KALAT nasocial media ang mga insidente ng panic- buying kung saan nagkakaubusan na raw ng suplay ng alcohol, hand sanitizer, tissue, face mask at iba pa sa gitna ng outbreak ng Coronavirus Disease 2019 (COVID-19).

Kaugnay nito, agad na umapela ang gobyerno sa publiko na iwasan ang pagse-share ng mga hindi beripikadong impormasyon dahil magdudulot lamang ito ng panic.

Tiniyak din ng Department of Trade and Industry (DTI) sa taumbayan na hindi kailangang mag-hoard ng alcohol dahil hindi naman nagkaroon ng production stoppage sa mga ito.

Anila, mauubos ang pera ng mamimili, pero hindi ang suplay ng alcohol. Kaya mamili lang ng kailangan para sa isang linggo o pinakamatagal na ang isang buwan.

Pinayuhan na rin ang mga supermarket na limitahan ang pag-display ng mga produkto para hindi mag-hoard ang mga mamimili, pero huwag sanang hayaan na may mabakanteng estante dahil dito nagsisimula ang maling akala, tipong ‘pag nakita ng mga mamimili na wala nang display, iisipin nilang wala nang stock na nauuwi na sa panic.

Isa pang epekto ng panic-buying ay nagkakaroon ng pagkakataon ang mga abusado at sugapa sa pera na pagkakitaan ang sitwasyon. Magho-hoard saka ibebenta sa mas mataas na presyo sabay tatakutin ang buyer na kesyo lalo pang magmamahal hanggang sa wala nang mabili, ang tindi n’yo po.

Kaya ngayong nagbigay naman ng garantiya ang DTI na sapat ang suplay sa merkado ng essential items, huwag nang mag-panic. Huwag nang magpaloko sa mga nag-aalok ng alcohol sa hindi makatarungang halaga.

Try kaya nilang ipaligo hanggang sa luminis ang kanilang konsensiya? Tablan sana. Panawagan naman natin sa kinauukulan, turuan ng leksiyon ang mga mapagsamantala. Tuwing may problema sa bansa ay nakikisabay din sila na para bang nakakakita ng oportunidad para makapanlamang ng kapwa. Mahiya naman kayo!

LUNGSOD NG MALOLOS- Kasunod ng anunsyo ng Kagawaran ng Kalusugan na umakyat na sa 33 ang kumpirmadong kaso ng COVID-19 sa bansa, kung saan kabilang ang isang Bulakenyo mula sa Lungsod ng San Jose del Monte, Bulacan, itinuloy ni Gob. Daniel R. Fernando ang suspensyon ng klase sa lahat ng antas, pampubliko at pribadong paaralan, mula kahapon hanggang Marso 14,2020, Sabado.

Umapela din ang gobernador sa publiko na manatiling kalmado sa gitna ng kinakaharap na health emergency dahil sa banta ng nasabing sakit na mabilis na kumakalat, at hinikayat ang lahat na magdasal.

“Tayo ay nagsasagawa ng contact tracing alinsunod sa direktiba ng Department of Health at Bulacan Provincial Health Office-Public Health kasama ang City Health Office of San Jose Del Monte upang matukoy ang mga nakasalamuha ng pasyente at magsagawa ng patuloy na beripikasyon. Ang mga estudyante ay mag-aral pa rin sa kani-kanilang mga bahay,” ani Fernando.

Aniya, wala siyang ibang hangad kundi masiguro ang kalusugan at kaligtasan ng mga Bulakenyo kung kaya naman gagawin ng Pamahalaang Panlalawigan ng Bulacan ang lahat upang proteksyunan ang mga residente, dahilan upang ipagbawal pansamantala ang mga malakihang pagtitipon.

Bago ito, pinirmahan ng gobernador ang Memorandum GO DRF031020-91 na nag-aatas sa mga punong bayan at lungsod, health worker at mga kapitan ng barangay upang mahigpit na ipatupad an mga angkop na hakbang upang makaiwas sa COVID-19 gaya ng nakasaad sa Proklamasyon Blg. 922 at alinsunod sa Republic Act No. 11332 o ang Mandatory Reporting of Notifiable Diseases and Health Events of Public Health Concern Act.

Hinihilingan ang mga punong bayan at lungsod at mga kapitan na isagawa ang Sustained Inter-agency coordination, pagsiguro sa back up systems to address surge capacity, at establish logistic management system habang ang mga health worker ay inaatasang panatilihing maalam ang publiko upang mabawasan ang takot at pangamba.

Dagdag pa rito, muli ding pinaalalahanan ng Provincial Health Office-Public Health ang mga mamamayan hinggil sa kahalagahan ng personal na mga paraan ng pag-iwas sa sakit gaya ng tama at palagiang paghuhugas ng kamay, pag-ubo at pagbahing ng tama, pag-iwas sa matataong lugar at tamang paraan ng pagluluto.

Samantala, sa isinagawang media briefing ng Kagawaran ng Kalusugan, sinabi ni Asec. Ma. Rosario Vergeire na ang mga kumpirmadong kaso ay ipinasok sa iba’t ibang ospital kabilang na ang San Lazaro, RITM, Makati Medical Center, Saint Luke’s BGC at Quezon City, The Medical City, Jose N. Rodriguez, Cardinal Santos, Lung Center, at ang mga repatriated na pasyente ay nasa New Clark City. (Bishop Jesus “Jemba” M. Basco)

INUTUSAN ni Department of Transportation (DOTr) Secretary Arthur Tugade ang Civil Aviation Authority of the Philippines (CAAP) at Manila International Airport Authority (MIAA) na ipagpaliban muna ang pagbabayad ng take-off, landing, at parkingfees ng mga local airlines dahil sa nararanasang COVID-19.

“We are in a situation that is not of our own liking nor of our own making. There is an emergency. Can the government not do things that can assuage the emergency? We need to extend our arm to all. Let it not be said that we did not do a thing,” wika ni Tugade.

Ayon sa CAAP at MIAA ang nasabing hakbang at desisyon ay ginawa upang matulungan ang mga airlines dahil sa paghina ng turismo na siyang dahilan upang bumaba ang mga bilang nga mga pasahero na sumasakay dito dahil sa paglaganap ng COVID-19 sa buong mundo. Ang mga local na airlines na may operasyon sa MIAA at nasa ilalim ng CAAP ang siyang covered ng nasabing order.

“Deferred charges for local carriers total about P58 million a month. Local airlines operating under CAAP will save P37 million a month in terms of deferred take-off, landing, and parking fees. The airlines will pay the deferred charges once the COVID-19 threat in the country is lifted,” wika ni MIAA general manager Ed Monreal.

Sinabi ni Monreal na magkakaroon sila ng scheme na ipapatupad sa nasabing deferred payment at kanila rin titingnan kung paano sila makaka-recover. Titingnan din ng CAAP kung gaano katagal nila ipapatupad ang defernment at kung paano makababangon ang mga airlines kaya’t kanilang pinag-uusapan ang maaaring isang taon na deferment at isa pang taon para sa pagbabayad.

Tinatawagan din nila ng pansin ang aviation at airport sectors na palakasin ang local na turismo sa bansa. Kung kaya’t hinihikayat ng Civil Aeronautics Board (CAB) ang mga airlines na magkaroon ng mas maraming local destinations upang palakasin ang local tourism upang mabawasan ng kahit konti ang pagkalugi ng mga airlines.

Sa ngayon ang NAIA ay parating sumasailalim sa sanitation at disinfection upang siguraduhin na ligtas ang mga pasahero. Ayon sa MIAA, kada 30-minuto ay mayroong naglilinis at nagdagdag pa rin sila ng mga thermal scanner.
Sinabi naman ng DOTr, sila ay gumagawa ng isang holistic approach sa paglilinis ng lahat ng transportation hubs sa bansa.

Ang Philippine Ports Authority (PPA) ay nagbigay ng kautusan sa lahat ng mga daungan sa bansa na makipagtulungan sa mga quarantine offices at mahigpit na ipatupad ang screening ng mga pasahero sa arrival areas lalo na sa mga lugar na pinupuntahan ng mga turista.

Inutusan na rin nga ng Philippine Coast Guard (PCG) ang lahat ng medical units nito sa 13 Coast Guard Districts na maging alerto sa posibleng pagkalat ng NCOV-19.

Ang mga loob naman ng mga trains at station premises ay sumasailalim rin sa round-the-clock na paglilinis. (LASACMAR)