KALABOSO ang apat na hinihinalang tulak ng illegal na droga, kabilang ang isang bebot matapos matimbog ng pulisya sa magkahiwalay na buy bust operation sa Malabon at Navotas Cities, Martes ng madaling araw.

Sa ulat ng Northern Police District (NPD), dakong alas-3 ng madaling araw nang magsagawa ang mga operatiba ng Station Drug Enforcement Unit (SDEU) ng Malabon police ng buy bust operation sa Phase 2 Paradise Village, Brgy., Tonsuya na nagresulta sa pagkakaaresto sa dalawang ‘tulak’ ng droga.

Nakumpiska sa mga suspek ang humigi’t kumulang 9.0 grams ng hinihinalang shabu na may sandard drug price value na P61,200.00 at buy bust money.

Sa Navotas, nabingwit naman ng mga operatiba ng SDEU ng Navotas police sa ikinasa nilang buy bust operation sa pangunguna ni P/Capt. Genere Sanchez sa E. Rodriguez St., Brgy., Tanza 1, dakong alas-2:01 ng madaling araw sina alyas ‘Ega’ at alyas ‘Wilma’ matapos bintahan ng P500 halaga ng droga ang isang pulis na nagpanggap na buyer.

Sa report ni Navotas police chief P/Col. Mario Cortes kay NPD Director P/BGen. Rizalito Gapas, nakuha sa mga suspek ang nasa 5 grams ng hinihinalang shabu na may katumbas na halagang P34,000.00.

Mahaharap ang mga suspek sa kasong paglabag sa RA 9165 o Comprehensive Dangerous Drug Act of 2002. (Richard Mesa)

UPANG lalo pang palakasin ang kanilang mga programa sa sports, pumirma ng memorandum of understanding (MOU) ang Pamahalaang Lungsod ng Navotas sa pangunguna ni Mayor John Rey Tiangco kasama ang Unibersidad ng Sto. Tomas (UST) na kinakatawan nina Dr. Jerome Porto, chairperson ng UST Institute of Physical Education and Athletics (IPEA), at Asst. Prof. Marcelita Apolonia, IPEA SIMBAHAYAN Coordinator para sa isang partnership na magtataguyod ng sports training sa mga batang Navoteño. (Richard Mesa)

PUMASOK ang Pamahalaang Lungsod ng Navotas sa isang kasunduan upang lalo pang palakasin ang kanilang mga programa sa sports, kasunod ng paglagda sa memorandum of understanding (MOU) ni Mayor John Rey Tiangco kasama ang Unibersidad ng Sto. Tomas (UST) para sa isang partnership na magtataguyod ng sports training para sa mga batang Navoteño.

Si Dr. Jerome Porto, chairperson ng UST Institute of Physical Education and Athletics (IPEA), at Asst. Prof. Marcelita Apolonia, IPEA SIMBAHAYAN Coordinator, ang kumatawan sa UST.

Sa ilalim ng MOU, magsasagawa ang UST ng libreng community sports training at development tuwing Sabado hanggang sa matapos ang kasunduan sa Hulyo 2026.

Ang pagsasanay sa iba’t ibang sports tulad ng basketball, volleyball, football, swimming, taekwondo, at dancing, ay bukas sa mga baguhan na atleta na may edad 9-18 taong gulang.

Ayon sa MOU, ang UST ay magbibigay ng mga trainer at coach, gayundin ng mga kinakailangang kagamitan sa sports at supplies sa buong pagsasagawa ng mga aktibidad habang ang pamahalaang lungsod naman ang maghahanda ng mga venue at hahawak ng online registration at screening ng mga kalahok sa bawat barangay.

“We have seen how capable and talented Navoteño youth are in sports and athletics. The awards, competition championships, and 109 athletic scholars of the city are proof of this,” ani Mayor Tiangco.

“We thank UST for partnering with us and helping us provide more opportunities for our youth athletes to grow and excel in their fields,” dagdag niya. (Richard Mesa)

NASAMSAM ng pulisya sa dalawang hinihinalang tulak ng illegal na droga ang mahigit P90,000 halaga ng shabu nang matiklo sa buy-bustoperation sa Caloocan City.

Sa kanyang report kay Northern Police District (NPD) Director P/BGen. Rizalito Gapas, kinilala ni Caloocan police chief P/Col. Ruben Lacuesta ang mga naarestong suspek na sina alyas ‘JR’ at “Jay-Jay”, kapwa residente ng BMBA Compound, 3rd Avenue, Brgy. 120.

Ayon kay Col. Lacuesta, ikinasa ng mga operatiba ng Station Drug Enforcement Unit (SDEU) ang buy-bust operation kontra sa mga suspek matapos ang natanggap na impormasyon hinggil sa illegal drug activities ng mga ito sa kanilang lugar.

Nang tanggapin nila ang marked money na may kasamang boodle money mula sa pulis na nagpanggap na buyer kapalit ng isang medium plastic sachet ng droga ay agad dinamba ng mga operatiba ang mga suspek dakong alas-12:40 ng madaling araw sa BMBA Compound, Brgy. 120.

Nakumpiska sa mga suspek ang nasa 13.60 grams ng hinihinalang shabu na may standard drug price value na P92,480.00 at buy bust money.

Mahaharap ang mga suspek sa kasong paglabag sa RA 9165 o Comprehensive Dangerous Drug Act of 2002.

Pinuri naman ni Gen. Gapas ang Caloocan police sa kanilang pagsisikap para maaresto ang mga taong sangkot sa pagpapakalat ng ilegal na droga bilang tugon sa inilatag na agenda ng PNP Chief na “Aggressive and Honest Law Enforcement Operations”. (Richard Mesa)