2021 March Archive - People's Balita

July 4, 2024
Search in People's Balita
Ang Diyaryong Pinagkakatiwalaan

Archive for March, 2021

MGA GYM, SPAS, INTERNET CAFES SARADO SA NAVOTAS

Posted on: March 26th, 2021 by @peoplesbalita No Comments

Nilagdaan ni Mayor Toby Tiangco ang Executive Order 054 Series of 2021 na nag-aatas sa pansamantalang pagpapasara ng mga gyms, spas, at internet cafes sa lungsod habang umiiral ang mahigpit na general community quarantine sa Metro Manila mula March 24 hanggang April 4, 2021, maliban kung ito’y pahabain.

Alinsunod ito sa Metropolitan Manila Development Authority Resolution No. 21-05 at sa Department of Trade and Industry Memorandum Circular No. 21-11.

Layon ng EO na higit mabawasan ang pagkalat at paghahatid ng COVID-19 sa komunidad.

“Ang Navotas City Hospital at ang aming community isolation ay umabot sa full capacity dahil sa patuloy na pagtaas ng COVID-19 infections sa ating lungsod. Kailangan nating gawin ang lahat ng pag-iingat at mga hakbang sa kaligtasan upang mabawasan ang posibilidad ng pagkalat ng virus,” ani Tiangco.

Ang kagamitan sa mga gym at fitness center, pati na rin ang surfaces at lugar, ay naibabahagi sa mga parokyano nito, kaya nadaragdagan ang panganib na mahawaan ng virus. Ganun din sa mga internet cafe, kung saan ang bilang ng mga tao ay gumagamit ng isang yunit ng computer na nagpapataas ng posibilidad hawaan .

Sa kabilang banda, ang social distancing sa mga spa at massage parlor ay halos imposible at mahirap para sa mga manggagawa at kliyente na masunod ang minimum safety protocols.

“Patuloy nating isuot nang maayos ang ating face mask, magsanay ng social distancing, palaging maghugas ng mga kamay, at manatili sa bahay hangga’t makakaya natin. Ang mga safety protocols ang ating pangunahing proteksyon mula sa virus, lalo na ang bago at transmissible variants,” paalala ni Tiangco.

Nauna rito, kinumpirma ng DOH na may 10 kaso ng B.1.1.7 (UK) at isang B.1.351 (South African) variants ang naitala sa Navotas. (Richard Mesa)

Peak ng COVID-19 case noong 2020 nahigitan na

Posted on: March 26th, 2021 by @peoplesbalita No Comments

Nalagpasan na ngayong Marso ang peak ng mga kaso ng COVID-19 na naitala noong Hulyo 2020 kung saan nailagay na sa “high risk” ang Metro Manila at “moderate risk” naman ang lima pang rehiyon sa bansa.

Ayon sa Department of Health, tumaas ang mga kaso sa NCR ng 137% mula Marso 7-20 lamang, kumpara sa mga naitala mula Pebrero 21 hanggang Marso 6.

Pitong rehiyon naman sa bansa ang nagtaas na ng kanilang healthcare capacity na pinangungunahan ng NCR na may 21% increase sa kapasidad.

Pilipinas hindi pa nakakabili ng bakuna laban sa COVID-19 – PRRD

Posted on: March 26th, 2021 by @peoplesbalita No Comments

Nilinaw ni Pangulong Rodrigo Duterte na hindi pa nakakabili ang bansa ng bakuna laban sa COVID-19.

Ito ang naging kasaguntan ng pangulo sa mga tanong ng ilang opisyal na kung saan napunta ang inutang ng gobyerno pambili ng nasabing bakuna.

Sa kaniyang public address nitong Miyerkules ng gabi, sinabi ng pangulo na ang mga bakuna na dumating noong nakaraang mga linggo ay donasyon mula sa China at COVAX facility na pinangangasiwaan ng World Health Organization (WHO).

Iginigiit pa rin ng pangulo na ang mga perang inutang ng gobyerno ay nasa banko pa rin at hindi pa rin ito ipinapasakamay kanino man.

Magugunitang aabot sa halos 1 milyon na Sinovac mula sa China ang natanggap ng bansa at mayroong 525,000 doses ng AstraZeneca mula sa Covax facility. (Daris Jose)

Batangas, Pampanga may pagsipa sa COVID-19 cases kahit nasa labas ng ‘bubble’: OCTA

Posted on: March 26th, 2021 by @peoplesbalita No Comments

Nababahala ang independent group na OCTA Research sa tumataas ding kaso ng coronavirus (COVID-19) sa mga lugar na nasa labas ng tinaguriang NCR (National Capital Region) Plus bubble.

Kabilang na rito ang mga lalawigan ng Pampanga at Batangas.

Batay sa pinakabagong report ng OCTA, tumaas ng 141% o 150 ang bilang ng mga bagong kaso ng COVID-19 sa Batangas mula March 17 hanggang 23. Kumpara sa average na 62 new cases noong unang dalawang linggo ng buwan.

Habang 86% o 121 na bagong kaso ng sakit ang isinipa ng numero sa Pampanga, mula sa average na 65 new cases na naitala sa nagdaang linggo.

Ayon kay Prof. Guido David, mas mataas ang increase na kanilang na-obserbahan sa dalawang lalawigan kumpara sa bilang ng mga bagong kaso ng coronavirus sa mga lugar na sakop ng NCR Plus bubble.

“That is very significant, that’s a very big increase. That increase is even bigger in some of the increase seen in the bubble provinces,” ani David sa interview ng CNN Philippines.

Dapat umanong bantayan ng pamahalaan ang Batangas at Pampanga, at pag-aralan ang posibilidad na palawigin ang bubble o paghihigpit sa dalawang probinsya kung patuloy na tataas ang kanilang COVID-19 cases.

Samantala, sinabi rin ng OCTA na bumaba ng kaunti ang reproduction number (R-Naught) o bilang ng mga nahahawaan ng confirmed case sa NCR.

Sa ngayon daw kasi nasa 1.91 na ang R-Naught ng Metro Manila, mula sa 1.99 kahapon, araw ng Miyerkules.

“It is too early to tell if this is the beginning of a hoped-for downward trend in the reproduction number, given that the NCR was placed under the GCQ bubble.”

Ayon kay Prof. David, maaari lang masabi na nasa downtrend na COVID sa Metro Manila kung bababa pa sa 1.5 ang R-Naught ng rehiyon.

Una nang sinabi ng Department of Health na bumilis pa ang pagtaas ng kaso ng COVID sa bansa. Bukod sa NCR, nagtatala rin daw ng matataas na bilang ng bagong kaso ng sakit ang Calabarzon at Central Visayas.

Ayon kay Dr. Alethea De Guzman, OIC-Director ng Epidemiology Bureau, higit 200% ang itinaas ng bilang ng bagong COVID cases sa NCR.

“Nung simula ng taon nationally we were report 1,274. In the past we’re now report 5,644. Ayaw nating tumuloy tuloy yung pagtaas ng kaso, dito papasok yung ambag ng bawat individual, establishment at LGUs to implement minimum public health standards and other safety protocols.”

Sa datos ng OCTA, as of March 25, nangunguna pa rin sa may pinakamataas na bilang ng bagong kaso ng COVID sa NCR ang Brgy. Fort Bonifacio sa Taguig, Brgy. 76 at 183 sa Pasay, Brgy. Pio del Pilar sa Makati, at Brgy. Commonwealth sa Quezon City. (Daris Jose)

DION, pinost ang prenup photos at ready nang magpakasal sa non-showbiz girlfriend

Posted on: March 26th, 2021 by @peoplesbalita No Comments

READY nang magpakasal ang Kapuso hunk na si Dion Ignacio sa kanyang non-showbiz girlfriend na si Aileen Sosa.

Pinost nga ni Dion sa Instagram ang prenup photos nila ni Aileen na kinunan sa Tanay, Rizal.

Taong 2018 nang aminin ni Dion sa media na may anak na siya mula sa kanyang ka-live-in na girlfriend. Dylann Jailee ang name ng daughter nila.

Kasama sa pinangako ni Dion kay Aileen ay yung magpapakasal sila at pag-iipunan daw niya iyon para maibigay niya kay Aileen ang dream wedding nito.

Nabanggit noon ni Dion na malaki ang pinagbago niya simula noong maging isang tatay na siya. Tinigil na raw niya ang makipagbarkada at ang magpaumaga sa inuman. Mas gusto na raw niyang nasa bahay siya kasama ang kanyang mag-ina.

Tinapon din daw ni Dion ang kanyang cellphone kunsaan nandoon ang contact numbers ng mga naka-date niyang mga babae. Tapos na raw kasi ang buhay-binata niya at ready na siya sa buhay na may pamilya.

***

DAHIL naka-three seasons ang TV5-Cignal TV teleserye na Paano Ang Pangako?, nakabawi na raw si John “Sweet” Lapus financially.

Pati ang estado ng kanyang mental health ay naging maayos na dahil sa magkakasunod na trabaho.

“Heto at nakakabawi na tayo. Yung unang suweldo ko sa teleserye na ‘Paano Ang Pasko?’ nagbayad na ako sa iba na may utang ako.

“Sana matuloy agad ang next show ko, this time as director naman, para hindi matengga ng matagal.

“Napakalaking tulong ng Paano Ang Pasko? (now retitled Paano Ang Pangako?) sa aking mental health. Nababaliw lang naman ako kapag walang ginagawa.

“Kaya l’m so grateful sa IdeaFirst for this job. They saved me emotionally, mentally at financially. Miss ko na ang buong PAP family. Napakasaya ng set namin.”

Ang isa pang pinagpapasalamat ni Sweet ay ang pag-alaga sa kanilang kalusugan ng production team ng IdeaFirst.

“Napakabait nila and they assured our safety during our lock-in taping. May RTPCR test swab bago kami pumunta sa hotel namin sa San Pablo, Laguna. May safety officer at medics sa set.

“May exit swab ang lahat bago umuwi sa pamilya after each cycle. Nakakabilib talaga ang pag-asikaso nila sa aming lahat sa set.

“Balita ko kasi may mga production/network na KKB (kanya-kanyang bayad) ang mga tao na gusto magpa/exit swab. Kawawa naman ang iba na walang pang bayad, ‘di ba?”

Looking forward si Sweet sa pagkakataong muli siyang uupo bilang direktor. Huli niyang directorial job ay ang Kapamilya teleserye na Kadenang Ginto.

“Yes at nagpe-pre-prod na kami ng isang miniseries na romcom for me to direct. Hindi pa puwedeng magbigay ng detalye. But may awa ang Diyos sa last week of April kami mag-start ng lock-in taping.”

***

PUMANAW na ang Hollywood actor and musician na si George Segal sa edad na 87 sa Santa Rosa, California.

“The family is devastated to announce that this morning George Segal passed away due to complications from bypass surgery,” ayon sa official statement ng pamilya ng aktor.

Nakilala si George sa mga films na The Owl and the Pussycat, Ship of Fools, King Rat, The St. Valentine’s Day Massacre, Where’s Poppa?, The Hot Rock, Blume in Love, A Touch of Class, California Split, For the Boys, Flirting with Disaster, The Mirror Has Two Faces, Look Who’s Talking? and Who’s Afraid of Virginia Woolf? kunsaan nakatanggap siya ng best supporting actor nomination sa Academy Awards.

Lumabas din si George sa hit sitcoms na Just Shoot Me, Pushing Daisies, Entourage, Caroline in the City and The Goldbergs.

Isa ring accomplished banjo player si Segal at nakagawa ito ng tatlong albums: The Yama Yama Man, A Touch of Ragtime and Basin Street. (RUEL J. MENDOZA)

2 alamat sa ‘Apprentice’

Posted on: March 26th, 2021 by @peoplesbalita No Comments

TATASAHAN nina dating Mixed Martial Arts champion Georges St-Pierre ng Canada at jiu-jitsu legend US-based Brazilian Renzo Gracie ang 16 na kandidato sa Episode 2 ng The Apprentice: ONE Championship Edition.

Bantog din sa tawag na ‘GSP’ ang 39 na taong-gulang at may taas na 5-10 na si St-Pierredahil sa pagiging isa mga astig sa MMA sa lahat ng panahon.

Isang alamat na rin sa MMA si Gracie, 54 na taon na, at 5-10 ang taas, lalo na pagdating sa jiu-jitsu ng Brazil na gaya counterpart bisita sa reality show.

May dalawang pambato ang ‘Pinas sa The Apprentice: ONE Championship Edition” na may 13 episodes. Sila ay sina Lara Pearl Alvarez at Louie Sangalang.

Pinapalabas din ito sa bansa tuwing Huwebes ng alas-8:50 nang gabi sa AXN cable network, at kapag Lunes ng alas-9:00 nang gabi sa One Sport. (REC)

Misunderstanding ng Simbahan, plantsado na

Posted on: March 26th, 2021 by @peoplesbalita No Comments

PLANTSADO na ang maliit na misunderstanding ng Malakanyang at Simbahan na nag-ugat sa pastoral letter na inisyu ng pamunuan ng Simbahang Katolika ukol sa pagpapahintulot nitong makapagsimba ang kanilang miyembro ng hanggang 10% capacity.

Ayon kay Presidential spokesperson Harry Roque, pumagitna na kasi si DOJ Secretary Menardo Guevarra kaya’t nagkaliwanagan ang magkabilang panig.

Tiniyak ng Kalihim na wala ng problema.

Sinabi ni Sec. Roque na si Guevarra bilang nakatalagang makipag-ugnayan sa mga religious groups ay nagsabi na ang stand ng Simbahang Katolika ay ang sumunod sa IATF Resolution na wala munang mass gathering kasama na ang alinmang religuous activity.

“Wala pong problema diyan kasi ang Simbahang Katolika nagsasalita po sa pamamagitan ng CBCP. Narinig ko po, tinanong po sa akin ng isang media, hindi ko naman nakita kung ano iyong pastoral letter na iyon na mayroong isang Bishop lang na nagsasabi na susuwayin at magti-ten percent daw sila,” anito.

Kung tutuusin aniya ay wala naman talagang dapat na maging problema gayung nakasulat naman aniya sa Biblia na kailangan ding magpasakop o sumunod sa mga napili ng Panginoon na mamuno na ang tinutukoy ay ang gobyerno.

Aniya, kung papahintulutan daw kasi kahit 10 percent lang ang laman ng simbahan ay lalabas din sa kabilang banda na ang pagkukumpol – kumpulan ay mangyayari sa labas kaya sumat- total ay parang bale wala rin.

“Pero kahapon, nakakuha po ako ng text galing kay Secretary Meynard Guevarra dahil siya po ang assigned na makipag-coordinate sa ating mga religious groups, eh sabi niya wala raw pong problema at nilinaw na, na ang stand ng Simbahang Katolika ay susunod sila sa IATF Resolution.

So, wala pong problema kasi talaga namang maski sa Bibliya nakasulat iyan ‘no na kinakailangan sumunod doon sa mga napili ng Panginoon na mamuno,” lahad ni Sec. Roque. (Daris Jose)

Paras at Nabong kinuha ng Blackwater

Posted on: March 26th, 2021 by @peoplesbalita No Comments

Nakuha ng Blackwater sina Andre Paras at Kelly Nabong bilang bagong player sa pagsisimula ng bagong season ng PBA.

Ayon kay Blackwater team owner Dioceldo Sy na pumirma ng dalawang taon na kontrata si Paras sa halagang P3-milyon sa koponan.

Nakita ni Sy ang talento ni Paras sa basketball at umaasa naman silang madadala niya sa kampeonato ang nasabing koponan.

Matapos naman na pakawalan ng NorthPort ang 32-anyos na si Kelly Nabong ay pumayag ito ng six-month contract sa Blackwater.

Magsisimula ang nasabing pagpirma ng 9-years veteran na sa buwan ng Abril.

Kasama ng dalawa na bubuo sa koponan ay ang second round picks na si Joshua Torralba at Rey Mark Acuno.

Mayroong 2-year deal na nagkakahalaga ng P120,000 kada buwan sa unang taon at P150,000 naman sa ikatlong taon habang si Acuno ay mayroong 1 taon na kontrata na pinirmahan na mayroong P100,000 sahod kada buwan.

PUNONG BARANGAY, PUWEDENG MAGDEKLARA NG LOCKDOWN

Posted on: March 26th, 2021 by @peoplesbalita No Comments

BINIGYAN ni Manila Mayor Isko Moreno ang kapangyarihan ng mga Punong Barangay sa lungsod na magdeklara ng “lockdown” sa kani-kanilang nasasakupang lugar sakaling tumaas ang bilang ng aktibong kaso ng COVID-19.

Sa ilalim ng Executive Order No. 12 na nilagdaan ni Domagoso, maaaring magdeklara ng lockdown sa kanilang lugar ang isang Punong Barangay kung ang aktibong kaso ng COVID-19 ay umabot na sa 10 at higit pa.

“Within three (3) hours from its issuance, the Order placing the barangay, or portion thereof, under Critical Zone Containment shall be forwarded to the City Mayor for his confirmation,” saad sa kautusan.

“The Punong Barangay shall give a two-day prior notice to his constituents and businesses/other stakeholders operating in the barangay,” dagdag pa ng EO.

Magsasagawa ng beripikasyon ang mga tauhan ng Manila Health Department (MHD) ang pagkakaroon ng mga aktibong kaso ng COVID-19 bago pa magsimula ang lockdown ng barangay.

Ayon sa Alkalde, ang lahat ng residente sa mga barangay na isasailalim sa lockdown ay mahigpit na pinagbabawalang lumabas ng kanilang bahay.

Gayunman, maaari lamang makalabas sa kanilang tahanan ang mga health workers, military personnel, service workers (pharmacies, drug stores, at funeral homes), utility workers (energy, cable, internet, telecommunication companies, water, sanitation, at critical transport facilities including port operation), essential workers (goods delivery, food delivery, banking at money services), barangay officials, at media practitioners na accredited ng Presidential Communications Operations Office and the Inter-Agency Task Force.

“Station Commanders of Police Stations covering the said barangays are hereby directed to employ and deploy officers and personnel in strategic locations and areas necessary for the effective implementation of the ECQ,” saad pa sa EO.

Matatandaan na nasa 29 barangay sa lungsod, isang kalsada, at isang cluster lockdown ang isinailalim sa apat na araw na lockdown ngayong linggo.

Sa pinakahuling datos ng MHD nitong Miyerkules, nasa 3,667 aktibong kaso na ng COVID-19 ang kanilang naitala na may kabuuang bilang naman na 31,383 ang nakarekober o gumaling sa nasabing sakit at may kabuuang 866 ang nasawi. (GENE ADSUARA)

Ads March 26, 2021

Posted on: March 26th, 2021 by @peoplesbalita No Comments