Pinag-iingat ni House Transportation Committee Chair and Samar Rep. Edgar Mary Sarmiento ang publiko laban sa mga manloloko o con syndicates gamit ang nakaka-awang sitwasyon ng mga naapektuhan ng mga nagdaang bagyo.

Ang babala ay ginawa ni Sarmiento matapos mabunyag na may isang grupo na gumagamit sa kanyang opisina para manghingi ng pera sa mga kaanak, kaibigan, supporters at businessmen mula sa transport industry upang makakalap ng pondo na ipangtutulong sa mga nasalanta ng bagyo.

“The office of one of our colleagues called to verify if I’m seeking assistance in the form of cash donation for the victims of the calamity. Please be informed that there is no such activity or any donation drive,” ani Sarmiento.

Ayon pa sa mambabatas, sinasamantala ng mga sindikato ang sitwasyon ng libong pamilya sa Marikina, Rizal, Cagayan Valley at Bicol region na matinding naapektuhan ng sunud-sunod na bagyo na tumama sa bansa nitong nakalipas na dalawang buwan.

Ginagamit din aniya ng mga nasabing con artists ang pangalan ng ilang pulitiko, showbiz personalities at prominent personalities sa business sector para tumaas ang tiyansa ng mga ito na makakuha ng mas malaking halaga.

May mga ulat din umano na nagbuo ng Social Media pages at Go Fund Me sites para sa mga biktima ang con artists gamit ang pangalan ng pulitiko at iba pang kilalang personalidad.

“While we are appealing for help for tens of thousands of families who lost their homes, properties and the lives of their loved ones, we should make sure that our donations do not end up in the hands of these unscrupulous syndicates who are preying on the misfortunes of other people,” pahayag ni Sarmiento.

Nanawagan din ito sa Philippine National Police (PNP) at National Bureau of Investigation (NBI) na maglunsad ng crackdown laban sa mga scammers na namamalantala sa mga biktima ng bagyo. (ARA ROMERO)

Isang technical working group (TWG) ang binuo ng New Normal Cluster of the Defeat COVID-19 Ad-Hoc Committee (DCC) sa kamara para pagsasama-samahin ang limang panukala na naglalayong buuin ang Balik Probinsya Program.

Ito ay ang House Bills 6762, 7072, at 7111 na bubuo sa “Balik Probinsya, Bagong Pag-Asa” Program; HB 6970 na naglalayong gawaran ng mga insentibo ang mga kompanyang magtatayo ng mga bagong negosyo, magpapalawig o maglilipat ng operasyon sa kanilang negosyo sa ilalim ng Balik Probinsya Program bilang pagtugon sa Philippine Recovery and Rural Development (PRRD); at ang HB 7310 na naglalayong itatag ang Balik Probinsya Financial Assistance Fund Program.

Sinabi ni RECOBODA Party-list Rep. Godofredo Guya, isa sa may-akda ng HB 7072, na ang mga oportunidad sa mga kanayunan ay limitado, kakulangan sa mga imprastraktura na susuporta sa inaasahang pagdagsa ng mga tao, at maliit o kawalan ng insentibo sa mga taong mahihikayat na bumalik sa kanayunan na maaaring makaakit sa mga tao.

Sa mga kadahilalang ito, sinabi ni Guya na dapat lamang na isaayos ang pangangailangang pundasyon sa implementasyon ng Balik Probinsya Program.

Para kay Subcommittee Chair at Deputy Speaker Loren Legarda, ang pandemya at ang mga nanalasang bagyo sa bansa at kalamidad ang nagbigay ng pangangailangan upang paunlarin ang mga polisiya at gawin itong pantay at “hindi lamang nakatuon sa NCR.”

“Dapat ay magkaroon ng pantay-pantay na kaunlaran sa lahat ng rehiyon – pantay, mapanatili, matatag, at luntiang kaunlaran sa mga rehiyon,” ani Legarda. (ARA ROMERO)

TUMULAK pa sa  Cebu City ang mga tauhan ng Manila Police District (MPD) upang arestuhin ang isang 18-anyos na High School student at Top 5 Most Wanted Person sa Cebu City.

Sa bisa ng Alias warrant of arrest na insyu ni Hon. Jose Lorenzo Dela Rosa ng RTC Branch 4, Manila, inaresto si Ivhan Abel Candelario, alias Ivan Candelaria, binata at residente ng Brgy Lataban, Liloan Cebu City sa kasong Murder.

Sa ulat, dakong alas-10:45 Martes ng gabi nang naaresto ang suspek ng pinagsanib ng puwersa ng MPD-Station 12 at Liloan Municipal Police Station sa Purok Sunshine, Brgy Lataban, Liloan, Cebu City.

Nauna dito, isang informant ang nagsabi na ang suspek ay namataan sa nasabing lugar dahilan upang tumulak ang MPD sa lugar at nakipag-koordinasyon sa Liloan police na siyang nakakasakot sa lugar upang isilbi ang alias warrant of arrest laban sa suspek.

Unang dinala ang suspek sa Liloan Municipal Police Station bago ibinalik sa court of origin.

Walang  inirekomendang piyansa laban sa suspek. (GENE ADSUARA)