MAPUPURI mo talagang magmahal ng friends niya si Megastar Sharon Cuneta. 

Like na lamang nitong nakaraang ilang araw, nag-post si Sharon sa Instagram niya na humihingi ng dasal para sa kanyang TF, na si Fanny Serrano na na-stroke at dasal din niya, “Please Lord…don’t take him away from me yet…Don’t leave me, my dearest TF…I love you so, so much.” 

Maraming sumagot sa kanyang request at ngayon ay nagkamalay na at nagpapagaling na si TF na naging make-up artist ni Sharon nang nagsisimula pa lamang siya sa showbiz.

At nang mag-start silang mag-shoot ng actress na si Rosanna Roces ng bagong movie nilang Revirginized ng Viva Films, nakilala raw niya ang actress na napakadaling mahalin dahil totoong tao, walang pretensions at napakalaki ng puso.

“It is MY honor to have a friend like you in my life. Wala akong pakialam sa imperfections mo kasi lahat naman ng tao walang perfect. Ang kaibahan mo, open ka, yung iba nagpapanggap na perfect at disente pero baligtad pala. I love you lablab ko!”

At wala ring pakialam si Sharon kung mag-post man siya ng teaser ng kaibigang si Pops Fernandez, para sa Centerstage ng GMA Network na napapanood every Sunday, 7:40 PM, na mga judges sina Aicelle Santos, ang dati niyang musical director sa Sharon noon na si Mel Villena at si Pops nga.

Okey lang naman ‘yun kahit katapat ang Your Face Sounds Familiar na isa rin siya sa mga judges, ng ABS-CBN. Nagpasalamat si Pops at miss na raw niya ang sis niya, sagot ni Sharon, “I love you, sis.  Miss you too.”

Umabot ito ng more than 15K views matapost i-post ni Sharon.

***

PALAGAY na ang loob nina Shaira Diaz at Ruru Madrid na magkasama sa mga projects nila sa GMA Network.

Una sana nilang pagtatambal ay sa action-drama series na Lolong, pero inihahanda pa ang lock-in taping nito, nag-guest muna sila sa The Lost Recipe nina Mikee Quintos at Kelvin Miranda at saka sila nagtambal muna sa first episode ng Season 2 ng drama anthology na I Can See You: On My Way To You.

Simula na ngayong Monday, March 22, ang romantic-drama weekly series, hindi kaya magselos ang kani-kanilang loves?

No problem daw naman  dahil open ang relasyon nina Shaira at EA Guzman at sina Ruru at Bianca Umali.

Natawa si Shaira, dahil ang tagal na raw nila ni EA, wala na raw silang selosan. Saka ngayon daw ay naiintindihan na ng audience ang pinapanood nila, na acting lamang ang ginagawa nila.

Sa ngayon ay busy ang apat na Kapuso actors, dahil kung magkatambal man sina Shaira at Ruru, may project ding ginagawa si Bianca, ang Legal Wives na isa siya sa asawa ni Dennis Trillo sa serye.

Si EA naman ay isa sa katambal ni Julie Anne San Jose sa Heartful Cafe na malapit na ring mapanood sa GTV channel ng GMA simula sa April 5.

Gaganap na isang run-away bride si Shaira, tatakbuhan din ba niya si Ruru?     Mapapanood na simula ngayong gabi, March 22, ang ICSY: On My Way To You, after ng First Yaya sa GMA-7. (NORA V. CALDERON)

BIHIRANG mag-post sa kanyang Facebook account ang multi-awarded screenwriter na si Ricky Lee.

Pero nag-post siya noong Friday, not because it is his birthday kundi para ipaalam sa mga tao ang ginagawang film retrospective ng ABS-CBN Restoration ‘Sagip-Pelikula’ ng mga pelikulang sinulat niya, para sa birthday month niya na nag-start noong March 16 hanggang April 16.

Gusto raw niyang maiyak matapos makita ang line-up ng 14 films na kasali sa retrospective dahil sobrang blessed siya na maging bahagi ng pelikulang dinirek nina Lino Brocka, Ishmael Bernal, Marilou Diaz-Abaya, Mel Chionglo, Olive Lamasan. Chito Rono, Rory Quintos, Jerry Sineneng, Butch Perez, Cholo Laurel and their teams, to have been part of a community that keeps giving and giving through film.

Lalo raw niyang na-miss ang mga director na yumao na tulad nina Marilou, Lino, Ishma, and Mel. Pero dahil daw sa mga pelikulang nagawa niya, pakiramdam daw ni Sir Ricky ay kapiling pa rin natin ang mga mahuhusay na director.

Pinasalamatan din ni Sir Ricky ang untiring efforts nina Leo Katigbak and his team para ma-restore ang kanyang mga pelikula and hundreds of other films.    May problema man kaharapin at magkulang man sa resources pero walang sawa silang nagre-restore ng mga pelikula para bigyan tayo ng gift of history and legacy.

“Itong mga pelikulang ito namin nina Marilou, it is as much our work as theirs now. Kung hindi sa kanila, ang mga pelikulang ito ay mananatiling mga title na lang na binabanggit.

“Pero sa halip, bawat isang pelikulang niri-restore nila ay nagiging isang maligayang muling pagsilang,” sabi pa ni Sir Ricky sa kanya.

Humiling din siya ng suporta sa ‘Sagip Pelikula’ sa ngayon and in the coming days.

***

AFTER doing dramas two in a row, comedy naman ang sunod na handog ng Heaven’s Best Entertainment titled Ang Huling Birheng Bakla sa Balatlupa.

Mula sa direksyon at panulat ni Joel Lamangan, with Afi Africa as co-writer, ang all-out camp comedy na ito ay tatampukan nina EA Guzman, Teejay Marquez, Mimi Juareza, Carmi Martin, Lou Veloso, Sunshine Garcia, Dave Bornea, Lexi Gonzales, Sean de Guzman at Jim Pebanco.

Hindi lang namin sure kung bakla ang role ni EA sa movie kasi he said na after his award-winning role sa Deadma Walking, hindi na muna siya tatanggap ng role ng bakla whether sa movie o TV.

Congratulations nga pala kay EA for being nominated as Best Supporting Actor sa upcoming 4^th Eddys Awards para sa Coming Home.

May gagawin rin si EA na bagong TV show titled Heartfelt Café na ipalalabas sa GTV.

***

NAPANOOD namin ang video ni Megastar Sharon Cuneta asking for prayers para sa kanyang kaibigan na si Fanny Serrano.

“It’s a private thing supposedly, but there’s no way asking around it. I would really like to ask for your prayers because Tita Fanny Serrano had a massive stroke today (March 17). He is being treated. He is conscious.

“But please, I need prayers to work wonders talaga, so please pray for Tita Fanny. I love him so much. He is like family to me for three decades already. Please pray for him and his healing.”

Tapos na ang shoot ng Revirginized, ang comeback film ni Ate Shawie sa Viva Films. Tulad ng maraming Sharonians, wish namin na sana maganda ang pelikula.  (RICKY CALDERON)

SAKTONG isang taon na pala ng mag-positive sa Covid-19 ang mag-asawang Art Atayde at Sylvia Sanchez, na hanggang ngayon ay kinatatakutan pa rin sa buong mundo ang nakamamatay na virus.

Naging matindi nga ang pagsubok na hinarap ng mag-asawa noong isang taon, unang nag-positive noong March 16, 2020 si Papa Art at paglipas naman ng ilang araw ay malaman ni Sylvia na nahawa na rin siya ng asawa.

Buti na lang at agapan nila at na-confine agad sa hospital silang mag-asawa at walang nahawa sa kanilang apat na anak na sina Arjo, Ria, Gela at Xavi.

Takot na takot noon si Sylvia, para sa kanilang mga anak, lalo na sa bunso nila na si Xavi, na ilang linggo niyang hindi nakita at mayakap.

Dahil sa nangyaring pagsubok, mas lalong tumatatag ang pananalig niya sa Diyos at never siyang nagtanong kung bakit silang mag-asawa ang tinamaan ng nakamamatay na virus na ngayon tumaas na naman ang bilang nang nagkakasakit sa Metro Manila, kaya naghihigpit muli at mas pinag-iingat ngayon ang publiko dahil mas mabilis na makahawa.

Malaki nga ang pasasalamat ng pamilya Atayde na nalampasan nila ang pinakamatinding pagsubok na dumating sa kanila, at sa tulong din ng maraming nagdasal, na yun iba ay hindi talaga nila kakilala ng personal.

Kahit may mga matinding pagsubok, patuloy naman ang pagdating ng blessings sa kanilang pamilya, na hindi naman nawalan ng trabaho, sa kabila ng pandemya.

Kaya naman malaki ang pasasalamat ni Sylvia, na napasama siya sa malaking cast ng newest inspirational drama series ng ABS-CBN na Huwag Kang Mangamba, na saktong-sakto sa panahong ito na marami ang nangangailangan ng inspirasyon.

Kakaibang role na naman ang gagampanan ni Sylvia bilang Barang, na tiyak na mamahalin ng manonood. Aminado ang premyadong aktres na malaking hamon ito sa kanya, dahil paiba-iba ang twist ng kanyang character, na kailangan niyang paghandaan.

Ang Huwag Kang Mangamba ay pinagbibidahan ng The Gold Squad na sina Andrea Brillantes, Seth Fedelin, Kyle Echarri at Francine Diaz, at kasama ni Sylvia sina Nonie Buencamino, Mylene Dizon, RK Bagatsing, Dominic Ochoa, Diether Ocampo, Enchong Dee, Angeline Quinto, Matet De Leon, Soliman Cruz, Mercedes Cabral, Paolo Gumabao, Alyanna Angeles at pasok na rin si Dimples Romana.

Ang serye ay mula sa direksyon nina Emmanuel Palo, Jerry Lopez Sineneng at Darnel Villaflor. Una itong mapapanood noong Sabado, Marso 20 sa iWantTFC at WeTV iflix, at ngayong Lunes (Marso 22), 8:40 p.m. pagkatapos ng FPJ’s Ang Probinsyano sa Kapamilya Channel, Kapamilya Online Live, Jeepney TV, A2Z Channel 11 at TV5 sa free TV at digital TV boxes gaya ng ABS-CBN TVplus.

Samantala, nominated naman si Sylvia sa 4^th EDDYS bilang Best Actress para sa Coming Home.

Ang 4^th EDDYS ay mapapanood sa April 4, 8 p.m. sa FDCP Channel (mag-register para sa libreng access), SPEEd Facebook page at iba pang digital platforms.

***

MAHIGIT sa 100 mag-aaral na Grade 1, mga magulang at mga guro ang tinutulungan ng Globe na magkaroon ng internet connection para sila ay makasabay sa bagong pamamaraan ng pagtuturo na ipinapatupad ngayon sa lahat ng paaralan sa bansa.

Nakikipagtulungan ang Globe sa Knowledge Channel Foundation Inc. (KCFI), ABS-CBN, at Mary’s Way Foundation sa pamamagitan ng Big Blue Hearts Campaign para mabigyan ng libreng internet access ang mga mag-aaral.

Sa ilalim ng naturang proyekto, nakalikom ng sapat na halaga ang KCFI, ABS-CBN at Mary’s Way Foundation para mabigyan ang 102 mga mag-aaral at guro ng Balibago Elementary School at Sta. Rosa Elementary School 1 at 3 ng Globe At Home Prepaid WiFi (HPW) modems.

Sa kabilang banda, sinagot naman ng Globe ang libreng data load ng HPW sa loob ng anim na buwan. Sa tulong nito, maipagpapatuloy ng mga estudyante sa Grade 1 ang kanilang mga klase at ma-aaccess pa nila ang mga videos ng Knowledge Channel at Basa Bilang habang nasa kanilang mga tahanan.

    “Sa panahon ngayon, kinakailangang online ang mga estudyante para tuloy-tuloy ang kanilang pag-aaral. Nais lamang ng Globe, bilang isang technology company, na gawin ang bahagi nito para mabigyan ang mga bata ng access sa mga learning resources,”  sabi ni ni Yoly Crisanto, Globe Chief Sustainability Officer at SVP for Corporate Communications.

Mayroon ding sariling pagsisikap ang Globe na matulungan ang mga guro sa pagtuturo ng Early Language Literacy sa mga bata sa pamamagitan ng mga webinar ng Global Filipino Teachers.

Ayon kay KCFI President at Executive Director Rina Lopez-Bautista: “Marami sa mga bata ay nahihirapan maka-adapt sa remote learning. Isa ito sa mga rason kung bakit binuo namin ang Big Blue Heart Campaign kasama ang Globe Telecom, Mary’s Way Foundation, at ABS-CBN. Nais naming matulungan sila na mapaunlad pa ang kanilang kakayahan sa pagbasa. Nais din ng KCFI na maipagpatuloy pa ang program sa mas mahabang panahon. Kaya lamang, dahil sa pandemya, hindi namin agad-agad magawa ang programa dahil sa kakulangan ng connectivity.”

Inilunsad ng KCFI ang Basa Bilang project noong 2018 para mapaunlad pa ang kakayahan sa pagbasa at aritmetik ng mga mag-aaral sa mababang baitang sa pamamagitan ng panonood ng mga animated at live action videos na nakabatay sa curriculum ng Department of Education (DepEd). Tinutulungan ng KCFI na mabuo ang pundasyon ng mga mag-aaral sa pagbabasa, mathematics, at pagsasalita — mga pangunahing aspeto para mahasa ang educational development ng bata.

Ayon kay Esperanza “Espie” M. Batitis, guro sa Sta. Rosa Elementary School Central 1, ang Basa Bilang at Wikaharian videos ay talagang nakatulong sa kanilang mga guro na nagtuturo ng asignaturang Filipino dahil mas nakukuha na nila ang atensyon ng mga bata.

“Ang mga video ay tumutulong sa mga guro na makatipid ng oras sa paghahanda ng mga visual material sa Filipino. Ito ay isa sa mga mas mahusay na diskarte sa pag-aaral sa kasalukuyan. Dahil sa mga motion at mga special effects, ang pagkatuto ay naging mas kasiya-siya kaysa sa pagbabasa ng isang teksto,” ani ni Batitis.

Tinuon ng DepEd ang atensyon nito sa distance learning para sa kasalukuyang school year nang masuspinde ang mga klase sa paaralan noong Marso 2020 dahil sa community quarantine na ipinatupad sa buong Luzon para maiwasan ang pagkalat ng COVID-19.

Sa pamamagitan ng iba’t ibang programa, patuloy na sinusuportahan ng Globe ang United Nations Sustainable Development Goals lalo na ang Goal No. 4 na naglalayong masiguro ang inclusive at pantay na dekalidad na edukasyon at itaguyod ang pangmatagalang oportunidad sa pagkatuto para sa lahat.      Para sa iba pang kaalaman sa Globe, bisitahin ang www.globe.com.ph (ROHN ROMULO)