NAGDESISYON ang mga organizers ng 2020 Tokyo Olympics na huwag munang palahukin sa isa sa mga nalalapit nang test event ang mga atletang hindi Hapon dahil pa rin sa isyu ng coronavirus disease (COVID-19).

Magbubukas na kasi sa Pebrero 28 ang dalawang araw na test event sa Ariake Arena kung saan tampok ang Paralympic sport na boccia na isang uri ng precision ball sport.

Ito ang una sa 19 pang mga test events bago ang pagsisimula ng Olympics sa Hulyo 24.

Ayon kay Tokyo spokesman Masa Takaya, tuloy na tuloy pa rin ang iba pang mga test events kahit na magpapatupad sila ng iba pang mga pagbabago.

“We still don’t which athletes are competing,” wika ni Takaya. “When it”s the most appropriate time, we will release the participants information.”

Una nang nanidigan ang International Olympic Committee at mga local organizers na walang balak na ipagpaliban o ikansela ang Olympiyada, na huling nangyari noong panahon pa ng digmaan.

PARARANGALAN ng Philippine Sportswriters Association (PSA) ang Amateur Boxing Association sa gaganaping SMC-PSA Annual Awards Night ngayong Marso 6 sa Centennial Hall ng Manila Hotel.

Ang Association of Boxing Alliances in the Philippines (ABAP) ang tatanggap ng National Sports Association of the Year.

Apat sa mga kilalang boksingero ng bansa ang naging dahilan ng karangalan na nakuha ng ABAP upang hirangin sa nasabing kategorya sa naturang awards night.

Si Nesthy Petecio, ang unang pangalan na nagbigay ng ingay nang kanyang kunin ang kampeonato sa world championships sa pamamgitan ng gintong medalya.

Ang 27-anyos ang naging pambato ng ABAP para sa matagumpay na kampanya nito sa AIBA Women’s World Boxing Championships na ginanap sa Ulan-Ude, Russia kung saan pinataob niya ang pambato nito na si Liudmila Vorontsova sa pamamgitan ng split decision para sa featherweight division.

Kasunod nito, bagama’t hindi nakakuha ng gintong medalya, nakuha naman ni Felix Eumir Marcial ang silver sa nasabi ring torneo para sa naman sa men’s event na ginanap naman sa Yekaterinburg sa Russia.

Gayunman kinilalala pa rin ang 24-anyos na tubong Lunzuran, Zamboanga City na si Marcial ilang ikatlong Pinoy na tumapos ng ikalawang puwesto sa prestihiyosong torneo na huling nakuha nina light-flyweight Roel Velasco noong 1997 at Harry Tanamor noong 2007.

Hindi rin matatawaran ang galing na ipinamalas ng dating world champion na si Josie Gabuco kung saan nag-uwi siya ng gintong medalya buhat sa Asian Boxing Confederation ASBC Elite Boxing Championships na ginanap naman sa Bangkok, Thailand kung saan pinatob naman niya si Kim Hyang Mi ng North Korea sa finals ng women’s light-flyweight category.

Si Gabuco ay naging kampeon din ng AIBA world women’s champion noong 2012 bago pa man nakuha ni Petecio ang nasabing parangalan noong nakaraang taon.

Sa pinagsanib na puwersa ng tatlong nabanggit na boksingero, nakuha din nila ang gintong medalya sa nakaraang 30th Southeast Asian Games upang maiambag sa overall title na nakuha ng buong Team Philippines.

Samantala, ang Team Philippines naman ang tatanghaling Athlete of the Year para sa nasabing gabi ng parangal na suportado ng Philippine Sports Commission, MILO, Cignal TV, the Philippine Basketball Association, AirAsia, at Rain or Shine. (REC)

TATRANGKAHAN pala nina French import Maeve Orle at legendary libero Lizlee Ann ‘Tatan’ Gata-Pantone habang si Rogelio ‘Roger’ Gorayeb pa rin ang magmanado para sa PLDT Home Fibr sa nakatakdang 8th Philippine SuperLiga Grand Prix 2020.

Puntirya ng Power Hitters na maparehasan, hindi man mahigitan ang bronze medal na tinapos dito sa nakalipas na taon sa pagbabalik pa rin nina Vira May Guillem, Aiko Urdas, Shola Alvarez, Jorelle Singh, Rysabelle Devanedera, Alysa Etoa, Kath Villegas, at Joyce Sta. Rita.

Nasa team din ang mga bagong saltang sina Jan Andrea Morano, Necelle Mae Gual, Sheek Gin Espinosa at Menchie Tubiera, Sheeeka Gin Espinosa sa paghalili kina Grethcel Soltones, Jasmine Nabor at Jerrili Malabanan.

Lumanding na pang-anim at panlima lang ang kampo sa all-Filipino at Invitational conference, ayon sa pagkakasunod, sa nagdaang edisyon ng liga.

Kaugnay nito, binanggit ni Clint Malazo na si veteran coach Gorayeb pa rin ang mamando sa koponan sa kabila na siya ang namamahala sa kasalukuyan sa trainings at drills.

“Okay naman na siya, nagre-recover na lang siya,” wika ng PLDT assistant coach sa pagpeprepara ng team para sa pagbubukas ng women’s indoor volleyfest sa Pebrero 29.

Nasuring may multiple myeloma si Gorayeb sa nakalipas na taon at patuloy pang sumasailalim sa chemotherapy sessions. Nasa bench siya ng team buhat pa noong 2018.

“By March. Baka sa first game pwede na rin siya. Hindi pa natin alam, hindi pa namin napag-usapan,” dugtong ng Power Hitters asst. coach.

Kahit limitado pa kung gumalaw, sumasaksi naman na si Gorayeb sa mga training ng PLDT para sa PSL season-opening conference.

“Nasa training na siya palagi pero siyempre hindi muna siya nagdi-drills. Kami muna,” wakas na saad ni Malazo.
Matatasahan agad ang PLDT kopening game sa Peb. 29 kontra Sta. Lucia Lady Realtors sa FilOil Flying V Centre sa San Juan City.

Good luck na lang sa inyo. (REC)

MABANGIS pa rin ang San Beda University Red Lions sa parating na National Collegiate Athletic Association (NCAA) Season 96 men’s basketball tournament 2020 dahil may mga bagong dating pero astig na tatlong manlalaro.

Sinigurado ng SBU na sasalang pa rin sa kanila bilang ang mga bagito pero may potensiyal na sina Rhayyan Amsali, big man Justine Sanchez at defensive specialist Tony Ynot.

Ayon kay team manager Jude Roque nitong Huwebes, masaya ang Beda sa naging desisyon ng tatlo dahil sila ang mga kapalit sa mga nawalang key player sa nakaraang season.

“They will surely add more depth to our team, which as you all know lost key players from last season,” dada ni Roque. “They will also add championship experience to our young roster, having won the NCAA Juniors title last year.”

Nagpeprepara na ang Mendiola-based squad para nakatakdang pagsisimula nng seniors hoops ng nasabing liga sa Agosto 1.

Pinangunahan nina Amsali, Sanchez at Ynot ang Red Cubs nang tagpasin ang Lyceum of the Philippines-Cavite sa finals at angkinin ang titulo sa juniors division sa nagdaang ediyson ng liga.

Nas 6-foot-3 ang taas, may average si Amsali ng 16.6 points, 9.0 rebounds, 4.1 rebounds at 1.6 steals para sa Red Cubs. (REC)

MAY panlaban rin ang Philippine Team sa 2020 Tokyo Para Olympics matapos makasungkit ng slots si swimmer Ernie Gawilan matapos maabot ang kinakailangang puntos para mapasabak sa quadrennial meet na nakatakda sa Agosto 25 hanggang Setyembre 6.

Nakalap ni Gawilan ang Olympic points bunsod nang matikas na kampanya sa 2018 Asian Para Games sa Jakarta Indonesia at sa 2019 World Para Championships na ginanap sa London kasama sina Garry Bejino, Arnel Aba at Roland Sabido.

Aminado si Gawilan na maging siya ay nasorpresa dahil ang kanyang pagkakaalam ay dalawang events pa ang dapat niyang lahukan.

“Akala ko po isa o dalawang events pa po. Pero sabi ni coach Tony, ok na raw po, siya po talaga ang nakaalam,” pahayag ni Gawilan.

Ito ang ikalawang pagkakataon na sasabak sa Olympics si Gawilan na bahagi rin ng delegasyon na sumabak sa 2016 Rio de Janeiro sa Brazil.

“Masaya po ako, kasi kapag nagkataon, ito po ang ikalawang beses na makapaglaro sa pinakamataas na competition. Kakaunti lang po kasi ang nakakarating doon,” pahayag ng 28- anyos na si Gawilan.

Sa kasalukuyan, puspusan ang paghahandang ginagawa ni Gawilan kung saan buo ang suporta na kanyang nakukuha buhat sa Philippine Sports Commission (PSC) sa pangunguna ni Chairman William “Butch” Ramirez. Malaking bagay, ayon kay Gawilan ang suportang ibinibigay ng gobyerno sa mga tulad niyang atleta.

“Sana po ay huwag po kayong magsawang sumuporta sa sports dito po sa ating bansa, para po maituwid po sila sa mga bagay na nakakasira sa kanila. Malaking tulong din po kasi ito para sa kanila lalo na sa kalusugan po at para magkaroon po sila ng disiplina,” pahayag ni Gawilan.

Lubos ang pasasalamat ng pambato ng Davao na si Gawilan sa lahat ng kanyang tagumpay na nakuha at sa patuloy na suporta ng sambayanan sa Para athletes.