bona Slim and I… this is not just because you know, this is a brand partnership, but when I first met-up with Bona Slim, they were saying they’re promoting gradual change, and so everything really felt like it was in line.”

Pagpapatuloy pa ni Moira…

“And hindi po kasi ako mabilis tumanggap ng endorsement kasi hindi po talaga ako magaling mambola,” at natawa ang singer, “mahiyain din ako, hindi ko nga alam kung saan nanggaling yung confidence na sinasabi ni Sir Jeth (Cerezo, CEO of Bona Slim) e.

“So, when they were telling me about gradual change and change that starts from within, and Bona Slim being something that assists you to feel good starting from within, it really made me feel like, ‘I can do this’, this is something I can do, and iyon po.

“So, my message to the people who are going on a journey that I have been on, don’t be too hard on yourself and be unapologetic when it comes to choosing yourself, it’s not a bad thing.”

Sa naging journey ni Moira sa music industry, masasabi ba niya na malayo na ang narating niya dahil sa talento niya sa musika?

Sabi pa ni Moira, “Siguro po, pero more than… I think kung titingnan ko mas marami naman po talagang mas magaling, mas marami pong mas deserving, in terms of talent, but I know that I’ve worked hard, I’ve done my part but I also know that I will not be where I am now if not for the people around me and if not for God, so I can never take full credit for what I have now.”

(ROMMEL L. GONZALES)

MATUTUPAD na ang pangarap ni Jennylyn Mercado na makatrabaho sa isang proyekto ang kanyang mister na si Dennis Trillo.

Magtatambal ang Kapuso couple sa isang romantic comedy film na may pamagat na “Everything About My Wife.” Ang naturang pelikula ay Philippine adaptation ng isang Argentinian movie.

“Masaya siya kahit na tungkol siya sa mag-asawang nag-aaway,” sabi ni Dennis.

Natatawang sey ni Jen ,“Pinamigay niya ‘yung asawa niya.”

Ang “Everything About My Wife” ang magiging unang proyekto nina Dennis at Jennylyn matapos silang magpakasal noong 2021.

Dati nang nagkasama sa isang proyekto ang dalawa sa “I Can See You: Truly, Madly, Deadly” noong 2020.

Ayon kay Dennis, tinulungan siya ni Jennylyn na makapag-adjust sa romcom, na aminado siyang bago para sa kanya.

“Nung umpisa medyo nangangapa ako dahil hindi ako sanay gumawa ng mga light na project. Siyempre sinusuportahan naman ako nung asawa ko, queen of romcom.”

Sey naman ni Jennylyn: “Hindi naman niya kailangan sa totoong buhay. Natutuwa ako na nashe-share na niya sa mga tao gamit ‘yung TikTok, at least maraming natutuwa sa kanya, na-e-enjoy ‘yung mga videos niya at ‘yung creative side niya nilalabas niya.”

Magtatapos na ngayong gabi ang teleserye ni Jennylyn na “Love. Die. Repeat.” Habang magiging kontrabida naman si Dennis sa upcoming historical action series na “Pulang Araw,” na kasama rin sina Alden Richards, Sanya Lopez, Barbie Forteza, at David Licauco.

***

EMOSYONAL sina Ogie Alcasid at Karylle sa kanilang pagbabalik sa Kapuso Network, matapos ang contract signing ng “It’s Showtime” na mapapanood na ito sa main channel ng GMA-7.

Si Ogie, umaasang magkaroon ng “SOP” reunion sa noontime show.

“Naluluha ako because of joy. Dito ako nanggaling noon, tapos ito at nakabalik ako. It’s an emotional journey. Sino ba ang makakapagsabi? Only God,” sabi ni Ogie.

Hiling ni Ogie na muli niyang makasama ang kanyang co-hosts sa “SOP,” na dating variety show ng Kapuso Network tuwing Linggo.

“Maganda, magsama-sama kami for a great production number, we can relieve the old SOP days, that would be nice. Maybe nandiyan sina Jolina (Magdangal), sina Janno (Gibbs), Regine (Velasquez), Jaya. Maybe gagawin ko ‘yun sa birthday ko,” saad ni Ogie.

Labis din ang tuwa ni Karylle sa kanyang pagbabalik-Kapuso.

“For me personally it’s almost like a homecoming also because I was welcomed back by the Kapuso bosses and I felt talagang very, very special and very, very welcome.”

Pumirma ng kontrata ang “It’s Showtime” sa Kapuso Network kung saan mapapanood na sila sa main channel nito simula sa Abril 6.

Nagsimulang mapanood ang “It’s Showtime” sa GTV channel ng GMA noong nakaraang Hulyo.

***

SA edad na 82, muling lalabas si Martha Stewart sa Sports Illustrated Swimsuit issue para sa 60th anniversary nito.

Unang na-feature ang alindog ng Lifestyle Queen noong 2023. Sa susunod na paglabas niya ay kasama niya ang mga iconic models ng naturang magazine.

“They got about 28 of the former iconic models — ‘legends,’ they call them… and we’re going to be in that issue. I’m honored to be in that issue with the likes of Christie Brinkley, Paulina Porizkova, Kate Upton and Tyra Banks,” sey ni Martha na pasabog daw ang isusuot niyang swimsuit.

(RUEL J. MENDOZA)

SA grand mediacon ni Kapuso Primetime Queen Marian Rivera, na nagbabalik-serye sa “My Guardian Alien”, ipinagtanggol ni Kiray Celis ang aktres tungkol sa mga kanegahan sa ugali nito at mahirap ding katrabaho.

Pinatunayan nga ni Kiray na fake news ito dahil siya mismo ang nakasaksi sa kabaitan ni Marian, na first time lang niyang makatrabaho sa isang bonggang teleserye ng GMA Network, kaya sobrang happy siya.

“Ako na ‘yung magsasabi. Siyempre kapag sinabi mong Marian Rivera, ang daming magsasabi sa ‘yo, ‘Naku, makakatrabaho mo si Marian. Good luck sa ‘yo.’

“May mga ganu’n di ba? Tatakutin ka, aanuhin ka, sasabihin sa ‘yo lahat ng hindi magaganda,” pahayag pa ni Kiray.

“Pero sa totoong buhay po, lahat ng nagsabi sa ‘kin nu’n, gusto kong balikan isa-isa kasi lahat po ‘yun mali. Lahat po ‘yun, kabaligtaran sa lahat ng sinasabi nila.”

Aminado naman si Kiray na mukha lang daw talagang “intimidating” si Marian pero napakabait daw nito.

“Kung gaano nila sinasabing nakakatakot, sobrang nakakatawa. Kung gaano sinasabi nila maldita, sobrang kulit. Yayain mo du’n sa gilid, hindi maarte. Sasabihin lang maarte, kabaligtaran po ‘yun sa lahat ng nakikita niyo,” sambit pa ng komedyana.

“Siguro ‘yun tingin lang niya, ‘yun hitsura niya, ‘yun mga pananamit niya, nakaka-intimidate. Pero pag nakatrabaho n’yo siya, kabaligtaran po ‘yun.

Kaya lahat kami nararamdaman ‘yun and very thankful kami na naka-work namin si Ate Yan,” dagdag pa niya.

Ang “My Guardian Alien” ay mula sa direksyon ng award-winning director na si Zig Dulay at kasama rito sina Gabby Concepcion, Raphael Landicho, Max Collins, Gabby Eigenmann, Arnold Reyes, Tanya Gomez, Caitlyn Stave, Josh Ford, Sean Lucas, Tart Carlos, Christian Antolin, Kirst Viray, at Marissa Delgado.

Mapapanood na sa GMA Prime ang “My Guardian Alien” simula sa April 1 after “Black Rider.”

***

SABI nga nila, maraming kuwentong pag-ibig ang nabubuo mula sa pagkain. Ngayong Linggo (March 31), tuklasin ang iba’t ibang putahe ng pagmamahal sa espesyal na handog ng GMA Public Affairs na “Recipes of Love.”

Sa naturang drama special, tiyak bubusugin ng Recipes of Love ang mga manunuod sa mga kuwentong hango sa tunay na buhay at pagbibidahan ng ilan sa mga kilalang aktor ngayon.

Para sa unang recipe, susubukan nina Kapuso actress Katrina Halili at sought-after Sparkle actor Martin del Rosario na ipaglaban ang kanilang pag-ibig sa “Tortang Talong with Tuna.”

Single mother of two si Gemmalyn (Katrina). Nagsusumikap siya na palaguin ang maliit niyang karinderya para sa mga anak. Likas na mahilig magluto si Gemmalyn, kaya maging sa pagtitinda ay nag-iimbento siya ng simpleng mga recipe na binabalik-balikan ng kanyang mga customer. Isa sa mga sikat niyang lutuin ang tortang talong na may tuna.

Sa karinderya niya rin nakilala ang kaniyang kasintahang si Jonathan (Martin) na suki ng mga luto niya. Noong una ay bumibili lang ng ulam si Jonathan kay Gemmalyn, hanggang sa naging malapit ang loob ng dalawa.

Malaki ang pasasalamat ni Gemmalyn na nabiyayaan siya ng lalaking tinanggap ang pagkatao niya. Tanggap kasi ni Jonathan pagkakaroon niya ng dalawang anak.

Pero si Jonathan pala, mula sa mayamang pamilya na malawak ang mga lupain sa probinsya. Nang pinakilala ni Jonathan sa kaniyang pamilya si Gemmalyn ay tumututol agad ang mga ito.

Niyurakan nila ang pagkatao ni Gemmalyn at pilit nilang inilalayo kay Jonathan.

Kakayanin bang tiisin ng magkasintahan kung sukdulan na ang pagpapahirap sa kanilang dalawa?

Huwag palampasin ang unang putahe ng “Recipes of Love” na “Tortang Talong with Tuna” ngayong Linggo, March 31, bago ang “The Atom Araullo Specials” sa GMA Network.

Abangan din ang pangalawang kuwentong ihahain sa May 19 tampok naman sina Max Collins at Luis Hontiveros.

Maaari ring mapanood ng Global Pinoys ang “Recipes of Love” sa GMA Pinoy TV.

Para sa ibang updates sa GMA Network, bisitahin ang www.GMANetwork.com.

(ROHN ROMULO)