KULONG ang isang padre de pamilya nang nabuking  na ginagawang parausan ang kanyang 11 taon gulang na anak sa Sta.Ana, Maynila.

Kasong Qualified Rape sa ilalim ng  Article 266-A par 1 ng Revised Penal Code ng Republic Act 8353 at Sexual Assault na inamiyendahan sa Article 8353 na may ugnayan s  Section 5 ng Republic Act 7610 ang kakaharapin ng suspek na si Jefferson  ng Pedro Gil St., Sta.Ana, Manila.

Sa  ulat ni P/ Lt.Col. Orlando Mirando Jr., Station Commander ng MPD- Station 6 , Martes ng gabi nang maaresto ang suspek sa bisa ng warrant of arrest na inisyu ni  Hon. Roy Gironella , Presiding Judge ng  Regional Trial Court Br 43, ng Manila.

Batay sa rekord ng pulisya, may isang taon na umanong  parausan ng suspek ang anak na babae na inamin naman ang ginawang kahalayan sa biktima nang hiwalayan siya ng kanyang asawa.

Aminado rin ang suspek na nalulong  ito sa shabu.

Bagama’t hiwalay na ang nanay ng biktima sa suspek, nang malaman ang kahayupang ginawa sa anak ay agad itong  humingi ng tulong  sa tanggapan ni P/ Lt.Col.Mirando kaya ito ay naaresto. GENE ADSUARA

SHOOT sa kulungan ang apat na hinihinalang drug personalities, kabilang ang isang bebot matapos makuhanan ng halos P.6 milyon halaga ng shabu sa isinagawang buy bust operation ng pulisya sa Malabon City, kamakalawa ng gabi.

Kinilala ni Malabon police chief Col. Albert Barot ang naarestong mga suspek na sina Prea Enate, 21, ng Caloocan, Lyndon Regino alyas “Dodong”, 27 ng Brgy. Tonsuya, Mark Carlo Fortes, 20 ng Navotas city, at Jarwin Gamalog alyas “Aweng”, 20 ng Caloocan city.

Ayon kay Col. Barot, dakong alas-7:30 ng gabi nang magsagawa ang mga operatiba ng Station Drug Enforcement Unit (SDEU) sa ilalim ng pangangasiwa ni PLT Alexander Dela Cruz ng buy bust operation sa Salinas St., Brgy. Longos.

Nagawang makipagtransaksyon ng isang pulis na nagpanggap na buyer kay Enate at Regino ng P16,000 halaga ng marijuana.

Nang tanggapin ng mga suspek ang marked money mula sa poseur buyer kapalit ng isang brick ng marijuana ay agad silang sinuggaban ng mga operatiba, kasama si Gamalog at Portes.

Nakumpiska ng mga operatiba sa mga suspek ang tinatayang nasa 4.800 grams ng hinihinalang pinatuyong dahon ng marijuana na may standard drug price P576,000, buy bust money na isang tunay na P1,000 at 16 pirasong boodle money, motorsiklo, back pack bag, green plastic bag at eco bag.

Nahaharap ang mga suspek sa kasong paglabag sa RA 9165 o Comprehensive Dangerous Drugs Act of 2002. (Richard Mesa)

NATANGGAP na ng pamahalaang lungsod ng Manila ang 40,000 kapsula ng anti-Covid drug na Molnupiravir.

Ang nasabing gamot para sa COVID-19 ay idiniliber sa Sta.Ana Hospital kung saan mismong si Manila Mayor Isko Moreno Domagoso at Aksyon Demokratiko Presidential aspirant ang nanguna sa symbolic turn-over  ng ilang kahon ng Molnupiravir sa Manila Covid 19 Field Hospital sa Luneta noong Martes ng umaga.

Sinasabing 50 porsyentong nakagagamot ng COVID-19 ang Molnupiravir.

“We should always be ahead of Covid infections. We were the first to purchase Remdesivir and Tocilizumab. And now this wonder drug Molnupiravir, tayo rin ang naunang bumili. I will continue to listen to science. I always listen to Doc Willie Ong when it comes to anti-covid drugs,”pahayag ni Domagoso

Sinabi ni Domagoso na marami na ang matutulungan ang 400,000 capsules ng naturang anti-Covid drug kung saan mismong si Doc Willie Wong na kanyang runningmate ang siyang nagrekomenda nito.

Ang Molnupiravir (Molnarz) ay available na sa bansa  matapos bigyan ng Compassionate Special Permit (CSP) ng Philippine Food and Drug Administration. GENE ADSUARA

MAHIGIT P13 milyon halaga ng shabu ang nasamsam ng mga awtoridad sa 23-anyos na bebot na binansagan ng mga pulis bilang “drug queen” matapos matimbog sa buy bust operation sa Malabon City, kamakalawa ng gabi.

Sa report ni Malabon police chief Col. Albert Barot kay Northern Police District (NPD) Director PBGEN Jose Hidalgo Jr., ang pagkakaaresto kay Herssie Ogoy ng Fatima Street Tulay 14, Brgy. Daang Hari, Navotas City ay nagmula sa impormasyon na ibinunyag ni Alejandro Blancaflor, 46, na unang naaresto ng mga pulis, kasama ng dalawa pa sa buy bust operation sa Don Basilio Blvd. Brgy. Dampalit dakong alas-6:20 ng Biyernes ng gabi.

Nang isailalim siya sa custodial debriefing, sinabi ni Blancaflor kay P/Lt. Alexander Dela Cruz, hepe ng Station Drug Enforcement Unit (SDEU) na nagmula sa isang alyas Herssie ang ilegal na droga na kanilang ibinenta sa isang police poseur-buyer, kasama ng 19 grams ng shabu na nakuha sa kanila na naging dahilan upang magsagawa ang mga operatiba ng panibagong buy-bust operation.

Nagawa ni P/Cpl. Paulo Laurenz Rivera na umaktong poseur-buyer, kasama si P/Cpl Ferdinand Danzal na nagsilbi bilang back-up na makipagtransaksyon ng P50,000 halaga ng shabu kay Ogoy sa Dalagang Bukid St. Brgy. Longos dakong alas-11 ng gabi na nagresulta sa pagkakaaresto sa suspek.

Narekober sa suspek ang dalawang malaking chinese tea bag at isang knot tied transparent plastic bag na naglalaman ng humigi’t kumulang sa 2 kilos at 50 grams ng hinihinalang shabu na may standard drug price P13,940,000, buy bust money na limang pirasong tunay na P1,000 bills at 45 pirasong boodle money, pulang eco bag at cellphone. (Richard Mesa)

MANANATILI sa  Alert Level 2 ang  National Capital Region, epektibo Nobyembre 15, 2021 hanggang Nobyembre 30, 2021.

Bukod sa NCR, ang mga  lugar ng  Nueva Ecija, Bataan, Aurora, Pampanga, Bulacan, Tarlac, Zambales, Olongapo at Angeles City sa Region III; Rizal, Cavite, Laguna, Batangas, Quezon at Lucena City sa Region IV-A; Bacolod City, Iloilo City, Negros Occidental, Capiz, Antique, Aklan, Iloilo Province at Guimaras sa Region VI; Negros Oriental, Lapu-Lapu City, Cebu City, Mandaue City, Cebu Province at Bohol sa Region VII; Cagayan de Oro City, Misamis Occidental, Lanao del Norte, Bukidnon, Camiguin, Misamis Oriental at Iligan City sa Region X; at Davao del Norte, Davao de Oro, Davao Occidental, Davao City, Davao del Sur at Davao Oriental sa Region XI ay nasa Alert level 2 sa kaparehong petsa.

Idagdag pa, sa ilalim ng Alert Level 2, epektibo Nobyembre 17, 2021 hanggang Nobyembre 30, 2021 ang  City of Santiago, Cagayan at Isabela sa Region II; Albay, Sorsogon, Naga City, Camarines Sur, Camarines Norte at Masbate sa Region V; Zamboanga del Norte, Zamboanga Sibugay at Zamboanga del Sur sa Region IX.

Sa kabilang dako, inaprubahan  ng Inter-Agency Task Force,   na ilagay ang  Catanduanes sa ilalim ng  Alert Level 4 epektibo Nobyembre  17, 2021 hanggang Nobyembre 30, 2021.

Ang Baguio City sa Cordillera Administrative Region at Siquijor sa Region VII ay inilagay naman sa Alert Level 3 epektibo Nobyembre 15, 2021 hanggang Nobyembre  30, 2021.

Inilagay din sa ilalim ng  Alert Level 3 ang Batanes, Quirino at Nueva Vizcaya sa Region II at ang  City of Isabela at Zamboanga City sa Region IX mula  Nobyembre 17, 2021 hanggang Nobyembre  30, 2021.

Samantala, nasa ilalim naman ng  Alert Level 2, “effective immediately” hanggang Nobyembre  30, 2021 ang Ilocos Sur, La Union, Pangasinan, Dagupan at Ilocos Norte sa Region I; Tacloban, Southern Leyte, Samar (Western Samar), Ormoc City, Eastern Samar, Northern Samar, Leyte at Biliran sa Region VIII; South Cotabato, Sarangani, General Santos City, Sultan Kudarat at Cotabato (North Cotabato) sa  Region XII. (Daris Jose)

NASAWI ang isang 7-anyos na batang babae at kanyang 2-anyos na kapatid na lalaki sa naganap na sunog na tumupok sa 15 kabahayan sa Caloocan City, kahapon ng madaling araw.

Ang sunog na katawan ng mga biktimang sina Jumina Jean Corado at kanyang kapatid na si Brix Tyler, na unang iniulat ng kanilang ina na nawawala ay natagpuan sa debris ng isang bahay na katabi ng kanilang bahay dakong alas-7 ng umaga.

Ayon kay North Caloocan Fire Station chief F/Insp, Elyzer Ruben Leal, nagsimula ang sunog sa bahay ni certain Lilybeth Dolen dakong 1:05 ng madaling araw sa Ilang-Ilang Street, Brgy. 185 Malaria at mabilis na kumalat ang apoy sa katabing mga kabahayan.

Umabot ang sunog sa unang alarma bago idineklarang under control bandang 1:47 ng madaling araw at tuluyang naapula dakong alas-3:20 ng madaling araw.

Inaalam pa ng mga Arson investigator ang sanhi ng naging sunog habang tinatayang naman nasa P100,000.00 halaga ng ari-arian ang tinupok ng apoy.

Ipinag-utos naman ni Mayor Oca Malapitan sa City Social Welfare Department ang agarang tulong, kabilang ang pagkain, kumot, inuming tubig at iba pang relief goods na kailangan ng mga biktima ng sunog na pansamantalang nanunuluyan sa Malaria covered court. (Richard Mesa)