2024 December 05 Archive - People's Balita

January 6, 2025
Search in People's Balita
Ang Diyaryong Pinagkakatiwalaan

Archive for December 5th, 2024

POC pres. Tolentino ipinagmalaki ang tagumpay ng mga atleta sa kanyang pamumuno

Posted on: December 5th, 2024 by @peoplesbalita No Comments

IPINAGMALAKI ni Philippine Olympic Committee president Bambol Tolentino na mayroong mga malalaking sporting events na asahan na dito sa bansa gaganapin.

Muling nahalal kasi si Tolentino bilang POC president matapos na talunin ang dating basketbolistang si Chito Loyzaga sa botong 45-15.

Sinabi nito na ang resulta ng halalan ay nagpapakita lamang na marami sa kaniyang miyembro ang nagtitiwala sa pamumno niya.

Nais nito na mapanatili ang mga paghakot ng gintong medalya ng mga atleta ng bansa gaya sa mga atleta ng bansa na sumabak noon sa Paris Olympics at sa Tokyo Olympics.

Acknowledgement receipt na isinumite ng OVP sa COA sa pangalan ni Mary Grace Piattos bogus – Rep. Chua

Posted on: December 5th, 2024 by @peoplesbalita No Comments

BOGUS ang isinumiteng acknowledgement receipt na isinumite ng Office of the Vice President (OVP) sa Commission on Audit (COA) sa ilalim ng pangalan ni Mary Grace Piattos.

Ito’y matapos maglabas ng ulat ang Philippine Statistics Authority (PSA) na wala sa kanilang record ang isang Mary Grace Piattos.

Ayon kay Manila Representative at House Blue Ribbon Committee Chairman Joel Chua, isasama nila sa kanilang committee report ang datos mula sa PSA.

Sinabi ng mambabatas na natanggap na niya ang nasabing certification at na forward na rin mga miyembro ng komite.

Aminado si Chua ng lumabas ang AR na naka pirma si Mary Grace Piattos ay nag suspetcha na sila dahilan na pina validate ito sa PSA.

Siniguro naman ni Chua na posibleng ipapa-verify din nila ang iba pang mga pangalan na naka pirma sa acknowledgement receipts.

Dagdag pa ng mambabatas na humingi na rin sila ng tulong sa NBI para ipasuri ang mga pirma o signatures gaya ng pangalan ni Kokoy Villamin.

Binigyang-diin ni Chua na dapat managot ang mga lumabag sa batas ng sa gayon magkaroon ng accountability. (Vina de Guzman)

IMPLEMENTASYON NG 2 MEMO UKOL SA PAGGAMIT NG IMPROVISED PLATES, NANANATILING SUSPENDIDO – LTO

Posted on: December 5th, 2024 by @peoplesbalita No Comments

NILINAW ng Land Transportation Office (LTO) nitong Martes, Disyembre 3, na ang implementasyon ng 2 memorandum ukol sa paggamit ng improvised plates ay nananatiling suspendido “hanggang sa karagdagang abiso.”

Naglabas ng pahayag ang LTO kasunod ng mga tanong at alalahanin mula sa mga motorista na naghahanap ng update sa implementasyon ng Memorandum Circular VDM-2024-2721 at Memorandum Circular No. VDM-2024-2722.

Ang Memorandum Circular VDM-2024-2721 ay nagtatakda ng patnubay sa paggamit ng improvised plates para sa mga sasakyan at motorsiklo, habang ang Memorandum Circular No. VDM-2024-2722 naman ay nagtatakda ng mga patnubay para sa implementasyon at mga kinakailangan sa pakikilahok sa pilot study ng motorcycle taxi.

Nagpahayag ang mga may-ari ng sasakyan ng kanilang pangamba ukol sa implementasyon ng Memorandum Circular VDM-2024-2721 at humiling ng karagdagang oras upang makuha ang kanilang mga plaka.

Noong Setyembre 30, naglabas si LTO Chief Assistant Secretary Atty. Vigor D. Mendoza II ng memorandum na nagsususpinde sa implementasyon ng dalawang memorandum circular upang bigyan ng sapat na oras ang mga may-ari ng sasakyan na makuha ang kanilang mga plaka.

Bilang tulong sa mga may-ari ng sasakyan, inatasan ni Assec Mendoza ang lahat ng dealer ng sasakyan na pabilisin ang pag-release ng mga plaka na nasa kanilang pangangalaga.

Alinsunod sa kautusan ni Assec Mendoza, naglunsad din ang mga regional at district offices ng LTO ng programang naglalayong maghatid ng mga plaka nang door-to-door at libre.

Samantala, hiniling din ng mga motorcycle rider sa LTO na bigyan sila ng karagdagang panahon upang makasunod sa mga kinakailangan ng Memorandum Circular No. VDM-2024-2722 para sa motorcycle taxi pilot study, partikular sa mga plaka at RFID requirements.

Noong Nobyembre 27, naglabas muli ng memorandum si Assec Mendoza na nagpapaalala sa lahat ng regional director at opisyal ng LTO na ang pagpapaliban sa implementasyon ng 2 memorandum circular ay pinalawig hanggang sa karagdagang abiso.

“Para sa interes ng publiko at upang bigyan ng sapat na panahon ang mga dealer ng sasakyan at motorsiklo na maipamahagi ang mga plaka sa kani-kanilang mga may-ari, ang Memorandum na may petsang 2 Setyembre 2024 o ang ‘Deferment of Memorandum dated 30 July 2024 re Deferment of Implementation of Memorandum Circular No. VDM-2024-2721 and Memorandum Circular No. VDM-2024-2722′ ay pinalawig hanggang sa karagdagang abiso,” nakasaad sa memorandum na inilabas noong Nobyembre 27.

Ayon kay Assec Mendoza, ang pagpapaliban sa implementasyon ng 2 polisiya ay tugon sa kahilingan ng mga may-ari ng sasakyan at iba pang stakeholder. (PAUL JOHN REYES)

Alinsunod sa kanilang mandato.. AFP tiniyak kay VP Duterte na poprotektahan nila ito

Posted on: December 5th, 2024 by @peoplesbalita No Comments

TINIYAK ng Armed Forces of the Philippines (AFP) kay Vice President Sara Duterte, na poprotektahan nila ito alinsunod sa kanilang mandato.

Ayon kay AFP Spokesperson Col. Francel Padilla, ang mga pansamantalang ipapalit na sundalo sa Vice Presidential Security Group (VPSPG) ay propesyonal, tapat sa chain of command at pinili base sa merit.

Kasunod ito ng pahayag ng Pangalawang Pangulo na hindi na siya tatanggap ng karagdagang security personnel dahil wala na siyang pinagkakatiwalaan.

Matatandaan na pansamantalang papalitaan ang miyembro ng VPSPG ng contingent force mula sa AFP at PNP ayon kay AFP chief Gen. Romeo Brawner Jr.

Ito raw ay dahil sa nagpapatuloy na imbestigasyon sa mga miyembro ng VPSPG hinggil sa nangyaring kaguluhan sa Veterans Memorial Medical Center (VMMC) noong November 23 at sa nagpapatuloy din na paglilitis sa confidential funds ng OVP na nakakaapekto na sa pagganap sa kanilang tungkulin na protektahan ang bise presidente. (Daris Jose)

Roque, inaming nasa labas na ito ng Pilipinas

Posted on: December 5th, 2024 by @peoplesbalita No Comments

Kasunod ng pag-amin ni dating Presidential Spokesperson Atty. Harry Roque na pumunta siya sa Abu Dhabi, inamin din niyang nananatiling wala siya sa Pilipinas.

Sa pulong balitaan ngayong araw, natanong si Roque nasa labas pa rin siya ng Pilipinas o kung nakabalik na siya sa bansa.

Sagot ni Roque, nasa labas siya ng bansa.

Gayonpaman, hindi naman tinukoy ng dating Duterte spokesman kung saang bansa siya naroroon.

Tinanong din ng media ang dating kalihim kung kailan pa siya lumabas sa Pilipinas.

Pero ayon kay Roque, ‘no comment’ na siya sa naturang katanungan.

Sa kasalukuyan ay mayroong Immigration Lookout Bulletin na inilabas laban kay Roque.

Mayroon din itong arrest order na unang inilabas ng Kamara de Representantes kasunod ng ilang beses niyang hindi pagsipot sa pagdinig ng Quad Committee. (Daris Jose)

Tsina, walang karapatan na magpatupad ng ‘fishing regulations’ sa WPS —NSC exec

Posted on: December 5th, 2024 by @peoplesbalita No Comments

SINABI ng National Security Council (NSC) na malayang magagawa ng mga mangingisda sa Palawan ang kanilang fishing activities sa West Philippine Sea (WPS) dahil walang karapatan ang Tsina na magpatupad ng kahit na anumang regulasyon sa pinagtatalunang katubigan.

Sinabi ni NSC assistant director general Jonathan Malaya na nakipagpulong ang ahensiya sa 170 mangingisda sa isinagawang Northern Palawan Fishermen’s Congress sa Coron. Sa nasabing event, inihayag ng mga mangingisda ang kanilang mga saloobin at alalahanin ukol sa kanilang kaligtasan sa gitna ng agresyon ng Chinese vessels sa WPS.

“Isa sa mga natanong nila, ‘Totoo bang mayroong moratorium sa pangingisda dahil naging announcement ng Chinese Coast Guard?’” ang sinabi ni Malaya sa Bagong Pilipinas Ngayon.

“Sinabi namin, sa National Security Council, na walang ibang bansa na pwedeng magbigay ng regulasyon sa mga lugar na ‘yan kundi ang Philippine government lamang. Walang karapatan ang China na mag-impose ng anumang regulation sa pangingisda,” aniya pa rin.

Nauna rito, nagprotesta ang Pilipinas kaugnay sa unilateral four-month fishing ban na nagsimulang maging epektibo noong Mayo, malinaw na paglabag ito sa international law at tila pinarurupok ang ‘sovereignty at maritime rights’ ng bansa.

Sa kabila ng fishing moratorium, namataan pa rin ng Philippine Navy ang mahigit sa 120 Chinese vessel sa WPS.

Noong Hunyo, hiniling ng Pilipinas sa UN na I-extend ang boundary nito ng mas malayo sa pinagtatalunang WPS sa pamamagitan ng ‘ by registering its entitlement to an extended continental shelf’ sa West Palawan Region.

“We assured them of the support of the Philippine government kapag sila ay nandoon at nangingisda,” ayon kay Malaya.

Samantala, bukod sa Pilipinas at Tsina, nakikipag-agawan din ang mga bansang Malaysia, Brunei, Taiwan at Vietnam. (Daris Jose)

Barko ng PCG, muling hinarass

Posted on: December 5th, 2024 by @peoplesbalita No Comments

NAKATIKIM muli ng pangha-harass ang mga barko ng Philippine Coast Guard (PCG) mula sa mga barko ng China.

Ayon kay CG Commodore Jay Tarriela, ginamitan ng water Cannon ng China Coast Guard (CCG) vessel 3302 ang BRP Datu Pagbuaya ng BFAR at PCG .

Ang insidente ay nangyari kaninang alas 6:30 ng umaga sa bahagi ng 16 nautical miles timog ng Bajo De Masinloc kung saan pakay ng mga Tsino ang navigational antennas ng barko ng BFAR.

Ayon pa sa PCG, sinadya rin umanong banggain ng CCG ang gilid ng BRP Pagbuaya bago muling binomba ng tubig.

Hinarang at binuntutan at ginawan ng delikadong mga pagmaniobra ang BRP Teresa Magbanua mula sa PLA Navy vessel 500 at CCG 503.

Habang ang BRP Cabra naman ay nakaranas din ng dangerous maneuvers mula sa CCG 3104.

Sinabi ni Tarriela na ang insidente ay nangyari habang nagsasagawa ng routine patrol bilang suporta sa mga mangingisdang Pilipino ang PCG at BFAR sa bahagi ng Bajo De Masinloc

Sa kabila nito, tiniyak ni Tarriela na hindi titigil ang PCG at BFAR sa commitment nila na pangalagaan ang interes ng mga mangingisdang Pilipino. GENE ADSUARA

Lakers, dumanas ng 29 point-loss sa kamay ng Wolves

Posted on: December 5th, 2024 by @peoplesbalita No Comments

TINAMBAKAN ng Minnesota Timberwolves ang Los Angeles Lakers ng 29 points (Dec. 3), 109 – 80.

Ipinalasap ng Wolves sa Lakers ang ika-siyam na pagkatalo ngayong season sa pangunguna ng bigman na si Rudy Gobert na nagpasok ng 17 points at nagbulsa ng 12 rebounds.

Nagdagdag naman ng 18 points ang bagong Wolves forward na si Juluis Randle, kasama ang limang rebound.

Naging malamiya ang laro ng tinaguriang NBA King na si Lebron James at nalimitahan lamang sa sampung puntos sa mahigit 30 mins na paglalaro.

Maging ang bigman na si Anthony Davis ay nalimitahan lamang sa 12 points ngunit bumawi naman ng 11 rebound.

Nagawa pa ng Lakers na makipagsabayan hanggang sa ikatlong kwarter kung saan umabot lamang sa 15 points ang lamang ng Wolves.

Gayonpaman, sinamantala ng Minnesota ang malamiyang laro nina Labron at Davis at nagbuhos pa ng 30 points sa huling kwarter. Tanging 16 points lamang ang naisagot ng Lakers sa naturang quarter.

Naging mitsa sa pagkatalo ng Lakers ang pagpapakawala nito ng 31 3-pointers sa kabuuan ng laro at tanging anim na tres lamang ang nagawang maipasok. Ito ay katumbas ng 19.4% na shooting percentage.