TIMBOG ang 22-anyos na tambay na nag-iingat ng hindi lisensiyadong baril nang salakayin ng pulisya ang kanyang tirahan sa bisa ng search warrant sa Navotas City, kamakalawa ng hapon.

Bago nadakip ang suspek na si alyas “Buboy”, nakatanggap na ng impormasyon ang mga tauhan ni Navotas City Police Chief P/Col. Mario Cortes hinggil sa pag-iingat niya ng baril na dahilan upang mag-apply sila ng search warrant sa hukuman.

Mismong mga tauhan ni Col. Cortes na sina Lt. Michael Salvador, P/SSgt. Jason Dela Cruz at isang alyas “Irene” ang nag-apply ng search warrant sa sala ni Navotas Regional Trial Court (RTC) Presiding Judge Romana M.M. P. Lindayag Del Rosario ng Branch 287 upang mapasok ang tirahan ng suspek sa Brgy. NBBS Proper sa naturang lungsod.

Nakumbinsi ng mga deponent ang hukom bunga ng personal nilang kaalaman sa ilegal na pag-iingat ng baril ni alyas Buboy na dahilan upang maglabas ng search warrant ang hukuman na ginamit ng pulisya sa paghahalughog sa bahay ng suspek dakong alas-2:35 ng hapon, suot ang kanilang body camera na sinaksihan pa ng opisyal ng barangay sa naturang lugar.

Nakuha sa loob ng bahay ni alyas Buboy ang itinatagong kalibre .38 revolver na walang serial number at dalawang bala na gagamitin ng pulisya sa paghahain nila ng kasong paglabag sa R.A. 10591 o ang Comprehensive Firearms and Ammunition Regulation Act laban sa suspek sa Navotas City Prosecutor’s Office.

Pinuri naman ni Northern Police District (NPD) Director P/BGen. Rizalito Gapas ang Navotas police sa pagsisikap na madakip ang mga nag-iingat ng hindi lisensiyadong armas sa tulong na rin ng mga concerned citizens na nagbibigay ng impormasyon sa mga taong gumagawa ng labag sa batas. (Richard Mesa)

Hinikayat ni Quad Comm co-chair Rep. Bienvenido “Benny” Abante Jr. ng Manila si dating Philippine National Police (PNP) chief at ngayon ay Senador Ronald “Bato” Dela Rosa na ibunyag ang naging legal basis sa pagpapalabas ng karagdagang allowances para sa mga pulis na sangkot sa war on drugs. Ng nakalipas na administrasyon.

“Kung totoo mang allowances ito, it raises more questions than answers. May memo ba ito from the PNP? May approval ba ito ng relevant government agencies like DBM? Dumaan ba ito sa Kongreso, kasi kung totoong intel funds ito, pondo ito ng bayan,”ani Abante, chairman ng House Committee on Human Rights.

Una nang kinumpirma ni PCSO General Manager Royina Garma sa kanyang testimonya ang pagkakaroon ng “rewards system” sa mga pagpatay na kahalintulad sa “Davao model.”

Ayon kay Garma, ang direktiba para sa pagpapatupad ng naturang sistema ay direktang nagmula umano kay dating Presidente Rodrigo Roa Duterte.

Sinabi pa ni Garma na ang cash rewards ay dumaan sa bangko at sangkot ang ilan umanong personalidad mula sa tanggapan ni dating Special Assistant to the President at ngayon ay Senador Bong Go.

“Assuming that these are allowances, then Sen. Bato needs to answer these questions: were there ng safeguards in place to ensure that these allowances were used for legitimate operational needs? How was the distribution of these funds monitored to prevent misuse or the incentivization of violence?” pagtatanong ni Abante.

Bilang dating hepe ng PNP, dapat linawin at palawigin ni Dela Rosa ang sistemang ipinatupad ng PNP noon kanyang kapanahunan upang maiwasan ang pang-aabuso ng mga opisyal na posibleng inakala na ang naturang cash payments ay isang uri ng pabuya o rewards sa kanilang agresibong aksyon.

Nanawagan pa ang mambabatas kay dela Rosa na dumalo sa hearings ng komite upng sagutin ang mga tanong. (Vina de Guzman)

HINIKAYAT ni House Minority Leader Marcelino “Nonoy” Libanan si Presidente Marcos na magbuo ng isang independent fact-finding commission na siyang mag-iimbestiga sa extrajudicial killings na may kaugnayan sa kontrobersiyal na war on drugs noong nakalipas na administrasyon.

“We urge the President to form a panel – similar to the Agrava Fact-Finding Board – that will probe the summary killings and identify all individuals who may be held criminally liable. Just like the Agrava board, the proposed commission should be independent from the legislative and executive branches of government,” dagdag nito.

Ayon sa mambabatas, bubuuin ito dapat ng mga indibidwal na kilala sa pagiging patas at walang kinikilangan o maay halong pulitika.

Ang five-member Agrava Fact-Finding Board ang nagsagawa ng imbestigasyon sa nagananap na asasinasyon noong August 21, 1983 ni dating Senador Benigno “Ninoy” Aquino Jr. sa Manila International Airport.

Pinangunahan ito ng unang woman judge ng bansa na si retired appellate court Justice Corazon Agrava, kasama ang abogadong si Luciano Salazar, businessman Dante Santos, educator Amado Dizon, at labor leader Ernesto Herrera, na naging senador sa huli.

Sa loob ng 11 buwan, dininig ng board ang testimonya mula sa 194 saksi at nagsagawa ng 146 public hearings at binusisi ang mahigit sa 1,400 photographic exhibits.

Naging konklusyon ng board na si Aquino ay pinatay sa isang military conspiracy sa pangunguna ni noon ay Armed Forces of the Philippines (AFP) Chief of Staff Gen. Fabian Ver.

Noong 1990, hinatulan ng Sandiganbayan ang 16 sundalo, kabilang na si Brig. Gen. Luther Custodio ng double life imprisonment dahil sa pagpatay kay Aquino at sa fall guy na si Rolando Galman. Si Ver ay namatay sa Thailand noong 1998. (Vina De Guzman)