SERYOSO ang pamahalaan na ipatupad ang paglalagay ng mga speed limiters sa mga public utility vehicles (PUVs) na dapat sana ay noong 2016 pa pinatupad ng Land Transportation Office (LTO).

Sa pinagsamang lakas ng Department of Transportation (DOTr), Land Transportation Franchising and Regulatory Board (LTFRB, at LTO, sinabi ng mga ahensiya na pinaghahandaan na nila ang masusing pagpapatupad ng nasabing batas.

“The full implementation of this law is long overdue. We will have to do something now for the interest and protection of all road users. We will continue holding series of meetings to come up with the guideline, with the intention of installing the required speed limiters in the soonest possible time,” wika ni LTO assistant secretary Vigor D. Mendoza III.

Kamakailan lamang ay nagkaron ng isang pagpupulong ang mga nasabing ahensiya kasama ang mga transport operators kung saan pinagusapan ang paglalagay ng speed limiters sa lalong madaling panahon na hindi maaapektuhan ang mga units.Sa ilalim ng Republic Act (RA) No. 10916 o ang tinatawag na Road Speed Limiter Act of 2016, nakalagay dito na kailangan lagyan ng speed limiters ang mga public utility vehicles (PUVs) ganon din ang mga closed vans, haulers, shuttle services at ibang pang klaseng sasakyan.

Nakalagay sa batas na kung walang speed limiter ay hindi puwedeng marehistro ang isang sasakyan.Kapag naipatupad na ang batas, ang mga hindi susunod sa mga probisyon ng RA 10916 at mahuhuli ay papatawan ng kaukulang multa. Ang mahuhuli ay papatawan ng P50,000 na multa ganon din sa may mga nonfunctioning o tampered na limiter.

Sa unang pagkakataon, ang mahuhuli ay papatawan ng suspensyon ng kanilang prangkisa sa loob ng tatlong (3) buwan o di kaya ay suspensyon ng driver’s license sa loob ng isang (1) buwan.Kung mahuhuli naman sa ikalawang pagkakataon, ang nagkasala ay papatawan ng suspensyon ng license sa loob ng tatlong (3) buwan o di kaya ay suspensyon ng prangkisa sa loob ng anim (6) na buwan kasama ang P50,000 na multa. Sa mga susunod na pagkahuli naman ay revocation ng driver’s license o di kaya ay isang (1) taon suspensyon ng prangkisa.

Ang mahuhuling nagtatamper ng speed limiters ay makukulong ng mula sa anim (6) na buwan hanggang tatlong (3) taon at multang aabot ng P30,000. LASACMAR

TUNAY na isinasabuhay ng Lalawigan ng Bulacan ang reputasyon nito bilang “Cooperative Capital of the Philippines” sa paglulunsad ng kanilang makabagong GO KOOP Dashboard na pinasinayaan noong Oktubre 5 sa Victory Coliseum sa San Rafael, Bulacan sa ginanap na Kick -Off Ceremony at Motorcade para sa pagdiriwang ng 2024 Cooperative Month.

Sa temang, “Empowering Cooperatives, Transforming Communities”, layon ng proyektong ito, sa kolaborasyon ng Provincial Cooperative Development Council (PCDC), na baguhin ang pangongolekta ng datos sa pamamagitan ng paglikha ng isang standardized system na magbibigay ng tumpak at kumprehensibong impormasyon sa mga kooperatiba sa Bulacan. Ang data na ito ay magiging napakahalaga para sa mga stakeholder sa kanilang patakaran, programa, at pagpaplano ng proyekto, at maging sa paggawa ng mga desisyon na batay sa datos.

Bilang bahagi ng programa, nilagdaan ng mga kalahok ang Wall of Commitment at nanumpa na susuportahan ang GO KOOP Dashboard. Ang pangakong ito ay ginawa ng Cooperative Development Authority, mga opisyal ng Provincial Cooperative Development Council – Bulacan, Liga ng mga Cooperative Development Officer sa Pilipinas, Inc. – Bulacan Chapter, City/Municipal Cooperative Development Officers and Councils, at sama-sama silang nangako na mapahusay at mapanatili ang organisado, napapanahon na impormasyon sa mga kooperatiba sa lalawigan, na napakahalaga para sa pagpaplano ng programa sa pagpapaunlad ng kooperatiba at paggawa ng desisyon na batay sa datos.

Habang naghahatid ng kanyang pangunahing talumpati, pinuri ni dating Cooperative Development Authority (CDA) Chairperson at kasalukuyang City Development Officer Lecira V. Juarez ng Taguig City ang lalawigan sa pagpapatupad ng monitoring dashboard at binigyang diin ang kahalagahan ng naturang tool sa pagsasabing ito ay nagbibigay ng solidong plataporma para sa mabisang pagsubaybay sa paglago at pag-unlad ng mga kooperatiba sa lalawigan.

“More than 300, 000 lives ay nakasandal po sa inyo, kaya when we speak of empowering cooperatives, ang sabi ‘nga po nila, how can we empower the structure kung tayo po na nakapaloob sa istruktura ay hindi po empowered? Nakuha po ninyo ako doon? So, when we speak of empowering cooperatives, let us start with ourselves, magsisimula po tayo sa ating mga sarili, bakit? Dahil sabi ‘nga po nila, we can never give what we don’t have, tama po ba? So dyan ko po sisimulan ang ating pagpupugay,” ani Juarez.

Hinikayat naman ni Gob. Daniel R. Fernando, Bise Gob. Alexis C. Castro at Juarez ang mga panauhin sa pagdiriwang na magkaroon ng aktibong papel sa pagsusulong sa paglago ng ekonomiya ng bansa at pagpapahusay sa buhay ng mga marginalized na komunidad.

Iminungkahi din ng The People’s Governor ang pagtatatag at pagpapalawak ng mga kooperatiba sa loob ng iba’t ibang organisasyon bilang isang praktikal na paraan upang matulungan ang mga nangangailangan.

“Bakit hindi po natin gawing maging mayabong at palakasin natin ang grupo ninyo? Bago kayo tumulong sa iba, tulungan muna ang inyong mga members, ‘yung pamilya ng inyong mga members, bakit hindi kayo magtayo ng koop, ano po? Sa koop, may pag-asa ka, sa koop, may pag-unlad ka, sa koop, may kinabukasan ang pamilya mo, ‘yan po ‘yan,” dagdag ni Fernando.

Ang Buwan ng Kooperatiba ngayong taon ay punumpuno ng mga kapana-panabik na aktibidad na tiyak na magpapasaya sa lahat kabilang na ang League of Cooperative Development Officers of the Philippines (LCDOP) Bulacan Chapter Bowling Tournament sa Lungsod ng Baliwag sa Oktubre 11; 11th Regional Kooplympics sa Baler, Aurora sa Oktubre 18; at ang prestihiyosong Gawad Galing Kooperatiba sa Pavilion, Hiyas ng Bulacan Convention Center (HBCC) sa Oktubre 30.

Bukod dito, nakatakdang maganap ang 3rd Central Luzon Tripartite Conference for Coop Development sa Venus Parkview Hotel sa Baguio City sa Nobyembre 20-22.

Bago nagsimula ang lahat ng kasiyahan, isang Capacity Development Training on Investment Promotion and Facilitation ang idinaos noong Oktubre 4 sa Balagtas Hall, HBCC.

Kabilang sa mga dumalo sa paglulunsad sina Regional Director Marieta P. Hwang ng CDA Region 3, na kinatawan ni Acting Supervising CDS Carolina M. Miguel, kasama sina Leilani N. Babista, Chairperson ng PCDC-Bulacan, at Jon Louie P. Santiago, Presidente ng LCDOP-Bulacan.

KARAPATANG pumili ng mga lider pahalagahan…huwag magpasilaw sa popularidad ng kandidato, apela ng mga lider ng simbahan sa mga botante.

Umaapela si Tagbilaran Bishop Alberto Uy sa mamamayan lalo na sa mga botante na pahalagahan ang karapatang pumili ng mga lider ng bansa.

Ito ang mensahe ng obispo sa pagsisimula ng election season matapos ang filing of candidacy ng mga naghahangad kumandidato sa 2025 Midterm National and Local Elections.

Ayon kay Bishop Uy, ang halalan ang natatanging paraan upang pumili ng mga karapat-adpat na lider na kayang paglingkuran ang interes ng mamamayan sa halip na tutukan ang korapsyon at iba pang uri ng katiwalian sa paninilbihan.

“Our vote is sacred. We will use it to choose leaders who are godly and competent,” mensahe ni Bishop Uy sa Radio Veritas.

Aktibong nakibahagi si Bishop Uy sa paghahanda sa halalan sa susunod na taon sa pamamagitan ng online voters’ education gamit ang kanyang social media platforms at suporta rin sa inilunsad na END Vote Buying Movement.

Apela ng obispo lalo na sa mga magulang na maging mabuting halimbawa sa kabataan sa pamamagitan ng hindi pagtanggap ng anumang uri ng suhol mula sa mga kandidato sa halalan.

“For parents who are thinking of accepting bribes from candidates…setting a bad example for your children is very displeasing in the eyes of God,” dagdag pa ni Bishop Uy.

Ang End Vote Buying Movement ay inorganisa nina Lily Flordelis kasama sina retired General Edgardo Ingking at Fr. Jingboy Saco ng Diocese of Tagbilaran.

Ito rin ang panawagan sa 1 Godly Vote campaign ng Radio Veritas at Public Affairs Ministry ng Archdiocese of Manila bilang hakbang ng simbahan sa kampanyang malinis at matapat na halalan.

Ipinaliwanag ni Veritasan Host Fr. Jerome Secillano na layunin ng OneGodly vote na maging malinaw sa mahigit 60-milyong botante sa bansa ang wastong pagpili ng mga lider ng lipunan.

“It is a campaign for the voters to take seriously the elections. Gawin natin na yung pagpipili natin ng mga kandidato ay isang maka-Diyos,” pahayag ni Fr. Secillano.

Sinabi ni Fr. Secillano na dapat makita ng mga botante na ang mga ihahalal na lider ay may tunay na hangaring paglingkuran ang mamamayan at magbibigay prayoridad sa pangkalahatang pag-unlad ng bayan.

Nananawagan naman sa mga botante ang implementing arm ng Catholic Bishops’ Conference of the Philippines-Episcopal Commission on the Laity na huwag magpasilaw sa popularidad ng sinumang kandidato sa 2025 Midterm Elections.

Ayon kay Sangguniang Laiko ng Pilipinas President Bro. Francisco Xavier Padilla, bilang paghahanda sa halalan sa susunod na taon ay mahalagang maging bukas ang mata at isipan ng bawat mamamayan kaugnay sa tunay na hangarin ng mga kandidato sa pagtakbo sa nakatakdang halalan.

Hinimok ni Padilla ang mga botante na alamin at suriin ang planong gawin ng mga kandidato para sa kapakanan ng taumbayan sa pamamagitan ng kanilang posisyon nais na paglingkuran.

Ipinaliwanag ni Padilla na dapat ding alamin ng mga botante kung ano na ang mga nagawa ng mga kandidato para sa kapakanan ng kanilang kapwa hindi lamang sa pamamagitan ng serbisyo publiko kundi maging sa kanilang personal na kapasidad.

“Bilang paghahanda sa darating ng eleksyon, kailangan natin buksan ang mga mata’t isipan natin. Wag tayo masilaw sa artista, social media personality, political family, ayuda…. Dapat tignan natin kung ano ang gusto nilang gawin para sa Pilipinas o Distrito o City natin. And tignan din natin ano mga nagawa na nila, whether sa public service o sa sarili nilang kakayanan.” Bahagi ng pahayag ni Padilla sa Radio Veritas.

Iginiit ni Padilla na dapat na maging matalino at isantabi ng bawat botante ang popularidad ng mga kandidato sa pagpili ng mga karapat-dapat na ihalal sa iba’t ibang posisyon sa pamahalaan.

Apela ni Padilla na nawa ay mailulok sa katungkulan ang mga kandidato na may tunay at dalisay na pagnanais na maglingkod ng tapat para sa kabutihan at kapakanan ng bansa lalo’t higit ng taumbayan.

“Minsan kasi nasisilaw tayo sa popularidad, pero tayo din nagrereklamo pagkatapos ng ilang buwan na wala naman sila ginagawa. God bless our candidates and may the one who has the heart of service for the Philippines win!” Dagdag pa ni Padilla.

Sa datos ng Commission on Elections (COMELEC) umabot sa 374 ang mga naghain ng kanilang certificates of candidacy (COC) at certificates of nomination – certificates of acceptance of nomination (CON-CAN) para sa senatorial at party-list race para sa nalalapit na halalan kung saan 184 ang bilang ng mga naghain ng COCs sa pagka-senador, habang 190 naman sa hanay ng mga partylist na pawang binubuo ng ilang mga dati ng pulitiko, artista, at maging mga social media personality.

Batay sa tala ng COMELEC nasa 18,280 na posisyon ang pagbobotohan sa darating na 2025 Midterm Elections, kabilang ang 12-senador, mga partylist representatives, congressional district representatives, governor, mayor, sangguniang bayan member at iba pa.