Ang Diyaryong Pinagkakatiwalaan
Maganda ang ipinakita ng Los Angeles Lakers sa kanilang unang scrimmage kahit natalo sa Dallas Mavericks, 104-108, sa larong ginanap sa “Bubble” sa Walt Disneyland sa Orlando, Florida.
Natalo ang Lakers dahil hindi na pinalaro ang kanilang stars sa 2nd half matapos tambakan ang Mavericks sa 1st half.
Sa unang scrimmage ipinakita nina LeBron at Anthony Davis, umiskor ng tig-12 sa paglalaro ng 15 minuto, na hindi sila kinalawang kahit pa nagbakasyon ng mahigit apat na buwan ang liga.
Tinatayang nasa 300,000 estudyante mula sa private school ang lumipat na sa pampublikong paaralan para sa paparating na academic year 2020 hanggang 2021 sa gitna ng coronavirus pandemic, ayon sa Department of Education (DepEd).
“Ang sabi po sa amin ng field officials namin, traditionally ang private schools, nahuhuli mag full blast ng enrollment,” ani Education Undersecretary Diosdado San Antonio sa isang panayam.
Sa datos pa aniya kahapon, July 23 ay pumalo na sa 78.9 ang enrollment rate.
Samantala, tiwala naman si San Antonio na tuloy na ang pagbubukas ng klase sa Agosto 24. (Daris Jose)
CAUAYAN CITY – Patuloy ang masusing imbestigasyon ng mga otoridad para malaman ang tunay na dahilan ng pagbagsak ng isang helikopter ng Philippine Air Force (PAF) kagabi.
Apat na ang patay, isa ang malubhang nasugatan sa pagbagsak ng Huey helicopter habang palipad kagabi upang magsagawa ng night vision proficiency training.
Unang lumabas sa imbestigasyon ng Cauayan City Police Station na dakong alas-7:10 kagabi nang bumagsak at sumabog ang chopper habang palipad mula sa Air Station ng Tactical Operations Group (TOG 2), Philippine Air Force na nakabase sa San Fermin, Cauayan City.
Nagsagawa hanggang madaling araw ng crime scene processing ang mga miyembro ng Scene of the Crime Operatives (SOCO) ng Cauayan City Crime Laboratory matapos na marekober ang bangkay ng apat na sakay ng chopper.
Nasa punerarya pa ang bangkay ng mga namatay na dalawang piloto, isang crew at isang backride habang ginagamot sa isang pribadong ospital ang isa pang crew na malubhang nasugatan.
Hindi pa inilabas ni Col. Augusto Padua, commander ng TOG-2 Philippine Air Force ang pangalan ng mga sakay ng helicoper dahil kailangan munang ipabatid sa kanilang pamilya ang nangyari sa kanila.
Inaasahang darating sa Cauayan City ang mga kinatawan ng Civil Aviation Authority of the Philippines (CAAP) para imbestigahan ang pagbagsak ng helicopter. (Ara Romero)
Itinanggi ni Philhealth President Ricardo Morales ang mga iregularidad sa ahensyang nasasakupan.
Kasabay nito ay hinamon din ng opisyal si Thorrsson Montes Keith, anti-fraud officer na nagbitiw sa pwesto na patunayan ang sinasabing “widespread corruption.”
“[Aabot sa] 50,000 transactions ang hina-handle ng PhilHealth araw-araw, palagay ko naman kung hindi corruption ‘yung mga inefficiencies diyan, mali ‘yung pasok [ng entries], kulang. Pero iyong sinasabi na korapsyon na may sindikato, may mafia, wala hong ebidensiya,” lahad ni Morales sa isang panayam.
“Kung may alam siyang corruption, ilabas niya. Mag-aantay pa siya ng August 31 [for his resignation to become effective]? Gawin na niyang Lunes o ngayon, kasi detrimental na ‘yung ano niya… it would compromise the corporation for him to stay, for him to have access to the resources of the corporation,” dagdag pa nito.
Lahad ni Morales, hindi nag-e-exist ang posisyong sinasabi ni Keith.
“Wala namang ganung position. Pumunta sa akin ‘yan noong isang araw, naga-apply sa position na hindi siya qualified, gusto palitan si Laborte. Hindi ko siya kilala, eh position of confidence iyong executive assistant,” paliwanag ni Morales tungkol sa posisyong Executive Assistant Etrobal Laborte.
“Hindi naman siya qualified roon kasi kailangan ng training, attitude,” lahad pa nito.
Nagbitiw sa kaniyang puwesto ang anti-fraud legal officer ng Philippine Health Insurance Corporation (PhilHealth) na si Atty. Thorrsson Montes Keith.
Sa kanyang resignation letter na isinumite kay PhilHealth president at CEO Ricardo Morales, isinaad nito na ang dahilan ng pagbitiw niya sa puwesto ay dahil sa hindi makatarungang job promotion process.
Kasama rin dito ang ilang delayed na pasahod at hazard pays kung saan magiging epektibo ang resignation nito sa Agosto 31.
Mahigpit kasi nitong kinokontra ang mandatory na pagbabayad sa PhilHealth ng mga overseas Filipino workers.
Magugunitang inatasan ni Pangulong Rodrigo Duterte na gawing boluntaryo na lamang ang pagbabayad sa PhilHealth matapos na almahan ito ng mga OFW.
Mariing pinabulaanan din ng hepe ng PhilHealth ang nawawala umanong pondo na umaabot sa P154 billion. (Daris Jose)
Siniguro ng Philippine National Police (PNP) sa publiko na hindi magiging target ng law enforcers ang mga magsasagawa ng kilos protesta sa ikalimang State of the Nation Address (SONA) ni President Rodrigo Duterte.
Sa isang panayam, tinanong si PNP spokesperson Police Brigadier General Bernard Banac tungkol sa ispekulasyon na ang SONA ang magiging ‘big test’ sa bagong batas na anti-terror law laban sa mga magpoprotesta.
“There is no rush to implement the new law, we continue to be alert and vigilant against threats of terrorism and to prevent occurrence of crimes. We always say that expression of opinion, protest, or dissent is never part of the definition of terrorism,” paliwanag ni Banac.
Tinataya aniyang nasa 5,000 pulis ang idedeploy sa Metro Manila sa SONA sa Lunes, July 27.
“We still want our protesters to be responsible and observe minimum health protocols.”
“In so far the PNP is concerned, we are just there to protect people from getting sick,” dagdag pa ni Banac. (Daris Jose)
Kinumpirma ni US retired boxing champion Floyd Mayweather Jr na kasalukuyang inaayos ang kontrata sa isang exhibition match sa Japanese promotion na Rizin.
Sinabi nito na kung hindi maihahabol ngayong taon ay maaaring sa 2021 na ito maisasakatuparan.
Iginiit nito na retirado na ito at hindi rin sasabak sa Mixed Martial Arts.
Magugunitang noong 2018 ng nakaharap niya sa exhibition game si Japanese kickboxer Tenshin Nasukawa at nanalo ito sa first-round technical knockout.
Nag-uwi ito ng $9 million bilang panalo sa nasabing laban.