KALABOSO ang isang tulak ng iligal na droga na itinuturing bilang High Value Individual (HVI) matapos makuhanan ng mahigit P.2 milyon halaga ng shabu nang matimbig ng pulisya sa ikinasang buy bust operation sa Valenzuela City.

Sa kanyang ulat kay Northern Police District (NPD) Director P/BGen. Rizalito Gapas, kinilala ni Valenzuela police chief P/Col. Nixon Cayaban ang naarestong suspek na si alyas Levy, 41, ng Brgy. Marulas.

Ayon kay Col. Cayaban, nakatanggap ng impormasyon ang Station Drug Enforcement Unit (SDEU) hinggil sa umano’y pagtutulak ng iligal na droga ng suspek kaya ikinasa ni SDEU chief P/Capt. Joan Dorado ang buy bust operation sa pangunguna ni P/Lt. Johnny Llave kontra sa kanya.

Nang tanggapin umano ng suspek ang isang P500 bill marked money na may kasamang 12-pirasong P500 boodle money mula sa pulis na nagpanggap na buyer kapalit ng isang plastic sachet ng shabu ay agad siyang pinosasan ng mga operatiba dakong alas-6:10 ng umaga sa gilid ng Thoa basketball court sa Karen Avenue, Brgy. Gen. T De Leon.

Nakumpiska sa suspek ang humigi’t kumulanh 35 grams ng hinihinalang shabu na may standard drug price value na P238,000, buy bust money, P200 revovered money at cellphone.

Ayon kay PMSg Ana Liza Antonio, sasampahan nila ang suspek ng kasong paglabag sa Sections 5 at 11 sa ilalim ng Article II of RA 9165 o ang Comprehensive Dangerous Drug Act of 2002 sa piskalya ng lungsod ng Valenzuela.

Pinuri naman ni Gen. Gapas ang Valenzuela police sa kanilang matagumpay na operation kontra iligal na droga na nagresulta sa pagkakaaresto sa suspek. (Richard Mesa)

KINALAWIT ng pulisya ang isang lalaki na wanted sa kaso ng panggagahasa sa Quezon City matapos makorner sa harap ng isang bantog na supermarket sa Valenzuela City.

Hindi na nakapalag si alyas “Paeng”, 35, nang isilbi sa kanya ng mga tauhan ni Valenzuela acting police chief P/Col. Nixon Cayaban ang warrant of arrest na inilabas ni Quezon City Regional Trial Court (RTC) Presiding Judge Noel L. Parel ng Branch 106 na may petsang Setyembre 26, 2024 para sa kasong rape nang masukol sa harap ng Puregold Supermarket dakong ala-1:45 ng madaling araw sa McArthur Highway, Malanday.

Ang akusado ay nakatala sa Quezon City Police District (QCPD) bilang most wanted person nang maglahong parang bula sa naturang lungsod matapos sampahan ng kasong panghahalay at hindi na rin mahanap ng pulisya sa kanyang tirahan sa Tondo, Maynila.

Nang maglabas ng alarma ang QCPD laban sa akusado, pinakilos ni Northern Police District (NPD) Director P/BGen. Rizalito Gapas ang mga city chief of police na kanyang nasasakupan upang tumulong sa pagtugis kay alyas Paeng.

Nang makatanggap ng impormasyon ang mga operatiba ng Valenzuela Police Station Intelligence Section (SIS) na namamataan sa Brgy. Malanday ang akusado, ay agad silang nagsagawa ng manhunt operation hanggang tuluyan siyang maaresto.

Pinuri naman ni Gen. Gapas ang Valenzuela police sa kanilang pagsisikap na nagresulta sa matagumpay na pagkakaaresto nila sa wanted na rapist. (Richard Mesa)

LUNGSOD NG MALOLOS- Isa na namang patunay ng dekalidad na paghahatid ng serbisyong pangkalusugan ang ipinamalas ng Lalawigan ng Bulacan makaraang gawaran ng Department of Health-Central Luzon Center for Health Development (DOH-CLCHD) ng ilang parangal ang probinsiya sa ginanap na Ika-10 Central Luzon Excellence Awards for Health (CLExAH) sa Quest Plus Conference Center, Clark, Pampanga noong Lunes.

Tinanggap nina Provincial Health Officer II Dr. Hjordis Marushka Celis at Provincial Health Officer I Dr. Edwin P. Tecson ang Excellence in the Implementation of the 8 Priority Health Outcomes Award, at Outstanding Performance in 2023 LGU Health Scorecard Award para sa Lalawigan ng Bulacan.

Samantala, iniuwi naman ng Chief of Hospital ng Rogaciano M. Mercado Memorial Hospital na si Dr. David Rawland Domingo ang Inspirational Four-Star Green and Safe Health Facility Award ng pangkalusugang pasilidad.

Ayon sa mensaheng pagtanggap ni Gob. Daniel R. Fernando na inihatid ni Tecson, ang mga parangal ay patunay na nakatutugon ang lalawigan sa mga lokal na reporma sa kalusugan at national health targets base sa mga programa ng kagawaran sa kalusugan.

“Sa Lalawigan ng Bulacan, numero uno nating prayoridad ang kalusugan ng mga Bulakenyo. Dahil sa kanila at para sa kanila kaya natin isinusulong ang Universal Healthcare Law,” anang gobernador.

Binati rin niya ang DOH-CLCHD at siniguro na patuloy nilang magiging katuwang ang lalawigan sa pagpapanatili ng malusog, ligtas, at masaganang rehiyon at bansa sa mahabang panahon.

Samantala, pinasalamatan ni DOH Region 3 Regional Director Dr. Corazon Flores ang mga lokal na ehekutibo at mga panlalawigan at pambayang health office sa kanilang pagtugon sa pagbabahagi ng dekalidad na paghahatid ng serbisyong pangkalusugan sa rehiyon.

“When we talk about improvement in health system, top most po diyan ang leadership and governance. Kung hindi po maganda ang pamumuno ng local chief executives natin, ng ating provincial health office, ng ating municipal health office, hindi po magiging maganda. Napakaganda na active ang ating provincial health board, nagtutulungan po tayo to ensure that health service delivery is there,” ani Flores.

Dagdag pa rito, kasama sa iba pang tumanggap ng parangal ang Lungsod ng San Jose del Monte, at mga bayan ng Hagonoy, Guiguinto, Paombong, at Bulakan para sa Excellence in the Implementation of the 8 Priority Health Outcomes Award; at Lungsod ng San Jose del Monte, at mga bayan ng Guiguinto, Angat, at Balagtas para sa Outstanding Performance in 2023 LGU Health Scorecard Award.

LUMULUTANG ngayon ang pangalan ni Cavite Governor Jonvic Remulla na susunod na Kalihim ng Department of the Interior and Local Government (DILG).

Ang appointment umano ni Remulla ay ihahayag ni Pangulong Ferdinand Marcos Jr. sa sandaling bumitiw na sa puwesto si DILG Secretary Benhur Abalos na maghahain naman ng kanyang kandidatura sa pagka Senador.

Si Remulla umano ang “top choice” ni PBBM.

Si Remulla ay kapatid ni Justice Secretary Jesus Crispin Remulla.

Bukod kay Remulla, ikinokonsidera rin sa DILG position sina Navotas Rep. Toby Tiangco, National Security Adviser Eduardo Año, South Cotabato Go­vernor Reynaldo Tamayo Jr., Quirino Governor Dakila Carlo Cua at Special Assistant to the President Antonio Lagdameo, Jr.