Ang Diyaryong Pinagkakatiwalaan
Mayroon ng 10 gold medal sa e-kata ngayong taon si Filipino karateka James Delos Santos.
Nakuha nito ang ika-sampung medalya ng hindi tinanggap ng mga tournament officials ang video entry ng kaniyang katunggali mula sa South Africa.
Dahil sa hind pumasa ang video ni Cerone Biagoni sa gold medal round ay naibigay sa 30-anyos na si Delos Santos ang panalo.
Mula pa noong Oktubre noong nakaraang taon ay nagunguna na si Delos Santos sa mga online competition na kaniyang sinasalisahan.
TODO-depensa ang Malakanyang sa pagtatalaga ni Pangulong Rodrigo Roa Duterte ng mga sundalo para sa mahalagang papel na ginagampanan ng mga ito sa Inter-Agency Task Force (IATF).
Muli kasing inulan ng pamumuna at pagkuwestiyon ang pamahalaan kung bakit mga militar ang nilalagay sa Task Force.
Ayon kay Presidential Spokesperson Harry Roque, hindi lamang war hero gaya ni vaccine czar Secretary Carlito Galvez Jr. ang kuwalipikasyon ng mga itinatalaga sa IATF.
“Now mayroon din pong pumupula, bakit kasi sundalo ang ina-appoint dito sa IATF. Well, wala naman na-appoint sa IATF outside of iyong mga secretaries at mga namumuno ng opisina. Totoo po maraming mga military pero isang dahilan po kung bakit nagtitiwala ang ating Presidente eh dahil magaling po sa logistics ang ating mga military,” ayon kay Sec. Roque.
Sa kagaya aniya ni Galvez ay inihayag ni Roque na may kaalaman ito sa aspeto ng losgistics na nagagamit nito ngayon sa pag-aangkat ng mga bakuna.
Inihayag naman ni Galvez na may degree siya sa Project Management Major on System Modeling and Project Scheduling.
“Ang degree po namin ay sa ano po, sa Project Management Major on System Modeling at saka sa tinatawag nating Project Scheduling, iyon po ang Project Management,” ani Galvez.
Giit ni Galvez na nag- specialize siya sa leadership at system modeling na ayon naman kay Roque ay isang patunay na kuwalipikado ang mga sundalong itinatalaga sa Task Force at kanilang ini- aaplay ngayon ang kanilang kasanayan sa pag- angkat ng bakuna.
“Bale po iyan almost 18 months po iyan. Ang in-specialize ko po is sa leadership at saka po iyong system modeling, iyong modeling po ginagawa natin mga simulation, paano kukuha ng empirical data at saka iyong tinatawag nating, kino-compute po natin, iyong tinatawag na difference, iyong tinatawag nating how we will maximize iyong resources and minimize the time over output; iyon po ang pina-specialize po namin, systematic,” ayon kay Galvez.
“Importante pong malaman ng taumbayan iyan dahil hindi din nila alam na kaya kayo itilaga ng Presidente hindi lang dahil kayo ay war hero, kung hindi mayroon po talaga kayong advanced training doon sa isang field na kinakailangan pagdating sa logistics, pag-aangkat ng ating mga bakuna,” sundot na pahayag naman ni Sec. Roque. (Daris Jose)
HINILING ng Malakanyang sa mamamayang filipino na gawin ang tradisyunal na pag- obserba ng Mahal na Araw para sa taong ito.
Para kay Presidential Spokesperson Harry Roque, ito kasi ang mga panahong wala talagang lumalabas kapag panahon ng Mahal na Araw lalo na kapag Biyernes Santo.
Ayon kay Sec. Roque, malaking bagay ito lalo pa’t sinisikap ng pamahalaan na mapababa ang bilang ng mga nadaragdag na kaso ng COVID 19.
Kaya ang hiling ni Sec. Roque sa publiko ay huwag na lang munang lumabas bilang pakikiisa na din sa nakagawiang paggunita ng Holy week na siya naman aniya talagang paraan ng pag- oobserba ng nabanggit na okasyon.
“So without forcing anyone to stay indoors, we are requesting everyone na ang traditionally naman talaga, noong mga unang panahon, talagang walang lumabas kapag panahon ng kuwaresma. So sana ngayon na lang po ang gawin natin ng mapababa natin ang numero,” aniya pa rin.
Samantala, inaasahan naman ng Malakanyang na 25 percent ang matatapyas sa daily recorded COVID cases ngayong ipinatutupad ang mas mahigpit na hakbang sa mga nagsisipag- labasan at makakatulong aniya ang ilang araw na kuwaresma KUNG i-oobserba lang ang nakaugaliang pag- aalaala dito.
“Well, ang tingin po namin it is a realistic goal for the next two weeks. Remember two weeks lang po ito and we hope we can sustain the gains afterwards. Pero this is a minimum goal po. We are aiming for more at we are hoping na dahil Holy Week nga po at wala na pong lalabas ngayon ng Metro Manila eh lahat na lang po ay manatili sa ating mga tahanan,” anito. (Bishop Jesus “Jemba” M. Basco)
WALA pang ebidensya na ang “direct sunlight” ay nakamamatay ng virus ng coronavirus disease.
Ito ang sinabi ni Health Usec Maria Rosario Vergeire, sa umano’y muling paggamit ng mga surgical mask matapos itong ibilad sa araw upang mamatay umano ang virus.
“Wala pang ebidensya na nakakapagbigay sa atin kung ito ba ay naapektuhan ng weather, kung malamig o mainit ..kung direct sunlight o hindi”, ayon pa kay Vergeire.
“Ito pong praktis natin na nagbibilad sa araw ..direct sunlight kasi po ang ibang organismo talaga sa direct sunlight namamatay pero dito sa COVID-19 , itong SARS-CoV virus hanggang sa ngayon wala pa tayong ebidensya for that”, ayon pa kay Vergeire sa Dobol B.
Nilinaw din ng opisyal na ang mga medical grade o surgical mask ay mga disposable mask at kapag nabasa o nadumihan na ay kailangan nang palitan.
Kahit nga hindi pa natapos ang araw kung ito ay nadumihan na at nabasa, kailangan na pong palitan na natin dahil baka mas mahawa pa kayo kung ginagamit ng paulit-ulit”, dagdag pa nito.
Mas mainam na rin aniyang gumamit na lamang ng “cloth mask” dahil ito ay maaring labhan at muling magamit .
Paalala din ni Vergeire na mahalaga na may suot na facemask at faceshield at isinusuot ng maayos upang maproteksyunan laban sa virus . (GENE ADSUARA)
Limang hinihinalang drug personalities ang arestado sa magkahiwalay na buy bust operation ng mga operatiba ng Station Drug Enforcement Unit (SDEU) sa Valenzuela City.
Ayon kay SDEU investigator PSSg Ana Liza Antonio, dakong 10:30 ng gabi nang magsagawa ng buy-bust operation ang mga operatiba ng Station Drug Enforcement Unit (SDEU) sa pangunguna ni PLT Joel Madregalejo sa ilalim ng pangangasiwa ni P/Col. Fernando Ortega kontra kay Noel Rotairo Jr., 53, sa isang kubo sa Star Apple St. Brgy. Gen. T De Leon.
Nagawang makapagtransaksyon ni PCpl Randy Canton na nagpanggap na buyer kay Rotairo ng P300 halaga ng shabu at matapos tanggapin ng suspek ang marked money mula sa poseur-buyer ay agad siyang sinunggaban ng mga operatiba.
Nang kapkapan ni PSSg Gabby Migano, nakuha kay Rotairo ang nasa 2.5 gramo ng hinihinalang shabu na tinatayang nasa P17,000 ang halaga, buy bust money, P270 cash at asul na kipling pouch.
Inaresto din ng mga operatiba si Joshua Brazil, 21, at Domingo Mendoza Jr., 39, matapos maaktuhang sumisinghot ng shabu sa loob ng kubo at narekober sa kanila ni PCpl Ed Shalom Abiertas ang isang unsealed plastic sachet ng may bahid ng hinihinalang shabu, kandila at ilang drug paraphernalias.
Dakong 10 naman ng gabi nang masakote din ng mga operatiba ng kabilang team ng SDEU na sina PCpl Jhun Ahmard Arances at PCpl Maverick Jake Perez sa pangunguna ni PLT Madregalejo sa buy-bust operation sa kahabaan ng Jadevine St. Malinta si Bryan Peña alyas “Boss”, 46.
Ani SDEU investigator PCpl Christopher Quiao, nakumpiska kay Peña ang nasa 3 gramo ng hinihinalang shabu na may standard drug price P20,400, P300 buy bust money, P150 cash, smartphone, coin purse at mountain bike.
Samantala, ayon naman kay PSMS Fortunato Candido, dakong 7:30 kamakalawa ng gabi nang madamba din ng isa pang team ng SDEU na sina PCpl Kenneth Marcos at PCpl Mario Martin si Danilo Ranada, 41, (watch listed) sa buy bust operation sa pangunguna ni PLT Madregalejo sa kanyang bahay 65 De Galicia St. Brgy. Maysan.
Nasamsam sa kanya ang nasa 7 gramo ng hinihinalang shahu na tinatayang nasa P47,600.00 ang halaga, P500 buy bust money, P1,500 cash,cellphone at pouch. (Richard Mesa)
POLITIKA ang nangingibabaw na motibo para sa panawagang buwagin ang Inter-Agency Task Force (IATF).
Hindi kasi makita ng Malakanyang na isang constructive criticism ang panawagang buwagin ang IATF.
Kumbinsido si Presidential Spokesperson Harry Roque na pamumulitika ito lalo pa’t ang mga nananawagan at patuloy na pumupuna sa Task Force ay may kani- kanya umanong agenda.
“Wala pong mabubuwag because kapag binuwag mo ang IATF, it is as if you are, bubuwagin mo iyong buong gobyerno kasi wala naman pong ibang buhay ang IATF kung hindi iyong gobyerno mismo,” ayon kay Sec. Roque.
“Now, kung mayroon naman silang constructive criticism, ano ba iyong mga constructive criticism nila? We don’t think the abolition of IATF is constructive kasi ang IATF ay pinagsama-sama lang pong talino at galing ng buong gobyerno. At pagdating naman po sa burukrasya natin, eh hindi naman po mga pulitiko iyang nasa DOH, nasa NEDA, nasa DOF – lahat po iyan ay mga civil service passers, the best talents that we have. So hindi po iyan constructive criticism. But if they have constructive criticisms, we welcome them. Kaya lang sa kaso naman ni Vice President, every time she has constructive criticism, iyong kaniyang criticism ay nai-implement na ng IATF bago pa niya sabihin,” dagdag na pahayag nito.
Sinabi ni Sec. Roque na isa na rito ay isang nag- aambisyong maging Health Secretary na hindi aniya titigil sabihing palpak ang IATF hangga’t hindi siya maging Secretary of Health.
” Dagdagan ko lang ha, iyong isang pumupula sa IATF, eh di ba gusto ngang mag-Secretary of Health so hindi iyon titigil na talagang palpak ang IATF hangga’t hindi siya maging Secretary of Health, that’s the nature,” ayon kay Sec. Roque.
Habang dalawa naman ay politiko na naturalmente na maghahanap ng butas lalot eleksiyon na sa susunod na taon.
“Oh, isa naman pulitiko, dalawang pulitiko, natural eleksiyon na! Lalo na iyong isang pulitiko, talunan iyong kaniyang partido so pagkakataon niya itong butasan ang gobyerno,” aniya pa rin.
Giit ni Sec. Roque na welcome naman sa kanila kung ang isang puna ay constructive dangan lang at hindi talaga ito naglalayong makatulong lalo na kapag galing kay VP Leni Robredo gayung ang kritisismo nitoy ipinatutupad na bago pa ito magpakawala ng puna sa pamahalaan.
“Pero iyon nga po, uulitin ko, hindi naman po isang taon na ganito karami ang kaso natin; itong buwan lang ng Marso tumaas iyan. Na-manage po natin iyan, napababa po natin iyan at nabuksan natin ang ekonomiya na comparative to the rest of the world, we have done very well po at hanggang ngayon po, dahil nga itong na-experience natin na spike ay hindi lang sa Pilipinas, nananatili po tayo na number 30 worldwide in terms of total cases,” lahad nito. (Daris Jose)
PINUPURI ng netizens ang pinost ni Jerald Napoles sa kanyaang Instagram account na dinaan ang kanyang saloobin sa pagtaas na naman Covid-19 cases sa bansa sa pamamagitan ng isang liham sa kanyang sarili.
Post ng aktor:
“Dear Jerald,
“Linggo, maganda sikat ng araw, palabas ka na pero naisip mo. Mataas ang covid cases, dumadami rin ang nahihirapan dahil sa pandemya, may pamilya kang inaalagaan at sinusuportahan. May matatanda at bata sa bahay. Mahal ang gastos pag may sakit. At higit sa lahat ayaw mo mahawa di ba. At ayaw mo rin maka sagap ng virus at dalhin sa tahanan.
“Alam ko matagal ka na naiinip, napapagod ka na mag tiis. Pero sa mga oras na to. Sarili mo na lang din ang aasahan mo sa krisis na to. Ikaw na lang rin ang tutulong sa sarili mo, isa pa, gagastos ka rin sa labas. Wala ka rin gagawin sa pupuntahan mo. Wala naman din sine. Kakain ka lang naman at mag window shopping.
“In-short. tatambay ka lang sa labas. Bahay ka na lang muna. Pag pahingahin mo na rin ang sarili mo sa facemask. Nakaka irita rin mag bitbit ng face-shield. Tignan mo mukha ng mga mahal mo. Ikaw kasi malakas ka, eh sila matitiis mo ba sila. Kakayanin mo bang mag hirap sila. Oh diba.
“Kaya hanggang parking ka lang. umakyat ka na sa taas. Hubarin mo lang sapatos mo tutal mukha naman nang pambahay ang #ootd mo. Iniisip lang kita. Iniisip ko lang ang sarili ko. Iniisip ko lang rin tayo. Isipin mo mga mahal mo.
“Nagmamahal, Jerald.”
Reaction ng ilang netizens:
“Nice post. Tama. Stay na lang sa bahay kung wala naman essential na lakad.”
“Tama ka Jerald! Good job! Yan din ang sasabihin ko sa sarili ko. Salamat sayo idol!”
“Eh bakit ako naiiyak sa post mo balong hehe laban lang at stay safe and inlove lagi kau ni gandang kim. always watching ur posts.”
“Sana lahat ganito mag isip. Yung iba basta’t may pang pcr at gastos, g lang eh. Kebs na lang sa iba. Basta sila nagsasaya.”
“Tama tapos naka save ka pa ng pera.”
“Tularan si Jerald! Paki-tag ang mga nagpaplanong magbakasyon this coming holy week.”
May nagkumpara naman kay Jerald kay Enchong Dee na mahilig daw mag-rant.
“This actor is more sensible than de forever whining enchong d.”
“Ha? Ano namang konek?”
“DDS lang galit kay Enchong at galit kayo kay Enchong dahil nagsasabi siya ng totoo. Wala kasi kayong ginawa. Oo kasama ka dahil suportado mo lider mong walang ginawa.”
“Hindi bagay mag rant ni Enchong lalo na nung napanuod ko siya na dancer ng noontime sunday show.”
***
BILANG pasasalamat sa mga loyal customer, may diskwentong ibibigay ang Globe Rewards na maaaring ipagpalit sa 10 Rewards points lang.
Maaaring gamitin ng mga Globe customer ang mga voucher na ito sa kanilang mga paboritong tindahan tulad ng The SM Store, Shopee, Zalora, 0917 Lifestyle, at online grocery shopping platform, PureGo simula sa araw na ito, Marso 24, 2021.
Gamit ang 10 Rewards points, maaaring makuha ng mga customer ang isang The SM Store GCash voucher na nagkakahalaga ng P100. Ang mga gustong mamili online ay maaaring mag-access ng mga voucher ng Shopee at Zalora. Ang mga customer ay maaaring makakuha ng isang P100 Shopee voucher para sa 80 na Rewards points, o makakapag-enjoy ng isang P500 Zalora voucher kapalit ng 50 Rewards points.
Maaari ring makakuha ang mga customer ng P50 na discount voucher para sa Globe 0917 Lifestyle shop gamit ang 25 Rewards points o kaya ay magkaroon ng 20 percent discount sa alinmang paninda nito na walang points na kailangan.
Ang mga indibidwal at pamilya ay pwede ring makatipid kapag namimili sa PureGo kapag tinubos nila ang P1000 na voucher gamit ang 100 na Rewards points.
Mayroon ding iba’t ibang mga shops at retail partners ang Globe Rewards na pwedeng-pwedeng pagpilian ng mga konsyumer kung saan nila pwedeng ipagpalit ang kanilang Rewards points.
“Pinahahalagahan namin ang aming mga tapat na customer na patuloy na sumusuporta sa aming mga produkto at serbisyo. Bukod sa madali nilang magagamit ang mga voucher na ito sa pamimili kahit nasa loob ng bahay, makatutulong din ito sa kanilang budget,” sabi ni Joey Kilayko, Head ng Globe Rewards.
Ang Globe Rewards ay nakapagpapasaya sa maraming mga customer sa tulong ng mga freebies at diskwento na nakukuha mula sa kanilang mga puntos.
Maaaring makaipon ang mga Globe prepaid subscribers ng Rewards points sa bawat paglo-load habang ang mga Postpaid subscribers naman ay binibigyan ng points kada buwan. Ang mga naipong points ay maaaring gamitin hanggang Marso 31 ngayong taon.
Para sa karagdagang kaalaman tungkol sa Globe Rewards at iba pang mga eksklusibong alok, i-download ang Globe Rewards, Globe One o Globe sa Home app mula sa App Store para sa iOS at Play Store para sa Android o bisitahin ang http://globe.com/GRewardsApp. (ROHN ROMULO)
IBINUNYAG ni Joseller ‘Yeng’ Guiao, na puntiryang magbalik sa laro sa North Luzon Expressway ni Larry Alexander Fonacier.
Sa pagkaandap sa Cooronavirus Disease 2019 sa nakalipas na taon, hindi lumaro ang 38-anyos, 6-2 ang taas na veteran guard-forward sa 45th Philippine Basketball Association Philippine Cup 2020 sa Clark Freeport bubble sa Angeles, Pampanga.
“Nagpapakundisyon. He’s hoping to be back in the second conference (PBA Governors’ Cup). One-year siyang bakante. So, parang gini-gauge niya yung sarili niya kung he can still make a contribution,” pahayag ni Road Warriors coach Guiao.
Hinirit niyang kundi naman makapasok sa lineup ng Road Warriors, maaaring bigyan na niya ng puwesto sa coaching staff si Fonacier. (REC)
Maaaring makasuhan ang mga opisyales ng Department of Transportation (DOTr) at Land Transportation Office (LTO) dahil sa alegasyon ng maanomalyang pagbili ng vehicle license plates.
Ayon kay Sen. Richard Gordon ng Senate Blue Ribbon committee na siyang head na sila ay patuloy na kumakalap ng mga sapat na ebidensiya upang magbigay sila ng rekomendasyon upang sila ay maghain ng plunder complaints.
Subalit sa mga nakaraang hearings na ginawa ng committee sa mga katiwaliang pangyayari sa dalawang ahensiya lumalabas na may sapat na ebidensiya upang makasuhan ng heinous crime ang mga nasabing opisyales.
“The act of making people suffer- whoever causes damage to third parties and other agencies that violates anti-graft law. Now, since a huge amount of money is involved, they may be liable for plunder. That’s what we’re looking at now,” wika ni Gordon.
Ang plunder ay isang non-bailable offense simula sa P50 million.
Dagdag pa ni Gordon na ang mga opisyales mula sa dating admistrasyon ng Aquino at ang mga kasalukuyan opisyales ng DOTr at LTO na nakagawa ng ibat-ibang paglabag sa batas simula noong 2013 nang ang DOTr ay nagsimulang gumawa ng bidding para sa pagbili ng license plates ng walang appropriation ay maaring makasuhan ng plunder.
Ang dating transportation secretary na si Joseph Emilio Abaya at undersecretary ng legal affairs na si Jose Perpetuo Lotilla ang silang lumagda sa multi-year contract para sa joint venture PPI-JKG ng hindi muna kumuha ng Multi-Year Obligational Authority mula sa Department of Budget and Management (DBM).
Tinawag ng Commission on Audit ang transaksyon na “irregular at illegal” at hindi rin pinapayagan ang advanced payment na ginawa sa PPI-JKG na nagkakahalaga ng P478 million.
Dahil dito ang Supreme Court ay nag issue ng isang restraining order na siyang nagpahinto sa pagagawa ng mga plates ng mga motor vehicles at motorcycles noong 2016.
“PPI-JKG then could not deliver their vehicle plates because another supplier Trojan to whom LTO consistently awarded the contracts for the supply of license plates since 2018 had monopolized LTO’s Order Management System and the digital signature, which is important feature of the new plates,’ dagdag ni Gordon.
Hanggang sa lalo nang maantala ang paggagawa ng mga license plates na tumagal na ng tatlong taon hanggang sa pumasok na ang bagong administrasyon. Patuloy pa rin na humihingi ang mga motorista ng kanilang mga plates. Kung kaya’t sinisi ni Gordon ang DOTr at LTO. (LASACMAR)