UPANG higit pang mapangalagaan ang kalikasan, nanawagan si Department of Environment and Natural Resources (DENR) Secretary Roy A. Cimatu sa private sector na makipagtulungan sa pamahalaan para sa pagpapatupad ng Enhanced National Greening Program (ENGP), na isang hakbang ng gobyerno upang madagdagan ang “forest cover” sa bansa.

“We hope to encourage more private companies to help us in restoring and protecting our forests as we seek to establish new ENGP plantations,” ayon kay Cimatu na naging kinatawan ng Department of Environment and Natural Resources (DENR) sa paglagda noong Pebrero 27 sa magkahiwalay na kasunduan sa dalawang private entities bilang pakikipagtulungan ng mga ito sa ENGP.

Ang Mitsubishi Motors Philippines Corp. (MMPC) at Steel Asia Foundation Inc. (SAFI) ay kapwa sumang-ayon na makikipagtulungan sa DENR sa pagtatanim at pag-aalaga ng mga puno para sa national greening efforts.

Sinabi pa ni Cimatu, ginawang mas madali ng gobyerno para sa pribadong sektor na makiisa sa ENGP matapos ilabas noong isang taon ang DENR Administrative Order (DAO) 2019-03, kung saan nakasaad ang mga hakbang upang mas maging madali ang gagawing partisipasyon ng pribadong sekor sa reforestation program.

Pinapayagan ng DAO ang mga kumpanya na pumasok sa public-private partnership scheme sa pamamagitan ng pagbuo ng bagong ENGP plantations, pagpapanatili at pagbibigay ng proteksiyon sa mga kasalukuyang plantations at ang pangangalaga sa mga kasalukuyang kagubatan sa labas ng ENGP areas.

Sa pamamagitan ng DAO, lumagda ang DENR sa memorandum ng agreement (MOA) sa MMPC para sa reforestation activities sa 30-hectare forestland sa Barangay Kapatalan, Siniloan, Laguna.

Ang 23 hectares ng forestland naman sa Barangay Dayawan sa Villanueva, Misamis Oriental ang nakapagkasunduan sa nilagdaang MOA ng DENR at ng SAFI para sa reforestation activities.

Nakapaloob sa MOA na ang MMPC at ang SAFI ay pumayag na maglaan ng pondo para sa limang-taong implementasyon ng iba’t ibang gawain na kinabibilangan ng paghahanda sa lugar na pagtataniman, seedling production o pagbili at maintenance at protection ng mga gagawing plantations at ang paligid dito.

Sa bahagi naman ng DENR, tutukuyin at ihihiwalay nito ang forestlands at aalamin din kung anong indigenous tree species ang itatanim, mode of plantation establishment at ang pagbibigay ng proteksiyon at pangangalaga sa lugar na sakop ng MOA.

Nakasaad din sa MOA na ang DENR, katuwang ang MMC at SteelAsia, ang pipili ng people’s organization o komunidad na magtatanim at mag-aalaga sa seedlings sa loob ng limang taon.

Ang ENGP ay ang karugtong ng National Greening Program na binuo sa pamamagitan ng Executive Order (EO) 26 na ipinatupad noong 2011 hanggang 2016. Sa loob ng anim na taong implementasyon nito ay nakapagtanim na ng 1.3 billion seedlings sa 1.7 million hectares na lupain.

Naitatag noong 2015 sa ilalim ng EO 193, layunin ng ENGP na mataniman ang 7.1 milyong ektarya ng open, degraded at denuded forests sa bansa para sa taong 2016 hanggang 2028. (Bishop Jesus “Jemba” M. Basco)

LUNGSOD NG MALOLOS- Humakot ng parangal ang Lalawigan ng Bulacan kasabay ng paggagawad sa Pamahalaang Panlalawigan ng Bulacan, 21 bayan at tatlong lungsod ng 2019 Good Financial Housekeeping ng Department of the Interior and Local Government.

Nagawa ng mga pumasang lokal na pamahalaan na tumalima sa Full Disclosure Policy o ang pagpapaskil ng dokumentong pinansyal sa tatlong hayag ng lugar at sa FDP Portal para sa CY 2018 all quarters at CY 2019 1st quarter posting period documents; at ang kanilang pinakabagong COA Audit Opinion ay Unqualified o Qualified para sa CY 2017 at 2018.

Binati naman ni Gobernador Daniel R. Fernando ang lahat ng tatlong lungsod at 21 bayan ng Bulacan para sa pagtalima at pagpasa sa pamantayan ng DILG at sinabi na ang pagiging bukas ang susi sa isang mabuting pamumuno.
“Ito pong pagiging bukas ng ating dokumento, lalo pa nga po at pinansyal ay dapat talagang pagtuunan ng pansin ng ating pamahalaan. Karapatan po ng ating mga mamamayan na malaman kung saan napupunta ang buwis na kanilang ibinabayad. Kaya naman po, tayong mga pinagkatiwalaan ay dapat na gugulin ang mga pondong ito sa tamang mga proyekto na mabebenipisyuhan ang ating mga kalalawigan,” anang gobernador.

Ayon sa Official List of Passers na inilabas ng DILG, 89 porsiyento o 1,522 sa 1,706 na sinuring lokal na pamahalaan ang pumasa sa batayan.

Ang Financial Housekeeping, kasama ng Disaster Preparedness, Social Protection, Peace and Order, Business Friendliness and Competitiveness, Environmental Protection at Tourism, Culture and the Arts, ang mga batayan sa paggagawad ng Seal of Good Local Governance sa mga lokal na pamahalaan. (Bishop Jesus “Jemba” M. Basco)

KASKASERO, balasubas, kamote, pasaway ay ilan lamang sa mga bansag sa mga pasaway na drayber na hindi dapat nabibigyan ng prebilehiyo na makapagmaneho.

Kabilang sila sa mga dahilan kung bakit nakapagtala ng mahigit 121,000 insidente sa kalsada sa Metro Manila mula Enero hanggang Disyembre 2019.

Ayon sa Land Transportation Franchising and Regulatory Board (LTFRB), kabuuang 121,771 na road crashes ang naitala. Pawang fatal, non-fatal at Damage to Property (DTP) ang klasipikasyon ng mga nangyaring insidente.

Kaugnay nito, mahigit 40,500 sa mga insidente ay naitala sa pitong major roads sa bansa — EDSA, C5, Commonwealth, Roxas Boulevard, Marcos Highway, Quezon Avenue at R10, habang ang mga sasakyang sangkot ay pedicab, tricycle, kotse, jeep, taxi, bus, truck at van. Kapansin-pansing hindi nabanggit ang motorsiklo na halos araw-araw ay may naiuulat ding insidente ng pagsemplang at salpukan.

Isa sa mga nakikita nating problema ay may mga drayber na kulang ang kaalaman sa mga batas-trapiko. Ang masaklap, sa kabila nito ay nakalulusot pa rin sa renewal ng lisensiya. Ibig sabihin, may isyu rin sa mga ahensiya ng gobyerno.

Sakit din sa ulo ang mga drayber na bumibiyahe nang wala sa huwisyo, lasing o sabog sa ilegal na droga. Sa simula pa lang ng 2020, kaliwa’t kanan na ang mga nabibiktima ng pag-araro at banggaan, huwag naman sanang lumobo pa sa pagtatapos ng taon.

Pero, kung lalo pang lalala ang mga insidenteng kinasasangkutan ng mga iresponsableng drayber, panahon na para mas higpitan ang mga batas na ipinatutupad sa lansangan.

Mula sa pagbibigay ng lisensiya, pagre-renew, hanggang sa pagpapataw ng parusa sa mga pasaway, kung puwedeng itodo na ang paghihigpit ay gawin na.

Tandaan, ang kapirasong papel na ipinagkatiwala sa atin ay lisensiya para makapamuhay nang mas komportable at madali ang mga bagay-bagay at hindi para mapadali ang sariling buhay o ang buhay ng sinuman.