LUNGSOD NG MALOLOS – Kagyat na nagpatawag ng pulong si Gob. Daniel R. Fernando kasama ang Inter-Agency Task Force matapos ianunsyo ni Pangulong Rodrigo Roa Duterte na muling isasailalim ang Bulacan kasama ang iba pang lalawigan na nakapalibot sa National Capital Region sa Modified Enhanced Community Quarantine (MECQ) mula Agosto 4-18 dahil sa paglobo ng kaso ng COVID-19 sa bansa.

“Medyo nabigla po ang lahat, sarado na naman ang maraming establishments. But let us face the reality, hindi naman ito matitigil hanggang walang vaccine kaya pataas pero ang bantayan natin ay ang mas marami ang makarecover at hindi tayo magka-casualty. Mahirap ‘yung tatahakin natin na ito, but we need to fight until we heal,” ani Fernando.

Ayon kay Bulacan PNP Provincial Director Lawrence Cajipe, babantayan nila ang 21 controlled points na hangganan ng Bulacan, 52 na inter-municipality at 13 pasukan at labasan sa lalawigan habang mahigpit na sinusunod ang mga alituntunin ng MECQ.

Nakasaad sa alituntunin na suspendido ang pampublikong transportasyon, sarado ang mga paaralan, mahahalagang serbisyo lamang ang papayagan sa malls, walang malakihang pagtitipon, 50 porsyento lamang ng mga empleyado na may skeletal na iskedyul ang pahihintulutang pumasok habang work from home ang iba.

Ibinahagi naman ni Dr. Jocelyn Gomez, pinuno ng Provincial Health Office-Public Health, na sa huling tala nitong Agosto 3, mayroong 1,499 na kaso ng COVID-19, 462 ang gumaling habang 49 ang namatay sa Bulacan.

Aniya, may mga barangay at kabahayan na nasa ilalim ng localized zoning containment kabilang ang mga barangay ng San Nicolas at Bambang sa bayan ng Bulakan na matatapos sa Agosto 8 at 12; pitong kabahayan sa anim na barangay sa Plaridel na magtatapos sa Agosto 7; at 85 kabahayan sa Brgy. Ibayo, Hagonoy na matatapos sa Agosto 5.

Bukod dito, sinabi ni Rowena Joson -Tiongson, pinuno ng Provincial Social Welfare and Development Office, na naipamigay na nila ang 250,000 na mga survey form sa 569 na mga barangay sa lalawigan para sa contact tracing sa mga nagtatrabaho sa labas ng Bulacan.

Gayundin, sinabi ni Mayor Ambrosio Cruz, Jr., pangulo ng LMP Bulacan at miyembro ng IATF, na binanggit niya sa pulong kasama ang mga kapitan ng barangay na kailangang mahigpit na ipatupad ang mga alituntunin at maramdaman ito ng publiko.

“Kailangan maramdaman ng tao na may paghihigpit, kailangan maramdaman ng tao na kailangan natin sila sa laban na ‘to,” ani Cruz. (Bishop Jesus “Jemba” M. Basco)

Umaabot na umano sa mahigit 14,000 na aplikasyon sa calamity loans ang naaprubahan ng Social Security System (SSS) nito lamang nakalipas na buwan ng Hulyo.

Ayon sa SSS ang 14,186 na applications ay katumbas ng P15.53 billion na kanilang naipahiram sa mga kawani sa pribadong sektor mula July 1 hanggang July 27.

Habang nasa P190.02 million naman ang kanilang naipaluwal bilang tulong sa programang unemployment insurance benefits (UIB) para sa mga empleyado na naapektuhan ng COVID pandemic.

Iniulat naman ni SSS president at CEO Aurora Cruz Ignacio, mula nang tumanggap sila ng aplikasyon sa mga insurance benefits noong July 27, nasa 43,347 na ang kanilang naaprubahan kaya naman may combined total na ito sa P544.37 million.

Samantala nagpaliwanag pa si Ignacio doon naman sa programa nila na
Calamity Loan Assistance Package (CLAP) nasa 1.03 million applications na ang kanilang inaprubahan mula ng nang ilunsad ang online filing noong June 15.

Habang noong June 15 naman hanggang July 28 ang application average na tinatanggap kada claim ay nagkakahalaga ng P15,144.

Sinabi pa ng SSS na ang calamity loan for COVID-19 ay magtatapos hanggang September 14, 2020.

Meron lamang mababang 6% interest per annum ang itinakda ng SSS na sisingilin sa loan na magsisimula sa ikaapat na buwan ng 27-month term.

Ibig sabihin nito, merong three-month moratorium sa pagbayad ang isang applicant.