HINIKAYAT ng mga lider ng grupong young guns sa Kamara leaders na magkaroon ng psychological evaluation kay Vice President Sara Duterte matapos ang ginawang pahayag nito sa isang press conference.

Sa naturang conference, inamin nito na nasa imahinasyon niya ang pagpugot umano sa ulo ni Presidente Bongbong Marcos at ipahukay ang labi ni dating pangulong Marcos Sr. At itapon ito sa West Philippine Sea.

Ikinaalarma ni House Assistant Majority Leader at Zambales Rep. Jay Khonghun ang naging pahayag na ito ni Duterte na nagsabing “walang matinong tao ang makakaisip, lalo’t gagawa, ng ganitong klaseng pahayag. Nakababahala ang antas ng kawalan ng katinuan sa kanyang mga salita.”

“For someone in such a high position to make violent and grotesque threats, even in jest, shows a troubling level of instability. Kailangang magkaroon ng masusing psychological assessment upang matiyak kung siya ay karapat-dapat pang maglingkod sa bayan sa ganitong kritikal na posisyon,” pahayag pa nito.

Inihayag naman ni House Assistant Majority Leader at La Union Rep. Paolo Ortega V ang posibleng panganib sa mga pahayag na ito ni Duterte at ang seryosong implikasyon sa kanyang binitawang salita.

“Ang ganitong uri ng marahas at nakakatakot na mga pahayag ay hindi katanggap-tanggap mula sa kahit sino, lalo na sa isang nakaupong Bise Presidente. Malinaw na may malalaking katanungan tungkol sa kanyang estado ng pag-iisip at emosyonal na kalagayan. We urge the Office of the Vice President to consider seeking professional help for Vice President, Duterte, as this behavior is deeply concerning and could have serious consequences for our nation’s leadership,” dagdag ni Ortega.

Sa isinagawang press conference nitong Biyernes, ikinuwento ni Duterte ang isang pagkakataon na inimahinasyon niya ang pagpugot sa ulo ng presidente, kung saan na-realize niya kung gaano ka-toxic ang kanilang relasyon.

Sinabi pa ni Duterte na minsan ay pinadalhan niya ng mensahe si Senadora Imee Marcos, na nagbabala na kapagnagpatuloy ang pag-atake sa kanya ay ipahuhukay niya umano ang labi ng kanilang amang si dating Presidentw Ferdinand E. Marcos Sr., at itatapon ito sa West Philippine Sea. Idinagdag nito na hindi tumugon ang senadora sa kanyang mensahe.

Ang pahayag ng bise presidente ay kasunod na rin sa patuloy na pagbusisi sa ginawang paggastos sa podno ng Office of the Vice President at Department of Education (DepEd), kung saan nagsilbi itong kalihim ng dalawang taon bago magbitiw nitong nakalipas na Hulyo.

Sa press conference, hindi naman niya binanggit ang isyu kaugnay sa CIFs at mga testimonya mula sa military officers.

At sa halip ay nagsagawa ito ng personal at agresibong pag atake sa pangulo. (Vina de Guzman)

ISINUMITE ng House Quad Comm sa Office of the Solicitor General (OSG) nitong Lunes ang mga dokumentong hawak nito kasabay ng panawagan nang pagsasagawa ng legal action laban sa mga Chinese nationals na naakusahan ng paggamit ng pekeng Filipino citizenship para iligal na makabili ng lupa at makapag-operate ng business sa Pilipinas.

Hinikayat din ng mga chairpersons ng House Committees on Dangerous Drugs, Public Order and Safety, Human Rights, and Public Accounts na sina Reps. Robert Ace Barbers, Dan Fernandez, Bienvenido Abante Jr., at Joseph Stephen Paduano ang OSG na bilisan ang rebyu at pasimulan ang pagsasagawa ng civil forfeiture proceedings, sa pakikipagkoordinasyon sa ibang ahensiya ng gobyerno.

Ilan sa isinumiteng dokumento ay ang Philippine Statistics Authority (PSA)-issued birth certificate mula 2004, sa kabila ng ipinanganak noong 1983 ng isang Aedy Tai Yang, isang Chinese national na pinagsusupetsahang nameke ng dokumento para makakauha ng Filipino citizenship, na ginamit umano para makabili ng lupa at makapagpatayo ng business ng iligal Batay sa records mula sa Municipal Civil Registry ng San Antonio, Nueva Ecija, ang kanyang birth documents ay naabo sa isang sunog.

Kasama din sa ebidensiya ang ilang certifications mula sa PSA ay ang marriage, tax declarations para sa properties na nasa kanyang pangalan at corporate records na nag-uugnay sa kanya sa Empire 999 Realty Corporation at Sunflare Industrial Supply Corp. Ang mga naturang kumpanya ay may ugnayan sa kuwestiyonable umanong land acquisitions, kasama ang records mula sa Land Registration Authority (LRA) na nagsasaad na ang properties ay pag-aari ng Empire 999’s incorporators.

Pag-aari rin ng Empire 999 ang isang warehouse sa Mexico, Pampanga, kung saan nakumpiska ang P3.6 bilyong halaga ng shabu shipment noong 2023. Iprinisinta din ng komite ang dokumento na nagpapakita sa kuwestiyonableng land deals sa pagitan ni Yang at local government ng Mexico, Pampanga, suportado ng Memorandums of Agreement, Deeds of Sale, at municipal resolutions na hindi umano dumaan sa legal processes.

Kinumpirma ng Department of Agrarian Reform (DAR) na ilang lupian ibinenta ni Yang ay hindi dumaan sa kinakailangang conversion process.

Sa liham kay Solicitor General Menardo Guevarra, iihayag ng Quad Committee ang posibilidad ng national security risks dulot ng naturang aktibidades na nangangailangan ng agarang aksyon.

“These actions are blatant violations of our laws and call for immediate executive intervention,” pahayag ng komite.

Tinanggap naman nina Assistant Solicitor Generals Hermes Ocampo at Gilber Medrano at Senior State Solicitor Neil Lorenzo, na humarap din sa press conference, ang mga dokumento mula sa mga lider ng Quad Comm.

Dumalo din sa seremonya sina House Senior Deputy Speaker Aurelio “Dong” Gonzales Jr. ng Pampanga, House Deputy Majority Leader David “Jay-jay” Suarez ng Quezon, Quad Comm Vice Chairman Romeo Acop ng Antipolo City, 1-Rider Partylist Rep. Rodge Gutierrez, La Union Rep. Paolo Ortega V, at Zambales Rep. Jay Khonghun. (Vina de Guzman)

Iminungkahi ng House Quad Committee ang Office of the Solicitor General na maghain ng forfeiture cases laban sa mga top Chinese personalities na nakabili ng lupa sa Pampanga at nanawagan ng legal na aksiyon.

Hinikayat din ng mga chairpersons ng House Committees on Dangerous Drugs, Public Order and Safety, Human Rights, and Public Accounts sina Reps. Robert Ace Barbers, Dan Fernandez, Bienvenido “Benny” Abante Jr., at Joseph Stephen Paduano ang OSG na bilisan ang pag review at simulan na ang civil forfeiture proceedings sa pakikipag tulungan ng ibang government agencies.

Sa isang seremonya, ibinigay ng Quad Comm ang mga kritikal na dokumento sa OSG sa hangaring pangalagaan ang pambansang seguridad at itigil ang dayuhang pagsasamantala.

Inakusahan ng mga Chinese national sa paggamit ng mapanlinlang na Filipino citizenship para iligal na makakuha ng lupa at magpatakbo ng mga negosyo sa Pilipinas. (Vina de Guzman)

PINAYUHAN ng Office of Civil Defense (OCD) ang mga residente ng Cagayan Valley (Region 2) na maghanda para sa potensiyal na epekto ng bagong low pressure area (LPA) na maaaring ma-develop sa isang tropical depression sa loob ng 24 oras.

Sa ilalim ng paggabay ni Defense Sec. Gilberto Teodoro Jr. at OCD Administrator USec. Ariel Nepomuceno nagpalabas si OCD-2 Regional Director Leon Rafael Jr. ng isang memorandum order na nagbabalangkas sa critical measures na kailangangan ipatupad ng local disaster risk reduction and management (DRRM) councils para ayusin ang ‘preparedness at response protocols’ sa buong rehiyon.

Inatasan ang Local DRRM councils na simulan ang preparatory activities upang masiguro ang kahandaan para sa posibleng epekto ng LPA, na tatawaging “Kristine” sa oras na ma-develop ito sa tropical depression at pumasok sa Philippine Area of Responsibility (PAR) ngayong araw ng Lunes.

Inatasan din ang mga ito na masusing i-monitor ang weather advisories at local conditions, magsagawa ng pre-disaster risk assessment (PDRA) meetings, at magpatupad ng preparedness measures na detalyado sa “Operation Listo,” sa advocacy program ng Department of the Interior and Local Government (DILG) na naglalayong palakasin ang disaster preparedness ng local government units (LGUs).

“Additionally, they are encouraged to improve risk communication by tailoring messages for better community understanding. Pre-emptive evacuations should be considered if necessary, and essential resources—including response assets, relief goods, medical supplies, and other logistical support—should be prepositioned as warranted,” ang sinabi ng OCD.

“As of 8 a.m. Sunday, the LPA was located approximately 1,460 kilometers east of Southeastern Luzon,” ayon sa Philippine Atmospheric, Geophysical and Astronomical Services Administration (PAGASA).

Sinabi ng PAGASA na malaki ang posibilidad na tumama si ‘Kristine’ sa extreme Northern Luzon at maaaring maabot ang typhoon intensity bago pa mag-landfall.

Tinuran pa ng OCD na ang regional office nito sa Cagayan Valley ay mayroong mahigpit na koordinasyon sa lalawigan ng Batanes, na kamakailan lamang ay apektado ng Super Typhoon “Julian,” upang matiyak na maibibigay ang lahat ng kakailanganing suporta para sa mga ito.

“Additionally, the agency is actively disseminating weather advisories and monitoring the status of the Magat Dam, as well as major river systems and tributaries, including water sources from the Sierra Madre and Cordillera Mountains,” ang sinabi ng OCD.

“Backup communication systems are operational, and continuous coordination with the National Disaster Risk Reduction and Management Operations Center (NDRRMOC) at Camp Aguinaldo in Quezon City is being maintained,”ang sinabi pa rin nito. ( Daris Jose)